Wednesday, September 28, 2022
ሌሎች ዓምዶች
    - ማስታወቂያ -
    - ማስታወቂያ -

    ዛይራይድ የሞባይል ክፍያና የታክሲ አገልግሎት ከሚሰጡ ተቋማት የሦስትዮሽ ስምምነት ፈጸመ

    - ማስታወቂያ -

    ተዛማጅ ፅሁፎች

    ዛይራይድ የተባለውና በቅርቡ ሥራ የጀመረውና በሞባይል ስልክ አማካይነት የታክሲ አገልግሎት ለመስጠት የተነሳው ይህ ድርጅት፣ ዘመናዊና በአቅጣጫ አመላካች ወይም ጂፒኤስ የተገጠመላቸው፣ ተሳፋሪው በተጓዘበት ርቀት ልክ በታሪፍ የሚያስከፍሉ ታክሲዎችን ካሰማራው አብነት ባንድነት ኃላፊነቱ የተወሰነ የግል ማኅበር ጋር ቀደም ብሎም የሞባይል ባንኪንግ አገልግሎት እየሰጠ ከሚገኘው ኤም ብር ጋር የሦስትዮሽ ስምምነት ተፈራርሟል፡፡

    ሦስቱ ድርጅቶች በተስማሙት መሠረት ዛይራይድ ሶፍትዌር አፕሊኬሽኑን ለታክሲዎችና ለተጠቃሚዎች ያቀርባል፡፡ ታክሲዎቹም በዛይራይድ አማካይነት ከደንበኞች በሚቀርብላቸው አገልግሎት ጥሪ ስምሪት ውስጥ ይገባሉ፡፡ ለታክሲዎቹ የሚፈጸመውን ክፍያም ኤም ብር እንዲያስተናግድ ለማድረግ ዝግጅቶች መጠናቀቃቸው ታውቋል፡፡

    በአዲስ አበባ ከተማ ውስጥ በትንሹ ከ10,000 በላይ ታክሲዎች እንደሚያስፈልጉ የተለያዩ ጥናቶች ይጠቁማሉ፡፡ ይሁንና በከተማ አገልግሎት የሚሰጡት የ‹‹ላዳ›› ታክሲዎች ብዛት ግን ከ2,000 ብዙም ፈቅ አይልም፡፡ ከቁጥራቸው ማነስ ባሻገር ላዳ ታክሲዎች በሚጠይቁት ዋጋ ምክንያት ለአብዛኛው ሰው ተደራሽ አይደሉም፡፡ ሲብስም የዋጋቸው መጠን በዝናባማ ቀናትና በምሽት ወቅት እየባሰበት እንደሚሄድ ይገለጻል፡፡

    ይህ በመሆኑም በተለይ በሥራ መግቢያና መውጫ ሰዓት የሚታየው ሠልፍ ከፍተኛ እንዲሆን ካደረጉ ምክንያቶች መካከል ላዳ ታክሲዎች እንዲሆኑ አድርጓቸዋል፡፡ የላዳ ታክሲዎች እንደ ልብ ለሰው ፍላጎት አለመመቸታቸው፣ የሚጓዙት ርቀት ከሚኒባስ ታክሲዎችና ከአውቶቡሶች በንፅፅር አነስተኛ መሆንም በብዙዎች ዘንድ ተመራጭ እንዳይሆኑ ቢያደርጋቸውም፣ ይህንን እቀይራለሁ የሚል ወጣት ብቅ ብሏል፡፡

    ከአንድ ዓመት በላይ እየከለሰና እየሰለሰ ሲያዘጋጀው የቆየው የታክሲ አገልግሎትን የሚያቀላጥፈውን ሶፍትዌር፣ ‹‹ዛይራይድ›› ብሎ በመሰየም ለአገልግሎት ማብቃቱን የሶፍትዌሩ ባለቤት አቶ ሀብታሙ ታደሰ ይፋ አድርጓል፡፡ ዝዋይ ውስጥ ከሚገኙ የዛይ ማኅበረሰቦች መነሻውን እንዳደረገና ‹‹ራይድ›› የሚለውን የእንግሊዝኛ ቃል በማገጣጠም ዛይራይድ የሚል ስያሜ በመፍጠር ላዘጋጀው ሶፍትዌር መጠሪያ፣ ማበጀቱን ወጣቱ መግለጹን ጠቅሰን መዘገባችን ይታወሳል፡፡

    አቶ ሀብታሙ ያዘጋጀው የታክሲ አገልግሎት መስጫ ሶፍትዌር በአሜሪካና በአውሮፓ ከተሞች በስፋት አገልግሎት ከሚሰጠው፣ በቅርቡም ወደ አፍሪካ በመምጣት እንደ ጋና ያሉ አገሮችን ከተቀላቀለው የኡበር ኩባንያ አሠራር ጋር የሚመሳሰል ነው፡፡  በመሆኑም ታክሲ አሽከርካሪዎች ለአገልግሎቱ ተጠቃሚዎች በስልክ የድምፅ ጥሪ፣ አለያም በመልዕክት ወይም በኢንተርኔት አማካይነት አገልግሎቱን ይሰጣል፡፡ ይሁንና ኡበር የታክሲ አገልግሎቱን የሚሰጠው ባደጉ አገሮች ደረጃ፣ ቢያንስ የተሟላ መሠረተ ልማት ባላቸውና ፈጣን የኢንተርኔት አገልግሎት ማቅረብ በቻሉ አገሮች ውስጥ ነው፡፡

    ይህ ግን እንደ ኢትዮጵያ ላሉ፣ የመንገዶች፣ የጎዳናዎች ስያሜዎችና መጠሪያዎች በአግባቡ ተግባራዊ በማይደረጉባቸውና የኢንተርኔት አገልግሎት በፍጥነትም በብዛትም ባልተስፋፋባቸው አገሮች ውስጥ በቀጥታ ሶፍትዌር አገልግሎቱን ማስጀመር ባለማስቻሉ፣ ማሻሻዎች በማድረግና ለአገሪቱ ነዋባራዊ እውነታዎች እንዲስማማ መደረጉን ወጣት ሀብታሙ አብራርቷል፡፡ በመሆኑም ሥራ ላይ የዋለው ሶፍትዌር፣ ተሳፋሪው የተሳፈረበትን ታክሲ እንቅስቃሴ፣ በአቅጣጫ ጠቋሚና አመላካች (ጂፒኤስ)፣ ከመነሻ እስከ መድረሻ ድረስ ባሉ አቅጣጫዎች እንዴት እንደተጓዘ፣ ምን ያህል ርቀት እንደተጓዘ የሚለካ የኪሎ ሜትር መለኪያ (ሜትር) ተዘጋጅቶለታል፡፡

    አሽከርካሪዎችም ሆኑ ተሳፋሪዎች በስልኮቻቸው የዛይራይድ አፕሊኬሽንን በማውረድ፣ በኢሜል አድራሻቸው በመመዝገብና የስልክ ቁጥራቸውን በማስገባት አባል መሆን ይጠበቅባቸዋል፡፡ ይህን ካደረጉ በኋላ አገልግሎት ሲፈልጉ በሚያቀርቡት ጥያቄ መሠረት በአቅራቢያቸው የሚገኝ ታክሲ ወዳሉበት አካባቢ በመምጣት፣ ሲደርስም የጽሑፍ፣ የስልክ አለያም የኢሜይል መልዕክት በማስተላለፍ የጠሩት ታክሲ መምጣቱን ያሳውቃቸዋል፡፡ ከዚህም በተጓዳኝ አግልግሎቱን ለማግኘት ከመነሳታቸው ቀድሞ የሚጓዙበትን ርቀት ግምታዊ ዋጋ አስልቶ የሚያቀርብላቸው ሲሆን፣ ይህ ዋጋ ግን በትራፊክ መጨናነቅ ወቅት ሊጨምር እንደሚችልም አቶ ሀብታሙ ጠቅሷል፡፡ አዲሱ የሶፍትዌር አፕሊኬሽን ለሊሞዚን፣ ለመደበኛ የላዳ ተጠቃሚዎች እንዲሁም ለባጃጅ ተጠቃሚዎች አማራጭ ሆኖ የቀረበ ሲሆን፣ እስካሁን 536 ታክሲዎችና 10,000 ተጠቃሚዎች አገልግሎቱን ለማግኘት እንደተመዘገቡም አቶ ሀብታሙ አስታውቋል፡፡

    ተጠቃሚዎችና አሽከርካሪዎች ከኢንተርኔት አውርደው በስልካቸው የሚጭኑት ይህ ሶፍትዌር በነፃ የሚጫን ሲሆን፣ ዛይራይድ የሚያገኘው ጥቅም ምንድን ነው ለሚለው ጥያቄም አቶ ሀብታሙ ያብራራው፣ ከታክሲዎች የ20 ከመቶ ኮሚሽን በማስከፈል ይሆናል፡፡ አቶ ሀብታሙ እንደሚገልጸው፣ ኡበር በሚያራምደው ሥርዓት አማካይነት ከታክሲዎች እስከ 28 ከመቶ ኮሚሽን ይቀበላል፡፡

    አቶ ሀብታሙ የታክሲዎችን የዕለት ገቢ እንደሚጨምረው እርግጠኛ ሆኖ ሲያብራራም፣ በርካታ ታክሲዎች ያለምንም ሥራ የሚያሳልፉትን ጊዜ በዚህ ሶፍትዌር አማካይነት መቀነስ እንደሚቻል በማስረዳት ነው፡፡ በኬንያ የዚህ ዓይነት አገልግሎት ይፋ በመደረጉ የታክሲዎች ገቢ እስከ ሦስት እጥፍ ስለማደጉም ዋቢ ይጠቅሳል፡፡

    የ12 ዓመት ልጅ ሳለ ወደ አሜሪካ ያቀናው ወጣት ሀብታሙ፣ ከ13 ዓመታት ቆይታ በኋላ ወደ ኢትዮጵያ በመመለስ የሠራውን ሶፍትዌር ሥራ ለማስጀመር መብቃቱን ይናገራል፡፡ በአሁኑ ወቅት በሀብታሙ ብቸኛ ባለቤትነት የሚንቀሳቀሰውን ዛይራይድ የታክሲ አገልግሎት ኩባንያ፣ የአሜሪካና የዱባይ ኩባንያዎች አክሲዮን ገዝተው ለመግባት ጥያቄ ማቅረባቸውን ጠቅሷል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች