Tuesday, November 29, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር

    [ክቡር ሚኒስትሩን ሾፌራቸው በጠዋት ወደ ቢሮአቸው እየወሰዳቸው ነው]

    • ሬዲዮ ክፈትልኝ ዜና ላዳምጥ፡፡
    • እሺ ክቡር ሚኒስትር (ሬዲዮው ተከፈተ)፡፡
    • ከ40/60 ቤቶች ግንባታ የተዘረፈው የአርማታ ብረት ተገኘ ነው የሚለው?
    • ብረቱን የዘረፉት 23 ተጠርጣሪዎችም ተያዙ ነው የሚለው ክቡር ሚኒስትር፡፡
    • ብረቱ አልተገኘም?
    • ተገኝቷል ክቡር ሚኒስትር፡፡
    • ይኼንን አሳፋሪ ድርጊት ማን ነው የፈጸመው?
    • ፖሊስ ተጠርጣሪዎቹን ይዞ እየመረመራቸው ነው ክቡር ሚኒስትር፡፡
    • ለመሆኑ የተዘረፈው ብረት ምን ያህል ያወጣ ነበር አሉ?
    • ከአምስት ሚሊዮን ብር በላይ ያወጣል ነው የተባለው ክቡር ሚኒስትር፡፡
    • አምስት ሚሊዮን?
    • አዎን ክቡር ሚኒስትር፡፡
    • ይኼ ሁሉ ሲሆን ኃላፊዎቹ የት ነበሩ?
    • የእነሱም ጉዳይ ይመረመራል ነው የተባለው ክቡር ሚኒስትር፡፡
    • እኔ እኮ የሚያበሳጨኝ ይኼ ነው፡፡
    • ምኑ ክቡር ሚኒስትር?
    • ምርመራው ሁሉንም አለማካተቱ፡፡
    • እኔን የሚያበሳጨኝ ደግሞ አለ፡፡
    • ምንድነው እሱ?
    • የግልጽነትና የተጠያቂነት መጥፋት ክቡር ሚኒስትር፡፡
    • ለምን እንዲዚህ አልክ?
    • በሌላ አገር ቢሆን ከላይ እስከ ታች ያለ ሹም ይባረር ነበር እኮ ክቡር ሚኒስትር፡፡
    • ከጥልቅ ተሃድሶው በኋላ ይኼንን ጠብቅ፡፡
    • ጥልቅ  ተሃድሶውም እኮ ጊዜ እያባከነ ነው እየተባለ ነው ክቡር ሚኒስትር፡፡
    • ማን ነው እንደዚያ የሚለው?
    • ሕዝቡ ውስጥ በስፋት እየተባለ ያለው ይኼው ነው፡፡
    • እና አሁን ምን ይደረግ?
    • ጊዜ አይባክን ክቡር ሚኒስትር፡፡
    • ለምኑ?
    • ለተሃድሶውም ሆነ ለምርመራው ክቡር ሚኒስትር፡፡
    • አንተ መቼ ነው እንዲህ ያለ ነገር የተማርከው?
    • ይኼ ኑሮ ምን የማያስተምረው አለ ብለው ነው ክቡር ሚኒስትር?
    • ህምም. . .

    [ክቡር ሚኒስትሩ ቢሮ ገብተው ጸሐፊያቸውን ጠሯት]

    • ምን አዲስ ነገር አለ?
    • አልሰሙም እንዴ?
    • ምኑን?
    • ክቡር ሚኒስትር ፊደል ካስትሮ ሞቱ እኮ?
    • ሰምቻለሁ፣ ሌላ ምን አዲስ ነገር አለ?
    • የተዘረፈው ብረት መገኘቱንስ ክቡር ሚኒስትር?
    • እሱንም ሰምቻለሁ፡፡
    • በኤርትራ በኩል የገቡ ታጣቂዎች መደምሰሳቸውንና መማረካቸውንስ?
    • ሰምቻለሁ፡፡
    • ሌላ አዲስ ነገር ምን ልንገርዎ ታዲያ ክቡር ሚኒስትር?
    • ዜና አልቆብሻል ማለት ነው?
    • ክቡር ሚኒስትር ሠራተኞች ጥያቄ እያቀረቡ ነው፡፡
    • ምን ይፈልጋሉ?
    • ክቡር ሚኒስትሩ ለምን አይተዋወቁንም እያሉ ነው፡፡
    • እሺ፡፡
    • ሌላ ደግሞ አንዳንድ ጥያቄዎች ማቅረብ ይፈልጋሉ ክቡር ሚኒስትር፡፡
    • ለምሳሌ?
    • የዕድገት፣ የዝውውርና የጥቅማ ጥቅም ጥያቄዎች ክቡር ሚኒስትር፡፡
    • አንቺ ምን አስተያየት አለሽ?
    • እኔማ ይኼ ተሃድሶ እስኪያልቅ ጠብቁ ብል ማን ይስማኝ ክቡር ሚኒስትር?
    • የእነሱን ጥያቄና ተሃድሶውን ምን አገናኘው?
    • አለ አይደል ለማረጋጋት ብዬ ነው ክቡር ሚኒስትር፡፡
    • ምንድነው የምታረጋጊው?
    • እርስዎ ሥልጣንዎ ላይ እስኪደላደሉ ብዬ ነዋ፡፡
    • የእኔ መደላደልና የእነሱ የመብት ጥያቄ ደግሞ ምን ያገናኘዋል?
    • ‹‹መጀመርያ የመቀመጫዬን›› ያለችው ዝንጀሮ እኮ ወዳ አይደለም ክቡር ሚኒስትር?
    • አሁንስ የሰለቸኝ ያረጀ ጥቅስና ተረት ነው፡፡
    • ይኼን ያህል ክቡር ሚኒስትር?
    • ለአንቺም ቢሆን አይጠቅምሽም፡፡
    • ምን ይጎዳል ብለው ነው ክቡር ሚኒስትር?
    • የሰለቸኝ ወሬ ነው፡፡
    • ወሬ ከሌለ እኮ ጥሩ አይደለም፡፡
    • ከያዝሽው ኃላፊነት ጋር አይመጣጠንም፡፡

    [ክቡር ሚኒስትሩ ከቀድሞ ጓደኞቻቸው አንዱ ደውሎላቸው እያወሩ ነው]

    • ከየት ተገኘህ እባክህ?
    • ክቡር ሚኒስትር ካለሁበት፡፡
    • በስሜ ጥራኝ፡፡
    • ፕሮቶኮሉ አይፈቅድም ክቡር ሚኒስትር፡፡
    • ኑሮ እንዴት ነው?
    • እርስዎን ከማጣታችን ውጪ ደህና ነው፡፡
    • ይኸው አለሁ አይደል?
    • አዬዬ . . .
    • ምነው?
    • ያቺ ቢራ ፉት የምንልባት ቦታ ጭር አለች እኮ ክቡር ሚኒስትር፡፡
    • እንግዲህ ምን ይደረግ ትላለህ?
    • ባይሆን አንዳንዴ እቤት እየመጣን ብናውካካ ጥሩ ነበር፡፡
    • እንግዲህ ሲመች እንሞክራለን፡፡
    • ክቡር ሚኒስትር አዲሱ ሹመት እንዴት ነው?
    • ከባድ ነው፡፡
    • ይኼን ያህል?
    • ከምታስበው በላይ ነው፡፡
    • ምን አጋጠመዎት?
    • ለጊዜው ዝርዝሩን ባልናገርም ትልቅ አደራና ኃላፊነት አለበት፡፡
    • እኔ እኮ አዳዲስ ወዳጆች አፍርቼ አስተዋውቀኝ ሲሉ ነው የደወልኩልዎት፡፡
    • የት አገኘሃቸው?
    • በቅርቡ ዱባይ ሄጄ ሆቴል ውስጥ በድንገት ተገናኘን፡፡
    • በድንገት?
    • አዎን በድንገት ነበር ክቡር ሚኒስትር፡፡
    • የሚገርም ትውውቅ ነው እባክህ?
    • በዚያ ላይ በአገር ውስጥና በውጭ ከፍተኛ ሀብት እናንቀሳቅሳለን ብለውኛል፡፡
    • ኧረ እባክህ?
    • አንድ ቀን ቀጠሮ ቢይዙልኝ ብር ብለው ከዱባይ ይመጡ ነበር፡፡
    • አትቸኩል፡፡
    • ምነው ክቡር ሚኒስትር?
    • የዘንድሮ ባለሀብት ተብዬዎች እዚያ ስትላቸው እዚህ፣ እዚህ ስትላቸው እዚያ ሲረግጡ ነው የሚገኙት፡፡
    • አልገባኝም ክቡር ሚኒስትር?
    • በቅርቡ ይገባሃል፡፡
    • ኧረ ፈታ አድርገው ይንገሩኝ?
    • ብዙዎቹ ቁጭ በሉ ናቸው፡፡
    • ማለት?
    • ዱባይ ነን ይሉህና ስታምናቸው መርካቶ ምናለሽ ተራ ይገኛሉ፡፡
    • እንዴ?
    • ኢስታንቡል ነኝ ያለህ ቦምብ ተራ ሲያተራምስ ይገኛል፡፡
    • እነዚህ እኮ እንዲህ አይደሉም ክቡር ሚኒስትር?
    • እንዳይሸውዱህ፡፡
    • በምን ይሸውዱኛል?
    • አፋቸው ጥሬ ይቆላል፡፡

    [ክቡር ሚኒስትሩ አማካሪያቸውን አስጠርተውት እያወሩ ነው]

    • የተባባልነውን ጥናት ጨረስክ?
    • አዎ ክቡር ሚኒስትር፡፡
    • የት አለ ታዲያ?
    • ተጽፎ አልቆ እየተጠረዘ ነው ክቡር ሚኒስትር፡፡
    • ምን አዲስ ነገር አገኘህ?
    • የሚገራርሙ ነገሮች አሉበት ክቡር ሚኒስትር፡፡
    • ለምሳሌ?
    • በግዥ፣ በጨረታ፣ በኮንትራክተር መረጣ፣ በውጭ ጉዞ አበል፣ በንብረት አያያዝና አወጋገድ፣ በበጀት አጠቃቀምና ሪፖርት አቀራረብ፣ ወዘተ የሚገርሙ ነገሮችን ያገኛሉ ክቡር ሚኒስትር፡፡
    • በአጠቃላይ ድምዳሜህ ምንድነው?
    • ካየሁት የሌብነት ተግባር  ትልቅ ትምህርት ይገኛል ክቡር ሚኒስትር፡፡
    • ምን ዓይነት ትምህርት?
    • ‹‹በአንድ ድንጋይ ሁለት ወፍ›› የሚባል ምሳሌያዊ አነጋገር ያውቃሉ አይደል ክቡር ሚኒስትር?
    • ተረትህን ተውና በቀጥታ ንገረኝ፡፡
    • በአንድ በኩል የሌቦችን ቀዳዳ ለመድፈን ትልቅ ትምህርት ይሰጣል፡፡
    • በሌላ በኩልስ?
    • በሌላ በኩል ደግሞ የራስን ስትራቴጂ ለመዘርጋት በጣም ጠቃሚ ነው ክቡር ሚኒስትር፡፡
    • የምን ስትራቴጂ?
    • ያው ክቡር ሚኒስትር. . .
    • ምንድነው እሱ (ተቆጡ)?
    • ኧረ አይቆጡ ክቡር ሚኒስትር?
    • ንገረኛ?
    • ‹‹ሥጋ መሬት ወድቆ አፈር ሳይዝ አይነሳም›› ይባል የለ?
    • ምን ማለት ነው?
    • መቼም እዚህ ሥልጣን ላይ ሆኖ መታማት አይቀርም ብዬ ነው ክቡር ሚኒስትር?
    • እና?
    • እናማ ዓይንን መክፈት ያስፈልጋል ክቡር ሚኒስትር፡፡
    • የእኔ ዓይን ማን ተጨፈነ አለህ?
    • እሱን እኮ ነው የምለው ክቡር ሚኒስትር፡፡
    • ምድንነው የምትለው?
    • ኃላፊነት የሚያስገኘውን ጥቅም እንዳይዘነጉ ነው ክቡር ሚኒስትር፡፡
    • ገና ከአሁኑ?
    • ቻይናዎች ምን እንደሚሉ ያውቃሉ ክቡር ሚኒስትር?
    • ምን ይላሉ?
    • ‹‹የሺሕ ኪሎ ሜትር ጉዞ በዕርምጃ ይጀመራል›› ነው የሚሉት ክቡር ሚኒስትር፡፡
    • ምን አልክ አንተ?
    • ያዳመጡኝ መሰለኝ ክቡር ሚኒስትር፡፡
    • ውጣልኝ!

    [ክቡር ሚኒስትሩ የዕለቱን የቢሮ ውሎ ጨርሰው ምሽት ላይ ቤት ሲደርሱ ባለቤታቸው ለእራት እየጠበቁዋቸው ነበር]

    • እንዴት አመሸህ ክቡር ሚኒስትር?
    • ደህና ነኝ፡፡
    • ምነው ያኮረፍክ ትመስላለህ?
    • ይኼ አማካሪ ተብዬ አናዶኝ ነው፡፡
    • ምን አለህ?
    • ሥልጣንህን ለራስህም ተጠቀምበት ዓይነት ወሬ ሲያወራልኝ ነበር፡፡
    • ምን አልከው?
    • ተቆጥቼ ከቢሮ አባረርኩት፡፡
    • ከሥራ አባረርኩት ነው የምትለው?
    • እንደሱማ ሕጉም አይፈቅድልኝም፡፡
    • መቆጣትህም ልክ አይደለህም፡፡
    • ምን ማድረግ ነበረብኝ?
    • የሚለውን በፅሞና መስማት፡፡
    • ከዚያስ?
    • ነገሩን ማብላላት፡፡
    • ከዚያስ?
    • ከዚያማ ሁሉንም ነገር በሆድህ መያዝ፡፡
    • በሆድህ መያዝ ነው የምትይኝ?
    • አዎን!
    • እሱ ያንን ሁሉ ሲቀባጥር ዝም ብዬ መስማት አለብኝ?
    • ጥናት እኮ ነው ያቀረበልህ፡፡
    • ያጠናውና የእሱ ማብራሪያ የተለያየ ነው፡፡
    • በጥናቱ መሠረት ሁለት የተለያዩ ግኝቶችን አገኘ አይደል?
    • ልክ ነሽ፡፡
    • አንደኛው ሌሎችን ለመታገል፣ ሌላው ደግሞ ‹አድቫንቴጅ› ለማግኘት አይደል?
    • ሁለተኛውን ሐሳብ ግን ፈፅሞ አልወደድኩትም፡፡
    • አብላላው አልኩህ እኮ?
    • ተብላልቶ ምን ይገኛል?
    • የተጣራ ነገር ነዋ!
    • ለእኔ የሚታየኝ ግን የደፈረሰ ነው፡፡
    • ተረቱን አስታወስከኝ?
    • የምን ተረት አመጣሽ አንቺ ደግሞ?
    • ለአደፍራሾች የተተረተ ነዋ!
    • ምን ተብሎ?
    • ‹‹በጥባጭ ሳለ ማን ጥሩ ይጠጣል?›› ይባላል፡፡
    • ማነው በጥባጩ?
    • አደፍራሹ!
    • ምን አልሽ አንቺ?
    • የምልህ ግልጽ መሰለኝ፡፡
    • ምን ዓይነት ዘመን ላይ ደረስን እባካችሁ?
    • ዘመኑን አትውቀስ፡፡
    • ይኼንን የሞላጮች ዘመን እንዴት አልወቅስ?
    • በጣም ትገርመኛለህ፡፡
    • ምኔ ነው የሚገርምሽ?
    • ሞላጮች የምትላቸው ናቸው እኮ እየተተኮሱ ያሉት፡፡
    • እና አንቺ የሞላጮች ደጋፊ ነሽ?
    • ቆይቶ ይገባሃል፡፡
    • ምኑ ነው የሚገባኝ?
    • የሞላጮችና የከርፋፎች ጉዳይ፡፡
    • ማነው ከርፋፋ?
    • እንዲያውም ሰሞኑን የሰማሁትን ግጥም ልንገርህ፡፡
    • አሁንስ ተረት፣ ጥቅስ፣ ግጥም. . . ሰለቸኝ፡፡
    • ይልቁንስ ስማ፡፡
    • እስቲ አነብንቢው፡፡
    • ‹‹ለምን አይሰረቅ ለምን አይዘረፍ፣ የማያውቅበትን ይዞ ሲንከረፈፍ›› ተብሎልሃል፡፡
    • ለእኔ ነው የተገጠመው?
    • ለእኔ ነው ታዲያ?
    • ሆሆ . . .! 

    በብዛት የተነበቡ ፅሁፎች

    ‹‹ከገበሬው እስከ ሸማቹ ያለውን የንግድ ቅብብሎሽ አመቻቻለሁ›› ያለው ፐርፐዝ ብላክ ውጥኑ ከምን ደረሰ?

    ከመቼውም ጊዜ በላይ በአሁኑ ወቅት በኢትዮጵያ በተደጋጋሚ የሚሰማ አንድ...

    ከመሬት ለአራሹ ወደ ደላላ የዞረው የመሬት ፖለቲካ

    ጠቅላይ ሚኒስትር ዓብይ አህመድ (ዶ/ር) በአንድ ወቅት ለመጀመርያ ጊዜ...

    ኢትዮጵያ በብድርና ዕርዳታ የምታገኘው ገንዘብ ለታለመለት ዓላማ እንዲውል ፓርላማው አሳሰበ

    በብድር የተገኘ ገንዘብ በሥልጠናና ውሎ አበል መልክ እንዳይባክን ተጠየቀ የሕዝብ...
    - Advertisment -

    ትኩስ ፅሁፎች

    በችግር የተተበተበው የሲሚንቶ አቅርቦት

    ሲሚንቶን እንደ ግብዓት ተጠቅሞ ቤት ማደስ፣ መገንባት፣ የመቃብር ሐውልት...

    ‹‹የናይል ዓባይ መንፈስ›› በሜልቦርን

    አውስትራሊያ ስሟ ሲነሳ ቀድሞ የሚመጣው በተለይ በቀደመው ዘመን የባህር...

    ‹‹ልብሴን ለእህቴ››

    ለሰው ልጅ መኖር መሠረታዊ ፍላጎት ተብለው ከተዘረዘሩት ውስጥ ልብስ...

    የአዲስ አበባ ትምህርት ቤቶች የምርመራ ውጤት እስከምን?

    በፍቅር አበበ የትምህርት ጥራትን፣ ውጤታማነትንና ሥነ ምግባርን ማረጋገጥ ዓላማ አድርጎ...

    ከመሬት ለአራሹ ወደ ደላላ የዞረው የመሬት ፖለቲካ

    ጠቅላይ ሚኒስትር ዓብይ አህመድ (ዶ/ር) በአንድ ወቅት ለመጀመርያ ጊዜ...
    spot_img

    ተዛማጅ ፅሁፎች

    [የተቃዋሚ ፓርቲው ትይዩ ሚኒስትር ክቡር ሚኒስትሩ ጋ ደውለው መንግሥት በሙሰኞች ላይ ለመውሰድ ስላሰበው የሕግ ዕርምጃ ሐሳብ እየተለዋወጡ ነው]

    ሄሎ… ማን ልበል? ጤና ይስጥልኝ ክቡር ሚኒስትር? ጤና ይስጥልኝ… ማን ልበል? የእርስዎ ትይዩ ነኝ፡፡  አቤት? ያው ፓርቲዬን ወክዬ የፍትሕ ሚኒስትሩ ትይዩ ነኝ ማለቴ ነው፡፡ ኦ... ገባኝ… ገባኝ...  ትንሽ ግራ አገባሁዎት አይደል? ትይዩ...

     [ክቡር ሚኒስትሩ እራት እየበሉ መንግሥትን በሚተቹ ጋዜጠኞች ላይ እየተወሰደ ያለውን ዕርምጃ የተመለከተ መረጃ እየቀረበላቸው ነው]

    ለጋዜጠኞቹ መንግሥትን እንዲተቹ መረጃ የሚሰጧቸው ታሪካዊ ጠላቶቻችን ናቸው፡፡ እነሱ አይደሉም፡፡ እና የትኞቹ ናቸው? እዚሁ ከተማችን የሚገኙ ምዕራባውያን ናቸው። እንዴት ነው መረጃውን የሚያቀብሏቸው? እራት እያበሉ ነው። ምን? አዎ፣ እራት ግብዣ ይጠሯቸውና መተቸት...

    [ክቡር ሚኒስትሩ ከፕሮፓጋንዳ ጉዳዮች ኮሚቴ ሰብሳቢው ጋር ስለ ሰሜኑ የሰላም ስምምነት ትግበራ መረጃ እየተለዋወጡ ነው]

    እኔ ምልህ፡፡ አቤት ክቡር ሚኒስትር? የሰሜኑ ተዋጊዎች ከሠራዊታችን ጋር መቀራረብ ጀመሩ የሚባለው እውነት ነው?  አዎ። እውነት ነው ክቡር ሚኒስትር።  ከማንም ትዕዛዝ ሳይጠብቁ ነው ከእኛ ሠራዊት ጋር መቀላቀል ጀመሩ...