Sunday, April 21, 2024
- ማስታወቂያ -
- ማስታወቂያ -

የኡበር ታክሲዎችን መነሻ ያደረገና የታክሲ አገልግሎትን የሚመራ ሶፍትዌር ይፋ ሆነ

ተዛማጅ ፅሁፎች

–  ለአሽክርካሪዎችና ተሳፋሪዎች አማራጭ ተደርጓል

በአዲስ አበባ ከተማ ውስጥ በትንሹ ከ10,000 በላይ ታክሲዎች እንደሚያስፈልጉ የተለያዩ ጥናቶች ይጠቁማሉ፡፡ ይሁንና በከተማ አገልግሎት የሚሰጡት የ‹‹ላዳ›› ታክሲዎች ብዛት ግን ከ2,000 ብዙም ፈቅ አይልም፡፡ ከቁጥራቸው ማነስ ባሻገር ላዳ ታክሲዎች በሚጠይቁት ዋጋ ምክንያት ለአብዛኛው ሰው ተደራሽ አይደሉም፡፡ ሲብስም የዋጋቸው መጠን በዝናባማ ቀናትና በምሽት ወቅት እየባሰበት እንደሚሄድ ይገለጻል፡፡

ይህ በመሆኑም በተለይ በሥራ መግቢያና መውጫ ሰዓት የሚታየው ሠልፍ ከፍተኛ እንዲሆን ካደረጉ ምክንያቶች መካከል ላዳ ታክሲዎች እንዲሆኑ አድርጓቸዋል፡፡ የላዳ ታክሲዎች እንደልብ ለሰው ፍላጎት አለመመቸታቸው፣ የሚጓዙት ርቀት ከሚኒባስ ታክሲዎችና ከአውቶቡሶች በንፅፅር አነስተኛ መሆንም በብዙዎች ዘንድ ተመራጭ እንዳይሆኑ ቢያደርጋቸውም፣ ይህንን እቀይራለሁ የሚል ወጣት ብቅ ብሏል፡፡

ከአንድ ዓመት በላይ እየከለሰና እየሰለሰ ሲያዘጋጀው የቆየው የታክሲ አገልግሎትን የሚያቀላጥፈውን ሶፍትዌር፣ ‹‹ዛይራይድ›› ብሎ በመሰየም ለአገልግሎት ማብቃቱን የሶፍትዌሩ ባለቤት አቶ ሀብታሙ ታደሰ ይፋ አድርጓል፡፡ ዝዋይ ውስጥ ከሚገኙ የዛይ ማኅበረሰቦች መነሻውን እንዳደረገና ‹‹ራይድ›› የሚለውን የእንግሊዝኛ ቃል በማገጣጠም ዛይራይድ የሚል ስያሜ በመፍጠር ላዘጋጀው ሶፍትዌር መጠሪያ፣ ማበጀቱን ወጣቱ ነሐሴ 10 ቀን 2008 ዓ.ም. በሰጠው ጋዜጣዊ መግለጫ ወቅት አትቷል፡፡

አቶ ሀብታሙ ያዘጋጀው የታክሲ አገልግሎት መስጫ ሶፍትዌር በአሜሪካና በአውሮፓ ከተሞች በስፋት አገልግሎት ከሚሰጠው፣ በቅርቡም ወደ አፍሪካ በመምጣት እንደ ጋና ያሉ አገሮችን ከተቀላቀለው የኡበር ኩባንያ አሠራር ጋር የሚመሳሰል ነው፡፡  በመሆኑም ታክሲ አሽከርካሪዎች ለአገልግሎቱ ተጠቃሚዎች በስልክ የድምፅ ጥሪ፣ አለያም በመልዕክት ወይም በኢንተርኔት አማካይነት አገልግሎቱን ይሰጣል፡፡ ይሁንና ኡበር የታክሲ አገልግሎቱን የሚሰጠው ባደጉ አገሮች ደረጃ፣ ቢያንስ የተሟላ መሠረተ ልማት ባላቸውና ፈጣን የኢንተርኔት አገልግሎት ማቅረብ በቻሉ አገሮች ውስጥ ነው፡፡

ይህ ግን እንደ ኢትዮጵያ ላሉ፣ የመንገዶች፣ የጎዳናዎች ስያሜዎችና መጠሪያዎች በአግባቡ ተግባራዊ በማይደረጉባቸውና የኢንተርኔት አገልግሎት በፍጥነትም በብዛትም ባልተስፋፋባቸው አገሮች ውስጥ በቀጥታ ሶፍትዌር አገልግሎቱን ማስጀመር ባለማስቻሉ፣ ማሻሻዎች በማድረግና ለአገሪቱ ነዋባራዊ እውነታዎች እንዲስማማ መደረጉን ወጣት ሀብታሙ አብራርቷል፡፡ በመሆኑም ሥራ ላይ የዋለው ሶፍተዌር፣ ተሳፋሪው የተሳፈረበትን ታክሲ እንቅስቃሴ፣ በአቅጣጫ ጠቋሚና አመላካች (ጂፒኤስ)፣ ከመነሻ እስከ መድረሻ ድረስ ባሉ አቅጣጫዎች እንዴት እንደተጓዘ፣ ምን ያህል ርቀት እንደተጓዘ የሚለካ የኪሎ ሜትር መለኪያ (ሜትር) ተዘጋጅቶለታል፡፡

አሽከርካሪዎችም ሆኑ ተሳፋሪዎች በስልኮቻቸው የዛይራይድ አፕሊኬሽንን በማውረድ፣ በኤሜል አድራሻቸው በመመዝገብና የስልክ ቁጥራቸውን በማስገባት አባል መሆን ይጠበቅባቸዋል፡፡ ይህን ካደረጉ በኋላ አገልግሎት ሲፈልጉ በሚያቀርቡት ጥያቄ መሠረት በአቅራቢያቸው የሚገኝ ታክሲ ወዳሉበት አካባቢ በመምጣት፣ ሲደርስም የጽሑፍ፣ የስልክ አለያም የኢሜይል መልዕክት በማስተላለፍ የጠሩት ታክሲ መምጣቱን ያሳውቃቸዋል፡፡ ከዚህም በተጓዳኝ አግልግሎቱን ለማግኘት ከመነሳታቸው ቀድሞ የሚጓዙበትን ርቀት ግምታዊ ዋጋ አስልቶ የሚያቀርብላቸው ሲሆን፣ ይህ ዋጋ ግን በትራፊክ መጨናነቅ ወቅት ሊጨምር እንደሚችልም አቶ ሀብታሙ ጠቅሷል፡፡ አዲሱ የሶፍትዌር አፕሊኬሽን ለሊሞዚን፣ ለመደበኛ የላዳ ተጠቃሚዎች እንዲሁም ለባጃጅ ተጠቃሚዎች አማራጭ ሆኖ የቀረበ ሲሆን፣ እስካሁን 536 ታክሲዎችና 10,000 ተጠቃሚዎች አገልግሎቱን ለማግኘት እንደተመዘገቡም አቶ ሀብታሙ አስታውቋል፡፡

አቶ ሀብታሙ ያስተዋወቀውን ሶፍትዌር ጠቀሜታ በዚህ ብቻ አይገልጸውም፡፡ በታክሲ አማካይነት የሚፈጸሙ ወንጀሎችን ለመቀነስም ፋይዳ አለው፡፡ ምክንያቱም ተሳፋሪውም አሽከርካሪውም ከየት ተነስተው የት እንደደረሱ፣ የት እንደቆሙ፣ ምን ያህል እንደተጓዙ ሁሉ መረጃውን ያስተላልፋልና ነው፡፡ ለምሳሌ ወላጆች በማይመች ሁኔታ ውስጥ ሆነው ልጆቻቸውን በታክሲ አሳፍረው መላክ ቢፈልጉ፣ አሳፍረዋቸው ያለችግር ካሉበት ቦታ ሆነው የታክሲውን እንቅስቃሴ መቆጣጠር የሚችሉበት አሠራር (ትራከር) አለው፡፡ ታክሲው ላይ አደጋ ቢከሰት አለያም ያልታሰበ ነገር ቢገጥመው መልዕክት ስለሚያስተላልፍም የት አካባቢ ሆኖ ችግር እንደገጠመው የሚጠቁም መረጃ ያስተላልፍላቸዋል፡፡

እንዲህ ያሉ ጠቀሜታዎችን ይዞ ብቅ ያለው የታክሲ አገልግሎት ሶፍትዌር እስካሁን የሚታየውን የላዳ ታክሲዎች ዋጋ አተማመን ወጥ ለማድረግ እንዲሁም የ20 ከመቶ ዋጋ ቅናሽ ለማምጣት እንደሚያስችል አቶ ሀብታሙ ያምናል፡፡ ተጠቃሚዎችና አሽከርካሪዎች ከኢንተርኔት አውርደው በስልካቸው የሚጭኑት ይህ ሶፍትዌር በነፃ የሚጫን ሲሆን፣ ዛይራይድ የሚያገኘው ጥቅም ምንድን ነው ለሚለው ጥያቄም አቶ ሀብታሙ ያብራራው፣ ከታክሲዎች የ20 ከመቶ ኮሚሽን በማስከፈል ይሆናል፡፡ አቶ ሀብታሙ እንደሚገልጸው፣ ኡበር በሚያራምደው ሥርዓት አማካይነት ከታክሲዎች እስከ 28 ከመቶ ኮሚሽን ይቀበላል፡፡

አቶ ሀብታሙ የታክሲዎችን የዕለት ገቢ እንደሚጨምረው እርግጠኛ ሆኖ ሲያብራራም፣ በርካታ ታክሲዎች ያለምንም ሥራ የሚያሳልፉትን ጊዜ በዚህ ሶፍተዌር አማካይነት መቀነስ እንደሚቻል በማስረዳት ነው፡፡ በኬንያ የዚህ ዓይነት አገልግሎት ይፋ በመደረጉ የታክሲዎች ገቢ እስከ ሦስት እጥፍ ስለማደጉም ዋቢ ይጠቅሳል፡፡

የ12 ዓመት ልጅ ሳለ ወደ አሜሪካ ያቀናው ወጣት ሀብታሙ፣ ከ13 ዓመታት ቆይታ በኋላ ወደ ኢትዮጵያ በመመለስ የሠራውን ሶፍትዌር ሥራ ለማስጀመር መብቃቱን ይናገራል፡፡ በአሁኑ ወቅት በሀብታሙ ብቸኛ ባለቤትነት የሚንቀሳቀሰውን ዛይራይድ የታክሲ አገልግሎት ኩባንያ፣ የአሜሪካና የዱባይ ኩባንያዎች አክሲዮን ገዝተው ለመግባት ጥያቄ ማቅረባቸውን ጠቅሷል፡፡

 

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች