Tuesday, November 29, 2022
ሌሎች ዓምዶች
    - Advertisement -
    - Advertisement -
    ማኅበራዊለመሞከር የማይሰንፉ እጆች

    ለመሞከር የማይሰንፉ እጆች

    ቀን:

    ዘመናዊ ዕቃዎችን ላለመጠቀም የቆረጡ ይመስላል፡፡ አዳራሹ በባህላዊ ጌጣጌጦችና ቁሳቁሶች ተጊጧል፡፡ እንግዶች ከሚቀመጡበት ቦታ ትይዩ የሚገኘው የሙሽሮችና የሚዜዎች መቀመጫ ወንበሮች በቆንጆ ቆንጆ ሠፌዶች ደምቀዋል፡፡ ጉንጉን አበቦች እንኳን በህብረ ቀለም ባሸበረቁ መሶበ ወርቅ ነው የተቀመጡት፡፡ ትንንሽ ማሰሮዎች ሳይቀሩ አዳራሹን ለማስጌጥ ጥቅም ላይ ውለዋል፡፡ መጋረጃዎችም እንደዚሁ በጌጠኛ ሥፌቶች ተንቆጥቁጠዋል፡፡

     ሁሉም ዝግጁ፣ ሁሉም ሙሉ፣ በሚባል ደረጃ አዳራሹ የተሰናዳ ቢሆንም የ28 ዓመቷ ወይዘሮ ምህረት ምትኩ ደስተኛ የሆነች አትመስልም፡፡ አዳራሹ መሃል ላይ ቆማ ምን ቀረ? በሚል አስተያየት አንዳች የጎደለ ነገር በዓይኗ ትፈልጋለች፡፡ ለሥራ የሚመቻትን አለባበስ ለብሳ ወዲያና ወዲህ እያለች ጥቃቅን የጎደሉ ነገሮችን ታስተካክላለች፡፡ ይህ በስንት ጊዜ የሚገጥማት የሥራ ኃላፊነት አይደለም፡፡ ገንዘብ ተከፍሏት የምትሠራው ሥራዋ መተዳደሪያዋ ነው እንጂ፡፡

    ተወልዳ ያደገችው እዚሁ አዲስ አበባ አፍንጮ በር አካባቢ ነው፡፡ ለቤተሰቦቿ ሦስተኛ ልጅ ነች፡፡ አንደኛና ሁለተኛ ደረጃ ትምህርቷን የተከታተለችው በአፄ ልብነድንግልና በእቴጌ መነን እንዲሁም በራስ አበበ ትምህርት ቤቶች ነው፡፡ በእንጦጦ አጠቃላይ የሥነ ጥበብ ትምህርት ቤትም የሥዕል ትምህርት እንደተማረች ትናገራለች፡፡ ‹‹ሥለ ተማርሽ ብቻ ሠዓሊ ትሆኛለሽ ማለት አይደለም፡፡ ሥራው ላይ ስትገኚ ነው ነኝ ማለት የምትችይው፤›› ስትል የሥዕል ትምህርት የተማረች ቢሆንም ልቧ አብዝቶ ይፈልግ ወደ ነበረው የዲኮር ሙያ መግባቷን ትናገራለች፡፡

    የተለያዩ የዲኮር ሥራዎችን ትሠራለች፣ ዲዛይነርም ነች፡፡ ‹‹ሁለቱም ሙያዎች ለኔ አንድ ናቸው፡፡ በሸራ ላይ የሚሣለውን ነው በአልባሳት አልያም በመድረኮች ላይ የምሠራው፤›› ስትል ሥዕልና የተሠማራችበት ሙያ ብዙ የተራራቁ አለመሆናቸውን ትናገራለች፡፡፡ የተለያዩ ፕሮግራሞችን (ኤቨንት ኦርጋናይዚንግ) ትሠራለች፡፡ እንደሷ ያሉ ፍላጎት ያላቸውን የዲኮር ትምህርት የሚማሩበት ትምህርት ቤትም ከከፈተች ቆይታለች፡፡ ከምንም ተነስታ ዛሬ ለደረሰችበት ደረጃ መብቃቷን ትናገራለች፡፡  በሥኬታማነቷም ሰሞኑን የኢትዮጵያ ኢንተርፕሩነርሺፕ ልማት ማዕከል የዓመቱ ምርጥ ሥራ ፈጣሪ በሚል ዕውቅና ሰጥቷታል፡፡

    ለዚህ ሥኬት ያበቃትን ሙያ እንዴት መሥራት እንደጀመረች ስትናገር ‹‹ነገሮችን ለመሞከር ስለማልፈራና ደፋር ስለሆንኩኝ ነው፤›› ስትል የሥኬቷን ሚስጥር ትገልፃለች፡፡ ልጅ ሳለች ጠበቃ የመሆን ፍላጎት ነበራት፡፡ ጓደኞቿና ሌሎች ሁኔታዋን የተመለከቱ ሞዴል፣ ዲዛይነር ትሆኛለሽ ይሏት ነበር፡፡ ይህንን ይሏት የነበረው እንዲሁ ከመሬት ተነስተው አይደለም፡፡ በየደብተሮቿ ላይ ትስላቸው የነበሩ ጫማዎችና አልባሳትን ተመልክተው፣ አለባበሷንም አጢነው እንጂ፡፡

    በምትለብሳቸው ልብሶች ላይ አዳዲስ ነገሮች ትጨምር እንደነበር እንዲህ ታስታውሳለች፡፡ ‹‹ጌጣጌጦች እራሴ እሠራ ነበር፡፡ የትምህርት ቤት ዩኒፎርሞቼንም በተለያዩ ዲዛይኖች አስተካክዬ እለብስ ነበር፡፡ ይኼ ብዙ ጊዜ ከመምህራኖቼ ጋር ያጋጨኝም ነበር፤›› ትላለች፡፡ ይህ ሳይታወቃት ውስጧ የቆየው ጥበብ እንጀራዬ ይሆናል ብላ አስባው አታውቅም ነበር፡፡ ነገር ግን አንድ አጋጣሚ  ጠበቃ የመሆን ሕልሟን ወደ ጎን ብላ ወደ ዲኮርና ዲዛይን ሙያ እንድትገባ አደረጋት፡፡

    ከዓመታት በፊት የሆነ ነገር ነው፡፡ ደቡብ አፍሪካ ይኖር የነበር አንድ ዘመዷ ለማግባት ወደዚህ ይመጣል፡፡ ሲመጣ ለሠርግ ዝግጅቱ ይሆናሉ ብሎ ያሰባቸውን  ልዩ ልዩ ጌጣጌጦችና ፊኛዎች ጭኖ ነበር የመጣው፡፡ ይኼንን የተመለከተችው ምህረት ዕቃዎቹ ምን መሆናቸውን ጠየቀችው፡፡ እሱም ለዲኮር እንዲሆኑ ያመጠቸው መሆኑን ነገራት፡፡

    ደፋርና ግትር የሆነችው ምህረትም የሠርጉን ዲኮር እሧ እንደምትሠራለት ቀጠን ያለ ትዕዛዝ አይሉት ጥያቄ አዘል መልዕክት አስተላለፈችለት፡፡ እሱም ባህሪዋን ጠንቅቆ ስለሚያውቅ ከማስቀይማት በሚል እሺታውን ገለጸላት፡፡ ‹‹ከትምህርት ቤታችን ፊት ለፊት አንድ ዲኮር ቤት ነበር፡፡ እዚያ ገብቼ ለዲኮር የሚሆኑ የሙሽራ ወንበሮችና አንዳንድ ጌጣጌጦችን በ800 ብር ተከራየሁኝ፡፡ ከዚያ በፊት እንዴት ዲኮር እንደሚሰራ አላውቅም ነበር፡፡ ዕቃዎቹን ስከራይ እንኳን ፎቶ ለማየት አልሞከርኩኝም፤›› የምትለው ምህረት በድፍረት የገባችበት ሥራ ከሰዎች ጥሩ ምላሽ ያገኘችበት ዛሬ ለደረሰችበት ደረጃ መሠረት እንደሆናት ትናገራለች፡፡

    ሠርጉ የተዘጋጀው በአፍንጮ በር ፓርክ ነበር፡፡ አጋጣሚው የሌሎችን የዲኮር ሥራ እንድታይና እንድትማርበት ረድቷታል፡፡ ‹‹በሰርጉ ላይ የተገኙት የሰፈራችን ሰዎች እኔ መስራቴን ሲያውቁ አበረታቱኝ ጎበዝ አሉኝ፡፡ እኔ ግን ከጎኔ የነበረችው ልጅ የሠራችውን ዲኮር እያየሁ ቀንቼ ነበር፤›› ስትል አጋጣሚው ከሌሎች በሙያው ከቆዩና ልምድ ካካበቱ ጋር ፉክከር እንድትገጥም ሙያውም፤ እንጀራዋ እንዲሆን እንዳደረጋት ታስታውሳለች፡፡

    ብዙም ሳትቆይ ከዓመት በኋላ ነበር የራሷን ዲኮር የሚሰራ ድርጅት የከፈተችው፡፡ ነገሮች አልከበዷትም፡፡ ‹‹ከሰዎች ቀብድ እየተቀበልኩ ነበር ዕቃዎች ያሟላሁት፡፡ በጣም በሚገርም ፍጥነት ነበር ለውጥ ማሳየት የቻልኩት፡፡ ይኼ የሆነው የተሻለ ነገር መሥራት ስለልቻልኩኝ ነበር፡፡ ተወዳዳሪዎቹ የሌላቸውን ነገር በማድረግ ገበያ ለመሳብ ጥረት አደርግ ነበር፤›› በማለት በወቅቱ ስትነሳ በደንበኞች ዘንድ የነበራትን ተቀባይነት ታስታውሳለች፡፡

    ሥራውን የጀመረች አካባቢ ለአንድ ፕሮግራም ታስከፍል የነበረው 800 ብር ብቻ ነበር፡፡ ከዚያም 1,200፣ 5,000 እያለ በአንድ ፕሮግራም የሚከፈላት ገንዘብ ከ15,000 እስከ 200,000 ብር መድረሱን ትናገራለች፡፡ ‹‹ሠርግም ሆነ ከሠርግ ወጪ ያሉ ትልልቅ ፕሮግራሞች ላይ እሰራለሁ፡፡ እኛ አገር ብዙ ያልተሠሩ ነገሮች አሉ፡፡ አዲስ ነገር ተሞክሮ ውጤታማ የመሆን ዕድልም ሰፊ ነው፤›› ስትል ከተሰራ በቀላሉ ውጤታማ መሆን እንደሚቻል ትገልፃለች፡፡

    በልጅነቷ የጀመረችውን ሙያ በትምህርት ላይ ተመስርቶ ለሌሎች እንዲዳረስ ለማድረግ በ2001 ዓ.ም. የዲኮር ትምህርት ቤት ከፍታለች፡፡ በልምድ የምታውቀውን ሙያ ወደ ትምህርት ለመቀየር ብዙ ተቸግራ ነበር፡፡ ነገር ግን አርት ሥኩል ገብታ ከተማረች በኋላ ነገሮች እንደቀለሏት ትናገራለች፡፡ ካሪኩለሙን የቀረፀችው የሥነ ጥበብ ትምህርቷን ካጠናቀቀች በኋላ ነበር፡፡

    ይሁንና ነገሮች አልጋ በአልጋ አልሆኑላትም፡፡ የዲኮር ትምህርት በተለይም ባህላዊ ቁሳቁሶችን ተጠቅሞ ዲኮር የመሥራት ባህሉ ዕምብዛም አለመለመድ ካሪኩለም ተቀርፆ በትምህርት የሚሠጥበት ሁኔታዎች አለመኖራቸው በዚህ ረገድም የመጀመርያ መሆኗ ነገሮች ቀላል እንዳይሆኑላት አድርጓል፡፡ የአዲስ አበባ ትምህርት ቢሮም ጥያቄዋን ያፀደቀው ጥያቄዋን ካቀረበች ከሁለት ዓመታት በኃላ መሆኑን ትናገራለች፡፡ የምታስተምርባቸውን መጻሕፍት ያዘጋጀችውም እሷው ነች፡፡ ተማሪዎቿም የብቃት ማረጋገጫ ፈተና ተፈትነውና ብቁ መሆናቸው ተረጋግጦ  ገበያውን እንዲቀላቀሉ የማድረግ ዕቅድ አላት፡፡ ይህንንም ለማድረግ እንቅሰቃሴ መጀመሯንና ተስፋ ሠጪ ፍንጮች ማየቷን በኩራት ትናገራለች፡፡

    እንጦጦ አካባቢ ኢኮሎጅ የሚል ስያሜ የሰጠችውን የራንሧን ሎጅ በማስገንባት ላይ ትገኛለች፡፡  ሎጁን ተፈጥሯዊ በሆኑ ነገሮች የማዋቀር ሐሳብ አላት፡፡ አንድ ጎብኚ ኢትዮጵያ መጥቶ ጎንደር፣ ላልይበላ የመሳሰሉትን ከጎበኘ በኋላ እንጦጦና ሌሎችም በከተማዋ የሚገኙ መስህብነት ያላቸውን ቦታዎች ለመጎብኘት ወደ አዲስ አበባ ይመጣል፡፡ እንጦጦ አካባቢ ግን ማረፊያ ሆቴል ባለመኖሩ ቤተ ክርስቲያኖቹን ከጎበኘ በኋላ ውኃ እንኳን ሣይጠጣ ገንዘቡን ይዞ ይመለሳል፡፡

    ለዚህም ነው ኢኮሎጂን በእንጦጦ አካባቢ ለመገንባት የወሰነችው፡፡ ግንባታው ገና ያልተጠናቀቀ ሲሆን ሙሉ ለሙሉ ባህላዊና ተፈጥሯዊ በሆኑ ዕቃዎች እንደሚዋቀር ትገልጻለች፡፡ ከዚህም ሌላ በተለያዩ የፋሽን ሾው መድረኮች ላይ በመሳተፍም ከሌሎች ሥራዎቿ ጎን ለጎን የምታዘጋጃቸውን አልባሳት ታሳያለች፡፡ 

    spot_img
    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    በችግር የተተበተበው የሲሚንቶ አቅርቦት

    ሲሚንቶን እንደ ግብዓት ተጠቅሞ ቤት ማደስ፣ መገንባት፣ የመቃብር ሐውልት...

    ‹‹የናይል ዓባይ መንፈስ›› በሜልቦርን

    አውስትራሊያ ስሟ ሲነሳ ቀድሞ የሚመጣው በተለይ በቀደመው ዘመን የባህር...

    ‹‹ልብሴን ለእህቴ››

    ለሰው ልጅ መኖር መሠረታዊ ፍላጎት ተብለው ከተዘረዘሩት ውስጥ ልብስ...

    የአዲስ አበባ ትምህርት ቤቶች የምርመራ ውጤት እስከምን?

    በፍቅር አበበ የትምህርት ጥራትን፣ ውጤታማነትንና ሥነ ምግባርን ማረጋገጥ ዓላማ አድርጎ...