Thursday, October 6, 2022
ሌሎች ዓምዶች
    - Advertisment -
    - Advertisment -

    የአገር ህልውና ከፓርቲ ፖለቲካ በላይ ነው!

    ከአዲሱ ዓመት ዋዜማ ጀምሮ የገዢው ፓርቲ ኢሕአዴግ የ15 ዓመታት ጥልቅ ተሃድሶ ጉዳይ በሰፊው እየተነገረ ነው፡፡ የጥልቅ ተሃድሶው ሙሉ ውጤት በፌዴራል ደረጃም ሆነ በክልሎች በሚደረጉ የምክር ቤቶች የሥራ መጀመሪያዎች ላይ የሚታይ ቢሆንም፣ የኦሮሞ ሕዝብ ዴሞክራሲያዊ ድርጅት (ኦሕዴድ) ሊቀመናብርቱን አንስቶ በአዲስ ተሿሚዎች ተክቷል፡፡ በሌሎች የግንባሩ አባል ድርጅቶች የአመራሮች ሹም ሽር አለመታየቱ እንዳለ ሆኖ፡፡ ያም ሆነ ይህ የፓርቲ ፖለቲካው በገዢው ፓርቲ ውስጥ ባሉ ችግሮች ላይ ብቻ ሳይሆን፣ በአጠቃላይ የአገሪቱ የፖለቲካ ሥነ ምኅዳር ላይም መሠረታዊ ለውጥ ማምጣት ይኖርበታል፡፡ አገሪቱን ላለፉት 25 ዓመታት እያስተዳደረ ያለው ኢሕአዴግ ከ1993 ዓ.ም. ወዲህ ያሉትን የ15 ዓመት ጉዞዎች ሲገመግምና ዕርምጃ ለመውሰድ ተዘጋጅቻለሁ ሲል፣ በእነዚህ ዓመታት ለአገሪቱ መድበለ ፓርቲ ሥርዓት ግንባታ የሚረዱ እሴቶች ለምን እንደተናዱና መፍትሔውም ሊቀመጥ ይገባል፡፡ የአገር ህልውና ያለ ሥጋት የሚቀጥለው ሌሎች ተፎካካሪ ፓርቲዎችም በፖለቲካው መድረክ ላይ ሲገኙ ነውና፡፡

    የአገሪቱ የፖለቲካ ምኅዳር እጅግ በጣም በመዘጋጋቱና መላወሻ በመጥፋቱ ምክንያት ከገዥው ፓርቲ ጋር ብርቱ ፉክክር ማድረግ ይገባቸው የነበሩ የፖለቲካ ፓርቲዎች ተሽመድምደዋል፡፡ በመኖርና ባለመኖር መካከል ሆነው አልፎ አልፎ ስማቸው የሚነሳው ጥቂት ተፎካካሪ ፓርቲዎች በአደረጃጀት፣ በአባላት ብዛት፣ በሀብትና በመሳሰሉት እንኳን ገዥውን ፓርቲ ሊፎካከሩ፣ በሕይወት ቆይተው አሉ መባሉ በራሱ ትንግርት ነው፡፡ ምንም እንኳ የፖለቲካ ፓርቲዎቹ በገዛ ራሳቸው የፈጠሯቸው ውስጣዊ ችግሮች ቢኖሩዋቸውም፣ በገዥው ፓርቲ ተፅዕኖ ሳቢያ የደረሰባቸው ጉዳት ግን በጣም ከፍተኛ ነው፡፡ የመድበለ ፓርቲ ሥርዓት ያስፈልጋል ሲባል፣ በአገሪቱ ጉዳይ ያገባናል የሚሉ ዜጎች የመደራጀት መብታቸውን ተጠቅመው ፓርቲዎች በማቋቋም በምርጫ ብቻ የመንግሥት ሥልጣን መጨበጥ መቻልን ለማረጋገጥ ነው፡፡ የሥልጣን ምንጭ የሆነው ሕዝብ የሚፈልጋቸውን ወኪሎች በነፃነት መርጦ ለሥልጣን ማብቃት ማለት፣ የአገሪቱን ዴሞክራሲያዊ ሥርዓት ግንባታ ወደፊት ማራመድ መቻል ነው፡፡ በመሆኑም የመንግሥት ሥልጣን ከፓርቲዎች ወደ ፓርቲዎች በሰላማዊና በዴሞክራሲያዊ መንገድ ቅብብል ሲደረግ፣ አገር ሰላም ሁሉም ጤና ይሆናል፡፡ አምባገነናዊ አስተሳሰብ ሥፍራ ያጣል፡፡

