Monday, September 26, 2022
ሌሎች ዓምዶች
    - ማስታወቂያ -
    - ማስታወቂያ -

    የዱባዩ ግዙፍ ኩባንያ ሒልተን ሆቴልን ለመግዛት ጥያቄ አቀረበ

    - ማስታወቂያ -

    ተዛማጅ ፅሁፎች

    መስቀል አደባባይ አካባቢ የሚገኙትን ሁለት ያላለቁ ሆቴሎች የገዛው ግዙፉ የዱባይ ኩባንያ አልብዋርዲ ኢንቨስትመንት፣ አዲሰ አበባ የሚገኘውን ሒልተን ሆቴል ለመግዛት ጥያቄ አቀረበ፡፡

    የዱባዩ ኩባንያ ባለፈው ዓመት ኅዳር ወር ሒልተን ሆቴልን ለመግዛት ፍላጎት እንዳለው ለጠቅላይ ሚኒስትር ጽሕፈት ቤት ገልጾ ነበር፡፡ ምንጮች እንደገለጹት አልብዋርዲ ኢንቨስትመንት ከመንግሥት በጎ ምላሽ በማግኘቱ፣ ባለፉት አሥር ወራት ጥናት ሲያካሂድ ቆይቶ ሰሞኑን ለመንግሥት የልማት ድርጅቶች ሚኒስቴር ሆቴሉን ለመግዛት ዝርዝር ዕቅዱን አስገብቷል፡፡

    አልብዋርዲ ኢንቨስትመንት በቂርቆስ ክፍለ ከተማ፣ መስቀል አደባባይ አካባቢ በግማሽ ያለቁትን ሁለት ባለኮከብ ሆቴሎች ግዥ መፈጸሙ ይታወሳል፡፡

    የዱባዩ ኩባንያ ያላለቁትን ሆቴሎች የገዛው ከካራፊ ሆቴል ኢትዮጵያ ኃላፊነት የተወሰነ የግል ኩባንያ ነው፡፡ እነዚህ ሁለት ሆቴሎች በ10,232 ካሬ ሜትር ቦታ ላይ ያረፉ ሲሆን፣ አልብዋርዲ ኢንቨስትመንት ለሁለቱ ሆቴሎች 25 ሚሊዮን ዶላር ክፍያ በመፈጸም ሆቴሎቹን መግዛቱን መረጃዎች አመልክተዋል፡፡

    የሁለቱ ሆቴሎች ግንባታ በ2009 ዓ.ም. መጨረሻ እንደሚጠናቀቅና ሃያት ሬጀንሲ በሚባለው ታዋቂ የንግድ ስም እንደሚተዳደሩ ኩባንያው ገልጿል፡፡

    አልብዋርዲ ኢንቨስትመንት ከእነዚህ ሁለት ሆቴሎች በተጨማሪ፣ በኢትዮጵያ ቀዳሚ ባለአምስት ኮከብ ሆቴል የነበረውን ሒልተን አዲስ አበባ ለመግዛት ጥያቄ አቅርቧል፡፡

    ሒልተን ሆቴል በቀዳማዊ ኃይለ ሥላሴ ዘመነ መንግሥት ተገንብቶ በ1961 ዓ.ም. የመጀመሪያው ባለአምስት ኮከብ ሆቴል በመሆን ሥራ መጀመሩ ይታወሳል፡፡ ሒልተን በ62 ሺሕ ካሬ ሜትር ቦታ ላይ ያረፈ ግዙፍና ውብ ባለአምስት ኮከብ ሆቴል ነበር፡፡ አሁን ግን ደረጃው ወደ ሦስት ኮከብ ዝቅ ብሏል፡፡

    የኢትዮጵያ መንግሥት ይህንን ግዙፍ ሆቴል ለመሸጥ ጨረታ ባያወጣም የዱባዩ ኩባንያ ገፍቶ በመቅረብ ዕቅዱን ማቅረቡ ታውቋል፡፡

    የመንግሥት የልማት ድርጅቶች ሚኒስቴር ኮሙዩኒኬሽን ዳይሬክተር አቶ ወንዳፍራሽ አሰፋ ለሪፖርተር እንደገለጹት፣ አልብዋርዲ ኢንቨስትመንት ጥያቄ ስለማቅረቡ መረጃ የላቸውም፡፡ ነገር ግን መንግሥት ለሽያጭ የሚያቀርባቸውን ድርጅቶች ይፋ ሲያደርግ ፍላጎት ያለው ቀርቦ ይወዳደራል ብለዋል፡፡

    ‹‹ሒልተን ሙሉ በሙሉ የኢትዮጵያ መንግሥት ነው፡፡ እስካሁን ሆቴሉ ያለው ንብረት ወቅታዊ ዋጋ አልተጠናም፤›› በማለት አቶ ወንዳፍራሽ ገልጸዋል፡፡ ባለሙያዎች እንደሚናገሩት፣ ይህ ሆቴል ቀደም ሲል ከነበረው ባለአምስት ኮከብ ደረጃ ወደ ሦስት ኮከብ ዝቅ ያለ ሲሆን፣ ወደነበረበት ደረጃ ለመመለስ ትልቅ ዕድሳት ይፈልጋል፡፡

    መንግሥት ሒልተንን ለመሸጥ በይፋ ጨረታ ቢያወጣ የብሔራዊ ትምባሆ አክሲዮን ማኅበር ለሽያጭ ባቀረበበት ወቅት ያገኘውን ያልተጠበቀ ገንዘብ ሊያገኝ እንደሚችል ያሳስባሉ፡፡

    ብሔራዊ ትምባሆ ድርጅት ለሽያጭ በቀረበበት ወቅት አጠቃላይ ዋጋው 3.3 ቢሊዮን ብር ነበር፡፡ በዚህ ሥሌት 40 በመቶ የሚሆነው አክሲዮን ለሽያጭ ቀርቦ ነበር፡፡ ባለሙያዎች እንደሚሉት የየመኑ ኩባንያ ሼባ ኢንቨስትመንት፣ በድርጅቱ ላይ ድርሻ የነበረው እንደመሆኑ ግዥ እንዲፈጽም ቅድሚያ ተሰጥቶት ነበር፡፡

    ሼባ ኢንቨስትመንት ድርድር በማድረግ ተቀባይነት ቢያገኝም፣ የመን ውስጥ በተፈጠረው ቀውስ ክፍያ መፈጸም ባለመቻሉ ብሔራዊ ትምባሆ ለጨረታ ቀርቧል፡፡ ሼባ ክፍያ ቢፈጽም ለ40 በመቶ አክሲዮን 60 ሚሊዮን ዶላር በማቅረብ የትምባሆ ሞኖፖል ባለቤት ይሆን እንደነበር ባለሙያዎቹ ይገልጻሉ፡፡ ነገር ግን አክሲዮኑ ለጨረታ በመቅረቡ 40 በመቶው አክሲዮን 510 ሚሊዮን ዶላር ማግኘት መቻሉን በመጥቀስ፣ መንግሥት ጉዳዩን ሊያጤን እንደሚገባ ባለሙያዎች ያሳስባሉ፡፡

    የዱባዩ ኩባንያ ሒልተንን ለመግዛት ያቀረበውን የገንዘብ መጠን ማወቅ አልተቻለም፡፡  

        

       

     

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች