Saturday, November 26, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    የሞባይል ኔትወርክና የከተሞች አቤቱታ

    የአዲስ አበባ የሞባይል ኔትወርክ ችግር አንፃራዊ መሻሻሎች እየታዩበት ነው ማለት ይቻላል፡፡ ቀድሞ ከነበረው አዋኪ ችግር ቀስ በቀስ እየወጣ መሆኑን እያየን ነው፡፡ አልፎ አልፎ ከሚገጥመው መቆራረጥ በቀር ለውጦች ታይተዋል፡፡ ይህ ማለት ግን ችግሩ ሙሉ ለሙሉ ተወግዷል ማለት አይደለም፡፡ አንዳንዴ የሚገጥመው መቆራረጥ ደንበኞችን ማማረሩ ባይቀርም ለውጥ ስለመኖሩ መመስከሩ ግን ተገቢ ነው፡፡ በአዲስ አበባ እየታየ ነው የተባለው አንፃራዊ መሻሻል ግን ከአዲስ አበባ ውጭ ያሉ ከተሞን የዳሰሰ አይደለም፡፡ ከአዲስ አበባ ውጭ በአብዛኛዎቹ የክልል ከተሞች የኔትወርክ ኔትዎርክ ችግር ዛሬም ሊፈታ ሳይችል ዘልቋል፡፡

    በአዲስ አበባ እየታየ ያለው አንፃራዊ መሻሻል የክልል ከተሞችን ያላከተተበት ምክንያት ግልጽ አይደለም፡፡ ሌላው ቀርቶ ከአዲስ አበባ በቅርብ ርቀት ላይ የሚገኙ ከተሞች የሞባይል ኔትወርክ ችግር አገልግሎቱ ከተጀመረበት ጊዜ ጀምሮ አብሯቸው የቆየ ነው፡፡ ዱከም፣ ደብረዘይትና አዳማ ጥሩ ምሳሌ ሊሆኑ ይችላሉ፡፡ በእነዚህ ከተሞች በሞባይል ለመገልገል ያለው ፈተና ቀላል አይደለም፡፡ ለሥራ ወደእነዚህ ከተሞች የተጓዘ የሞባይል ተጠቃሚ ያለውን ችግር በሚገባ ይገነዘበዋል፡፡ የከተሞቹ ነዋሪዎችም  የሞባይል ኔትወርክ ችግር የቆየ መሆኑን ይገልጻሉ፡፡ በተለይ እነዚህ ሦስት ከተሞች ከሌሎች ከተሞች በተለየ አነስተኛና መካከለኛ ኢንዱስትሪዎች ያሉባቸው ከመሆናቸው አንፃር ነዋሪዎቻቸው ብቻ ሳይሆኑ ባለአዲንሱትሪዎችም የኔትወርክ መቆራረጥና የኢንተርኔት አገልግሎት ዘገምተኛ መሆን በሥራቸው ላይ ከፍተኛ እንቅፋት እንደሆነባቸው በተደጋጋሚ ሲገልጹ ነበር፡፡

    በእነዚህ ከተሞች የኢቨስትመንት መስኮች ላይ የተሰማሩ ባለሀብቶች ከመንግሥት ጋር በተለያዩ መድረኮች በተካሔዱ ውይይቶች ላይ ይፈቱልን ብለው ከሚያቀርቧቸው ጥያቄዎች ውስጥ የኔትወርክና የኢንተርኔት አገልግሎት ጥራት ችግር  ሳይነሳ የቀረበት ጊዜ የለም፡፡ ከዚሁ አቤቱታ ጎን ለጎንም በየመድረኩ ‹‹እንዲስተካከል ጥረት እናደርጋለን›› የሚለው የመንግሥት ኃላፊዎች ምላሽ የተለመደ ከሆነ ዓመታት ተቆጥረዋል፡፡ ለውጥ ግን የለም፡፡ ጥያቄው ዛሬም እየቀረበ ነው፡፡

    ኢንቨስተሮቹ የሞባይልና የኢንተርኔት አገልግሎት ቀዳሚ ጉዳያቸው ስለመሆኑ የሚገልጹት የንግድ ልውውጦች በአገር ውስጥና በውጭ ለማካሄድ ወሳኝ መረጃ መቀባበያ በመሆኑ ነው፡፡ ከደንበኞቻቸው ትዕዛዝ ለመቀበልና ለመስጠት በእነዚህ የመገናኛ ዘዴዎች መስተጓጎል ምክንያት ብዙ ነገር ማጣታቸውን ሲናገሩም ተሰምቷል፡፡ ጉዳቱ በእነሱ ላይ ብቻ የተወሰነ ሳይሆን አገሪቱ ልታገኝ የሚገባት የውጭ ምንዛሪ ላይም ተፅዕኖ እያሳረፈ ነው፡፡

    በሐዋሳ ከተማም ተመሳሳይ ችግር ታዝቤያለሁ፡፡ እንደ ዱከም፣ ደብረዘይትና አዳማ ከተሞችን ያህል አይሁን እንጂ በሐዋሳ ከተማም ከኔትወርክ ችግር ጋር በተያያዘ ደንበኞች ቴሌን ሲማፀኑ ይሰማል፡፡ ችግሩ በከተሞች አካባቢ ብቻ ሳይሆን ወጣ ባሉ የወረዳ ከተሞች ላይም ስለመኖሩ በግልጽ መናገር ይቻላል፡፡ በቅርቡ ከሐዋሳ 100 ኪሎ ሜትር ርቀት በሚገኙ ከተሞች ላይ የተመለከትኩትም ችግሩን በሚገባ ያሳያል፡፡ ከእነዚህ ከተሞች ውስጥ በሲዳማ ዞን ውስጥ እንደ አለታወንዶና ዳዬ ያሉ ከተሞችን መጥቀስ ይቻላል፡፡ በእነዚህ ከተሞች የሞባይል ኔትወርክ የሚኖርበት ጊዜ አይታወቅም፡፡ ደንበኞች በሞባይላቸው ለመነጋገር የሚያደርጉት ሙከራ አሰልቺ ነው፡፡ እኔም በአንድ ሁለት ቀን ቆይታዬ እንደነሱ ‹‹የኔትወርክ ያለህ›› በማለት በሞባይሌ ለመጠቀም ያደረኩት ጥረት ብዙ አድክሞኛል፡፡

    በአጠቃላይ በዚህ አካባቢ በሞባይል መገልገል ይከብዳል፡፡ አካባቢው ከፍተኛ የቡና ምርት የሚመረትበት በመሆኑ፣ አርሶ አደሩ የየዕለቱን ገበያ ለማወቅ በሞባይል ስልኩ መረጃ ለማግኘት የሚያደርገው ጥረት ላይ የኔትወርክ መቆራረጥ የሚፈጥርበት ችግር ቀላል አለመሆኑን መገንዘብ ይቻላል፡፡ ባለፈው ሳምንት ወደ አካባቢው የተጓዙት ጠቅላይ ሚኒስትር ኃይለ ማርያም ደሳለኝ፣ በዳዬ ከተማ ከአካባቢው ነዋሪዎች ጋር ሲነጋገሩ መንግሥት ሊያደርግልን ይገባል ብለው ነዋሪዎች ከጠየቋቸው ውስጥ አንዱ የኔትወርክ ችግርን የሚያመለክት ነው፡፡ በአገር ሽማግሌዎች የቀረበው ችግር ‹‹ለሥራችን እንቅፋት ሆኗል፤›› በማለት ጠቅላይ ሚኒስትሩ ችግሩን እንዲመለከቱላቸው አቤት ካሉ የጉዳዩን አሳሳቢነት ያመለክታል፡፡

    የቴሌ የሞባይል ደንበኞች ቁጥር እየጨመረ ባለበት በዚህ ወቅት ለኔትወርክ ችግር መላ ያለመፈለጉ አሁንም ያነጋግራል፡፡ ሞባይል መሠረታዊ መገልገያ ከመሆኑ አንፃር የአገልግሎቱ ጥራት ጥያቄ ውስጥ መግባት የለበትም፡፡ ከቅርብ ጊዜ ወዲህ በአዲስ አበባ የታየው ጥረት በሌሎች ከተሞችም መታየት አለበት፡፡ አገልግሎቱ በተገቢው መንገድ ሳይሰጥ ደንበኞችን ማብዛቱ ብቻ ስኬት እንደማይሆን ቴሌ ሊገነዘበው ይገባል፡፡ የኢንቨስትመንት እንቅስቃሴዎች በሚታዩባቸው ከተሞችና የውጭ ምንዛሪ የሚያስገኙ ምርቶች በሚመረቱባቸው ሥፍራዎች የሚታየው ችግር መቀረፍ አለበት፡፡ ይኖርበታል፡፡ ቴሌ የሞባይል ኔትወርክ ጥራት መጓደል እያስከፈለ ያለውን ዋጋ መገንዘብ ያሻዋል፡፡

      

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት