Sunday, February 5, 2023
- Advertisment -
- Advertisment -

የመንግሥት ባለሥልጣናትና መዋቅሮች ቶሎ ቶሎ መለዋወጥ ችግር እየፈጠረ ነው!

መንግሥት ባለሥልጣናትንና መዋቅሮቹን በተጠና መንገድ መለዋወጥ፣ በጠንካራ መሠረት ላይ የተገነቡ ተቋማትን መፍጠር፣ አቅምና ብቃት ያላቸውን ተሿሚዎች ኃላፊነት መስጠት አንደኛው ኃላፊነቱ ነው፡፡ የሕዝብን ፍላጎት የሚያረኩ ተቋማትና ተሿሚዎችን ማግኘት የሚቻለው ግን በቂ ጊዜ ተሰጥቶ በሚገባ ጥናት ሲደረግ ነው፡፡ ይህ ዓይነቱ የተጠና አካሄድ የተረጋጋና የሰከነ መንግሥት ለመመሥረት ከማስቻሉም በላይ፣ ዕቅዶችና አፈጻጸሞች በስኬት እንዲከናወኑ ይረዳል፡፡ በአሁኑ ጊዜ በመንግሥት የተለያዩ መዋቅሮችና በኃላፊዎቻቸው ላይ በተደጋጋሚ ለውጦች እየተደረጉ በመሆናቸው፣ በተገልጋዩ ሕዝብም ሆነ በባለድርሻ አካላት ላይ ችግር እየተፈጠረ ነው፡፡

በተለይ ባለፉት ሦስት ዓመታት በተለያዩ የሚኒስቴር መሥሪያ ቤቶች ላይ ተደጋጋሚ መልሶ የማዋቀርና እንደገና የማፍረስ ሥራዎች ተካሂደዋል፡፡ የተለያዩ ሚኒስትሮችም ከአንዱ ወደ ሌላው በፍጥነት ተዘዋውረዋል፡፡ በዚህም ሳቢያ አንድ የሚኒስቴር መሥሪያ ቤት በሥሩ ከሚገኙ የተለያዩ ኤጀንሲዎች ጋር ግንኙነት ባላቸው ባለድርሻ አካላት ላይ ቅሬታ እየተፈጠረ ነው፡፡ ለምሳሌ የትራንስፖርት ሚኒስቴር በሥሩ የኢትዮጵያ አየር መንገድ፣ የኢትዮጵያ ሲቪል አቪዬሽን ባለሥልጣን፣ የኢትዮጵያ ኤርፖርቶች ድርጅት፣ የኢትዮጵያ ባህር ትራንስፖርትና ሎጂስቲክስ ኢንተርፕራይዝ፣ የኢትዮጵያ መንገዶች ባለሥልጣን፣ የፌዴራል ትራንስፖርት ባለሥልጣን፣ ወዘተ. የመሳሰሉ ትልልቅ ተቋማት አሉ፡፡ እነዚህ ተቋማት ደግሞ በሥራቸው የተለያዩ ባለድርሻ አካላት ይገኛሉ፡፡ በዚህ ሰፊ የትራንስፖርት ሴክተር ውስጥ ለሚነሱ ችግሮች መፍትሔ ለመስጠት፣ ሴክተሩን የበለጠ ለማዘመንና ለማሳደግ የተረጋጋ አመራር መኖር አለበት፡፡ ከዕቅድ እስከ አፈጻጸም ባሉት ሒደቶች ውስጥ የሚያጋጥሙ ችግሮችን መፍታትና የተሻለ ውጤት ማግኘት የሚቻለው በተጠና መንገድ መሾምና ማዋቀር ሲቻል ብቻ ነው፡፡

መንግሥት አንድ ባለሥልጣንን ወይም ተሿሚን ለአንድ ኃላፊነት ሲያጭ በሚገባ ጥናት ማካሄድ አለበት፡፡ ለኃላፊነቱ ትክክለኛውን ሰው ለማግኘት በዕጩነት ከቀረቡት ውስጥ ደግሞ ደጋግሞ አውጥቶ ካወረደ በኋላ መሾም ይኖርበታል፡፡ ለሚኒስትርነት፣ ለኮሚሽነርነት፣ ለዋና ዳይሬክተርነት ወይም ለሥራ አስኪያጅነት ሥልጣኑን ወይም ኃላፊነቱን ከሰጠ በኋላ፣ ለተሿሚው ሙሉ ኃላፊነትና ነፃነት ሊሰጠው ይገባል፡፡ አንድ ተሿሚ የተቋሙን ማኔጅመንት በነፃነት እንዲመራ ዕድሉን ማግኘት አለበት፡፡ ተሿሚው የሚመራውን ተቋም ተቆጣጥሮ በነፃነት መሥራት መቻሉን ካላረጋገጠ ኃላፊነቱን መወጣት አይችልም፡፡ አንድ ተሿሚ ሲመጣ የራሱን ዕቅድና ድርጅቱን የሚመራበት መርሐ ግብር ይቀርፃል፡፡ ይህንን ተግባራዊ የሚያደርግበት በቂ ጊዜ ማግኘትም አለበት፡፡

በአሁኑ ጊዜ በብዛት እየታየ ያለው ሥራውን አውቆ፣ ዕቅዱን ነድፎና መርሐ ግብሩን ዘርግቶ ተግባራዊ ማድረግ ሳይጀምር በድንገት ይነሳል፡፡ በቦታው ሌላ ተሿሚ ይመጣና እንደገና አዲስ ዕቅድ ይነድፋል፡፡ ይኼኛውም በስንት መከራ ዘርፉን ተለማምዶ ዕቅዱን ተግባራዊ ለማድረግ ሲነሳ በሌላ ተሿሚ ይተካል፡፡ ይህ ዓይነቱ ተደጋጋሚ የሹም ሽርና መልሶ የማደራጀት ተግባር በተለያዩ ሴክተር መሥሪያ ቤቶች ላይ በመካሄዱ በርካታ ተገልጋዮችን ተስፋ እያስቆረጠ ነው፡፡ ይህ ዓይነቱ ያለመረጋጋት በአገሪቱ ላይ የሚያደርሰው ችግርም መጤን አለበት፡፡ በዓለም ላይ ኪሳራ የሚያስመዘግቡ የፋይናንስ ተቋማት፣ አየር መንገዶች፣ የንግድ ድርጅቶች፣ አምራቾችና የመሳሰሉት ዋነኛው ችግራቸው የተረጋጋ አመራር ማጣት ነው፡፡ በተጠና መንገድ መሪዎቻቸውን ያገኙ ተቋማት ግን ከዓመት ዓመት በትርፍ ይንበሸበሻሉ፣ ማስፋፊያ ያካሂዳሉ፣ ለበለጠ ውጤት ይተጋሉ፡፡

ብዙ ጊዜ በአግባቡ ካለማቀድና ከዝቅተኛ አፈጻጸም ጋር በተያያዘ የኤክስፖርት ገቢ በየጊዜው ሲቀንስ፣ የኢንዱስትሪና የግብርና ውጤቶች በቂ ገበያ ሲያጡ፣ የአገሪቱ የትራንስፖርት ሲስተም በሚፈለገው ደረጃ ማደግ ሲያቅተው፣ በተለያዩ ባለድርሻ አካላት የሚቀርቡ ማሳሰቢያዎች፣ ጥያቄዎችና ቅሬታዎች ትኩረት ሲነፈጋቸው፣ በትምህርት ጥራት ላይ የሚነሳው የዓመታት ችግር ሳይፈታ፣ የመልካም አስተዳደር ዕጦትና የፍትሕ ችግሮች መቀረፍ ሲያቅታቸው፣ በግብይት ሥርዓቱ ውስጥ የሚታዩ አሳሳቢ ችግሮች በነበሩበት ሲቀጥሉ፣ የዴሞክራሲና የሰብዓዊ መብት ጉዳዮች የአገር ራስ ምታት ሆነው ሲዘልቁ፣ ወዘተ. ሹማምንቱን ያለ ጥናት ከቦታ ወደ ቦታ ማንቀሳቀስና ተቋማቱን በተደጋጋሚ መላልሶ ማደራጀት ፋይዳው ምንድነው? ለአማካሪነት የተመደቡ የሥራ መደቦች አያስፈልጉም ተብሎ አስተባባሪ የሚባሉ ሹመቶች ሲፈጠሩም እየታየ ነው፡፡ በቂ ጊዜ ያልተሰጣቸውና ጥናት ያልተደረገባቸው ተግባራት እየበዙ ነው፡፡ ይታረሙ፡፡

በተለያዩ ዘርፎች በቀጥታም ሆነ በተዘዋዋሪ ጉዳይ ያላቸው ዜጎችና ከፍተኛ ኢንቨስትመንት ያፈሰሱ ኩባንያዎች፣ በተቋማትና በሹማምንት ቶሎ ቶሎ መለዋወጥ ምክንያት እየተጎዱ መሆናቸውን በተለያዩ አጋጣሚዎች እየገለጹ ነው፡፡ በተለይ በርካታ ዘርፎችን የሚመሩ ሚኒስቴር መሥሪያ ቤቶች ኃላፊዎች ቶሎ ቶሎ ሲለዋወጡ የበሰለው ጉዳይ ጥሬ እየሆነባቸው እየተቸገሩ ያሉም ብዙ ናቸው፡፡ በዚህ ምክንያት ኩርፊያና መነጫነጭ በየቦታው ይሰማል፡፡ የተቋማት መዋቅር በየጊዜው እየተሠራ ቶሎ ቶሎ ለውጥ ሲደረግበት የአገር ሀብትም ይባክናል፡፡ አንዱን ከሌላው ጋር በማዋሀድ ወይም በማለያየት የሚባክነው የአገር ሀብት ብቻ ሳይሆን፣ ለብዙ ተግባራት ሊውል የሚችልም የሠለጠነ የሰው ኃይል ነው፡፡ በየተቋማቱ በጥናት ላይ የተመሠረተ ለውጥና ማሻሻያ ማድረግ ጠቃሚነቱ ግልጽ ነው፡፡ ነገር ግን ባለሥልጣናቱንና መዋቅሮቹን ያለ ጥናት ቶሎ ቶሎ መለዋወጥ ከፍተኛ ችግር እየፈጠረ መሆኑ መታወቅ አለበት!     

በብዛት የተነበቡ ፅሁፎች

ከውጭ ይገቡ የነበሩ 38 ዓይነት ምርቶች እንዳይገቡ ዕግድ ተጣለ

የኢትዮጵያ ብሔራዊ ባንክ 38 ከውጪ የሚገቡ ምርቶች ላይ ዕገዳ...

የአየር መንገድ ተጓዦች በሻንጣ የሚያስገቡትን የልብስና የጫማ ብዛት የሚገድብ ረቂቅ መመርያ ተዘጋጀ

ከቀረጥ ነፃ ይገቡ የነበሩ ዕቃዎች 87 በመቶ እንዲቀንሱ ተደርጓል መንገደኞች...

አሜሪካ ሕወሓትን በማሳመንና በመጫን በሰላም ሒደቱ ትልቅ ሚና መጫወቷን የኢትዮጵያ ዋና ተደራዳሪ አስታወቁ

የተመድና የአውሮፓ ኅብረት አበርክቶ አሉታዊ እንደነበር ጠቁመዋል በመንግሥትና በሕወሓት መካከል...

ኢትዮጵያ በ2023 የሚኖራት የውጭ ምንዛሪ ክምችት ለ18 ቀናት ግዢ መፈጸሚያ ብቻ እንደሚሆን አይኤምኤፍ ተነበየ

ኢትዮጵያ በ2023 የሚኖራት የውጭ ምንዛሪ ክምችት ለ0.6 ወር ወይም...
- Advertisment -

ትኩስ ፅሁፎች

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

የኢትዮጵያ ካፒታል ገበያ ምሥረታ ዝግጅቶችና ከገበያው የሚጠበቁ ዕድሎች

ኢትዮጵያ ከ50 ዓመት በኋላ ዳግም የምታስጀምረውን የካፒታል ገበያ ዘመኑን...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...

መንግሥት የደቡብ ሱዳን ታጣቂዎች ድንበር ጥሰው የሚያደርሱትን ጥቃት እንዲያስቆም ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዮች ቋሚ...

አዲስ ሲኖዶስ አቋቁመዋል በተባሉና በኦሮሚያ መንግሥት ላይ ክስ ለመመሥረት...
spot_img

ተዛማጅ ፅሁፎች

ኢትዮጵያ ከገባችበት አረንቋ ውስጥ በፍጥነት ትውጣ!

የአገር ህልውና ከሕዝብ ሰላምና ደኅንነት ጋር በእጅጉ የተቆራኘ ነው፡፡ አገር ሰላም ውላ ማደር የምትችለው ደግሞ የሕዝብ ደኅንነት አስተማማኝ ሲሆን ነው፡፡ ሕዝብና መንግሥት በአገር ህልውና...

የፈተናው ውጤት የፖለቲካው ዝቅጠት ማሳያ ነው!

በ12ኛ ክፍል መልቀቂያ ፈተና ከአጠቃላይ ተፈታኞች ውስጥ 3.3 በመቶ ያህሉ ብቻ ማለፋቸው፣ የአገሪቱን የትምህርት ጥራት ደረጃ በሚገባ ያመላከተ መስተዋት እንደሆነ አድርጎ መቀበል ተገቢ ነው፡፡...

የምግብ ችግር አገራዊ ሥጋት ስለደቀነ ፈጣን ዕርምጃ ይወሰድ!

ኢትዮጵያ ውስጥ የሰው ልጆችን አቅም በብርቱ እየፈተኑ ያሉ በርካታ ችግሮች አሉ፡፡ ከችግሮቹ ብዛት የተነሳ አንዱን ከሌላው ለማስቀደም የማይቻልበት ደረጃ ላይ የተደረሰ ቢሆንም፣ የምግብና የሰላም...