Sunday, June 23, 2024
- ማስታወቂያ -
- ማስታወቂያ -

አዲሶቹ የአሊያንስ 300 አውቶቡሶች አዲስ አሠራር ሰንቀዋል

spot_img

ተዛማጅ ፅሁፎች

በአዲስ አበባ ከተማ ያለውን የትራንስፖርት ችግር ለመቅረፍ የከተማ አውቶቡስ አገልግሎት እንዲስፋፋ ማድረግ አንዱ አማራጭ ሆኗል፡፡ በዚህ ዘርፍ ቀደም ብሎ ከሚታወቀው የአንበሳ አውቶቡስ አገልግሎት ድርጅት ባሻገር በቅርቡ በከተማው አስተዳደር ባለቤትነት የተመዘገበው የሸገር አውቶቡስ አገልግሎት ሥራ ጀምሯል፡፡ የከተማ አውቶቡስ አገልግሎትን በግል ኩባንያ አማካይነት ለማቅረብ በአክሲዮን የተዋቀረው አልያንስ ትራንስፖርት ሰርቪስስ፣ 25 አውቶቡሶችን ይዞ ሲንቀሳቀስ ቆይቷል፡፡ በአሁኑ ወቅት ከአዲስ አበባ ከተማ የአውቶቡስ ተገልጋዮች ቁጥር አንጻር ወደ ዘርፉ የገቡ አውቶቡሶች ቁጥር አነስተኛ እንደሆነ ይታመናል፡፡ አልያንስ ትራንስፖርት ሰርቪስስ ከአምስት ዓመት በፊት ወደዚህ ሥራ ሲገባ ታሳቢ ያደረገው ያለማቋረጥ እያደገ ያለውን የተራንስፖርት ፍላጎትና ገበያ በማስላት ነበር፡፡ ኩባንያው ከትራንስፖርት አገልግሎቱ ጋር የተጎዳኑ ሥራዎችን ለማከናወን ምኞት ቢኖረውም  እንደ ዕቅዱ ለመሥራት ነገሮች አልጋ በአልጋ አልሆኑለትም፡፡ ይህ በመሆኑም እስከ ቅርብ ጊዜ ድረስ የነበሩትን አውቶቡሶች ቁጥር ከ25 በላይ ማሳደግ ሳይቻለው ቀርቷል፡፡ በአሁኑ ወቅት ግን ጉዞውን ገትተው የነበሩ መሰናክሎች መቀረፍ በመጀመራቸውና ዘርፉን ለማሳደግ በመንግሥት በተሰጠው ዕድል አማካይነት ብሩኅ ጉዞ መጀመሩን ኩባንያው ይገልጻል፡፡ አልያንስ  ወደ ተስፋ ሰጪ ጉዞ ለማቅናት ዕድል የተከፈተለት ከአንድ ዓመት ተኩል በፊት መንግሥት የአዲስ አበባ ትራንስፖርትን ለመታደግ አነስተኛ ታክሲዎችና የከተማ አውቶቡሶች ከቀረጥ ነጻ እንዲገቡና የባንክ ብድር በማመቻቸቱ ነበር፡፡ በመንግሥት ውሳኔ ለአዲስ አበባ ከተማ ትራንስፖርት አገልግሎት የሚውሉ 500 አውቶቡሶች ከቀረጥ ነጻ እንዲገቡ ሲፈቀድ፣ ከእነዚህ አውቶቡሶች ውስጥ 300ዎቹ ለአልያንስ ተሰጥተዋል፡፡ በዚህ መሠረት ኩባንያው አውቶቡሶቹን ለማስገባት ዓለም አቀፍ ጨረታ በማውጣት ከአሸናፊው ኩባንያ ጋር በመዋዋል የመጀመሪያዎቹን 100 አውቶቡሶች ባለፈው ሳምንት ተረክቧል፡፡ ቀሪዎቹን ደግሞ ከአራት እስከ አምስት ወራት ባለው ጊዜ ውስጥ እንደሚያስገባ የአክሲዮን ማኅበሩ ቦርድ ሊቀመንበር አቶ አዲል አብደላ ይገልጻሉ፡፡ ሳንሎንግ የተባሉት አዳዲሶቹ ዘመናዊ አውቶቡሶች፣ ከዚህ ቀደም በከተማዋ የአውቶቡስ አገልግሎት መስክ ያልተለመዱ አዳዲስ አገልግሎቶችን ለመስጠት የሚያስችሉ መሣሪያዎችን የተገጠሙላቸው ናቸው ተብሏል፡፡ ኩባንያው ባስገባቸው አውቶቡሶች፣ በአዲስ አበባ ትራንስፖርት አገልግሎትና በመሰል ጉዳዮች ላይ ዳዊት ታዬ አቶ አዲል አብደላን አነጋግሯል፡፡

ሪፖርተር፡- 300 አውቶቡሶችን ከቀረጥ ነጻ እንድታስገቡ የባንክ ብድርም ተመቻችቶላችሁ 100ዎቹን አስገብታችኋል፡፡ ይህንን ዕድል እንዴት ልታገኙ ቻላችሁ?

አቶ አዲል፡- ዕድሉ ከዓመታት ልፋትና ድካም በኋላ የተገኘ ነው፡፡ በመጋቢት ወር 2007 ዓ.ም. የትራንስፖርት ሚኒስቴር 500 አውቶቡሶችን ከቀረጥ ነጻ እንዲገቡ መመሪያ በማውጣቱና እንዲተገበር በማድረጉ የተገኘ ዕድል ነው፡፡ በከተማው የአውቶቡስ አገልግሎት ለመስጠት የሚችሉ ሁሉ ዕድሉ ተሰጥቶ ስለነበር እኛ ቀዳሚዎቹ ተጠቃሚዎች ለመሆን ችለናል፡፡ መንግሥት የሰጠው ዕድል ተሽከርካሪዎች ከቀረጥ ነጻ እንዲገቡ ብቻ ሳይሆን፣ የባንክ ብድርም ያመቻቸ ጭምር ነበር፡፡ ከሚያስፈልገው የአውቶቡሶች ዋጋ 30 በመቶን እኛ ማቅረብ ይጠበቅብን ነበር፡፡ 70 በመቶው ደግሞ በባንክ ብድር የሚሸፈን ስለነበር ይህንን ዕድል ለመጠቀም ጥረት አድርገን የመጀመሪያዎቹን 100 አውቶቡስ ልናስገባ ችለናል፡፡ ከጥቂት ወራት በኋላም 200ዎቹ አውቶቡሶች ይገባሉ፡፡ ስለዚህ ኩባንያው በ325 አውቶቡሶች አገልግሎት መሰጠት ይጀምራል ማለት ነው፡፡ ለእኛ ይህ ትልቅ እመርታ ነው፡፡

ሪፖርተር፡- ለተሽከርካሪዎቹ ግዥ ዓለም አቀፍ ጨረታ አውጥታችሁ እንደነበር ጠቅሰዋል፡፡ ማን አሸነፈ? ለ100 አውቶቡሶች ግዥ የዋለው ገንዘብስ ምን ያህል ነው?

አቶ አዲል፡- በጨረታ ኮሚቴ ውስጥ የትራንስፖርት ባለሥልጣንና የትራንስፖርት ቢሮ ተወካዮች በአባልነት እንዲካተቱ በማድረግ ጭምር ያካሄድነው ነው፡፡ አሸናፊው አግታ የተባለ ኩባንያ ነው፡፡ አንዱን አውቶቡስ ያስገባነው ሁለት ሚሊዮን ብር በሚጠጋ ዋጋ ነው፡፡ የመጀመሪያዎቹን አውቶቡሶች ለማስገባት ከ200 ሚሊዮን ብር በላይ ፈጅቶብናል፡፡ ሒደቱ ግን እንዲህ ቀላል አልነበረም፡፡ በርካታ ውጣ ውረድ ነበረበት፡፡ ሆኖም እነዚህን አውቶቡሶች ለማስገባት የትራንስፖርት ሚኒስቴር ትልቅ ድጋፍ አድርጎልናል፡፡ የፌዴራል ትራንስፖርት ባለሥልጣን፣ የአዲስ አበባ መንገድና ትራንስፖርት ቢሮ እነዚህ ተሽከርካሪዎች እንዲገቡ በርካታ ጥረቶችን አድርገዋል፡፡ በተለይ የባንክ ብድር ለማግኘት ብዙ ውጣ ውረዶች ነበሩብን፡፡ የውጭ ምንዛሪ ማግኘትም ራሱን የቻለ ፈተና ነበር፡፡ በራሳችን አቅም ብቻ ሊፈቱ የሚችሉ አልነበሩም፡፡ ይህንን ችግር ትራንስፖርት ሚኒስቴር ከጠቅላይ ሚኒስትር ጽሕፈት ቤትና ከብሔራዊ ባንክ ጋር ባደረገው ምክክርና መተማመን የውጭ ምንዛሪውን ያለችግር እንድናገኝ አድርገዋል፡፡

ሪፖርተር፡- በ25 ተሽከርካሪዎች ስትሠሩ ቆይታችሁ በአንዴ ይህንን ያህል አውቶቡስ ማስገባት መቻላችሁ በኩባንያችሁ አቅም ላይ ምን ዓይነት ለውጥ ሊያመጣ ይችላል?

አቶ አዲል፡- በአሊያንስ ላይ የሚለውጣቸው ነገሮች አሉ፡፡ ለምሳሌ በቋሚነት የምናወጣቸውን ወጪዎች ብትወስድ ለ25ቱ አውቶቡሶች የምታወጣው ወጪ ለ300ዎቹም በጋራ ሊውል ስለሚችል አትራፊ ትሆናለህ፡፡ ከዚህ ሥራ ጋር በተያያዘ የአዲስ አበባ ከተማ አስተዳደር መሬት እያዘጋጀልን ነው፡፡ የመሬት ርክክቡም በዚህ ሳምንት ይጠናቀቃል፡፡ ቦታዎች ምረጡ ተብለን የምንፈልገውን አካባቢ ጠቁመናል፡፡

ሪፖርተር፡- ቦታዎቹ ለምን አገልግሎት የምታውሏቸው ናቸው?

አቶ አዲል፡- ለተሽከርካሪዎቹ ማሳደሪያና ለተሽከርካሪዎች ጥገና አገልግሎት የምናውላቸው ናቸው፡፡ እስካሁን ድረስ ሥራ ላይ ያሉትን ተሽከርካሪዎች የምናሳድርበት ቦታ አልነበረንም፡፡ ቦታ ስላልነበረን በየወሩ 160 ሺሕ ብር እየከፈልን ነበር ተሽከርካሪዎቹን የምናሳድረው፡፡ በታሪፍ ላይ ቁጥጥር እየተደረገብን ለከተማው ሕዝብ አገልግሎት በመስጠት ያለውን የትራንስፖርት እጥረት ለመቅረፍ አስተዋጽኦ እያበረከትን ብንሆንም ለተሽከርካሪዎቻችን ማሳደሪያ መሬት ማግኘት አልቻልንም ነበር፡፡ ቦታ ለማግኘት ጠቅላይ ሚኒስትር ጽሕፈት ቤት ድረስ ሄደን አመልክተን ነበር፡፡ ውጤት ሳናገኝ ቆይተናል፡፡ አሁን ግን የአዲስ አበባ አስተዳደር መሬት እንድናገኝ ጥረት እያደረገ ነው፡፡ መሬቱ ተፈቅዶ በዚህ ሳምንት እንረከባለን ብለን እንጠብቃለን፡፡ ይህንን ቦታ ካገኘን ብዙ ወጪዎቻችን ይቀንሱልናል ማለት ነው፡፡ ከዚህ ባሻገር የአውቶቡሶቻችን ብዛት ሲጨምር ይወጣ የነበረውን ብክነት ይቀንስልናል፡፡ ለምሳሌ የአውቶቡሶቹ ቁጥር መጨመር የራሳችን ነዳጅ ማደያ ፓንፕ እንዲተከልልን ዕድል ይሰጠናል፡፡ የነዳጅ ኩባንያዎች ለ25ቱ አውቶቡሶች ብቻ ብለው ማደያ ለመትከል ፍላጎት አልነበራቸውም፡፡ አውቶቡሶቻችንን በየግለሰቦች ቦታዎች ላይ ስናሳድር ስለነበርና ቋሚ ቦታ ስላልበረን የነዳጅ ኩባንያዎች እኛ ብች የምጠቀምበት ፓምፕ ለመትከል ፍላጎቱ አልነበራቸውም፡፡ ከዚህ በኋላ ግን ቋሚ ቦታ ስለሚኖረንና በራሳችን ፓንፕ ስለምንቀዳ ብክነትን እንቀንሳለን፡፡ በእኛም ሆነ በመንግሥት ፍላጎት ተግባር ላይ የምናውለው ለትራንስፖርቱ የምናስከፍለው ክፍያ በካርድ እንዲስተናገድ ማድረግ ነው፡፡ ይህ በቲኬት ማጭበርበር ሊፈጠር የሚችለውን ችግር ያስቀራል፡፡ የካርድ ክፍያ ሥርዓቱ ተግባራዊ ሆነ ማለት ደግሞ ክፍያዎች በቀጥታ ወደ ኩባንያችን አካውንት ይገባሉ ማለት ነው፡፡ ይህ ትልቅ ለውጥ ነው፡፡ ሌላው ተሽከርካሪዎቹ ሲፈበረኩ አካል ጉዳተኞችን ታሳቢ ማድረጋቸው ነው፡፡ የአካል ጉዳተኞቹ በቀላሉ እንዲወጡና እንዲወርዱ የሚያስችል (ዊልቸል ራምፕ) አለው፡፡ አውቶማቲክ መሣሪያ የተገጠመለት ነው፡፡ ይህ እንግዲህ ለአገራችን የትራንስፖርት ዘርፍ አዲስ ነገር ነው፡፡

ሪፖርተር፡- እስካሁን በ25 አውቶቡሶች አገልግሎት ስትሰጡ ነበር፡፡ አትራፊ ነበራችሁ? አጠቃላይ የኩባንያው እንቅስቃሴ ምን ይመስል ነበር?

አቶ አዲል፡- እውነት ለመናገር እስካሁን የነበረው ሒደት አርኪ አልነበረም፡፡ እኛም ደስተኞች አልነበርንም፡፡ ምክንያቱም እስካሁን ድረስ የተረጋጋ ቦታ አልነበረንም፡፡ ከአከራዮች ጋር በየጊዜው ጭቅጭቅ ነው፡፡ በየጊዜው የኪራይ ዋጋ ይጨምሩብናል፡፡ የተሽከርካሪዎቹ ማሳደሪያ ሥፍራ ምቹ አልነበረም፡፡ እንዲህም ሆኖ የተከራየውን ቦታ ልቀቁ አንለቅም የሚለው ምልልስ ፈታኝ ነበር፡፡ ሌላው ቀርቶ በክረምት ወቅት በጭቃ ይያዙብን ነበር፡፡ አብዛኞቹ ጉዳዮች ከእኛ ቁጥጥር ውጭ ነበሩ፡፡ አሁን ግን የራሳችን ቦታ ስለሚኖረን በራሳችን መንገድ ምቹ ማሳደሪያ መሥራት እንችላለን፡፡ ከታሪፍ ጋር በተያያዘም በጣም አስቸጋሪ ሁኔታዎች ነበሩ፡፡ በታሪፍ ላይ ተግባብቶ በስምምነት መሥራት ባለመቻላችን ተፅዕኖ ስለነበረብን አርኪ ውጤት አላገኘንም፡፡

ሪፖርተር፡- ታሪፍ ላይ ችግር አለ ብለውኛል፤ ይህንን ግልጽ ቢያደርጉት፡፡

አቶ አዲል፡-  በአዋጅ በተሰጠው ሥልጣን መሠረት ታሪፍ የሚወሰነው በትራንስፖርት ባለሥልጣን ወይም በመንግሥት ነው፡፡ ታሪፍ ላይ ልንግባባ ያስፈልጋል፡፡ ተግባራዊ ይሆን የሚባለው የታሪፍ መጠን ወጪያችንን መሸፈን ስለመቻሉ ማረጋገጥ ይገባል፡፡ እንዲህ ያሉ ነገሮች ከግምት አልገቡም ነበር፡፡ ትልቁ ችግር የምለው በተለያዩ የመንግሥት አካላት ውስጥ በዚህ ጉዳይ ላይ የጋራ መግባባት አለመኖሩን ነው፡፡ በተለይ በአዲስ አበባ አስተዳድር፣ በፌዴራል ትራንስፖርት ባለሥልጣንና በአዲስ አበባ ትራንስፖርት ባለሥልጣን በኩል መግባባትና ቅንጅት ስላልነበር፣  በእኛ ሥራ ላይ ትልቅ ተፅዕኖ ፈጥሮብናል፡፡ አሁን ግን አንድ ሆነው እየሠሩ ነው፡፡ የማስተባበሩን ሥራ ትራንስፖርት ሚኒስቴር ወስዶ አስተዳደሩ የመሬት ጥያቄያችንን እንዲመልስ፣ የታሪፍ ጉዳይ ደግሞ በትራንስፖርት ባለሥልጣን እንዲፈታልን፣ የቀረጥ ጉዳዮችም በገቢዎችና ጉምሩክ ባለሥልጣን በኩል እንዲታዩ በማድረግ ተሽከርካሪዎቹ ከታክስ ነጻ እንዲገቡ እያደረጉ ነው፡፡ እንዲህ በትብብርና በቅንጅት የሚሠራው ሥራ በዘርፉ ትልቅ ለውጥ እንዲመጣ አስችሏል፡፡ ወደኋላ መለስ ብለን ስናይ በመጀመሪያው ሰሞን በብዙ ምክንያቶች መስዋዕትነት ከፍለናል፡፡ እውነት ለመናገር የከፈልነው መስዋዕትነት አስቸጋሪ ቢሆንም መቆየታችን ግን አሁን ለደረስንበት ደረጃ አብቅቶናል፡፡ መቆየታችን መንግሥት ባመቻቻቸው ዕድሎች ተጠቃሚ እንድንሆን ረድቶናል፡፡ ወጥተን ቢሆን ኑሮ የዚህ ዕድል ተጠቃሚ አንሆንም ነበር፡፡

ሪፖርተር፡- ከገለጻዎ እንደተረዳሁት ዘርፉን ለማሳደግ በተወሰደው ዕርምጃ ለውጥ መጥቷል፡፡ እናንተም ብዙ ተሽከርካሪ ለማስገባት ችላችኋል፡፡ ይህ ግን የአዲስ አበባ ከተማን የትራንስፖርት ችግር ይለውጠዋል?

አቶ አዲል፡- በትራንስፖርት ዘርፉ አልያንስ ብቻውን የሚፈጥረው ተዓምር የለም፡፡ ዘርፉ የተቀናጀ ሥራ ይፈልጋል፡፡ ለምሳሌ በአዲስ አበባ ትራንስፖርት አገልግሎት እንደዋና ተዋናይ የሚታዩት አንበሳ አውቶቡስ፣ ሸገር አውቶቡስና የአዲስ አበባ ቀላል ባቡር አሉ፡፡ ሁላችንም ተቀናጅተን ወደ ኤሌክትሮኒክ ቲኬት ሥርዓት እንድንገባ በአዲስ አበባ ትራንስፖርት ባለሥልጣን በኩል እየተሠራበት ነው፡፡ ይህ ወደ ሥራ ሲገባ በቲኬት ሰበብ የሚፈጠር ማጭበርበርና አላስፈላጊ እንግልት ይቀንሳል፡፡ ከታሪፍ ጋር በተያያዘ አትራፊነታችን፣ ካለብን የባንክ ብድርና አመላለስ አቅም ጋር ተሳቢ ተደርጎ፣ የሕዝቡም ተጠቃሚነት የማይጎዳበት ሁኔታ  ግምት ውስጥ ገብቶ የሚሠራ ይሆናል፡፡ እንዲህ ዓይነቱ ነገር ለእኛም ለዘርፉም ትንሳኤ ነው፡፡ እንደ አዲስ ራዕይ የምናየው ነው፡፡ አዲስ ነገር እየተፈጠረ ነው፡፡ በፊት ወደ ዘርፉ ለመግባት እኛው ስለፈለግን ለውጦችን ለመተግበር ትግል ነበር፡፡ ፍላጎታችንን ለማሳመን ብዙ ችግር ነበር፡፡ አሁን ግን ስንታገልለት የነበረው ነገር ተቀባይነት አግኝቶና መንግሥትም ተረድቶን የትግበራው አካል ሆኗል፡፡

ሪፖርተር፡- የአዳዲሶቹ አውቶቡሶች መግባትና አገልግሎት መጀመር በታሪፍ ላይ ለውጥ ያስከትላል፡፡ የእናንተ የአገልግሎት ታሪፍ ይኖራል? አሁን ባለው ታሪፍ በሸገር፣ በእናንተና በአንበሳ መካከል ያለውስ ልዩነት ምን ያህል ነው?

አቶ አዲል፡- አዲሱ ታሪፍ ገና አልወጣም፡፡ መቶዎቹ አውቶቡሶች ስለደረሱ ወደሥራ ለማስገባት በታሪፉ ላይ እየተነጋገርን እንገኛለን፡፡ ወደ ውድድር እንገባለን፡፡ ምናልባት ታሪፉ በአንድ በሁለት ሳምንት ተሠርቶ ያልቃል፡፡ የሸገር ታሪፍ ትንሽ ከፍ ይላል፡፡ አንበሳ አውቶቡስ ስለሚደጎም ዋጋው ዝቅ ይላል፡፡ እኛ መሐል ላይ ነን፡፡ እኛ እንደ አትራፊ ኩባንያ የተቋቋምን ስለሆነ እንደጎም አንልም፡፡ ነገር ግን እንደማንኛውም የኢንቨስትመንት ዘርፍ ልንበረታታ ይገባልናል፡፡ ዛሬ የአዲስ አበባን የትራንስፖርት ችግር ለመቅረፍ የምናደርገውና እያደረግን ያለው ጥረት ብሎም ለአዲስ አበባ የኢኮኖሚ ዕድገት የሚኖረው አስተዋጽኦ መታሰብ አለበት፡፡ ትልቁ የኢኮኖሚ እንቅስቃሴ ያለው እዚህ በመሆኑ ይህንን እየደገፈ ያለ ዘርፍ ነው፡፡ ይህንን የማያበረታታ የኢንቨስትመንት ማበረታቻ ለእኔ ሊገባኝ አይችልም፡፡ ምክንያቱም በየትኛውም ዓለም ብትሄድ የትራንስፖርት አገልግሎት ለአንድ አገር ኢኮኖሚ የደም ስር ማለት ነው፡፡ አዲስ አበባ ውስጥ ያለው የትራንስፖርት ችግር ከአቅም በላይ ነው፡፡ ችግሩ በዓይን የሚታይ ነው፡፡ የአውቶቡስ ቁጥር ስለጨመርክ፣ ባቡር ስለተጀመረ ብቻ አይፈታም፡፡ በዚያው ልክ የከተማው ነዋሪ እየጨመረ ነው፡፡ አዲስ አበባ እየሰፋችና እየተለጠጠች መጥታለች፡፡ አዲስ አበባ የአፍሪካ መዲናና የአገሪቱ ዋነኛ የግብይት ማከል በመሆኗ ለትራንስፖርት አገልግሎቱ ትኩረት መሰጠት የነበረበት ዛሬ አልነበረም፡፡ ዘግይቶም ቢሆን ግን ለውጡን ማየታችን ለእኛ ትልቅ ነገር ነው፡፡

ሪፖርተር፡- የአዳዲሶቹ አውቶቡሶች ስምሪት እንዴት ይሆናል?

አቶ አዲል፡- የአዲስ አበባ ትራንስፖርት አገልግሎት ከተደራሽነት አኳያ ብዙ ክፍተት አለበት ብዬ አምናለሁ፡፡ ለምሳሌ በቦሌ መንገድ ብዙ ታክሲና አውቶቡስ እንዲሰማራ ቢደረግ ብዙ ተሳፋሪ ላታገኝ ትችላለህ፡፡ በአንጻሩ በሌላው የአዲስ አበባ ክፍል ብዙ ሕዝብ ተሰልፎ የትራንስፖርት ያለህ ይላል፡፡ ይህ የሚያሳየኝ ተደራሽነቱን በተመለከተ በአግባቡ አለመሠራቱን ነው፡፡ እንዲህ ያለው ክፍተት መፍትሔ ይፈልጋል፡፡ ለዚህ ነው የአዲስ አበባ ትራንስፖርት ባለሥልጣን የሚባል መሥሪያ ቤት የተቋቋመው፡፡ ዋናው ሥራው ስምሪት ላይ ያለውን ችግር መፍታት ነው፡፡ ከዚህ መሥሪያ ቤት ጋር በመቀናጀት መስመሮች ላይ መረጣ እያደረግን ነው፡፡ ስለዚህ የሕዝቡን ፍላጎት የምናረካበትና እኛም ተጠቃሚ የምንሆንበትን አሠራር የሚያመቻች ነው፡፡

ሪፖርተር፡- በ25ቱ አውቶቡሶች ስንት መስመሮችን ታዳርሱ ነበር?

አቶ አዲል፡- ውስን ነበሩ፡፡ አምስት ወይም ስድስት መስመሮች ላይ ነበር የምንሠራው፡፡

ሪፖርተር፡- እስካሁን ምን ያህል ተሳፋሪዎችን አጓጉዛችኋል? አሁንስ?

አቶ አዲል፡- በቀን ከ20 እስከ 25 ሺሕ ተሳፋሪዎችን እናጓጉዛለን፡፡ በአዲሶቹ አውቶቡሶች (300 አውቶቡሶችና 25ቱን ጨምሮ) በቀን ከ350 ሺሕ እስከ 450 ሺሕ ተሳፋሪዎች ይጓጓዛሉ ብለን እንጠብቃለን፡፡ በአዲስ አበባ በአሁኑ ወቅት በአውቶቡሶች ብቻ በቀን የሚጓጓዙት ከ1.2 ሚሊዮን በላይ ይሆናሉ፡፡ ይህ ከፍተኛ ፍላጎት መኖሩን የሚጠቁም ነው፡፡ እኛ በሙሉ አቅማችን መሥራት ስንጀምር በቀን ይጓጓዛል ተብሎ ከሚገመተው 1.2 ሚሊዮን ተሳፋሪ መካከል አንድ አራተኛውን እንይዛለን፡፡ ከአውቶቡሶች ገበያም አንድ አራተኛው የእኛ ድርሻ ይሆናል፡፡ ይህ ለእኛ ትልቅ ዕድገት ነው፡፡

ሪፖርተር፡- የትራንስፖርት አገልግሎት ላይ የምናያቸው ነገሮች ተመሳሳዮች ናቸው፡፡ በተለይ የአውቶቡስ አገልግሎት ከሚሰጠው ስምሪት ጎን ለጎን በአንድ አጋጣሚ በአንደኛው የከተማው ክፍል ከፍተኛ ቁጥር ያለው ትራንስፖርት ፈላጊ መኖሩ ከተረጋገጠ ከስምሪቱ ውጭ እንዲህ ዓይነት ችግር ያለባቸውን ቦታ በማረጋገጥ ተሳፋሪዎች ወደተከማቹበት መስመር በፍጥነት በመሄድ ለምን አገልግሎት መስጠት አይጀመርም? መደበኛው ስምሪት እንደተጠበቀ ሆኖ ጊዜያዊ ስምሪት ለምን አይኖርም? እንዲህ ያለውን አሠራር አስባችሁበታል?

አቶ አዲል፡- እኛ እንደ ነጋዴ ነው የምንሠራው፡፡ እንደ ነጋዴ ሆኜ ስነግርህ የትኛውም መስመር ይሁን ሕዝብ ያለበት ቦታ ተገኝተን አጓጉዘን ገንዘብ ማግኘት ነው ዓላማችን፡፡ እንደሚመስለኝ ከመንግሥት አንጻር ሁሉንም የማየት ነገር አለ፡፡ በተቻለ መጠን አገልግሎቱ በፍትሃዊ መንገድ ሁሉም መስመር ላይ ማዳረስ የሚል አሠራር ነው፡፡ ከስምሪት አንጻር ግን የምናያቸው በርካታ ክፍተቶች አሉ፡፡ አንዳንድ ቦታዎች ላይ መኪኖች በዝተው ታያለህ፡፡ ተሳፋሪውን ግን አነስተኛ ሆኖ ትመለከታለህ፡፡ በሌላኛው መስመር ደግሞ መጓጓዣ ጠፍቶ በትራንስፖርት ጥበቃ ሰው በፀሐይ ሲንቃቃ ታያለህ፡፡ ስለዚህ እንዲህ ያለው ነገር መስተካከል ይኖርበታል፡፡ እኛም ከአስተዳደሩ ጋር እየተነጋገርንበት ነው፡፡ ነገሩን በመግባባት እንጨርሰዋልን ብዬ አምናለሁ፡፡ እስካሁን ባለው ሒደት በመግባባትና በቅንነት እየተጓዝን በመሆኑ ግባችንን ችግሩን በመፍታት ላይ አድርገን እየሠራን በመሆኑም የተሻለ ነገር ይፈጠራል ብዬ አምናለሁ፡፡ መንግሥት የዚህ ጉዳይ ባለቤት እኔ ብቻ ነኝ ብሎ ማሰብ የለበትም፡፡ ምክንያቱም እኛ ገንዘብ አውጥተን ወደዚህ ሥራ ስንገባ የጉዳዩ ባለቤቶች መሆን እንችላለን በማለት ነው፡፡ ስለዚህ የምናመጣቸው ሐሳቦችም በጋራ መፍትሔ እያገኙ ይሄዳሉ የሚል እምነት አለኝ፡፡ የትራንስፖርት ዘርፉ በአብዛኛው በመንግሥት ቁጥጥር ሥር ያለነው፡፡ በታሪፍ ጉዳይ አንዴ ከመንግሥት ጋር ስምምነት ላይ ከደረስክ ዋጋውን ከፍ ማድረግ አትችልም፡፡ መስመሮችን በተመለከተም አንዴ ስምምነት ላይ ከደረሰን በኋላም መኖር አለበት ብለን ብናምን እንኳ በፈለግንበት መስመር የመንቀሳቀስ ዕድሉ አይኖረንም፡፡ ዘመናዊነትን ከመፍጠር አኳያ የምንሠራው ሥራ አለ፡፡ ተጓዥ ደንበኞች ካርዳቸው ላይ ገንዘብ ይሞላሉ፡፡ በዚህ ካርድ መጓጓዝ የሚችሉትበን አሠራር አመቻችተናል፡፡ ከሞባይላቸው ላይ ወደ መጓጓዣ ካርዳቸው ገንዘብ የሚሞሉበትን አሠራር እየዘረጋን ነው፡፡ ለዚህ የሚሆኑ መሣሪያዎች ተገጥመዋል፡፡ እንዲህ ዓይነቶቹ አገልግሎቶች በቢዝነሱ ውስጥ ተመራጭ ሊያደርጉን ይችላሉ ብዬ አስባለሁ፡፡ ሌላው ለአካል ጉዳተኞች የተመቻቸ አገልግሎት ለመስጠት ብለን አውቶቡሶቹ እነሱን ታሳቢ ያደረጉ እንደሆኑ ማድረጋችን ለየት ያደርገናል፡፡ አማራጭ አገልግሎት ከመስጠት አኳያም በአንዳንዶቹ መስመሮቻችን ላይ የምንመድባቸው አውቶቡሶች ሁለት ዓይነት አገልግሎት እንዲሰጡ እናደርጋለን፡፡ ለምሳሌ ከቦሌ ፒያሳ ባለው መስመር የሚሰማሩት አውቶቡሶች ውስጥ አንዳንዶቹ ፌርማታዎቻችን ላይ እየቆሙ ተሳፋሪ እየያዙ እንዲሠሩ፣ ሌሎቹ አውቶቡሶች ደግሞ በፌርማታዎች ሳይቆሙ የበረራ አገልግሎት እንዲሰጡ የማድረግ አሠራር ሊኖረን ይችላል፡፡ ይህንንም እየተነጋገርንበት ነው፡፡

ሪፖርተር፡- የኤሌክትሮኒክስ አገልግሎት ከተጀመረ የእጅ በእጅ ሽያጩ ይቆማል ማለት ነው?

አቶ አዲል፡- በአንድ ጊዜ የሚመጣ ነገር የለም፡፡ የኤሌክሮኒክ አገልግሎት ሥራ ላይ ይውላል፡፡ ጎን ለጎን በእጅ እጅ ወይም ገንዘብ እየተቀበልን ማሳፈሩንም እንቀጥላለን፡፡ ነገር ግን የእጅ በእጅ ሽያጩ እየቀነሰ ይሄዳል፡፡ ምክንያቱም ኢ-ቲኬቱን በምንጀምርበት ወቅት ካርድ ስለሌለህ አናሳፍርም አይባልም፡፡ ተገልጋዩ ወደ ኢቲኤቲንግ እንዲገባ ግን የተለያዩ ማበረታቻዎችን እናደርጋለን፡፡ ለምሳሌ የአሥር ብር ካርድ ከገዛ በካርድ በመጠቀሙ የአንድ ብር ተጨማሪ አገልግሎት እንዲሰጠው እናደርጋለን፡፡ በሠለጠነው ዓለም በሰፊው የሚተገበር ነው፡፡ እንዲህ ማድረጋችን ለሁላችንም ነው የሚጠቅመው፡፡

ሪፖርተር፡- አሊያንስ ወደዚህ ቢዝነስ ሲገባ ከትራንስፖርት አገልግሎቱ ባሻገር ማቆሚያዎችንም እገነባለሁ ብሎ ነበር፡፡ ይህንን ግን አልተገበራችሁም፤ ለምን?

አቶ አዲል፡- አዎ ይህን ሐሳባችንን በወቅቱ ከአምስት ስድስት ዓመት በፊት ለአዲስ አበባ አስተዳደር አቅርበን ነበር፡፡ ውጤታማ አልሆነም፡፡ አንዳንዴ ሥራው ከራስህ ሲመጣ ተቀባይነት የማጣት ጉዳይ አለ፡፡ የሚገርምህ ነገር የዛሬ አንድ ዓመት ተኩል አካባቢ በአንድ ጋዜጣ ላይ ምክትል ከንቲባው ፓርኪንግ ለሚሠሩ ቦታ እንሰጣለን የሚል ዘገባ አነበብኩ፡፡ ከዚህ ዘገባ የተረዳሁት ፓርኪንግ እንዳስፈለገ ከመንግሥት በማመኑ እንዲተገበር መፈለጉን ነው፡፡ ፍላጎቱ ከመንግሥት መጥቷል ማለት ነው፡፡ ስለዚህ ነገሩን አይተን ወደ ፓርኪንግ ግንባታ ለመግባት ባለአክሲዮኖችን አሳምነን ልንገባ እንችላለን፡፡ በፊት ግን እጅግ አስቸጋሪ ነበር፡፡ እስካሁን የቆየነውም በትግል ነው፡፡ ላለመሞት የተደረገ ትግል ነው፡፡

ሪፖርተር፡- የታሰበውን ያህል ባለመሆኑ ባለአክሲዮኖች ላይ ቅሬታ አልፈጠረም?

አቶ አዲል፡- በትክክል ቅሬታ አሳድሯል፡፡ ይህ ምንም ጥያቄ የለውም፡፡ ግን ደግሞ ወደ ንግድ ሲገባ ማትረፍም ሆነ መክሰር ሊኖር ይችላል፡፡ ማንኛውንም ቢዝነስ የጊዜ ርዝመቱ ነው የሚለየው፡፡ ለተወሰነ ወቅት ዳዴ የሚልበት ጊዜ ይኖረዋል፡፡ እስካሁን የቆየነው ዳዴ እያልን ነው፡፡ ምክንያቱም በማንኛው ሥራ ላይ የመንግሥት ተነሳሽነት ወሳኝ ነው፡፡ ከመጋቢት ወር 2007 ዓ.ም. በፊት በእኛ አስተሳሰብ የአዲስ አበባ ትራንስፖርት በቂ ትኩረት ተሰጥቶታል ብለን አናምንም ነበር፡፡ የትራንስፖርት ዘርፉ ትኩረት እንዲሰጠው ግን ያላደረግነው ነገር አልነበረም፡፡ ብዙ ጎትጉተናል፡፡ አሁን ግን ትኩረቱ መጥቷል፡፡ ትኩረት መሰጠቱ ዳዴ ከማለት ወጥተን ቀና ብለን የምንራመድበትን ጊዜ አምጥቷል፡፡

ሪፖርተር፡- ከዚህ በኋላ አትራፊ ሆናችሁ ትቀጥላላችሁ?

አቶ አዲል፡- መሆን መቻል አለብን፡፡ ግዴታ ነው፡፡

ሪፖርተር፡- አሁን እየሠራችሁበት ባለው የማጓጓዣ ታሪፍ ይህንን ማሳካት ይቻላል?

አቶ አዲል፡- አዎ ይቻላል፡፡ ነገሮች ከተመቻቹ የማይቻልበት ምክያት የለም፡፡ ዋናውና ትልቁ ነበር የመንግሥት አካላት ለዘርፉ ትኩረት መሰጠታቸው ነው፡፡ ይህ ለእኛ ስኬት ወሳኝ ነው፡፡ ዛሬ እኮ ለሥራችሁ የሚሆን ቦታ ምረጡ እየተባልን ነው፡፡ የዛሬ አራትና አምስት ዓመት እባካችሁ ቦታ ይሰጠን ብለን አመልክተን ጥያቄያችንን የተቀበለው አልነበረም፡፡ ከክቡር ከንቲባው ጋር ከአንድ ሰዓት ተኩል በላይ ተወያይተን ጥያቄያችንን ተቀብለው፣ አስተዋጿችንንም አድንቀው፣ ቦታ ታገኛላችሁ መበረታታት አለባችሁ ብለውን በተግባር ግን ያየነው ነገር አልነበረም፡፡ ይኸው ዛሬ ግን ቦታ ምረጡ እየባልን ነው፡፡ በዚህ የምናድነው ገንዘብ ቀላል አይደለም፡፡ ከሁሉም በላይ እንደ አንድ ባለድርሻ፣ እንደ አንዱ የመፍትሔ አካል መቆጠራችን በሥራችን ወቅት ለሚያጋጥሙን ማንናቸውም ችግሮች እንድንወያይና መፍትሔ እየሰጠን እንድንሄድ ያስችለናል፡፡ ለአንድ ቢዝነስ ትልቁ ሥጋትና አስቸጋሪው ነገር የገበያ ጉዳይ ነው፡፡ ገበያ መኖርና አለመኖር ሊያሳስብ ይችላል፡፡ በእኛ ዘርፍ ወይም በአዲስ አበባ የትራንስፖርት መስክ ግን ገበያው አለ፡፡ በከቂ በላይ ገበያ አለ፡፡ ነገር ግን ገበያውን ለመጠቀም ሁኔታዎች ካልፈቀዱ ትርጉም የለውም፡፡ አሁን ባለው ሁኔታ ነገሮችን በእኛ ምዘና ስንለካቸው መንገሥት ምቹ ሁኔታ ፈጥሯል፡፡ የእኛ ተግባር ይህንን ምቹ ሁኔታ መጠቀም ብቻ ነው፡፡ እንዲህ በማድረግ አልያንስን ወደ ተሻለ ደረጃ የማሻገር ሥራ እንሠራለን ብዬ አምናለሁ፡፡ 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች