Monday, October 3, 2022
ሌሎች ዓምዶች
    - Advertisment -
    - Advertisment -

    አዲሱ ዓመት ለመንግሥት እውነተኛ የተግባር ዓመት መሆን አለበት!

    አዲሱ ዓመት ተጀምሯል፡፡ ነገር ግን ከአሮጌው ዓመት የተንከባለሉ በርካታ ችግሮች አሉ፡፡ አዲሱ ዓመት ለመንግሥት የተግባር ዓመት መሆን አለበት የሚባለው በአገሪቱ እጅግ በጣም አሳሳቢ የሆኑ ችግሮች ስላሉ ነው፡፡ እነዚህን የተደራረቡና የተወሳሰቡ ችግሮችን ለመፍታት የሚያስፈልገው ከልብ ለተግባር መነሳትና ሙሉ ፈቃደኝነት ነው፡፡ በ2008 ዓ.ም. ማጠቃለያ አካባቢ መንግሥት ራሱን በጥልቀት በማደስ ለውጥ እንደሚያመጣ ለሕዝብ ቃል ገብቷል፡፡ ይህ ቃል በተግባር ይረጋገጥ ዘንድ ቁርጠኝነት ሊኖር ይገባል፡፡ ቃል በተግባር ካልተደገፈ በተለያዩ አካባቢዎች የተነሱ ተቃውሞዎች የበለጠ እየተጋጋሉ ወደ አስፈሪ ቀውስነት ይሸጋገራሉ፡፡ ተቃውሞዎች ረግበው ሰላም እንዲሰፍን በአገር ጉዳይ በጋራ ለመምከር የሚያስችል ሰፊ ምኅዳር መፈጠር አለበት፡፡ ለዚህ ደግሞ ተግባር ይቅደም፡፡

    መንግሥት በ2009 ዓ.ም. ለውጥ እንዲያመጣባቸው ከሚፈለጉ መሠረታዊ ጉዳዮች መካከል የፖለቲካ ምኅዳር በሚገባ መስፋት፣ የሰብዓዊና የዴሞክራሲያዊ መብቶች በሚገባ መከበር፣ ሐሳብን በነፃነት የመግለጽ መብት በተግባር መረጋገጥ፣ ፍትሐዊ የሀብትና የሥልጣን ክፍፍል መኖር፣ ሙስናን ያለምሕረት ማስወገድ፣ ለመልካም አስተዳደር መጥፋት መንስዔ የሆኑ ጉድለቶችን ማረም፣ ብልሹ አሠራሮችን ማስወገድ፣ ፍትሕ ማስፈን፣ የሕግ የበላይነትን ማረጋገጥና የመሳሰሉት ከብዙ በጥቂቱ ናቸው፡፡ በአዲሱ ዓመት ሕዝብ ከመንግሥት የሚጠብቃቸው ናቸው፡፡ ሕዝብ በተግባር ያልታጀበ ቃል መግባት ሰልችቶታል፡፡ ከሚወራው ይልቅ በተግባር የሚታየውን ይመርጣል፡፡ መንግሥት በተከታታይ የገባቸውን ቃል ኪዳኖች ያክብር፡፡ በተግባር ያሳይ፡፡

    በአዲሱ ዓመት ለውጥ ከሚደረግባቸው መካከል የከፍተኛ ተሿሚዎች ጉዳይ አንዱ ነው፡፡ በሚካሄደው ለውጥ በብቃት ያልሠሩና ችግር አለባቸው የሚባሉ ባለሥልጣናት ያለምንም ማንገራገር መሰናበት አለባቸው፡፡ በሕግ መጠየቅ ያለባቸውም ካሉ ያለምንም ምሕረት ሊጠየቁ ይገባል፡፡ ቅጣታቸውንም መቀበል አለባቸው፡፡ የሚታሰሩም ከሆነ እንዲሁ፡፡ በምትካቸው በትምህርት፣ በሥራ ልምድ፣ በሥነ ምግባርና በሌሎች የብቃት መመዘኛዎች ሕዝብ የሚተማመንባቸው መሾም አለባቸው፡፡ የፓርቲ አባልነትን መሥፈርት የሚያደርገው ሹመት ወደ ጎን ተብሎ ሕዝባቸውን በብቃትና በቅንነት ሊያገለግሉ የሚችሉ የፓርቲ አባላት ያልሆኑ ዜጎች ሊሾሙ ይገባል፡፡ በሕዝብ ዘንድ ተቀባይነት የሌላቸው፣ ለአገር ክብርና ደንታ ሳይኖራቸው የራስ ጥቅም ለማጋበስ ብቻ ያሰፈሰፉ፣ ብቃት የሌላቸውና ሥነ ምግባር የጎደላቸው አያስፈልጉም፡፡ ሕዝብን የሚያገለግሉ ዴሞክራቶችና ለሕዝብ ራሳቸውን አሳልፈው የሚሰጡ አገር ወዳድ ዜጎች በባትሪ ጭምር ይፈለጉ፡፡ ለዚህም ተግባር ይቅደም፡፡

    ሕዝብና መንግሥትን ሆድና ጀርባ ካደረጉ ነገሮች መካከል አንደኛው ስለልማትና ዕድገት የሚነገረው ነው፡፡ ነጋ ጠባ ሕዝቡ ዘንድ ያልደረሰ ልማት ስለሚደሰኮር መተማመን እንዲጠፋ አደረገ፡፡ በተለይ በመንግሥት ቁጥጥር ሥር በሚገኙ መገናኛ ብዙኃን ሕዝብ ዘንድ በቅጡ ያልደረሰ የልማትና የዕድገት ወሬ ሲደጋገም፣ ሕዝቡ ደግሞ የባለቤትነት ስሜት አጣ፡፡ አገሪቱ በእርግጥም የልማት ጅማሮዎች ላይ ብትሆንም አሁንም እጅግ በጣም የከፋ ድህነት አለ፡፡ በብዙ ሚሊዮን የሚቆጠሩ ወጣት ሥራ አጦች አሉ፡፡ በየጊዜው መጠኑ እየጨመረ እንደ እሳት የሚለበልብ የኑሮ ውድነት አለ፡፡ በመኖሪያ ቤት ዕጦት  ለኑሮ ተስማሚ ባልሆኑ ጭርንቁስ መንደሮች ውስጥ ተፋፍጎ የሚኖረው ሕዝብ ብዛት በጣም ብዙ ነው፡፡ ከሰሐራ በታች ካሉ የአፍሪካ አገሮች ተርታ በዝቅተኛ ደረጃ ላይ የምትገኝ አገር ውስጥ ዕድገቱ ተጋኖ ሲነገር ይኼ ደሃ ሕዝብ እንዴት ያምናል? እሴት ያልጨመሩ ጥቂቶች ሚሊየነር በሆኑበት በዚህ ጊዜ ሕዝብ እንዴት ሆኖ ነው የልማቱ ባለቤት ሆነ የሚባለው? እነዚህን የማይጣጣሙ ጉዳዮች ለማስታረቅ በሚዲያ አጠቃቀም፣ በሕዝብ ግንኙነትና በመሳሰሉት መስኮች መሠረታዊ ለውጥ ያስፈልጋል፡፡ አሁንም ተግባር ያሻል፡፡

    ይህ ዘመን በቴክኖሎጂ የመጠቀ እንደመሆኑ መጠን በድሮ ዓይነት አሰልቺ ፕሮፓጋንዳ ወጣቱን ለመቅረብ መሞከር ፈጽሞ ጥቅም የለውም፡፡ ጉዳቱ ያመዝናል፡፡ ወጣቱ ማኅበራዊ ሚዲያዎችን ጨምሮ በዓለም ላይ እጅግ የመጠቁ መደበኛ ሚዲያዎችን የመከታተል ዕድሉ ሰፊ በመሆኑ፣ ቀድሞ በሚታወቀው አሰልቺ ሥልት ሊታለል አይችልም፡፡ መንግሥት ወጣቱን መቅረብ የሚችለው ፍላጎቱንና ሥነ ልቦናውን በሚገባ ሲያውቅ ብቻ ነው፡፡ በተለይ ኢሕአዴግ ሥልጣን ሲይዝ ሕፃናት የነበሩና ከዚያ ወዲህ የተወለዱ ወጣቶች ደርግን አያውቁትም፡፡ ኢሕአዴግ ራሱን ከደርግ ጋር እያወዳደረ የልማት አርበኛ ነኝ ሲል አይገባቸውም፡፡ እያንዳንዱ ትውልድ በዘመኑ የራሱ ጥያቄ ስላለው ወጣቱ ኢሕአዴግን የሚጠይቀው ከድርጊቱ በመነሳት ነው፡፡ ይህንን የዘመኑ ትውልድ ጊዜ ባለፈበት ፕሮፓጋንዳ ለመቅረብ መሞከር አደጋ አለው፡፡ ጥያቄ ሲያቀርብ ከሥርዓቱ እንከኖች ከተቀዱ ችግሮች በመነሳት እንጂ፣ በሌሎች ኃይሎች እየተገፋ ነው በማለት መደምደም ትክክል አይሆንም፡፡ ዴሞክራሲን በተግባር ሳይመለከት ስለዴሞክራሲ መኖር ሲነገረው አይቀበልም፡፡ በችግር እየተሰቃየ ዕድገት አለ ሲባል ይመረዋል፡፡ በዚህ ሳቢያ ለአመጽ ይነሳል፡፡ ስለዚህ ለወጣቱ ትውልድ የሚመጥን ለውጥ በተግባር ይረጋገጥ፡፡

    መንግሥት በየጊዜው እንዲህ አደርጋለሁ በማለት ከሚገባው ቃል በላይ በተግባር የተደገፈ ውጤት ይጠበቅበታል፡፡ መንግሥት የሚናገረውን በተግባር ካላሳየ ሕዝብ አይሰማውም፡፡ የመታለል ስሜት ስለሚሰማው ለመንግሥት ምሕረት አያደርግም፡፡ ይህ ደግሞ በጣም አደገኛ ችግር ይጋብዛል፡፡ መንግሥት በመንግሥትነቱ ማከናወን የሚገባው ኃላፊነት እንዳለበት እየታወቀ ልማትና ዕድገት አምጥቻለሁ፣ ይህንና ያንን ሠርቻለሁ ብሎ መመፃደቅ ያቁም፡፡ እርስ በርስ ከሚደረግ የይስሙላ መገማገም ወጥቶ ራሱን በሕዝብ ያስገምግም፡፡ ከሕዝብ ጋር የሚያጣሉ አጓጉል ድርጊቶችን አስወግዶ ለእውነተኛና ለትክክለኛ ለውጥ ራሱን ያዘጋጅ፡፡ ከሥልጣን በላይ የአገር ህልውና ይቅደም፡፡ እስካሁን የተፈጸሙ ስህተቶች በዜጎች ሕይወት፣ አካልና ንብረት ላይ ከፍተኛ ጠባሳ ትተው አልፈዋል፡፡ በሕዝብና በአገር ህልውና ላይ አደጋ ደቅነዋል፡፡ እነዚህን መሠረታዊ ጉዳዮች ከግምት ውስጥ በማስገባት መንግሥት በአዲሱ ዓመት ለእውነተኛና ለትክክለኛ ለውጥ ይነሳ! ተግባር! ተግባር! ተግባር!      

    በብዛት የተነበቡ ፅሁፎች

    የንብረት ታክስ ጉዳይ በሁለቱ ምክር ቤቶች የጋራ ጉባዔ ቀዳሚ አጀንዳ ይሆናል ተባለ

    መስከረም 30 ቀን 2015 ዓ.ም. በሚጀምረው የሕዝብ ተወካዮችና የፌዴሬሽን...

    መንግሥት ለሶማሊያ የፀጥታ ኃይሎችና የመንግሥት ሠራተኞች ሥልጠና ለመስጠት ቃል ገባ

    የኢትዮጵያ መንግሥት ለጎረቤት አገር ሶማሊያ የመንግሥት ሠራተኞችና የፀጥታ አካላት...

    የኢትዮጵያ ባንኮችን የማዋሃድ አስፈላጊነት ፍንትው ያደረገው ዓመታዊው የአፍሪካ ባንኮች የደረጃ ምዘና ሪፖርት

    የአፍሪካ ባንኮችን በየዓመቱ በመመዘንና ደረጃ በመስጠት የሚታወቀው አፍሪካ ቢዝነስ...

    በዕድሳት ምክንያት የተዘጋው የአዲስ አበባ ስታዲየም በቅርቡ ለአገልግሎት ክፍት ይሆናል

    የአደይ አበባ ስታዲየም ግንባታ በሚፈለገው ልክ እየተከናወነ እንዳልሆነ ተገልጿል ከስፖርታዊ...
    - Advertisment -

    ትኩስ ፅሁፎች

    የንብረት ታክስ ጉዳይ በሁለቱ ምክር ቤቶች የጋራ ጉባዔ ቀዳሚ አጀንዳ ይሆናል ተባለ

    መስከረም 30 ቀን 2015 ዓ.ም. በሚጀምረው የሕዝብ ተወካዮችና የፌዴሬሽን...

    መንግሥት ለሶማሊያ የፀጥታ ኃይሎችና የመንግሥት ሠራተኞች ሥልጠና ለመስጠት ቃል ገባ

    የኢትዮጵያ መንግሥት ለጎረቤት አገር ሶማሊያ የመንግሥት ሠራተኞችና የፀጥታ አካላት...

    ኢሬቻ/ኢሬሳ – የምስጋና ክብረ በዓል

    ክረምቱ አብቅቶ የመፀው ወቅት፣ በአፋን ኦሮሞ የቢራ (ራ ጠብቆ...