Wednesday, June 12, 2024

መንግሥት የሚወስዳቸው ዕርምጃዎች ከሕዝብ ፍላጎትና ከተጨባጭ ሁኔታዎች ጋር ይጣጣሙ!

የአገሪቱ ፖሊሲዎች፣ ስትራቴጂዎች፣ ሕጎች፣ ደንቦችና መመርያዎች ተግባራዊ የሚደረጉት በአስፈጻሚው አካል ወይም መንግሥት ነው፡፡ መንግሥት ሕዝብን ሲያስተዳድር ከአገር ዘላቂ ጥቅምና ሉዓላዊነት ጋር ትልቅ ኃላፊነት አለበት፡፡ ከሕግ አውጭውና ከሕግ ተርጓሚው ጋር በመናበብ ግዴታውን መወጣት ይኖርበታል፡፡ በአስተዳደራዊ ጉዳዮች፣ ሕግ በማስከበር፣ በትምህርት፣ በጤና፣ በግብርና፣ በንግድ፣ በዲፕሎማሲ፣ በመሠረተ ልማት ግንባታዎች፣ በመሬት አስተዳደርና ልማት፣ ወዘተ የሚወሰዱ ዕርምጃዎች የሕዝቡን ፍላጎት ያገናዘቡና ከተጨባጭ ሁኔታዎች ጋር መጣጣም አለባቸው፡፡ ሕዝብ በአገሩ ደስተኛ የሚሆነውና የሥራ ሞራሉ የሚነሳሳው በዚህ መንገድ ነው፡፡

መንግሥት ከሕዝብ የተሰጠውን አደራ በብቃት ለመወጣት ሕዝብ የሚያምንባቸውና የሚተማመንባቸው ሹማምንት ሊኖሩት ይገባል፡፡ እነዚህ በትምህርታቸው፣ በሙያ ብቃታቸውና በሥነ ምግባራቸው የተመሰከረላቸው ሹማምንት በቀጥታም ሆነ በተዘዋዋሪ የሕዝቡን ፍላጎት አውቀው ሥራቸውን በአግባቡ ሲወጡ ሁከትና ብጥብጥ ሥፍራ አይኖራቸውም፡፡ ይልቁንም የሕዝብ ፍላጎት ሲከበር የሕግ የበላይነት ይረጋገጣል፡፡ ፍትሐዊ የሥልጣንና የሀብት ክፍፍል ይኖራል፡፡ ዴሞክራሲያዊና ሰብዓዊ መብቶች በሚገባ ይከበራሉ፡፡ ምርጫ ነፃና ዴሞክራሲያዊ ይሆናል፡፡ የሲቪክ ማኅበራት ያብባሉ፡፡ የዜጎች ተሳትፎ ይዳብራል፡፡ ግልጽነትና ተጠያቂነት መርህ ይሆናሉ፡፡ በዚህ መሠረት የዳበረ ዴሞክራሲያዊ ሥርዓት እየተገነባ ለሁሉም ወገን የሚበጅ የፖለቲካ ምኅዳር ይፈጠራል፡፡ ድንጋይ ወርዋሪ ሳይሆን ጠያቂና ሞጋች ትውልድ ለማፍራት ይጠቅማል፡፡

አገራችንን ጨምሮ በበርካታ አገሮች በሕዝብና በመንግሥት መካከል መቃቃር የሚፈጠረው፣ ሕዝብ በመንግሥት ላይ ያለው አመኔታ ሲነጥፍና የመንግሥት የአገልጋይነት ሚና ሲኮላሽ ነው፡፡ መንግሥት የልማት ዕቅዶችን ዘርግቶ የፈለገውን ያህል ቢማስን የሕዝብ ተሳትፎ ካልታከለበት ፋይዳ አይኖረውም፡፡ መንግሥት በሕዝብ የተመረጠ አካል መሆኑን ማረጋገጫው የሥልጣኑ ባለቤት ለሆነው ሕዝብ በሚኖረው ታዛዥነት መጠን ነው፡፡ የመንግሥት የተለያዩ ተቋማት በየዘርፎቻቸው ከግብር ከፋዩ ሕዝብ ጋርም ሆነ ከባለድርሻ አካላት ጋር ያላቸው ግንኙነት በመተማመን ላይ የተመሠረተ ሊሆን ይገባዋል፡፡ ይህ መተማመን የሚፈጠረው ደግሞ የመንግሥት ተቋማቱ በአገልጋይነት መንፈስ ሥራቸውን ሲያከናውኑና ግልጽነትና ተጠያቂነት ሲኖርባቸው ነው፡፡ ዘመኑ ከደረሰበት የዕድገት ግስጋሴ ጋር በመጣጣም ለተገልጋዩ ሕዝብ ከበሬታ ሰጥተው ማገልገል ሲችሉ ነው፡፡ ከዚህ ውጪ በልማዳዊ አሠራር ተተብትበው የትም መድረስ አይችሉም፡፡ ለአገሪቱም አይጠቅሙም፡፡

ከዘመኑ ተጨባጭ ሁኔታ አንፃር አመራር መስጠት የሚችሉ ብቁ ሹማምንት በየቦታው መመደብ አለባቸው፡፡ እነዚህ ሹማምንት የግድ ከገዥው ፓርቲ ብቻ መምጣት የለባቸውም፡፡ አገራቸውን በከፍተኛ ፍቅር ለማገልገል የሚፈልጉ በተለያዩ የሙያ ዘርፎች የሠለጠኑና ልምድ ያካበቱ ዜጎች በአገር ውስጥም ሆነ በውጭ በብዛት አሉ፡፡ ይህ ዘመን በቴክኖሎጂ የተመነደገና በዳበሩ አስተሳሰቦች የሚመራ እንደመሆኑ መጠን፣ ከጊዜው ጋር እኩል የሚራመድ አሠራር ማስፈን ተገቢ ነው፡፡ ሥልጣን ሕዝብን ማገልገያ እንጂ በሕዝብ ላይ መገልገያ እንዳልሆነ በአንክሮ መጤን አለበት፡፡ እንኳን  ተሿሚ ግለሰቦች ይቅሩና ፓርቲዎች በሕዝብ ድምፅ ብቻ ነው ሥልጣን መያዝ ያለባቸው፡፡ እኔ ብቻ ነኝ የምችለው ከማለት ይልቅ፣ ለአገር በተሻለ የሚጠቅሙ አሉ ወይ? ብሎ ማፈላለግ ለዘላቂው የአገርና የሕዝብ ጥቅም ጥሩ ነው፡፡ በዓለም አቀፍ ደረጃ ሳይቀር ያስከብራልም፡፡

የመልካም አስተዳደር ዕጦት አለ ሲባል፣ ፍትሕ ችግር ውስጥ ገብቷል ሲባል፣ ሙስና አገርን እንደ ሰደድ እሳት እየበላ ነው ሲባል፣ ሕዝብ በመንግሥት ላይ አቂሟል ሲባልና የመሳሰሉት ችግሮች በስፋት ሲስተጋቡ ግራና ቀኙን ማየት ያስፈልጋል፡፡ እነዚህ ችግሮች ክትራቸውን ጥሰው ለአገር ህልውና ሥጋት ሲደቅኑ ዘለቄታዊ መፍትሔያቸው ሊታሰብበት ይገባል፡፡ የተጫረውን እሳት በጊዜያዊ ዕርምጃ አጥፍቶ መቀመጥ ሳይሆን፣ ከሕዝብ መሠረታዊ ጥቅምና ከተጨባጭ ሁኔታዎች ጋር የሚጣጣም ዘላቂ መፍትሔ ማፈላለግ ብልህነት ነው፡፡ በመንግሥት ውሳኔ አሰጣጥ ወቅት ግራና ቀኙን በሚገባ በመመርመር ከአገርና ከሕዝብ ዘላቂ ጥቅም አንፃር ድምዳሜ ላይ መድረስ ተገቢ ነው፡፡ በግዴለሽነትና በማናለብኝነት የሚወሰዱ ግብታዊ ዕርምጃዎች አገርን ለጥፋት፣ ሕዝብን ደግሞ ለእንግልት ሲዳርጉ በተደጋጋሚ ታይተዋል፡፡ ይህ ዓይነቱ አካሄድ በፍፁም መታረም አለበት፡፡

የአገር ሰላምና ደኅንነት በሕዝብ እርካታ ላይ ይወሰናል፡፡ ጥቂቶች እንደፈለጉ እንሁን ሲሉ ብዙኃኑ ለምን ብለው ይነሳሉ፡፡ የሕግ የበላይነት ሲረጋገጥና የሕዝብ ፍላጎት ሲከበር ግን ብዙኃን ይደሰታሉ፡፡ ጥቂቶቹም ቢሆኑ ተጠቃሚ ይሆናሉ፡፡ በተለይ በአገር አጠቃላይ ጉዳይ የሕዝብ ፍላጎት ገዥ መሆን አለበት፡፡ ከወቅቱ ተጨባጭ ሁኔታ አንፃር የተቃናና የሕዝብና የአገርን ዘለቄታዊ ጥቅም የሚያስከብር ውሳኔ ቅራኔን ለማስወገድና ብሔራዊ መግባባት ለመፍጠር ይጠቅማል፡፡ መንግሥት በተለያዩ ጉዳዮች  ውሳኔ ላይ ለመድረስ የሕዝቡን ፍላጎት በሚገባ መረዳት አለበት፡፡ የሕዝብ ፍላጎት ሲባል ከጊዜያዊ እርካታ ጋር የተያያዘ ስሜት ሳይሆን፣ ከአገር ዘለቄታዊ ጥቅም ጋር የተቆራኘ ውሳኔ ማለት ነው፡፡ ስለዚህም መንግሥት የሚወስዳቸው ዕርምጃዎች ከሕዝብ ፍላጎትና ከተጨባጭ ሁኔታዎች ጋር ሊጣጣሙ ይገባል!

በብዛት የተነበቡ ፅሁፎች

- Advertisment -

ትኩስ ፅሁፎች

[ክቡር ሚኒስትሩ በመንግሥት የሚታወጁ ንቅናቄዎችን በተመለከተ ባለቤታቸው ለሚያነሱት ጥያቄ ምላሽ ለመስጠት እየሞከሩ ነው]

እኔ ምልህ? እ... ዛሬ ደግሞ ምን ልትይ ነው? ንቅናቄዎችን አላበዙባችሁም? የምን ንቅናቄ? በመንግሥት...

የመንግሥት የ2017 ዓ.ም በጀትና የሚነሱ ጥያቄዎች

የ2017 ዓመት የመንግሥት ረቂቅ በጀት ባለፈው ሳምንት መገባደጃ ለሚኒስትሮች...

ከፖለቲካ አባልነትና ከባንክ ድርሻ ነፃ የሆኑ ቦርድ ዳይሬክተሮችን ያካተተው ብሔራዊ ባንክ ያዘጋጃቸው ረቂቅ አዋጅና መመርያዎች

የኢትዮጵያ የብሔራዊ ባንክ የፋይናንስ ተቋማትን የተመለከቱት ድንጋጌዎችንና የባንክ ማቋቋሚያ...

የልምድ ልውውጥ!

እነሆ መንገድ ከቦሌ ሜክሲኮ። አንዱ እኮ ነው፣ ‹‹እንደ ሰሞኑ...

የ‹‹ክብር ዶክትሬት›› ዲግሪ ጉዳይ

በንጉሥ ወዳጅነው ‹‹የክብር ዶክትሬት ዲግሪ ግልጽ የሆነ መመርያ እስኪወጣ ድረስ...
spot_img

ተዛማጅ ፅሁፎች

ባለሥልጣናት የሚቀስሙት ልምድ በጥናት ይታገዝ!

ሰሞኑን በጠቅላይ ሚኒስትር ዓብይ አህመድ (ዶ/ር) የተመራ የከፍተኛ የመንግሥት ባለሥልጣናት ልዑክ፣ ከሲንጋፖር ጉብኝት መልስ በሁለት ክፍሎች በቴሌቪዥን የተገኘውን ልምድ በተመለከተ ሰፊ ማብራሪያ ሰጥቷል፡፡ ለአገር...

የዘመኑ ትውልድ ለአገሩ ያለውን ፋይዳ ይመርምር!

በዚህ በሠለጠነ ዘመን ኢትዮጵያን የሚያስፈልጓት ብዙ ነገሮች አሉ፡፡ ከብዙዎቹ በጣም ጥቂቱን አንስተን ብንነጋገርባቸው ይጠቅሙ ይሆናል እንጂ አይጎዱም፡፡ ኢትዮጵያም ሆነች ብዙኃኑ ሕዝቧ ያስፈልጓቸዋል ተብለው ከሚታሰቡ...

ከግጭት አዙሪት ውስጥ የሚወጣው በሰጥቶ መቀበል መርህ ነው!

የኢትዮጵያን ሰላም፣ ብሔራዊ ደኅንነትና ጥቅሞች ማዕከል በማድረግ መነጋገር ሲቻል ለጠብ የሚጋብዙ ምክንያቶች አይኖሩም፡፡ ከዚህ በተቃራኒ የሚደረጉ ክንውኖች በሙሉ ከጥፋት የዘለለ ፋይዳ አይኖራቸውም፡፡ በኢትዮጵያ ዘርፈ...