Wednesday, October 5, 2022
ሌሎች ዓምዶች
    - ማስታወቂያ -
    - ማስታወቂያ -

    በአሜሪካው የንግድ ዓውደ ርዕይ የኢትዮጵያ ተሳትፎ ደካማ ሆኗል

    - ማስታወቂያ -

    ተዛማጅ ፅሁፎች

    ቡና፣ ቆዳና ሌጦ፣ ቅባት እህሎች ጥራጥሬና ሌሎችም የግብርና ውጤቶችና ጥሬ ዕቃዎች ኢትዮጵያ በስፋት ኤክስፖርት ከምታደርጋቸው ምርቶች መካከል ናቸው፡፡ ከቅርብ ጊዜያት ወዲህ ግን ሒደታቸውን የጨረሱ ወይም እሴት የተጨመረባቸው ምርቶችን ኤክስፖርት ማድረግ ተጀምሯል፡፡ ይሁን እንጂ ጉልበታቸው ከፈረጠመ የአውሮፓና የሩቅ ምሥራቅ አገሮች ጋር መወዳደሩ አስቸጋሪ መሆኑ ግልጽ ነው፡፡

    ስለዚህም ኢትዮጵያን ጨምሮ የአፍሪካ አገሮች በውድድሩ ከገበያ ውጪ እንዳይሆኑ የሚረዳቸው ዕድል ከምዕራቡ ዓለም ሲሰጥ ሰነባብቷል፡፡ የአፍሪካ አገሮች ተጠቃሚ እንዲሆኑበት ታልሞ በተለይ በአሜሪካ የተሰጠው ከታሪፍና ከቀረጥ ነፃ የገበያ ዕድል አፍሪካ ግሮውዝ ኦፖርቹኒቲ አክት (አጐዋ) የሚጠቀስ ነው፡፡

    በዕድሉ እንዲጠቀሙ አምራቾች ከሚደገፉባቸው መንገዶች አንዱ ‹‹ሶርሲንግ አት ማጂክ›› የተባለው የንግድ ዓውደ ርዕይ ነው፡፡ ሶርሲንግ አት ማጂክ በዓመት ሁለት ጊዜ በላስቬጋስ ከተማ የሚደረግ የንግድ ትርዒት ነው፡፡ እንዲሁም የፋሽን ትዕይንት የሚቀርብበት መድረክ ሲሆን፣ በዓለም የታወቁ ገበያዎችና ፋብሪካዎች የሚገናኙበትም ነው፡፡ ከ40 በላይ አገሮች የሚያመርቷቸው የጫማና የቆዳ አልባሳት ናሙናዎችን በማቅረብ ደንበኛ የሚያፈላልጉበት ቦታ ሆኖ ያገለግላል፡፡

    በዚህ ተጠቅመው ብዙዎቹ አገሮች የፋብሪካዎቻቸውን ምርት ናሙና ይዘው ይቀርባሉ፡፡ ውጤታማም ይሆናሉ፡፡ ኬንያን ጨምሮ በርካታ የአፍሪካ አገሮች ተጠቃሚ መሆናቸው ይነገራል፡፡ ከዓመት ዓመትም ጥሩ መሻሻሎችን እያሳዩ እንደመጡ ተነግሮላቸዋል፡፡ ኢትዮጵያ አጋጣሚውን ለመጠቀም ካልቻሉ አገሮች ተርታ ትመደባለች፡፡ በያመቱ የምታሳትፋቸው ባለፋብሪካዎች ቁጥር እየቀነሰ የመጣ ሲሆን፣ አልፎ አልፎም የማትሳተፍባቸው አጋጣሚዎች እየታዩ መሆኑ ተሰምቷል፡፡ በዝግጀቱ የሚሳፉ አካላት እንደሚሉት ከሆነ ችግሩን የፈጠረው የግንዛቤና የአቅም ማነስ ነው፡፡

    አቶ ሳሚ መሐመድ የቆዳና የጨርቃጨርቅ አምራችና ኤክስፖርተር ናቸው፡፡ በማጂክ ሾው የተሳተፉት እ.ኤ.አ. በ2007 ነበር፡፡ ነገር ግን በገጠሟቸው አስቸጋሪ ሁኔታዎች ደግመው አልተሳተፉም፡፡ ‹‹በጣም ትልቅ የንግድ ትርዒት ነው፡፡ ከኢትዮጵያ የተሳተፍነው ስምንት ፋብሪካዎች ነበርን፡፡ እኛ ስንሳተፍ የመጀመርያችን ነበር፡፡ በወቅቱ ምርቶች ወደ ውጭ መላክ የጀመርንበት ጊዜ ነበር፤›› በማለት የተሳተፉበትን አጋጣሚ ያስታውሳሉ፡፡

    እንደ እሳቸው ገለፃ በማጂክሾው የመጀመርያ ተሳትፎ ደንበኛ ማግኘት ከባድ ነው፡፡ ብዙዎቹ ኩባንያዎች የሚመጡት ለመተዋወቅና ማን ምን ይዞ እንደቀረበ ለማየት ነው፡፡ በያመቱ የመሳተፍ አቅም ቢኖር ግን ከመተዋወቅ አልፎ ደንበኝነት ይጀመራል ይላሉ፡፡ በትርዒቱ መሳተፍ አቅም እንደሚጠይቅ የሚናገሩት አቶ ሳሚ፣ ፉክክሩ ከባድ መሆኑንም ይገልጻሉ፡፡ እሳቸው እንደሚሉት፣ ከሌሎች አገሮች የሚሳተፉ ፋብሪካዎች ትልቅ አቅም ያላቸውና በአንድ ጊዜ እስከ 100 ሺሕ ቶን ማምረት የሚችሉ ናቸው፡፡ ምርቶችን ለማየት የመጡ ደንበኞችም ሰፊ የምርት መጠን የሚፈልጉ ናቸው፡፡ ‹‹በእኛ አቅም ይህን ያህል ማምረት አንችልም፡፡ ይህ በመሆኑም መሳተፉ ትርጉም አልነበረውምና በዚያው ቀረሁኝ፤›› ብለዋል፡፡

    አቶ ሳሚ በአሁኑ ወቅት የማምረት አቅማቸው ከበፊቱ ከፍ ማለቱን ይናገራሉ፡፡ ይሁን እንጂ አሁንም ደንበኞቻቸው በሚፈልጉት መጠን የማምረት አቅም ላይ ገና አልደረሱም፡፡ ይሁን እንጂ ምርታቸውን በስፋት ማቅረብ የማይችሉ ፋብሪካዎች በልዩ ሁኔታ የሚታገዙበት ዕድል መኖሩን በማረጋገጥ ዳግመኛ ለመሳተፍ በዝግጅት ላይ ይገኛሉ፡፡

    አቶ አዲስ ዓለማየሁ በኢትዮጵያ የማጂክ ሾው ንግድ ዓውደ ርዕይ አስተባባሪ ናቸው፡፡ በንግድ ትርዒቱ የጨርቃጨርቅና የጫማ ምርት በስፋት ይቀርባል ይላሉ፡፡ ቦታው ገዥና ሻጭ የሚገናኙበትም መሆኑንና በርካቶች ጥሩ የገበያ ዕድሎችን የሚፈጥሩበት እንደሆነም ያስረዳሉ፡፡ ኢትዮጵያ በማጂክ ሾው መሳተፍ ከጀመረች ከአሥር ዓመት በላይ ሆኗታል፡፡ የተጀመረ ጊዜ ብዙ ድርጅቶች ከኢትዮጵያ ይሳተፉ ነበር ቀስ በቀስ ግን ተሳትፏቸውን እየቀነሱ መምጣታቸውን ገልጸዋል፡፡ በ2005 … ፋብሪካዎች ተሳትፈው  እንደነበር የሚገልጹት አቶ አዲስ፣ በወቅቱ ፕሮጀክቱን የአሜሪካ ዓለምአቀፍ የልማት ትብብር ኤጀንሲ(ዩኤስኤአይዲ) ይደግፈው ስለነበር ጥሩ ተሳትፎ ይደረግበት እንደነበር ያስታውሳሉ፡፡ ድጋፉ እ.ኤ.አ. በ2011 በመቋረጡ ምክንያት ተሳትፎውም አብሮ እንደቆመ ገልጸዋል፡፡ ባለፈው ዓመት እንደገና የተጀመረ ቢሆንም ሁለት ፋብሪካዎች ብቻ መሳተፋቸውን ጠቅሰዋል፡፡

    ለዚህ መንስዔው የግንዛቤ እጥረት እንደሆነ ይገምታሉ፡፡ ለመጨረሻ ጊዜ በተሳተፉበት ትርዒት 1960 ድርጅቶች ከቻይና ሲሳተፉ፣ ከአገር ውስጥ ስድስት ፋብሪካዎች ብቻ እንደታደሙ ይናገራሉ፡፡ ችግሩ ከአቅም፣ ከአስተዳዳርና ከግንዛቤ ጉድለት እንደሆነም ይገልጻሉ፡፡ አያይዘውም ‹‹ኢትዮጵያውያኖች ራሳችንን በማስተዋወቁ ረገድ ኋላቀር ነን፡፡ ነገር ግን 100 ሚሊዮን ብር ወጥቶ ፋብሪካ ከተሠራ እዚህ አለሁ ማለት አለብን፡፡ እዚህ አቃቂ ድረስ መጥተው አይተዋወቁንም፡፡ ዓለም በሙሉ ነው ግዙኝ የሚለው፤›› በማለት ወቅቱ ኢትዮጵያ የምትጠቀምበት ጊዜ እንደሆነ ይገልጻሉ፡፡ ሔደው መገናኘትና ራሳቸውን ማስተዋወቅ እንዳለባቸውም ይመክራሉ፡፡ ባለፈው ዝግጅት ላይ ሁለት ድርጅቶች ብቻ መሳተፋቸውን ገልጸው በአሁኑ ወቅት ቁጥራቸውን ከፍ ለማድረግ የሚረዳ የግማሽ ቀን ዓውደጥናት በሒልተን ሆቴል ባለድርሻ አካላት በተገኙበት ተካሒዷል፡፡

    በአውደጥናቱ ላይ ከተገኙ እንግዶች መካከል አቶ አብዲሳ አዱኛ አንዱ ናቸው፡፡ አቶ አብዲሳ የኢትዮጵያ ቆዳ ኢንዱስትሪዎች ማኅበር ዋና ፀሐፊ ሲሆኑ፣ ካለፉት ሦስት ዓመታት ጀምሮ በማኅበሩ አማካይነት ኢትዮጵያ የምትሳተፍበትን ቦታ ወይም ፓቪሊዮን ሲያዘጋጁ መቆየታቸውን ገልጸዋል፡፡

    ማጂክ ሾህ በዓለም ላይ ትልቁ የንግድ ዓውደ ርዕይ እንደሆነ የገለጹት አቶ አብዲሳ፣ በሆንግ ኮንግ፣ በሻግጋይ፣ በሚላንና፣ በቦሎኛና በሎችም ትላልቅ ዓውደ ርዕዮች ላይ የማኅበሩ አባላት እንደሚሳተፉ አስታውሰዋል፡፡

    ‹‹ማጂክ ሾው ከሌሎቹ ልዩ የሚያደርገው ነገር የእኛን ጫማ ለመሸጥ ትልቅ የገበያ ሥፍራ መሆኑ ነው፤›› ብለዋል፡፡ ባለፉት ሦስት ዓመታት የኢትዮጵያን ጫማ በዓለም ገበያ እንዲታወቅ የረዳው የማጂክ ሾው የንግድ ትርዒት መሆኑንም ያምናሉ፡፡ ተሳትፏችን ወሳኝና በጣም አስፈላጊ ነው ሲሉ በቀጣይ ለሚዘጋጀው የንግድ ትርዒት ከሰባት እስከ አሥር የሚደርሱ የጫማ ፋብሪካዎችን ይዘው ለመሔድ ዝግጅት መጀመራቸውን ገልጸዋል፡፡

    እስካሁን ያለውን የኢትዮጵያ ተሳትፎ ከሌሎች አገሮች ጋር ሲነፃፀር እጅግ ዝቅተኛ እንደሆነ አቶ አብዲሳ ጠቅሰው፣ ለዚህም መንስዔው የአቅም ችግር  ነው ይላሉ፡፡ ይሁንና ምርቶቻቸው ደርድረው ከሚያሳዩበት ቦታ አንሥቶ ሌሎችም ተያያዥ ወጪዎች ዋጋቸው ከአቅም በላይ በመሆኑ፣ በዓውደ ርዕዩ ላይ መሳተፍ ከሚያስገኘው ጥቅም አንፃር እዚህ ግባ የሚባል ወጪ አይደለም በማለት ተሳትፎው እንደሚያበረታቱ ተናግረዋል፡፡

    ከ15 ዓመታት በፊት ይፋ የተደረገውና በአሁኑ ወቅት ማክተሚያው ጊዜ የተቃረበው አጎዋ፣ ለኢትዮጵያ በዓመት ያስገኘው የገበያ ዕድል 30 ሚሊዮን ዶላር ገደማ መሆኑን መረጃዎች ይጠቁማሉ፡፡ ከ30 በላይ የአፍሪካ አገሮች የሚሳተፉበት አጎዋ በጠቅላላው የሚጠበቀውን ያህል ውጤት ባያስገኝላቸውም እንዲራዘም ግን በመወትወት ላይ ይገኛሉ፡፡ የአሜሪካ መንግሥትም ዕድሉን ለማራዘም እንደሚፈልግ ፍንጭ ከመስጠት ውጭ በትክክል ስለመራዘሙና ለምን ያህል ጊዜ ሊራዘም እንደሚችል ከመግለጽ ተቆጥቧል፡፡ የመራዘሙ ጥያቄ በአሜሪካ ኮንግረስ አባላት ዘንድ መነጋገሪያ ርዕሠ ጉዳይ ሲሆን፣ የአፍሪካ አምባሳደሮችም ለኮንግረሱ ጥያቄያቸውን ሲያቀርቡ መቆየታቸው አይዘነጋም፡፡

    - Advertisement -spot_img

    የ ጋዜጠኛው ሌሎች ፅሁፎች