    ገዥው ፓርቲ ኢሕአዴግ የጥልቅ ተሃድሶው ውጤት ከፖለቲካ ሥልጣን በላይ ሆኖ የአገርን ህልውና ማረጋገጥ አለበት፡፡ ለዚህ ደግሞ በሕገ መንግሥቱ በሰፈረው መሠረት ሁሉም ዓይነት መሠረታዊ መብቶች መከበር አለባቸው፡፡ ዜጎች በነፃነት የመደገፍና የመቃወም ዴሞክራሲያዊና ሰብዓዊ መብቶቻቸው በተግባር ሊታዩ ይገባል፡፡ የፖለቲካ ፓርቲዎች በሙሉ በእኩል ሜዳ ላይ ተሳታፊ የሚሆኑበት ምኅዳር መመቻቸት ይኖርበታል፡፡ ዜጎች በቀጥታም ሆነ በተዘዋዋሪ መንገድ ውክልና ሊኖራቸው ይገባል፡፡ ማናቸውም ዓይነት ሐሳቦች ያለምንም መሸማቀቅ እንዲንሸራሸሩ ዕድሉ ሊሰጥ ይገባል፡፡ ዜጎች በሚያራምዱት አቋም ምክንያት ችግር እንዳይገጥማቸው ጥበቃና ከለላ ማግኘት አለባቸው፡፡ የሀብትና የሥልጣን ክፍፍሉ ፍትሐዊና ተዓማኒነት እንዲኖረው የመንግሥት አሠራር ለሕዝብ ግልጽና ተጠያቂነት እንዲኖረው መደረግ አለበት፡፡ እነዚህንና ሌሎች መሰል በጣም አስፈላጊ ነገሮች ተግባራዊ ለማድረግ ከምንም ነገር በላይ የሕግ የበላይነት መስፈን አለበት፡፡ የሕግ የበላይነት በተግባር ሲረጋገጥ ለአገር ህልውና ይበጃል፡፡

    ዜጎች በገዛ አገራቸው ባይተዋር እንደሆኑ የሚሰማቸው ከዜግነት ይልቅ የፖለቲካ ወገንተኝነት የበላይነት ይዞ ጥቂቶች ሲጠቀሙ ነው፡፡ ከፖለቲካው ወገንተኝነት በተጨማሪ በዘር፣ በሃይማኖትና በመሳሰሉት ግንኙነቶች በሚፈጠሩ ኔትወርኮች በሙስና  የሚበለፅጉ በአደባባይ በግልጽ ሲታዩ የዜጎች ምሬት ወደ አመፅ ይቀየራል፡፡ አመፁ ወደ ግጭት ይለወጥና ለሞት፣ ለአካል ጉዳትና ለአገር ሀብት ውድመት ምክንያት ይሆናል፡፡ በአንድ አገር ውስጥ ለዜግነት ደረጃ የወጣለት ይመስል የሀብትና የሥልጣን ክፍፍሉ ልዩነት ሲጎላ ስለዴሞክራሲም ሆነ ስለሰብዓዊ መብት፣ እንዲሁም ስለሕግ የበላይነት መነጋገር አይቻልም፡፡ የፓርቲ ፖለቲካ ከመንግሥት የዕለት ተዕለት ሥራ ጋር ከመጠን በላይ ሲቀላቀል ውጤቱ አደገኛ ነው፡፡ የፖለቲካ ወገንተኝነት ከሌሎች አላስፈላጊ ትስስሮች ጋር እየተመጋገበ የአገር ሀብት ከማውደሙም በላይ፣ ወደማያባራ ግጭት በመክተት ከፍተኛ የሆነ ጥፋት ያስከትላል፡፡ በኦሮሚያና በአማራ ክልሎች የታየው ነውጥ የእንዲህ ዓይነቱ ተጠያቂነት የሌለበት አሠራር ውጤት ነው፡፡ የፓርቲ ፖለቲካ ከአገር ህልውና በላይ ሲሆን አደጋው የገዘፈ ይሆናል፡፡

    ኢሕአዴግ በተደጋጋሚ ሲተችባቸው ከቆዩ መሠረታዊ ችግሮቹ መካከል የመንግሥትና የፓርቲ ሥራን ማደበላለቁ ነው፡፡ ምንም እንኳ አገር የሚያስተዳድር ፓርቲ በመንግሥት ሥራ ውስጥ በቀጥታም ሆነ በተዘዋዋሪ አልፎ አልፎ የሚገኝባቸው አጋጣሚዎች ቢኖሩም፣ ሁሉንም ኃላፊነት ለፓርቲ አባላት ሰጥቶ መንግሥታዊ ተቋማትን የፓርቲ ቢሮ ማስመሰል ግን ኃላፊነት የጎደለው ድርጊት ነው፡፡ ይልቁንም ከፖለቲካ ተሿሚዎች (የበላይ አካላት) ውጪ የሆኑ ብቃት፣ ሙያ፣ ልምድና ሥነ ምግባር የሚፈልጉ ኃላፊነቶችን ለተመሰከረላቸው ግለሰቦች መስጠት ለሥራ አፈጻጸምም ሆነ ለግልጽነት በጣም ጠቃሚ ነው፡፡ ዘወትር የሚሰማው ‘ፖሊሲው የሚያሠራ ቢሆንም አፈጻጸም ላይ ድክመት ታየ’ የሚባለው አባባል፣ ሙያንና ባለሙያን ያለማገናኘት ችግር ነው፡፡ ይህ ለዓመታት የተፀናወተ ችግር ብዙዎችን መንግሥታዊ ተቋማት ከማሽመድመዱም በላይ፣ አገልግሎት ፈላጊ ዜጎችን በማስመረርና የአገርን ሀብት በማባከን ከፍተኛ ጥፋት አድርሷል፡፡ ከዕቅድ ጀምሮ እስከ አፈጻጸም ድረስ የሚታዩ ብዙዎቹ ዝርክርክነቶች ቢሮክራሲውን መሳቂያ አድርገውታል፡፡ ሹመት ብቃትን መሠረት ማድረግ ሲገባው የፖለቲካ መሣሪያ በመሆኑ በርካታ ጥፋቶች ደርሰዋል፡፡ በጠቅላይ ሚኒስትሩ ቃል እንደተገባው ዘንድሮ ሹመት ብቃትን መሠረት አድርጎ ከፓርቲ ውጪ ያሉ ዜጎችን ማካተት ካልቻለ ውጤቱ ታጥቦ ጭቃ መሆን ነው፡፡ አገር የሚያስፈልጋት የሚያገለግላት ብርቱ ዜጋ እንጂ የሚገለገልባት ወስላታ አይደለም፡፡

    የፓርቲ ፖለቲካ ጉዳይ ሲነሳ ሌሎች ተፎካካሪ ፓርቲዎችንም ይመለከታል፡፡ በተለይ በአገሪቱ በሰላማዊ መንገድ ለመታገል የተቋቋሙ ፓርቲዎች ምንም እንኳ ጫናው ቢበዛና ፈተናው ከባድ ቢሆንም፣ የትግል መንገዱ አልጋ በአልጋ አለመሆኑን ተገንዝበው ለተሻለ ሥራ መነቃቃት አለባቸው፡፡ ተበታትነው ከሚታገሉ ይልቅ ልዩነቶቻቸውን አጥብበውና ቅራኔያቸውን አለዝበው በግንባርም ይሁን በውህደት ጠንክረው መውጣት አለባቸው፡፡ የይስሙላ ፓርቲ ከመሆን ጠንካራና በሳል አመራሮች የሚወጡባቸው መሆን ይኖርባቸዋል፡፡ ከተራ ቧልትና ከተለመደው የብሽሽቅ ጎዳና ወጣ ብለው ለመድበለ ፓርቲ ሥርዓት መፈጠር የመታገል ኃላፊነት አለባቸው፡፡ እንታገልለታለን ከሚሉት የሥልጣን ዓላማ በላይ የአገር ህልውና እንደሚበልጥ በማወቅ፣ ሕዝብን ለማማለል ሳይሆን በእርግጥም መሬት ወርዶ ተግባራዊ መሆን የሚችል አጀንዳ ይዘው ህልውናቸውን ሊያሳዩ ይገባል፡፡ ተፎካካሪ ፓርቲዎች የአኩራፊዎች ምሽግ ከመሆን በላይ አገር ለመምራት የሚያስችል ቁመና እንዳላቸው በተጨባጭ የሚያሳይ ፕሮግራም ይዘው መቅረብ ካልቻሉ፣ ለራሳቸውም ሆነ ለአገር ህልውና አይረቤ ይሆናሉ፡፡ ከግለሰቦች አምልኮና በእነሱ ዙሪያ ከመኮልኮል አባዜ በመውጣት ሰላማዊ የፖለቲካ ትግላቸው ወጣቶችን የሚስብና ለዓላማ የሚያሠልፍ ቢያደርጉ የበለጠ ይጠቀማሉ፡፡ ለአገርም ይጠቅማሉ፡፡ ዴሞክራሲያዊ ሥርዓት የሚለመልመው ዓላማ ቢስ በሆነ ሥርዓተ አልባ ትግልና በፈልገሽ አምጪው የሰነፎች አስተሳሰብ አይደለም፡፡ ለአገር ህልውናም አይበጅም፡፡ ስለዚህ ‹‹ጨው ለራስህ ስትል…›› እንዲሉ በዚህ መንገድ ራስን ማዘጋጀት ለራሳቸውም ለአገርም ጠቃሚ ነው፡፡

    በአጠቃላይ የአገሪቱን ተጨባጭ ሁኔታ በአንክሮ ለሚገመግም ማንም ቅን ዜጋ የአገሪቱ የፖለቲካ ምኅዳር በዚህ መንገድ መቀጠል የለበትም፡፡ አንድ መቶ ሚሊዮን የሚጠጋ ሕዝብ ባለበት አገር መቼም ሆነ መቼም የአንድ ፓርቲ አስተሳሰብ ገዥ ሊሆን አይችልም፡፡ በመድበለ ፓርቲ ሥርዓት ሥልጣን በነፃና በዴሞክራሲያዊ ምርጫ የሚያዘው ከብርቱ ፉክክር በኋላ በጠባብ ልዩነት ባሸነፈ፣ ወይም የተቀራረበ ድምፅ ባገኙ ፓርቲዎች ቅንጅት ነው፡፡ የተለያዩ ፍላጎቶች ባሉበት አገር ውስጥ ዴሞክራሲያዊ ምርጫ መኖር የሚገባው ሥልጣን በኃይል እንዳይያዝና ለግጭቶች በር እንዳይከፍት ነው፡፡ ገዥው ፓርቲ በምርጫ 2007 ከነአጋሮቹ የፓርላማውን መቀመጫዎች መቶ በመቶ መቆጣጠሩ ጤነኛ አይደለም የሚባለው የፖለቲካ ምኅዳሩ በመበላሸቱ ምክንያት ነው፡፡ የእዚህ ውጤት ደግሞ ከኅዳር 2008 ዓ.ም. በኋላ ለተፈጠረው ቀውስ መነሻ መሆኑን ማስተባበል አይቻልም፡፡ ኢሕአዴግ ከጥልቅ ተሃድሶው ግምገማ ማግሥት በአመራሮቹም ሆነ በአባላቱ ላይ እወስደዋለሁ ከሚለው ዕርምጃ በተጨማሪ፣ የፓርቲ ፖለቲካው ዙሪያ ገባውን የአገር ችግርና ሥጋት የሚጋራ እንዲሆን ያድርገው፡፡ የራሱን ችግር ከማጥራት በተጨማሪ ለመድበለ ፓርቲ ሥርዓት ግንባታው ጥርጊያውን ያመቻች፡፡ የፓርቲ ፖለቲካ ከአገር ህልውና በላይ አይደለም!

    በብዛት የተነበቡ ፅሁፎች

    ባንኮች እንዲዋሀዱ እስከ ማስገደድ ሊገባ እንደሚችል ብሔራዊ ባንክ ጠቆመ

    በአሁኑ ወቅት የባንኮች ቁጥር እየጨመረ መምጣቱ ችግር የሚሆንና የውጭ...

    የተጨማሪ እሴት ታክስ አዋጅን የሚተካ ረቂቅ ተዘጋጀ

    ከቫት ነፃ የነበረው የኤሌክትሪክ ኃይል ገደብ ተቀመጠለት የገንዘብ ሚኒስቴር ከሃያ...

    አገር የሚገቡ የግል ዕቃዎችን በሚገድበው መመርያ ምክንያት በርካታ ንብረቶች በጉምሩክ መያዛቸው ተገለጸ

    በአየር መንገድ ተጓዦች ወደ አገር የሚገቡትን የግል መገልገያ ዕቃዎች...

    ከአማራ ክልል ወደ አዲስ አበባ የሚጓዙ በርካታ ሰዎች ወደ ከተማዋ እንዳይገቡ በፖሊስ መከልከላቸውን ገለጹ

    ‹‹የኦሮሚያ ክልል መፍትሔ እንዲሰጥበት አሳውቀናል›› የአማራ ክልል ኮሙዩኒኬሽን ቢሮ ‹‹ጉዳዩ...
    - Advertisment -

    ትኩስ ፅሁፎች