Sunday, December 4, 2022
ሌሎች ዓምዶች
    - ማስታወቂያ -
    - ማስታወቂያ -

    አዋሽ ባንክ ባካሄደው ጨረታ ለአንድ አክሲዮን እስከ 14 ሺሕ ብር መጫረቻ ዋጋ ቀረበ

    - ማስታወቂያ -

    ተዛማጅ ፅሁፎች

    የውጭ ዜግነት ባላቸው ትውልደ ኢትዮጵያውያን ተይዘዋል የተባሉ የባንክና ኢንሹራንስ አክሲዮኖች እንዲሸጡ በተሰጠው ውሳኔ መሠረት፣ አዋሽ ባንክ ለመጀመሪያ ጊዜ ባካሄደው ጨረታ አንድ ሺሕ ብር ዋጋ ላለው አንድ አክሲዮን እስከ 14 ሺሕ ብር ድረስ የመጫረቻ ዋጋ ቀረበ፡፡

    አዋሽ ባንክ በአራት ምድብ ከፋፍሎ ለማካሄድ ካቀዳቸው ጨረታዎች የመጀመሪያው ምድብ ሐሙስ የካቲት 9 ቀን 2009 ዓ.ም. ሲከፈት፣ ለሽያጭ ካቀረባቸው 20.2 ሚሊዮን ብር ዋጋ ያላቸው አክሲዮኖች ውስጥ የተወሰኑትን ለመግዛት ተጫራቾች ለአንድ አክሲዮን ከአምስት ሺሕ እስከ 14 ሺሕ ብር አቅርበዋል፡፡ ተጫራቾች አንዱን አክሲዮን ከ1,000.24 ብር ጀምሮ ለመግዛት የተጫረቱ ሲሆን፣ አነስተኛ መጠን ያላቸውን አክሲዮኖች ለመግዛት ከፍተኛ ዋጋ እንደቀረበ ለማወቅ ተችሏል፡፡

    በዕለቱ 481 ተጫራቾች ሲቀርቡ አብዛኛዎቹ ተጫራቾች ለአክሲዮን ግዥው ያቀረቡት ዋጋ ከሁለት እስከ ሦስት ሺሕ ብር እንደሆነ ከባንኩ የተገኘው መረጃ ያስረዳል፡፡ እንደ ባንኩ መረጃ ባለፈው ሐሙስ ለጨረታ ከቀረቡት አክሲዮኖች ውስጥ ከ95 በመቶ በላይ ለሚሆኑት ተጫራቾች ቀርበውላቸው ነበር፡፡ ባንኩ በውጭ ዜጎች የተያዙ ናቸው ያላቸው አክሲዮኖች ጠቅላላ ዋጋ 82 ሚሊዮን ብር እንደሚገመት ለማወቅ ተችሏል፡፡

    አዋሽ ባንክ በመጀመሪያው ምድብ ለሽያጭ ያቀረባቸውን የትውልደ ኢትዮጵያውያንን አክሲዮኖች ለመግዛት የቀረበው ዋጋ፣ በባንክ ዘርፍ ውስጥ ለአንድ አክሲዮን ግዥ የተሰጠ ከፍተኛ ሆኖ ተመዝግቧል፡፡

    ሪፖርተር ያነጋገራቸው የባንክ ባለሙያዎች እንደሚገልጹት፣ እስካሁን ባንኮች ለሽያጭ አቅርበዋቸው ከነበሩ የአክሲዮን ሽያጮች በአንድ አክሲዮን (አንድ ሺሕ ብር ዋጋ ላለው አንድ አክሲዮን) የሚሰጡ ዋጋዎች፣ ከ25 እስከ 75 በመቶ ወይም ከ1,250 እስከ 1,750 ብር ይደርሳሉ፡፡

       እስካለፈው ሳምንት መጨረሻ ድረስ በባንኮችና በኢንሹራንስ ኩባንያዎች ውስጥ የውጭ ዜግነት ያላቸው መሆናቸው የተረጋገጠ ትውልደ ኢትዮጵያውያን ቁጥር ከ700 በላይ መድረሱን፣ እነዚህም ባለአክሲዮኖች ይዘዋቸዋል የተባሉ አክሲዮኖች ዋጋ ደግሞ ከ350 እስከ 400 ሚሊዮን ብር እንደሚገመት መዘገባችን አይዘነጋም፡፡

    በውጭ ዜጎች የተያዘው የአክሲዮኖች ዋጋ መጠን ባንኮችና ኢንሹራንስ ኩባንያዎች በአጠቃላይ ካላቸው ካፒታል አንፃር ሲታይ ከአንድ በመቶ ያነሰ መሆኑ ታውቋል፡፡

    በአሁኑ ወቅት ሁሉም የግል ባንኮችና የኢንሹራንስ ኩባንያዎች አስመዘገቡት የተባለው የካፒታል መጠን 46 ቢሊዮን ብር ነው፡፡ መንግሥት ኢትዮጵያዊ ባልሆኑ ትውልደ ኢትዮጵያውያን መያዛቸው የተረጋገጠ አክሲዮኖች እንዲሸጡ ሲወስን፣ ከአክሲኖች ሽያጭ የሚገኘው ትርፍ ለመንግሥት ገቢ ይደረጋል መባሉም ይታወሳል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች