Sunday, February 5, 2023
- ማስታወቂያ -
- ማስታወቂያ -

በሞሮኮው ኩባንያ ለሚገነባው ማዳበሪያ ፋብሪካ የድሬዳዋ አስተዳደር ሁለት ቦታዎችን ማቅረቡን አስታወቀ

- ማስታወቂያ -

ተዛማጅ ፅሁፎች

ከድሬዳዋ ከተማ ወጣ ብሎ በ3.7 ቢሊዮን ዶላር ወጪ በሞሮኮው ኩባንያ ይገነባል ለተባለው ግዙፍ የማዳበሪያ ፋብሪካ፣ የከተማዋ አስተዳደር ሁለት ቦታዎችን ማዘጋጀቱን አስታወቀ፡፡

ፋብሪካውን ይገነባል የተባለው የኦሲፒ ኩባንያ ኃላፊዎች ከቀረቡላቸው ሁለቱ ቦታዎች አንዱን በቅርቡ እንደሚመርጡ፣ የድሬዳዋ ከተማ ምክትል ከንቲባና የክልሉ ንግድ፣ ኢንዱስትሪና ኢንቨስትመንት ቢሮ ኃላፊ አቶ አብዱልጀባድ አብዱልሰላም ለሪፖርተር ገልጸዋል፡፡

ሰማንያ በመቶ የዓለም ገበያን በማዳበሪያ ምርቶች እንደሚሸፍን የተነገረለት ኦሲፒ የተባለው ኩባንያ፣ ኢትዮጵያ ግዙፍ ፋብሪካ ለመገንባት ባለፈው ሳምንት መፈራረሙን መዘገባችን ይታወሳል፡፡

ለፋብሪካው ግንባታ የሚውለውን ሥፍራ ለመምረጥ ባለፉት ወራት በአምስት ክልሎች ያሉ የኢንቨስትመንት ተስማሚነት ሁኔታዎችን ሲያወዳድሩ ከቆዩ በኋላ፣ የኩባንያው አማካሪዎች ድሬዳዋን ለመምረጥ መወሰናቸውን አቶ አብዱልጀባድ አመልክተዋል፡፡

ድሬዳዋም ቀዳሚ የኩባንያው ምርጫ ያደረጋት ለጂቡቲ ወደብ መቅረቧ፣ ከባቡር መስመር አቅርቦትና ለማዳበሪያ ምርት በጥሬ ዕቃነት ከሚያገለግለው የፎስፌት አቅርቦት ጋር በተያያዘ መሆኑንም አስረድተዋል፡፡

በዚህም መሠረት የድሬዳዋ ከተማ አስተዳደር  ወደ ጂቡቲ መውጫ መንገድ አቅራቢያ ሙዱ አነኖ የሚባል ቦታና በኢንዱስትሪ ዞን አቅራቢያ የሚገኝ ጎንደንሰር የተባለ ሥፍራ ለኩባንያው የቀረቡለት ሲሆን፣ ራባት የሚገኙት ኃላፊዎች ከሁለቱ ቦታዎች የተስማማቸውን በቅርቡ እንደሚመርጡም ምክትል ከንቲባው ገልጸዋል፡፡

ሁለቱም ሥፍራዎች ከፍተኛ የከርሰ መሬት ውኃ ያለባቸው መሆናቸውን ለማወቅ ተችሏል፡፡ ፋብሪካው አስፈላጊ የተባሉ የመሠረተ ልማት ግንባታዎች እንደሚኖሩትና የውኃ መሳቢያ ጣቢያ፣ የማጣሪያ አገልግሎት መስጫና ለከፍተኛ የኤሌክትሪክ ኃይል አቅርቦት የሚውል ቋት እንደሚኖረው ሪፖርተር ያገኘው መረጃ ያስረዳል፡፡

ፋብሪካው ሁለት የዩሪያ ማዳበሪያ ማምረቻ አካላት ያሉት ሲሆን፣ ዩሪያ ዩኒት አንድ በተባለው ማምረቻ የአሞኒያ ዩኒትና የካርቦን ዳይ ኦክሳይድ ማብላያ ይኖረዋል፡፡ ይህ ማምረቻ በዓመት አንድ ሚሊዮን ቶን ማዳበሪያ ያመርታል ተብሎ ይጠበቃል፡፡ በተጨማሪም የማደባለቂያና የማሸጊያ ሥፍራው ሌላው የፋብሪካው ሁለተኛ አካል ነው ተብሏል፡፡ በዚህ ሥፍራም 50 ኪሎ ግራም ክብደት ያለው ምርት የማሸጊያ አገልግሎት ይሰጣልም ተብሎ ይጠበቃል፡፡

 

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች