Thursday, October 6, 2022
ሌሎች ዓምዶች
    - Advertisement -
    - Advertisement -
    ዜናመንግሥት የስምንት ቢሊዮን ብር ተጨማሪ በጀት ጥያቄ አቀረበ

    መንግሥት የስምንት ቢሊዮን ብር ተጨማሪ በጀት ጥያቄ አቀረበ

    ቀን:

    ለ2007 ዓ.ም. ከፀደቀው 178.6 ቢሊዮን ብር በተጨማሪ ስምንት ቢሊዮን ብር እንዲፀድቅለት የጠቅላይ ሚኒስትር ጽሕፈት ቤት ፓርላማውን ጠየቀ፡፡ በጠቅላይ ሚኒስቴር ጽሕፈት ቤት ፊርማና ማኅተም የተላከውን የተጨማሪ በጀት ጥያቄ ያቀረቡት፣ በሚኒስቴር ዴኤታ ማዕረግ በፓርላማ የመንግሥት ተጠሪ ወ/ሮ ሙፈርያት ካሚል ናቸው፡፡ ወ/ሮ ሙፈርያት እንዳሉት፣ መንግሥት ከሐምሌ 1 ቀን 2006 ዓ.ም. ጀምሮ ለመንግሥት ሠራተኞች ያደረገው የደመወዝ ጭማሪ ለተጨማሪ በጀቱ መቅረብ ምክንያት ነው፡፡ በሰኔ ወር 2006 ዓ.ም. የፀደቀው የአገሪቱ በጀት ላይ የተቀመጠው መጠባበቂያ በጀት የደመወዝ ጭማሪው አጠቃላይ ወጪን ሊሸፍን አለመቻሉን ወ/ሮ ሙፈሪያት አስረድተዋል፡፡ በመሆኑም በቀሪዎቹ የበጀት ወራት የሚሰበሰበውን ገቢ ከግምት በማስገባት የስምንት ቢሊዮን ብር ጭማሪ ማስፈለጉን ጠቅሰዋል፡፡ ለተጨማሪ በጀቱ የገቢ ምንጮች የሆኑት ታክስ ነክ ያልሆኑ ገቢዎች መሆናቸውን የቀረበው የተጨማሪ በጀት ረቂቅ ያስረዳል፡፡ በዚሁ መሠረት ስድስት ቢሊዮን ብር ከነዳጅ ማረጋጊያ ፈንድ እንደሚገኝ፣ ከመንግሥት የልማት ድርጅቶች ሽያጭ 485 ሚሊዮን ብር፣ ከብሔራዊ ባንክ የዘቀጠ ትርፍ 900 ሚሊዮን ብር የገቢ ምንጮች ሆነው ቀርበዋል፡፡ ጥያቄው የቀረበለት ፓርላማ አንዳንድ አባላት የደመወዝ ጭማሪው ሲደረግ ተገቢ የሆነ ጥናት ባለመደረጉ፣ ጭማሪው ማስፈለጉን ረቂቁ የሚመራለት ቋሚ ኮሚቴ እንዲያጣራ ጠይቀዋል፡፡ ጭማሪው በበጀት ጉድለቱ ላይ የሚኖረውን ተፅዕኖ፣ እንዲሁም በዋጋ ግሽበት ላይ የሚያስከትለውን ግፊት ቋሚ ኮሚቴው እንዲመለከት ጠይቀዋል፡፡ አንድ የፓርላማ አባል በበኩላቸው፣ አጠቃላይ በጀት ሲፀድቅ የተያዘው መጠባበቂያ በጀት ከስምንት ቢሊዮን ብር በላይ መሆኑን እንደሚያስታውሱና ይህ የማይበቃ መሆኑን ቋሚ ኮሚቴው እንዲያጣራ ጠይቀዋል፡፡ የተነሱትን ጥያቄዎች በማካተት ረቂቁን በዝርዝር ተመልክቶ የውሳኔ ሐሳብ እንዲያቀርብ ለበጀትና ፋይናንስ ጉዳዮች ቋሚ ኮሚቴ ተመርቷል፡፡ በሰኔ ወር 2006 ዓ.ም. የፀደቀው አጠቃላይ የአገሪቱ በጀት 178.6 ቢሊዮን ብር መሆኑ ይታወሳል፡፡ ከዚህ ውስጥ የካፒታል በጀት 66.9 ቢሊዮን ብር ሲሆን፣ መደበኛ በጀት ደግሞ 45.1 ቢሊዮን ብር ነው፡፡ የፌዴራል መንግሥት ለክልሎች የሚሰጠው ድጐማ ደግሞ 51.5 ቢሊዮን ብር፣ እንዲሁም ለምዕተ ዓመቱ ግብ መሳካት 15 ቢሊዮን ብር ተይዞ ነበር፡፡ ከአጠቃላይ በጀት ውስጥ 8.33 ቢሊዮን ብር በመጠባበቂያነት የተያዘ ሲሆን፣ ከዚህ ውስጥ ለደመወዝና ጥቅማ ለጥቅሞች 6.47 ቢሊዮን ብር ተይዞ ነበር፡፡

    - Advertisement -

    ይመዝገቡ

    spot_img
    spot_img