Thursday, April 18, 2024
- ማስታወቂያ -
- ማስታወቂያ -

የዓለም ባንክ በሰጠው 300 ሚሊዮን ዶላር ብድር የትራንስፖርት ሥርዓት ማሻሻያ ፕሮጀክት ሥራ ጀመረ

ተዛማጅ ፅሁፎች

–  በሰባት ዓመታት የአገሪቱ የትራንስፖርት ሥርዓት ሙሉ በሙሉ ዘመናዊ ይሆናል ተብሏል

የዓለም ባንክ በቅርቡ 300 ሚሊዮን ዶላር ብድር ያፀደቀለት የኢትዮጵያ የትራንስፖርት ሥርዓት ማሻሻያ የተሰኘው ፕሮጀክት ሥራ ጀመረ፡፡ ፕሮጀክቱ በአብዛኛው በአዲስ አበባ ከተማ ውስጥ ተፈጻሚ እንደሚደረግ ይጠበቃል፡፡

የፕሮጀክቱን ወደ ሥራ መግባት በማስመልከት ሐሙስ ነሐሴ 12 ቀን 2008 ዓ.ም. በተካሄደ ዓውደ ጥናት ወቅት የትራንስፖርት ሚኒስትር ዴኤታው አቶ አብዲሳ ያደታ እንደገለጹት፣ በአገሪቱ ከተመዘገቡት 708 ሺሕ ያህል ተሽከርካሪዎች ውስጥ 426 ሺሕ ያህሉ በአዲስ አበባ የሚንቀሳቀሱ ናቸው፡፡ ይሁንና በእነዚህ ተሽከርካሪዎች ሳቢያ በሚደርስ አደጋ ከ100 ሺሕ ሰዎች 64 ያህሉ ሕይወታቸውን እያጡ ይገኛሉ ያሉት ሚኒስትር ዴኤታው፣ የአገሪቱን የትራንስፖርት ሥርዓት የሚያዘምን አዲስ ፕሮጀክት በዓለም ባንክ ፋይናንስ አማካይነት መተግበር መጀመሩን አስታውቀዋል፡፡

በአገሪቱ በተለይም በአዲስ አበባ ከፍተኛ የመኪና ማቆሚያ ዕጦት ችግር፣ ደካማ የትራፊክ ቁጥጥርና አስተዳደር፣ የአውቶቡሶችና ታክሲዎች ተርሚናል እጥረት እየደረሰ ካለው የሕይወት ጥፋት፣ የአካል ጉዳትና የንብረት ውድመት ባሻገር የአካባቢ ብክለትና በከፍተኛ ደረጃ እየጨመረ የመጣውን የትራፊክ መጨናነቅና ሌሎችም ጉዳቶች እየተስፋፉ በመምጣታቸው፣ ዘመናዊ የትራንስፖርት ሥርዓት መመሥረት አስፈልጓል ተብሏል፡፡

አገሪቱን በዓለም ላይ አስከፊ የትራፊክ አደጋዎች መከሰቻ ያሰኛትን የትራንስፖርት ሥርዓት ለመቀየር በተለይ በከተሞች አካባቢ ያለውን የቆየ ልማዳዊ አሠራር በዲጂታል ሥርዓት የሚተካው አዲሱ ፕሮጀክት ለእግረኞች የሚመቹ የእግረኛ መንገዶችን፣ ለዚህም የሚረዱ አምስት ዋና ዋና መተላለፊያዎች (ኮሪደሮች) እንደሚገነቡ የትራንስፖርት ባለሥልጣን ዋና ዳይሬክተር አቶ ካሳሁን ኃይለ ማርያም ለሪፖርተር ገልጸዋል፡፡ ለእግረኞች ምቹ መንገዶች እንደ ልብ ባለመኖራቸው ምክንያት በአዲስ አበባ ከተማ አንድ ኪሎ ሜትር ያህል ርቀት በእግር መጓዝ አዳጋች እየሆነ መምጣቱን አቶ ካሳሁን አክለዋል፡፡

እንደ አቶ ካሳሁን ገለጻ ከሆነ አዲሱ ፕሮጀክት የአገሪቱን የመንጃ ፈቃድና የመኪና ፈቃድ አሰጣጥ ሥርዓት በዲጂታል ሥርዓት ይቀይራል፡፡ የአንበሳ አውቶቡስን ጨምሮ ሁሉም የመንግሥትና የግል ትራንስፖርት አገልግሎት ሰጪ ድርጅቶች በጋራና በአንድነት የሚጠቀሙበት የኤሌክትሮኒክስ ቲኬት ሥርዓት ይጀመራል፡፡ የአንበሳ አውቶቡስ ዴፖዎችና የአስተዳደር ሥርዓትም እንደሚቀየር አቶ ካሳሁን አስታውቀዋል፡፡ የትራፊክ ፍሰትን በተማከለ ሥርዓት በመቆጣጠሪያ ካሜራዎች በመታገዝ የሚመራ አሠራር እንደሚተገበር ያብራሩት አቶ ካሳሁን፣ ሙሉ በሙሉ ፕሮጀክቱን አጠናቆ ለመተግበር ሰባት ዓመታት ይጠይቃል ብለዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች