Monday, October 3, 2022
ሌሎች ዓምዶች
    - Advertisement -
    - Advertisement -
    ይድረስ ለሪፖርተርበቴዎድሮስ አደባባይ ለደረሰው አደጋ ተጠያቂው ማን ነው?

    በቴዎድሮስ አደባባይ ለደረሰው አደጋ ተጠያቂው ማን ነው?

    ቀን:

    ባለፈው ሳምንት በመዲናችን አዲስ አበባ ከተማ በቴዎድሮስ አደባባይ አካባቢ በደረሰው የመኪና አደጋ ውድ ሕይወታቸውን ባጡ አራት ሰዎች የተሰማኝን ከፍተኛ ሐዘን እየገለጽኩ፣ ስለ ጉዳዩ ያሰብኩት ብዙ ቢሆንም እስቲ ለአሁን ትንሽ ልበል።

    ሕይወት እንደ ዋዛ እንዲህ ሲጠፋ ማየት ኋላቀርነትንና ጥንቃቄ አልበኝነትን አጉልቶ ከማሳያቱ ባሻገር፣ እንዲህ ዓይነት ከባባድ ጥፋቶች ሲገጥሙ የተጠያቂነት ጨረር ወደ ብዙ የሚሄድ ሆኖ ሳለ፣ ወደተወሰኑት ብቻ ላይ አድልቶ ማየት ሌላ የባሰ አሳዛኝ እውነታ ነው።

    ሚኒባሱ 15 ሰዎች ጭኖ ሲጓዝ እንደነበር በዜናዎች ሰማን። ምንም እንኳን የሚዲያ ጋዜጠኞቻችንና ኤዲተሮቻችን ቸልተኞች ቢሆኑም፣ ‹‹በሁኔታው አራት ሰዎች ሕይወታቸው ሲያልፍ ሰባት ሰዎች ሕክምና እየተደረገላቸው ነው፤›› ሲሉ ሁለቱ ሰዎች ከቁጥር ውጭ አድርገው ነው ሪፖርት ያደረጉት። በሕይወት ከተረፉት አራቱ እንደ ሰው ያልተቆጠሩት ምክንያት ዘጋቢው ወይንም ዜና አንባቢው ግልጽ አላደረጉትም። እስቲ ይሁንና እንለፋቸው ምናልባትም በሁኔታው ተደናግጠው መሠረታዊ ስሌቱን ዘለውት ሊሆን ይችላል።

    ሌላው በጣም ያሳሰበኝ ነገር ለዚህ ጥፋት ዋና ተጠያቂ አሽከርካሪው መሆኑን ዋና ኢንስፔክተር አሰፋ መዝገቡ ተናገሩ። እኔ ዋና ተጠያቂ ያደረኩት ግን መንግሥትን ነው። አሁን እያወቃችሁ ለምን ትሉኝ ይሆናል። መንግሥት ለሕንፃ ሥራ መሬት ሲሰጥ የሕንፃ ሥራው እጅግ ከፍተኛ ጥንቃቄ ስለሚያስፈልገው፣ አግባብ ያለው ክትትልና ቁጥጥር አለማድረጉ ነው እላለሁ።

    መንግሥት በመገንባት ላይ የነበረው ሕንፃ የሠራው ጉድጓድ ውኃ ሞልቶ ለስንት ጊዜ የቆየና ለምን በጊዜው ውኃው ከኩሬው እንዳልተወገደ አለማየቱ ጥፋት ሲሆን፣ ሁለተኛ ተከሳሽና እንዲያውም ሕግ ፊት አቅርብ ብባል የማቀርበው የሕንፃውን ባለቤት ነው። አሁንም ለምን የሚል ጥያቄ ቢመጣ የምሰጠው መልስ ከላይ መንግሥት ቁጥጥር ያላደረገባቸው ስህተቶች እየተከታተለ ማሠራት እየቻለ በቸልተኝነት ማለፉ ያስጠይቀዋል እላለሁ።

    አሁን አሁን እያልን ያለነው የመንግሥትና የባለሀብቶች ለከት ያጣ የጥቅም ትስስር ለእንደዚህና ሌሎች ዘግናኝ ክስተቶች መብዛት ምክንያት መሆኑ ነው፡፡

    አብዛኞቹ ነጋዴ ባለሀብቶቹ ሕገወጦች ናቸው። በግንባታና ሕንፃ ሥራ ስም ሲሚንቶ አለምንም ንግድ ፈቃድ የሚነግዱ ሌቦች ናቸው። እንዲህ ዓይነት የሕገወጥ ንግድ ትርፍ እስኪያሽከረክሩ የቆፈሩት ጉድጓድ ረስተውት አይደለም ውኃ ለምን ደም አይሞላም ግዳቸውም አይደለም።

    ሦስተኛ ተጠያቂ የማደርገው የአሽከርካሪው ብቃትም ሆነ ጥንቃቄ ማነስና የተሽከርካሪው የተሟላ ብቃት ነው። 

    በሁኔታው ሕይወታቸውን ያጡት አራት ወገኖች የገደላቸው ጉዳይ ተደራራቢ ሁኔታ መስሎ ተሰማኝ። አንዱ የአሽከርካሪው ፍጥነት ሲሆን፣ ሁለተኛው የጉድጓዱ ጥልቀትና ያቆረ ውኃ መኖሩ ነው። በግጭቱ ጉዳት እንዲሁም በዚያ ላይ ውኃ ውስጥ መግባታቸውና ዋና ቢችሉም ባይችሉም እንኳን ድንጋጤው ብቻ እንዴት አደናባሪ እንደሚሆን አስቡት።

    በስተመጨረሻ በዚህ አደጋ ሕይወታቸውን ያጡ ወገኖቻችን ነፍሳቸው በገነት እንዲያኖርልንና ለወዳጅ ዘመዶቻቸው መጽናናትን በመመኘት፣ ከአደጋው ለተረፉትም ደግሞ የበለጠ የሞራል ጥንካሬና ሙሉ ጤንነትን አግኝተው ከሞት አፋፍ የተመለሰች ሕይወታቸውን በሚገባ እንዲያጣጥሙ እላለሁ፡፡ ከዚህ በኋላም ጥንቃቄ በተሞላበት አካሄድ ኑሮአቸውን እንዲመሩ  አበክሬ በመግለጽ፣ እንኳን ሕይወታችሁ ተረፈ ለማለት እወዳለሁ።

    (ዳንኤል ትካ፣ ከመቐለ)

    *************************

    መንግሥት ለሕዝብ ተቃውሞ በአፋጣኝ ምላሽ ይስጥ

    በሆነ ባልሆነ ይቅርታ መጠየቅ መልካም አይመስለኝም፡፡ ነገር ግን ይቅርታ ለጠየቁበት ጥፋት ግን ፈጣን ምላሽ ብቻ ሳይሆን ተገቢ ድርጊት መፈጸም ተገቢ ነው ባይ ነኝ፡፡

    ጳጉሜን 2 ቀን 2008 ዓ.ም. ባወጣችሁት የረቡዕ እትም ‹‹በወልቃይት ጉዳይ የትግራይ ክልል ውሳኔ አርኪ ካልሆነ ለፌዴሬሽን ምክር ቤት ለማቅረብ ስምምነት መደረሱ ተገለጸ፤›› በሚል ርዕስ ያወጣችሁት መጣጥፍ ልበለው? በእርግጥ በአማራ ቴሌቪዥን ርዕሰ መስተዳደሩ አቶ ገዱ አንዳርጋቸው ከአካባቢው ተወካይ ሽማግሌዎች ጋር ያደረጉትን ውይይት ተከታትየዋለሁ፡፡ ምን ታዘብክ? ብትሉኝ፣ መሪና ተመሪ አለመመጣጠናቸውን! መሪ ከሚመራው ሕዝብ የተሻለ ራዕይና ግብ፤ ዕውቀትና ችሎታ ሊኖረው ይገባል፡፡

    ሕዝብን የሚመራ መንግሥት ችግር ፈጣሪ ሳይሆን ችግር ፈቺ መሆን አለበት፡፡ አቅጣጫ አመላካች መሆን አለበት፡፡ በራሱ የሚተማመን መሪ መሆን አለበት እንጂ እንደ ገበቴ ውኃ መዋለልና ባህር ላይ እንደተጣለ ኩበት መንሳፈፍ የለበትም፡፡ ሕዝብ ላነሳው ጥያቄ መልስ መስጠት ያለበት ችግሩ የተፈጠረበት ክልል መሪ ነው ወይስ የትግራይ ክልል? ለመሆኑ ʻራስን በራስ የማስተዳደር መብትʼ ሲባል ሕዝባዊ ውሳኔ አያስፈልገውምን? ሕዝብ የሚፈልገውንና የመረጠውን መከተል አይችልምን? ማለቴ የሌላውን ብሔር መብት እስካልነካና ኢሕአዴግ እንደሚለው ʻሕገ መንግሥቱን በኃይል እስካልናደʼ ድረስ፡፡

    ታዲያ ይህ የፀደቀ ሕገ መንግሥታዊ መብት ለምንድን ነው ለወልቃይት ጠገዴ ሕዝብ የተነፈገው? ወደ ትግራይ ክልላዊ መንግሥት መፍትሔ ፍለጋ? በጣም ያሳፍራል! ይሄን ሕዝባዊ ጥያቄ በኃይል ማዳፈን ፈጽሞ አይቻልም!! የመንግሥትን ሥልጣን እስካልነካና የክልሎችን ማለትም ሕገ መንግሥቱን ʻያልናደʼ የብሔር ብሔረሰቦችን መብት ያልተጻረረ ጥያቄ እስከሆነ ድረስ፣ ፈጣን ምላሽ መስጠት ሲገባ እስካሁን ድረስ በከንቱ ደም መፋሰስ ባልተገባ ነበር፡፡

    እስኪ ከትግራይ ክልል ውጭ ያሉትን የየክልሉን ርዕሳነ ብሔር ተመልከቱ! አንዳቸውም በራስ የመተማመን መንፈስ አይታይባቸውም፡፡ ለዚህ ነው በየቦታው ችግሮችን ከመፍታት ይልቅ እያስፈራሩ፣ እያሠሩና እያንገላቱ አዳፍነው ያቆዩት ችግር ዛሬ ላይ ፈንድቶ ሥጋት ላይ የጣለን፡፡ ለዚህ ችግር ደግሞ ተጠያቂዎች የየክልሉ አስተዳዳሪዎች ብቻ ሳይሆኑ ሕወሓትም ጭምር ነው፡፡ ምክንያቱም የየክልሉ ርዕሳነ መስተዳድሮች በራስ መተማመን እንዳይኖራቸው በከፍተኛ ደረጃ ተፅዕኖ ስለሚደረግባቸው ነው፡፡ የተሳሳተም ሆነ ትክክለኛ ሐሳብ ሲያመነጩ መንቀፍና መደገፍ ብቻ ሳይሆን፣ የተነሳው ሐሳብ ምን ያህል ሕዝባዊ ተቀባይነትና ጠቀሜታ አለው ተብሎ መታየት ሲኖርበት፣ በደፈናው መፈረጅ የለበትም፡፡ ሌላ ስምም መለጠፍ ተገቢ አይደለም፡፡ ስለዚህ የሚሻለውን መፍትሔ መፈለግ የሕወሓትም ትልቁ የቤት ሥራ ሊሆን ይገባዋል፡፡ ጭፍን ጥላቻውን አስወግዶ ሕዝቦችን መስማትና በነፃነት ሐሳባቸውን እንዲገልጹ ብቻ ሳይሆን፣ በነፃነት እንዲንቀሳቀሱ መፍቀድ መቻል አለበት፡፡

    በሕወሓት የበላይነት የሚመራው ኢሕአዴግ ባለው ወታደራዊ ኃይልና መሣሪያ በመመካት የሕዝብን ቁጣ መናቅና የበለጠ ማቀጣጠሉን አቁሞ ሕገ መንግሥታዊ መብታቸውን ማክበር ይገባዋል፡፡ እስኪ ተመልከቱ እንግሊዝ ከአውሮፓ ኅብረት ስትወጣ ለምን ይመስላችኋል ሕዝበ ውሳኔ ያካሄዳቸው? የሚጎዳም ይሁን የሚጠቅም የሕዝብ ውሳኔው የተከበረውስ ለምን ይመስላችኋል? ምንድን ነው ኢሕአዴግ የሚሠራው? የወልቃይት ጉዳይ የወልቃይት ብቻ ነው ማለትስ ምን ማለት ነው? እንዲህ ከተባለስ የትግራይ ክልል ምክር ቤት ስለወልቃይት ምን ይመለከተዋል? ኦሮሞን በግድ አማራ ነህ ማለት ይቻላል? አማራውንስ በግድ ትግሬ ነህ ማለት ምን ይበጃል? ጉዳቱን ይኼው አየነው አይደል!

    ሕወሓት ከዚህ የጥላቻ ስሜትና አስተሳሰብ በመውጣት የብሔሮች ብሔረሰቦችና ሕዝቦችን እኩልነት ማክበርና አብሮ የመኖር መብታቸውን ማክበር አለበት፡፡ የትግራይን ሕዝብ ከኢትዮጵያ ሕዝብ በመነጠልና የተስፋፊነት ባህሪውን በፍጥነት ማረም ይገባዋል፡፡ የትግራይን ሕዝብ አማራው፣ ኦሮሞው፣ ጉራጌው፣ ወላይታውና ሌሎች ብሔር ብሔረሰቦች ያውቁታል፡፡ የትግራይ ሕዝብም በሕወሓት ጥቂት ከፍተኛ አመራሮች በጥላቻ ፖለቲካ እየተወናበደ ከሌሎች ኢትዮጵያውያን ተነጥሎ ሕወሓትን እሹሩሩ እያለ እንደማይኖር ግልጽ ነው፡፡ ሕወሓት አንድ ቀን ያበቃለታል፡፡ በትግል ወቅት ካሳለፋቸው ተሞክሮዎች ሊማር ይገባዋል፡፡ አገልጋይ ሳይሆን ተገልጋይ የሆኑ አባላቶቹን በጥብቅ መከታተልና መቆጣጠር ይገባዋል፡፡ አስቸኳይ የእርምት ዕርምጃ በመውሰድ ሕዝብን በግልጽ ይቅርታ መጠየቅ ያስፈልጋል፡፡ አለበለዚያ ግን እነ ሊቢያንና ግብፅን ይመልከት፡፡ ይህ በየቦታው እየተቀጣጠለ ያለ ተቃውሞ እንደ ማዕበል ጠራርጐ እስኪያጠፋው መጠበቅ አይኖርበትም፡፡ አለበለዚያ ለአሥራ ሰባት ዓመት የደማለትና የሞተለት ዓላማ እንደ ጉም በነፋስ ሲበተንና እንዳልነበረ ሲሆን ከመፀፀት፣ ፈጥኖ ማሻሻል አለበት እላለሁ አመሰግናለሁ፡፡

    (ኢያሱ አበበ፣ ከአዲስ አበባ) 

       

     

    - Advertisement -

    ይመዝገቡ

    spot_img
    spot_img