Tuesday, October 4, 2022
ሌሎች ዓምዶች
    - Advertisement -
    - Advertisement -
    ማኅበራዊበመጪው ዓመት 254 ሜዋ ጋት ማመንጨት የሚጀምረው የገናሌ ዳዋ ኃይል ማመንጫ ግንባታ...

    በመጪው ዓመት 254 ሜዋ ጋት ማመንጨት የሚጀምረው የገናሌ ዳዋ ኃይል ማመንጫ ግንባታ 80 ከመቶ መጠናቀቁ ታወቀ

    ቀን:

    – የቻይናው ተቋራጭ አዲስ የዋሻ መቦርቦሪያ መሣሪያ አስተዋውቋል

    በነገሌ ቦረና፣ ጉጂ ዞን ውስጥ ላለፉት ስድስት ዓመታት ሲገነባ ቆየው የገናሌ ዳዋ ቁጥር ሦስት ኃይል ማመንጫ ፕሮጀክት 80 በመቶ ግንባታው በመጠናቀቁ፣ በመጪው ዓመት የ254 ሜጋ ዋት የኤሌክትሪክ ኃይል ማመንጨት እንደሚጀምር ታወቀ፡፡

    የኃይድሮ ኤሌክትሪክ ኃይል ማመንጫውን ለመገንባት 451 ሚሊዮን ዶላር ወጪ የጠየቀ ሲሆን፣ ግንባታውን እያከናወነ የሚገኘው የቻይናው ጌሹባ ግሩፕ (ሲጂጂሲ) የኃይል ማመንጫ ግድቡን ሥራ ለማጠናቀቅ የሚያስችለው የዋሻ መቦርቦሪያ ማሽን በ43.5 ሚሊዮን ዶላር ገዝቶ ወደ አገር ውስጥ በማስገባት ጥቅም ላይ ማዋሉን አስታውቋል፡፡

    ታነል ቦሪንግ ማሽን (ቲቢኤም) የሚባለው መቦርቦሪያ ከዚህ ቀደም ለዋሾ ቁፋሮ ይውል የነበረውን የፈንጂ አጠቃቀም ሥርዓት በመቀየር ከቻይና ኩባንያዎች ብቸኛው ሆኗል፡፡ ለኃይል ማመንጫነት የሚውለው ግድብ 110 ሜትር ከፍታ ሲኖረው፣ 12.4 ኪሎ ሜትር የሚረዝምና ስፋቱም 8.1 ሜትር የሚዘረጋ ዋሻ እንደሚኖረው ከተቋራጩ የተገኘው መረጃ አመላክቷል፡፡ ለዚህ ፕሮጀክት ግንባታ እንዲውል የተገዛው መቦርቦሪያ ማሽን 120 ሜትር ርዝመት ሲኖረው፣ 1,500 ቶን ክብደት ያለው ነው፡፡ በዋሻ ቁፋሮ ወቅት የሚያጋጥሙ አስቸጋሪ የቁፋሮ ሥራዎችን ለማቀላጠፍ የሚያስችል መሆኑም ታውቋል፡፡ ተቋራጩ በአሁኑ ወቅት የዋሻ ቁፋሮውን ማጠናቀቁንም ለመረዳት ተችሏል፡፡

    ስለገናሌ ዳዋ ኃይድሮ ኤሌክትሪክ ኃይል ማመንጫ ፕሮጀክት ዝርዝር መረጃ ከኢትዮጵያ ኤሌክትሪክ ኃይል ኃላፊዎች ለማግኘት ሪፖርተር ያደረገው ሙከራ ሳይሳካ ቀርቷል፡፡ በስክልም በአጭር የጽሑፍ መልዕክትም ጥሪ የተደረገላቸው የኢትዮጵያ ኤሌክትሪክ ኃይል የውጭ ሕዝብ ግንኙነት ዳይሬክተር አቶ ምስክር ነጋሽ ከከተማ ውጪ በመሆናቸው ሲመለሱ ምላሽ እንደሚሰጡ ገልጸዋል፡፡ ይህም ቢባል ግን ከተቋሙ ድረ ገጽ የተገኘው መረጃ የፕሮጀክቱ ክንዋኔ 80 በመቶ መገባደዱን ይገልጻል፡፡

    በቻይናው ተቋራጭ ከተገነባና ሥራ ከጀመረ ሰባት ዓመታት ቢያስቆጥርም፣ 300 ሜጋ ዋት ኃይል ማመንጨት አቅም ያለውና እስካሁን ግን የሚጠበቅበትን ያህል ማመንጨት ያልቻለውን የተከዜ ኃይል ማመንጫን መገንባቱ ይታወቃል፡፡

    በሌላ በኩል የኢትዮጵያ ኤሌክትሪክ ኃይል በመጪዎቹ አምስት ዓመታት ውስጥ ተገንብቶ ኃይል ማመንጨት እንዲችል ገናሌ ዳዋ ቁጥር ስድስት የተሰኘ ፕሮጀክት ለማስጀመር ዓለም አቀፍ ጨረታ ይፋ አድርጓል፡፡ ይህ ፕሮጀክትም ከ250 ሜጋ ዋት ያላነሰ ኃይል የማመንጨት አቅም እንደሚኖረው ያስታወቀው ኤሌክትሪክ ኃይል፣ ከገናሌ ዋዳ ቁጥር 3 አቅራቢያ የሚገነባ ነው ብሏል፡፡ ተቋራጭ ኩባንያዎች በተናጠልም ሆነ በጋራ ከራሳቸው የፋይናንስ ምንጭ በማቅረብ ይሳተፉበታል ተብሏል፡፡ የሁለቱ ገናሌዎች ፕሮጀክቶችን ጨምሮ መንግሥት በመጪዎቹ አምስት ዓመታት ውስጥ 17 ሺሕ ሜጋ ዋት ኃይል የሚያመነጩ ፕሮጀክቶችን ወደ ሥራ ለማስገባት አቅዷል፡፡

    - Advertisement -

    ይመዝገቡ

    spot_img
    spot_img