Thursday, July 25, 2024
- Advertisement -
- Advertisement -
የሳምንቱ ገጠመኝየሳምንቱ ገጠመኝ

የሳምንቱ ገጠመኝ

ቀን:

በቀደም ዕለት ምሣ ሰዓት ላይ ቅልጥ ያለ ዝናብ በመዝነቡ ምክንያት ቦሌ መድኃኔዓለም አካባቢ የሚገኝ አንድ ካፌ ውስጥ ተቀምጠን ወጋችንን እንሰልቃለን፡፡ ሰባት ሰዓት ተኩል የጀመረው ዝናብ ዘጠኝ ሰዓት ሊሆን ትንሽ እስኪቀረው ድረስ እንደ ጉድ ይወርዳል፡፡ ቢሮ የወዘፍኩት ሥራ ቢኖርብኝም አብረውኝ ምሣ ሲበሉ ከነበሩ ጓደኞቼ ጋር ቡና እየጠጣን ዝናቡ እስኪቆም እያወጋን ሳለ፣ አንድ ትልቅ ሰው አጠገባችን መጡ፡፡ እየወረደ ያለው ዝናብ ብስብስ አድርጓቸዋል፡፡ አንደኛው ጓደኛችን መቀመጫውን ለቆላቸው ተቀመጡ፡፡ ካፌው በጣም ከመጣበቡ የተነሳ መቀመጫ አልነበረም፡፡

ጓደኛችን እሳቸውን ካስቀመጠ በኋላ አንደኛውን ጓደኛችንን ተደግፎ በመቆም ወሬያችንን ስንቀጠል አዛውንቱ፣ ‹‹ልጄ ተባረክ፡፡ አንተም የዕድሜ ባለፀጋ ሆነህ ኖር የሚልህ አግኝ፡፡ ከታክሲ ወርጄ እዚህ ለመግባት አንድ ደቂቃ ባይፈጅብኝም፣ ይኼው እንደምታዩት የመስከረም ድንገተኛ ዝናብ የዋኘሁ አስመስሎኛል. . .›› ብለው ከት ብለው ሳቁ፡፡ እኛም በሳቅ አጀብናቸው፡፡ አዛውንቱ ሻይ በሎሚ አዘው፣ ‹‹ወጣቶች እናንተ ዝናብ አትወዱም፡፡ ሥራ ቦታ ላይ ብትፈለጉም በዝናብ አመካኝታችሁ ቁጭ ብላችኋል፡፡ ድሮ በእኛ ጊዜ አለቃ በጣም ይፈራ ስለነበር ዝናብ ሆነ ንዳድ፣ በረዶ ወረደም ጎርፍ አጥለቀለቀ በሰዓቱ ከች ነው፡፡ ልክ እንደ ወታደር. . .›› ብለው ሳቃቸውን ለቀቁት፡፡

እኝህ አዛውንት ተጫዋች ብቻ ሳይሆኑ ብዙ ነገር የሚያውቁ መሆናቸውን ለመረዳት ጊዜ አልወሰደብንም፡፡ ይልቁንም ዝናቡ ተግ አለ ስንል እንደገና ስለሚያገረሽበት ወጋቸውን ማዳመጥ ጀመርን፡፡ ‹‹ተወልጄ ያደግኩት እዚሁ አዲስ አበባ ሰሜን ማዘጋጃ አካባቢ ነው፡፡ የአንደኛና የሁለተኛ ደረጃ ትምህርቴን የተማርኩት ደግሞ መድኃኔዓለም ነው፡፡ ታውቁት የለ?›› ብለው አየት አደረጉን፡፡ እኔና አንደኛው ጓደኛችን ማወቃችንን ጭንቅላታችንን በመነቅነቅ ስንገልጽላቸው፣ ‹‹መድኃኔዓለም ማለት ቅዱስ ጳውሎስ ሆስፒታልን አለፍ ብላችሁ የምታገኙት ዝነኛ ትምህርት ቤት ነው፡፡ ስንት ትንታግ ወጣቶች ያፈራ፡፡ እኔም ከዚያ ነው የወጣሁት፡፡ የኮሌጁን ትምህርት ሁለተኛ ዓመት ላይ አቋርጬ አስተማሪ ሆንኩ፡፡ አሥር ዓመታት ያህል ካስተማርኩ በኋላ ትቼው ሌላ ሥራ ጀመርኩ፡፡ ንግድ፡፡ ከ20 ዓመታት በኋላ ለፍቼ ጠብ የሚል ሲጠፋ የግል ድርጅት ተቀጣሪ ሆኜ በዚያው ጡረታ ወጣሁ. . .›› ብለው አሁንም ሳቁ፡፡

‹‹በዚህ ሁሉ ዘመኔ ሦስት መንግሥታት አይቻለሁ፡፡ የንጉሡን ዘመን ነቅንቀን ለግብዓተ መቃብር ያበቃነው እኛ ነን፡፡ በበቂ ሁኔታ የደረጀን ስላልነበርን ግማሻችን መኢሶን፣ ሌሎቻችን ኢሕአፓ ሆነን እርስ በርስ ስንተጋተግ ደርግ አባ ጎዳዴ በጊዜያዊነት ስም ሥልጣኑ ላይ ወጥቶ አንድ ላይ ሰለቀጠን፡፡ ለክፉ የሚያደርስ ጠብ ሳይኖረን በመከፋፈላችን ብቻ ለደርግ ጨካኝ ብትር ተጋለጥን፡፡ ያለቁት አልቀው፣ የታሰሩት የእስር ቤት በር ተከርችሞባቸው፣ እግሬ አውጭኝ ያሉት ለስደት ተዳርገው፣ የተቀረነው ደግሞ በደርግ መዳፍ ውስጥ ሆነን 17 ዓመታት ነጎዱ፡፡ ይለይልን ብለው በረሃ የገቡት በለስ ቀንቷቸው ከ17 ዓመታት ትግል በኋላ የምኒልክ ቤተ መንግሥትን ተቆጣጠሩ፡፡ የእኛም ወጣትነት ወደ ጉልምስና፣ ከዚያም ወደ ሽምግልና ተቀይሮ ይኼው ታሪክን እንደ ተረት እናወራለን፤›› ብለው ለመጀመሪያ ጊዜ ፊታቸው ቅጭም አለ፡፡

ይኼኔ ከሁላችንም አነስ የሚለው ጓደኛችን፣ ‹‹አባት ይቅርታ ያድርጉልኝና እኔ የዚያ ዘመን ሰዎች አይመቹኝም፡፡ እርስ በርስ ይጣሉ የነበሩበት እዚህ ግባ በማይባሉ ምክንያቶች ነበር፡፡ ብዙዎቹ የጻፉዋቸውን መጻሕፍት አንብቤያቸዋለሁ፡፡ በጣም ይዋሻሉ፡፡ በዚህ ላይ ለተሰውት ጓዶቻቸው እዚህ ግባ የሚባል ዕውቅና ሳይሰጡ የራሳቸውን እንግልትና የመከራ ሕይወት ይተርኩልናል፡፡ በዚህ ላይ አሁንም ያኔ በተቃራኒ ጎራ የነበሩ ወገኖቻችውን በጠላትነት ዓይን ነው የሚመለከቱት፡፡ እነሱ የዘሩትን ጥላቻና የመጠፋፋት መንፈስ በዚህ ዘመን ትውልድ ላይ እየጫኑበት ነው፡፡ ‹ያ ትውልድ› የሚባለው የዚያን ዘመን ሰው ለይቅርታና ለምሕረት ግድ ስለሌለው አሁንም ቢመቸው ከመገዳደል አይመለስም፡፡ ለዚህ እኮ ነው ሰላማዊ ተቃውሞን መታገስ እያቃተ ምላሹ ጥይት ብቻ የሆነው. . .›› ብሎ በቁጣ ምሬቱን ገለጸ፡፡

አዛውንቱ አንገታቸውን በይሁንታ እየነቀነቁ በሐሳቡ መስማማታቸውን ሲገልጹ ከቆዩ በኋላ፣ ‹‹ልጄ አስተዋይ ነህ፡፡ እንዲህ ዓይነት አስተዋይነት ለመተራረም ጥሩ ነው፡፡ በእርግጥ ያኔ በወጣትነት ዘመን አብዮቱም ሆነ የትግል እንቅስቃሴው አዲስና ብርቅ ስለሆነ ሁሉም ሰው ስሜታዊ ቢሆን አይፈረድበትም፡፡ ነገር ግን ያ ሁሉ ዕልቂትና መከራ አገሪቱን የከል ሸማ ካለበሳት በኋላ መለስ ማለት መልካም ነበር፡፡ ከዚያም በኋላ ቢያንስ ባለፉት 25 ዓመታት ያ የተበላሸ ታሪካችን መለወጥ ሲገባው፣ ከመደብ ትንቅንቅ ትግል ወጥተን ወደ ብሔር ፖለቲካ ገባን፡፡ ብርቱ እርማት የሚያሻው ያ የተበላሸ ገጽታችን ሌላ መልክ ይዞ በመምጣቱ፣ እንኳን ከስህተት ለመታረም ከስህተት ወደ ስህተት መንጎድ የተለመደ ሆነ፡፡ መነጋገር የለ፡፡ መደማመጥ የለ፡፡ ሐሳብ ለሐሳብ ተለዋውጦ በጋራ ችግር ላይ መምከር የለ፡፡ ሁሉም የራሱን ትክክለኛነትና እውነት እየሰበከ ነው፡፡ እስቲ የተለያዩ አማራጮችን እንይ ሲባል ደግሞ የተለየ ነገር መስማት አይፈለግም፡፡ እርግጥ ያማል፡፡ እኔ ይኼ እጅግ በጣም ያናድደኛል፣ ይቆጨኛል. . .›› እያሉ ተብሰከሰኩ፡፡ ዝናቡ አቁሞ ስንለያይ አዛውንቱ በጥልቅ ሐዘን ውስጥ ነበሩ፡፡ እኛም የእሳቸው ተጋብቶብን የአገራችንን መፃኢ ዕድል እያሰብን እንደደበተን ወደ ሥራችን ተመለስን፡፡

(ኢዮብ ገናናው፣ ከገርጂ)

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

“ከሁለት ሳምንት በፊት ወደ ኤርትራ የማደርገውን በረራ እንዳሳድግ ተጠይቄ ነበር” የኢትዮጵያ አየር መንገድ

ኢትዮጵያ አየር መንገድ ወደ ኤርትራ የሚያደርገውን በረራ እንዲያሳድግ የሚጠይቅ...
00:06:46

የኤርትራ አቪዬሽን ባለሥልጣን የኢትዮጵያ አየር መንገድ በረራዎችን ማገዱን አስታወቀ

የኢትዮጵያ ሲቪል አቪዬሽን ባለሥልጣን ጉዳዩን እያጣራሁ ነው ብሏል በኤርትራ ትራንስፖርትና...

[ክቡር ሚኒስትሩ ከተቋሙ የሠራተኞች ማኅበር አመራር ጋር እየተወያዩ ነው]

ጤና ይስጥልኝ ክቡር ሚኒስትር? ሰላም! በአስቸኳይ እንደፈለጉኝ መልዕክት ደርሶኝ ነው የመጣሁት። አዎ።...

የሱዳን ጦርነትና የኢትዮጵያ ሥጋት

የሱዳን ጦርነት ከጀመረ አንድ ዓመት ከአራት ወራት አስቆጠረ፡፡ ጦርነቱ...