Friday, September 22, 2023
- ማስታወቂያ -
- ማስታወቂያ -

በኃይድሮ ኤሌክትሪክ ኃይል ግብይት ሳዑዲ ዓረቢያና ኢትዮጵያ ሊደራደሩ ነው

ተዛማጅ ፅሁፎች

ከመካከለኛው ምሥራቅ አገሮች የግዙፍ ኢኮኖሚ ባለቤት የሆነችው ሳዑዲ ዓረቢያና ኢትዮጵያ በኃይድሮ ኤሌክትሪክ ኃይል ግብይት ሊደራደሩ ነው፡፡ የውኃ፣ መስኖና ኢነርጂ ሚኒስትሩ አቶ ዓለማየሁ ተገኑ ለሪፖርተር እንደገለጹት፣ የጊዜ ሰሌዳውን መግለጽ ባይቻልም በቀጣይ ወደ ድርድር ይገባል፡፡

ኢትዮጵያ ከጂቡቲና ከየመን ጋር የኤሌክትሪክ ኃይል ለመገበያየት ስምምነት በተፈራረመችበት ወቅት፣ የኤሌክትሪክ ኃይል ዝርጋታው ወደ ሳዑዲ ዓረቢያ ሊቀጥል እንዲችል ታሳቢ ተደርጎ የተቀረፀ መሆኑን የውኃ፣ መስኖና ኢነርጂ ሚኒስትሩ አማካሪ አቶ ምሕረት ደበበ በቅርቡ ሒልተን ሆቴል በተካሄደ የዘርፍ ስብሰባ ላይ ገልጸዋል፡፡

ከዚህ በኋላ ሁለቱ አገሮች በተለያዩ ጊዜያት ባካሄዷቸው የጋራ ምክክር መድረኮች ላይ ፕሮግራሙ አዎንታዊ መሆኑ በመረጋገጡ፣ ሳዑዲ ዓረቢያ ከኢትዮጵያ ኃይድሮ የኤሌክትሪክ ኃይል ለመግዛት ፍላጎት ማሳየቷን ምንጮች አመልክተዋል፡፡ ስማቸው እንዳይገለጽ የፈለጉ የውኃ፣ መስኖና ኢነርጂ ሚኒስቴር ከፍተኛ ባለሥልጣን ለሪፖርተር እንደገለጹት፣ ፕሮግራሙ አዋጭ መሆኑ ጥያቄ ባይኖረውም በሁለቱ አገሮች የጋራ መግባባት የመነሻ ጥናት እንዲካሄድ ተወስኗል፡፡

አቶ ዓለማየሁ ጨምረው እንደገለጹት ሳዑዲ ዓረቢያ ጥያቄ አቅራቢ፣ ኢትዮጵያ ደግሞ ጥያቄ ተቀባይ ሆና ሳይሆን በሁለቱ አገሮች የጋራ ትብብር ተግባራዊ እንዲደረግ መግባባት ላይ የተደረሰበት ፕሮጀክት ነው፡፡ ከኢትዮጵያ ወደ ጂቡቲ በየብስ፣ ከጅቡቲ እስከ የመን በባህር ውስጥ ከተዘረጋ በኋላ፣ ከየመን ወደ ሳዑዲ ዓረቢያ በየብስ እንደሚዘረጋ የሚጠበቀው ይህ የኃይል መስመር፣ ስትራቴጂካዊ ጠቀሜታው የጎላ ነው ተብሏል፡፡

ባለሥልጣኑ እንዳሉት ይህ የኃይል መስመር የኤሌክትሪክ ኃይል ማቅረብ ብቻ ሳይሆን፣ ከሳዑዲ ዓረቢያ ኃይል መቀበል የሚያስችልም መሆኑን ጠቁመዋል፡፡ ኢትዮጵያ ከሌሎች አገሮች ጋር እንዳደረገችው ሁሉ ከሳዑዲ ዓረቢያ የኤሌክትሪክ ኃይል መቀበል ባስፈለጋት ወቅት፣ ልትቀበል የምትችልበት መስመር እንደሚሆን ባለሥልጣኑ ተናግረዋል፡፡

 ከኢትዮጵያ የኤሌክትሪክ ኃይል ለመግዛት ፍላጎት ያሳዩት ስምንት አገሮች ሲሆኑ እነሱም ኬንያ፣ የመን፣ ታንዛንያ፣ ኡጋንዳ፣ ቡሩንዲ፣ ጂቡቲ፣ ሩዋንዳና ሱዳን ናቸው፡፡ ከእነዚህ አገሮች ውስጥ ጂቡቲና ሱዳን ኤሌክትሪክ ማግኘት የጀመሩ ሲሆን፣ የኬንያ የተወሰኑ የድንበር ከተሞችም ተጠቃሚ መሆን ጀምረዋል፡፡ ሳዑዲ ዓረቢያ ከኢትዮጵያ ኤሌክትሪክ ኃይል ለመግዛት ዘጠነኛዋ አገር ሆና ብቅ ያለች ሲሆን፣ ሳዑዲና ኢትዮጵያ ፕሮጀክቱን በደስታ እንደተቀበሉት መረጃዎች አመልክተዋል፡፡

ሳዑዲ ዓረቢያ በሰዓት 292.2 ቢሊዮን ኪሎ ዋት የኤሌክትሪክ ኃይል የምታመነጭ ሲሆን፣ ይህንን ኃይል የምታገኘውም ከነዳጅና ከጋዝ ነው፡፡ ሳዑዲ ዓረቢያ በየጊዜው እየጨመረ የመጣውን የአገሪቱን የኤሌክትሪክ ኃይል ፍላጎት ለማሟላት እ.ኤ.አ. በ2032.120 ጊጋ ዋት ኃይል ለማመንጨት አቅዳለች፡፡ በዚህም ዕቅድ መሠረት ከፀሐይ ኃይል 41 ጊጋ ዋት፣ ከኑክሌር 18 ጊጋ ዋትና ከሌሎች ታዳሽ ኃይሎች አራት ጊጋ ዋት ለማምረት አቅዳለች፡፡

ከነዳጅ የሚገኘው ኃይል እጅግ ውድና አካባቢን የሚበክል በመሆኑ፣ ሳዑዲ ዓረቢያ ከአካባቢ ብክለት የፀዳውን የኢትዮጵያ ኃይድሮ ኤሌክትሪክ ኃይል ማግኘቷ ጥሩ አማራጭ ይሆንላታል ተብሏል፡፡

የሳዑዲ ዓረቢያ ግዙፍ ባንኮችና ባለሀብቶች በሁለቱ አገሮች በሚካሄዱ በተለያዩ የምክክር መድረኮች ይህንን ፕሮጀክት ፋይናንስ ለማድረግ ፍላጎት እያሳዩ መሆናቸውን ባለሥልጣኑ ጨምረው ተናግረዋል፡፡ ነገር ግን ድርድሩ ገና በጅምር ላይ ያለ በመሆኑ፣ ፕሮጀክቱን ፋይናንስ ለማድረግ ፍላጎት ያሳዩትን ባንኮችና ባለሀብቶች ከመግለጽ ተቆጥበዋል፡፡

የምሥራቅ አፍሪካ የኢነርጂ ቋት ለመሆን ፍላጎት የነበራት ኢትዮጵያ፣ ወደ መካከለኛው ምሥራቅ አገሮች ተሻግራለች፡፡ ኢትዮጵያ ግዙፍ የኃይድሮ ኤሌክትሪክ ግድብ ግንባታዎችን በማካሄድ ላይ እንደምትገኝ ይታወቃል፡፡ ታላቁ የህዳሴ ግድብ ግንባታ ከ40 በመቶ በላይ ሲደርስ፣ ግልገል ጊቤ ሦስት ኃይል ማመንጫ ግንባታ ደግሞ ከ90 በመቶ በላይ በመጠናቀቁ ከወራት በኋላ ኤሌክትሪክ ማመንጨት እንደሚጀምር ታውቋል፡፡ ዘንድሮ በሚጠናቀቀው የአምስት ዓመቱ የዕድገትና ትራንስፎርሜሽን ዕቅድ ኢትዮጵያ አሥር ሺሕ ሜጋ ዋት ኤሌክትሪክ ታመነጫለች ተብሎ ታቅዷል፡፡

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች