Monday, September 26, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    ኪሳራ ከማወራረድ በመለስ!

    ሰላም! እንዴት ይዟችኋል? መቼም ተስፋን በውስጣችን የመለኮስ ባለሙሉ ሥልጣን ባለቤት ስለሆንን፣ ማናችንም በኑሮ ሒሳብ መዛባት መባዘን እንደማይገባን ሳስብ ነበር በዚህ ሰሞን የሰነበትኩት፡፡ ለማሰቤ ምክንያቱ ደግሞ አንድ ከብዙ ዓመታት በፊት የተለየኝን የቀድሞ ወዳጄን ማግኘቴ ነው፡፡ መቼም፣ ‹‹ሰው ካልሞተ በስተቀር መገናኘቱ የማይቀር ነው›› የሚባለው አባባል በሕይወቴ የሠራው ለብዙ ጊዜ ነው፡፡ ደላላ አይደለሁም? ያከራየኋቸውን ሰዎች ሳስለቅቅ፣ መልሼ ሳከራይ፣ ያሻሻጥኩትን መልሼ ሳሻሽጥ ከስንት ሰዎችና ነገሮች ጋር በተደጋጋሚ እገናኛለሁ መሰላችሁ? ይህ ዓይነቱ ግንኙነት በድለላ ኑሮውን ለሚገፋው አምበርብር ምንተስኖት እጅግ ጠቃሚ ነው፡፡ የሕይወት ዕድሜ በአስተማማኝ እንዲቀጥል በተደጋጋሚ መገናኘቱ አይከፋም፡፡  

    መኖር ደግ ነው፣ ‹‹እንደ መሰንበት ያለ ሸጋ ነገር የለም፤›› አለኝ እንደኔ ከብዙ ዓመታት መለያየት በኋላ ዓይኔን ያየው ወዳጄ፡፡

     

    ‹‹ሁሉንም ያገኛል ሰው በሕይወት ካለ፣

    የሞተ ተጎዳ መቃብር ውስጥ ያለ፤›› ተብሏል አሉ፡፡ ስለመልሶ መገናኘት ምን ያልተባለ ነገር አለ? ‹‹እንገናኛለን እኔ አልቆርጥም ተስፋ…›› የሚለውን ዘፈን ስንቶች ተቀባብለው እንደዘፈኑት ሳስብ መልሶ መገናኘት ሁሌም ይኖራል ብቻ ሳይሆን የኑሮ አካል ነው፡፡ ይህ የቀድሞው ወዳጄ እንደኔው ደላላ ነው፡፡ ከረጅም ጊዜ በኋላ እንደመገናኘታችን መጠን አንዳችን ስለአንዳችን የማወቅ ጉጉታችን ጨምሮ ኖሮ በአንድ ጊዜ ሁለታችንም ለመናገር ስንደነቃቀፍ ቆየንና ስለሥራ፣ ስለ ቤተሰብ በአጠቃላይ ስለሕይወት ማውጋት ጀመርን፡፡

    ‹‹ምን እባክህ የዘንድሮን ነገር ለመርሳት መሞከር ከማሰቡ የከበደ ቢሆንም፣ የተቻለንን ያህል ብንጥር ነው የሚሻለን፡፡ ከኑሮ መክፋትና እንደ እቶን መንደድ አኳያ ቤተሰብ መምራት እስከማልችልበት ደረጃ ደርሻለሁ፡፡ መቼም አንድ አንተ ለራስህ አታንስም፡፡ ምናልባት ግን ለአንድ ለራስህ የምታንስበት ቀን ሊመጣም ይችል ይሆናል፡፡ ደግ ደጉን ካልተመኘህ፡፡ ለብዙ ስትሆን ግን አቅልህን ትስታለህ፡፡ እናም ይኼውልህ ይኼን ብለን እኔና ባለቤቴ ተማክረን ተለያየን፡፡ ቤተሰብ ከማስተዳደር ራስን ብቻ ለማስተዳደር መሞከር የሚል መፈክር አንግበን ተለያየን፡፡ ሳንለያይ ተለያየን፤›› አለኝ፡፡ በጣም ተገርሜ በአንድ በኩል ስለሰላማዊ ፍቺ የሰማሁበትን ቀን ለመዘከር እያውጠነጠንኩ፣ በሌላ በኩል ችግር ብልኃትን ይወልዳል እንዲሉ የሰው ልጅ ለመኖር የሚፈነቅላቸውን ደንቃራ መሰናክሎች በምናቤ ለመሳል ተጣጣርኩ፡፡ ምን ዋጋ አለው የደላላ እንጂ የሠዓሊ ፈቃድ ስለሌለኝ ተውኩት፡፡ ስንቱን ትተን እንችለዋለን ግን?

    ታዲያ ከዚህ የረጅም ጊዜ ወዳጄ ጋር የመጨዋወት ጉጉቴ ጨምሮ ቀልቤን ሰብስቤ አዳምጠው ቀጠልኩ፡፡ እሱም ስለሥራው ሁኔታ አጫወተኝ፣ ‹‹የሥራን ነገር አታንሳብኝ፡፡ ደላላ ማለት በተለይ አሁንማ ሙልጭ ያለ ሌባ የሚመስላቸው ሰዎች ብዙ ሆነዋል፡፡ እስኪ ይታይህ በጥቂት ገብጋባ ደላሎች ምክንያት ለሁሉም አንድ ዓይነት ስያሜ መሰጠት አለበት? በሩጫዬ መካከል አንድ ተጨማሪ ሥራ የሆነብኝ ደግሞ የደላላ ትርጉም ለተጣመመባቸው የማስተካከያ ስብከት ማስደመጥ ነው፤›› አለ ‹‹ደግሞ ምን እያልክ ነው የምትሰብከው?›› አልኩት፣ መልከ መልካምነቱን የዋጠውን የዕድሜን አረም እየታዘብኩ፡፡

    ‹‹ደላላ ከስም አንፃር እንኳ በአማርኛ ቋንቋ ብቻ ሳይሆን በእንግሊዝኛ ቋንቋ ስም አለው እያልኩ ነዋ፡፡ ደላላ ዓለም አቀፋዊ ነው፡፡ ደላላ የአገርና የዓለም ገበያ መኩሪያ ነው፡፡ ከፈለጋችሁ የየአገሩን ገበያ መርምሩ፡፡ ደላላ በእንግሊዝኛ ‘ብሮከር’ ይባላል፡፡ አሜሪካ የወደደችውንና ያመነችውን፣ እናንተ እነማናችሁ የምትጠሉትና የምትጠረጥሩት እያልኩ እሰብካለሁ፤›› ሲለኝ በፈገግታ ቅኝት የቅኔውን ፍቺ እየፈለቀቅኩ ጨዋታውን አጣጣምኩለት፡፡

    እንዲህ እንዲህ እያልን በመካከል ገዝፈው ያለያዩንን ረጅም የልዩነት ጊዜያት በአንድ ጊዜ ይጠቡ ይመስል ለመሙላት በብዙ የሐሳብ ሽርሽር ደከምን፡፡ ‹‹እንዲያው ይህን ያህል ጊዜ ስንለያይ ትዝ ብዬህ አውቃለሁ?›› ብዬ ትዝብትን ሳላጠምድ ጠየቅኩት፡፡ ‹‹አይ አንተ ሰው ከራሱ ጋር ተረሳስቷል እንኳን ከቀድሞ ወዳጁ፡፡ ትዝ ብትለኝም አፍታ ከውስጤ ሳትቆይ በኑሮ ኮተት ሐሳቦች ተጠርገህ ትጠፋለህ፡፡ የሆነው ሆኖ ፍቅርንና መተሳሰብን የሚያቀዘቅዝ ዘመን በአፍንጫችን ይውጣ፡፡ ለነገሩ እኛ ነን ፊት የሰጠነው፡፡ አየህ መሸ ነጋ ስለ ሆድአስበን፣ ስለ ሆድተጨንቀን፣ ስለምግብ አውርተን አናታችን ላይ አወጣነው፡፡ አኅጉር ከአገር እንደሚሰፋው ሁሉ ፍቅርና መተሳሰብም ከሆድ ይበልጣሉ፡፡ ይህ አልገባን ብሎ ነው መሰለኝ የዳዴአችን ዙሩ የበዛው፡፡ … ለምሳሌ ወታደርን ተመልከት፣ ውትድርናን ሲያስብ አብሮ ፈንጂ መርገጥን፣ በጦር ሜዳ መውደቅን ያስባል፡፡ እኛም ስለኑሮ አስፍተን ልናስብ የሚገቡን ብዙ ጉዳዮች አሉ፡፡ ለእነሱ ካልተዘጋጀን ትርፋችን ከራስ ጋር ፀብ ይሆንና ያርፋል፡፡ አየህ፣ ገባህ አይደል? ግን ምናባቱ አዕዋፋትን የሚመግብ አምላክ ለእኛ ደግሞ የዕለታችንን ያሳጣናል ብለህ ነው?›› አለኝ ትካዜውን የተስፋ ጽናት ጎልቶ ጋርዶለት፡፡ ለነገሩ ፀሎቱም የ‘ዕለት እንጀራችንን ስጠን’ አይደል?

    በእውነት የዚህ ጓዴ ለውጥ አስገረመኝ፡፡ በእሱ ለውጥ ውስጥ የእኔን ለውጥ አሰላሁት፡፡ ሒሳቡ ጨመረብኝ፡፡ መለየት የሚሉት ብሂል ግን ምንድን ነው? ከወደድነው ጋር አብሮ መኖር ለምን አቃተን? ትካዜ ትውስታዎቼን በረቂቅ ዳሰሳው በረበራቸው፡፡ ትዝታ በጓዴ ፊት ከዓይኖቼ እንባን ከመጥመቁ በፊት ተሰናብቼው ሰሞኑን ከገጠር የመጡትን ባሻዬን ጥየቃ ወደቤታቸው ሄድኩ፡፡

    ባሻዬ በቅርቡ ወደ ባላገር ዘመዶቻቸውን ጠያይቀው ተመልሰዋል፡፡ መቼም የድሮ ሰውና ብዙ ውጣ ውረድን አብሮ ያሳለፈ ዘመድም ባይሆን ይጠያየቃል፡፡ የባሻዬን ለየት የሚያደርገው አንድ ከተማ ተቀምጦ ሰው መጠያየቅ በተረሳበት ዘመን

    ‹‹ዘመን ደህና ሰንብት መንገድ ጉድ ያግኝህ፣

    ብድርም የለብኝ እኔም አልሸኝህ፤›› ብለው እሳቸው አገር ቤት ድረስ ሄደው መጠየቃቸው እጅግ ያስደምማል፡፡ እርጅና የተጫጫናቸው ባሻዬ ግን ገጠር ደርሰው ተመለሱ፡፡ ታዲያ ስለጉዞአቸውና ስለዘመዶቻቸው ልጠይቃቸው ቤታቸው ጎራ ስል፣ ያለወትሮአቸው ዳዊታቸውን በቀትር ያነበንባሉ፡፡ ሰላምታዬ እስከማይሰማቸው ድረስ ጮክ ብለው ዳዊታቸውን ሲያነቡ ነበር፡፡ ከስንት ትዕግሥትና መጠበቅ በኋላ ሲጨርሱ ዓይቼ በሰላም ደርሰው መምጣታቸውን ጠየቋቸው፡፡ ‹‹ኧረ ተወው የዘንድሮውንስ ነገር፣ ከሥርና ከላይ እንደ ገና ዳቦ ሆነ እኮ የእኛ ነገር አቤቱ ማረን፣ አቤቱ ይቅር በለን፣ ቱ ቱ ቱ…›› አሉ ወደ መሬት አቀርቅረው፡፡ ጨነቀኝ፡፡ ሁሌም ቢሆን ነገራቸው እንደዚህ ሲረዝምብኝ ይጨንቀኛል፡፡

    ምን እንዳዩ ወይ እንዳጋጠማቸው እንዲነግሩኝ ትዕግሥቴን ጨርሼ በብሽቀት ስጠይቃቸው፣ ‹‹መብረቅ ነዋ! መብረቅ ሰውን ፈጀው፡፡ ገባህ አይደል? ድንገት ሳይታሰብ ሕዝብ ሲያልቅ ምን ይባላል? ለእኔ ከላይ ይሁን ከታች ግራ ይገባኛል፡፡ ወይ ፈጣሪዬ…›› ብለው ሲነግሩኝ፣ እኔ ራሴ ሰሞኑን የበረገግኩባቸውን ቀናት ጥቂት አለመሆናቸውን ጨምሬ አስቤ እንዴት ነው ዘንድሮ መሬቱ መብረቅ፣ ሰማዩ መብረቅ ሆነ አልኩ፡፡ ‹‹የዘንድሮን አበሳ የላይኛው ጌታ ካልሆነ በስተቀር ማንም አይመልሰውም፤›› ብለው ወደ ዳዊታቸው ሲመለሱ እኔም አንገቴን ደፍቼ ተመለስኩ፡፡

    ይህን የባሻዬን ነገር ለባለቤቴ ማንጠግቦሽ ባጫውታት እሷም በፍርኃት ተርበደበደች፡፡ በዚህ ምክንያት ታዲያ በደላላነቴ ላይ ሌላ ሥራ ተጨምሮብኝ አረፈው፡፡ የማጽናናትና የመምከር ብሎም አለሁልሽ የማለት ነገር ተጨምሮበት የሰው አፍ ባምባረቀ ቁጥር እሷን እንደ ሕፃን ማቀፍ ሆኗል ሥራዬ፡፡ ይኼኔ ነበር ያ የቀድሞው ወዳጄ የነገረኝ የፍቺ ብልኃት እንደማይሠራ የገባኝ፡፡ ለካ ‹‹ሰው ለሰው መድኃኒቱ ነው›› የሚባለው እውነት ኖሯል? የአገራችን ሰው መቼም መተረት ያውቅበታል፡፡ ታዲያ በስንት ምክርና ማባበል ባለቤቴ ማንጠግቦሽ ከፍርኃቷ ብትላቀቅም፣ አልፎ አልፎ የወሬ መብረቅ ሲባርቅ ልቧ ብርግግ ይላል፡፡ ፍርኃቱ ነው መሰል ቅኔም ያስቀኛታል፡፡

    ‹‹መብረቁ በረቀ ልቤ በረገገ፣

    በኑሮና በሞት አሾፈና ሳቀ፣

    ስቆም አለቀሰ፤›› ስትል እሰማለሁ፡፡

    ቀድመን እንዳልነው ሰው ከሰነበተ መገናኘቱ ባይቀርም የመለየት ጊዜው ይኼው እንዳሁኑ እንደኛ ድንገት ነው፡፡ ብቻ ነገ እንዳሰብናትና እንደቀረፅናት ስለማትጠብቀን ስለትናንት በመተከዝ በትዝታ መኖር አይጠቅመንም፡፡ ዛሬን በምንሰማው ነገር አንደበታችንን ለጉመን በፍርኃት መራድ ትርፉ ውድቀትና ጉስቁልናን ያስከትላል፡፡ ‘አኅጉር ከአገር ትሰፋለች’ እንዳለው ወዳጄ፣ ነገን በሰፊ የተስፋ ብርሃን ብናስባት ሳይሻለን የሚቀር አይመስለኝም፡፡ ‘በትዝታ ከመኖር በተስፋ መኖር ይሻላል’ ያለውን ሰው ብናውቀው ኖሮ ይመቸን ነበር፡፡ ስለትናንት እያሰቡ ‹‹ድሮ ቀረ›› ከሚሉ ይልቅ ‹‹ነገን ነው መናፈቅ›› የሚሉ ልሂቃን ቢኖሩን ሳይሻል አይቀርም፡፡ እኔማ ሌሊቱ ነግቶ ነገን እስከማይ ድረስ ጊዜው ስለሚረዝምብኝ፣ በህልሜ ሳይቀር የነገዋን ቀን ማየት እፈልጋለሁ፡፡ ኪሳራን ማወራረድ የዋህነት ነው፡፡ አይጠቅምም፡፡ ኪሳራን በኪሳራ እያባዙ ከመንጎድ አዋጪውንና ቀናውን መንገድ መምረጥ የእኛ ፋንታ መሰለኝ፡፡ ሰላም ሁኑ! መልካም ሰንበት! 

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት