Saturday, December 3, 2022
ሌሎች ዓምዶች
    - Advertisement -
    - Advertisement -
    - Advertisement -

    ፌርማታ ፅሁፎች

    መርካቶ መንገድ ላይ የተከመረ ቆሻሻ

    ትኩስ ፅሁፎች

    (ፎቶ በአሸናፊ እምብዛ)

    * * *

    ጎዳናው

    ወለል ብለህ ሲያዩህ

    እንደ ሰማይ ጠርተህ

    አምሮብህ ተኩለህ

    እሾህህን ነቅለህ

    ጋሬጣህን ጠርገህ

    ጀርባህ ኩታ ለብሶ

    ደረትህ ለስልሶ

    ምንም ሀጅ ቢመኝህ

    ተጓዥ ብታማልል

    ለማምጣት ለመውሰድ

    አንተ ልብ አታህል

    እግር ለጠፋበት

    ደረትህ አያቅፍ ጀርባህም አያዝል

    ለዚህ ነው ጎዳናው

    ወሳጅ መላሽ አንተ መባልህ ስህተት ነው

    አንተ ባትፈጠር

    ጎዳናው ባትኖረው

    ይሄዳል ይነጉዳል

    ይደርሳል ካሰበው

    የሰው እግሩ ሳይሆን

    ወሳጁም መላሹም አድራሹም ልቡ ነው፡፡

    • ታዬ አስፋው፣ ‹‹ሐጢሾ›› (2008)

    ከ15 ዓመታት በኋላ የተገናኙት ካምፔልና ሼክ

    ከ22 ዓመታት በፊት ለንደን ውስጥ ነው፡፡ በዝቅተኛ የኑሮ ደረጃ ላይ የምትኖር አንዲት እናት ከተወለደች አንድ ቀን ያልሆናት ጨቅላ ልጇን በመታቀፊያ ጠቅልላ የሕዝብ ስልክ መደወያ ሳጥን ውስጥ አስቀምጣት ተሰወረች፡፡ ነገር ግን ለሁለት ሰዓታት ያህል ወደ ስልኩ ሳጥን ያመራ አልነበረም፡፡ ከቆይታ በኋላ ወደ ወላጆቹ ስልክ ለመደወል እየተጣደፈ ወደ ሳጥኑ ያመራው ጆይ ካምፔል ጨቅላዋን ኪራን ሼይክን ተመለከተ፡፡ እንደገባ ባየው ነገር ተደናግጦ ቆመ፡፡ አሳዘነችውም፡፡ ተጥላ ያገኛትን ሕፃን በማደጐ ልጅነት ወስዶ ለማሳደግም አስቦ ነበር፡፡ ይሁንና በወቅቱ ባለትዳር ስላልነበረ ይህ ሊሳካለት አልቻለም፡፡ በመሆኑም በአካባቢው ወደሚገኝ ፖሊስ ጣቢያ ስልክ በመደወል ጉዳዩን ፖሊስ እንዲይዘው አደረገ፡፡

    ሼክ በማደጐነት እንዲያሳድጓት ለአንድ ቤተሰብ ተሰጠች፡፡ ካምፔል ግን ሊረሳት አልቻለም፡፡ እስከ ሰባት ዓመቷ ድረስ የተለያዩ ስጦታዎችን ይልክላት ነበር፡፡ ነገር ግን ብዙ አልገፋበትም፡፡ ከአድራጐቱ እንዲታቀብ ዕገዳ እንደተጣለበት ይናገራል፡፡ ሼክ ለቤተሰቡ የማደጐ ልጅ መሆኗን የተረዳችው የስምንት ዓመት ልጅ ሳለች ነበር፡፡ ከዚያ ጊዜ ጀምሮ ትክክለኛ ወላጆቿን ስታፈላልግ ቆይታለች፡፡ ወላጅ እናቷን ማግኘት ባትችልም አባቷ ግን በእስር ላይ እንደሚገኝ አውቃለች፡፡ ቀጣይ ጉዞዋ ሕይወቷን ያተረፈውን ካምፔልን ማግኘት ነበር፡፡ ከብዙ ጥረት በኋላም በ22 ዓመቷ ካምፔልን ለማግኘት መቻሏን ኤምኤስኤን ኒውስ ዘግቧል፡፡

    * * *

    ድንገት ከነግልገሎቿ በመኖሪያ ቤት ውስጥ የገባችው ድብ ጉዳት ሳታደርስ ወጣች

    ባለፈው ሰኞ ካሊፎርኒያ ውስጥ በሚገኝ አንድ ሐይቅ አካባቢ ነው፡፡ ምሽት ላይ ሮድ ኒጅን በተባለው ግለሰብና በጓደኛው መኖሪያ ቤት ውስጥ ያልተለመደ ድምፅ ያስተጋባ ጀመር፡፡ ጓደኛው ድምፁ ወደ መጣበት አቅጣጫ ተመለከተ፡፡ በተመለከተው ነገር ተደናግጦ ‹‹ቤቱ ውስጥ ድብ ገብቷል›› ሲል ጮኸ፡፡ አጋጣሚውን ማመን የተሳነው ጅንም ስልኩን አውጥቶ ከነግልገሎቿ ቤታቸው ውስጥ የገባችውን ድብ እየተንቀጠቀጠ መቅረጽ ጀመረ፡፡ ስታጓራበትም መኝታ ቤቱ ወደሚገኝበት የላይኛው ክፍል ሮጠ፡፡ ተከትላውም ደረጃውን ወጣች፡፡ ጅንም ቀረጻውን ወደ ጐን ብሎ የመኝታ ቤቱን በር ዘጋው፡፡ ከቆይታ በኋላም ድቢቷ ግልገሎቿን ይዛ ከቤት ወጣች፡፡ ጅን አጋጣሚውን ‹‹የሚገርም ምሽት ነበር›› በማለት በፌስቡክ ገፁ ላይ ማስፈሩን ኤስኤፍ ጌት አስነብቧል፡፡

    * * *

    ከ80 ዓመት በኋላ የተሞሸሩት ጥንዶች

    ሶንግ ኪንግሊንና ሶንግ ሊሺ ባለትዳር ናቸው፡፡ ባልየው ሶንግ ኪንግሊ 102 ዓመታቸው ሲሆን፣ ሚስታቸው ሊሺ ደግሞ 99 ዓመታቸው ነው፡፡ በቻይና ውስጥ በምትገኘው በአንሁኢ ግዛት ውስጥ የሚኖሩት እነዚህ ጥንዶች የተጋቡት እ.ኤ.አ. በ1936 ነው፡፡ በወቅቱ በቂ ገንዘብ ስላልነበራቸው ሠርግ ለመደገስ አልቻሉም፡፡ በሠርጋቸው ቀን የተነሱት ፎቶግራፍም የላቸውም፡፡ የሙሽራ ልብስ ለብሰው ፎቶ መነሳት ትልቁ ህልማቸው ነበር፡፡ ስድስት ልጆች አፍርተዋል፡፡ አምስት የልጅ ልጆችም አይተዋል፡፡ ምንም እንኳን በዝቅተኛ የኑሮ ደረጃ ላይ የሚገኙ ቢሆኑም በመካከላቸው ያለው ፍቅር ቀዝቅዞ አያውቅም፡፡ ቅር የሚላቸው ነገር ቢኖር ሙሽራና ሙሽሪት ሆነው ፎቶ አለመነሳታቸው ነበር፡፡ ከተጋቡ ከ80 ዓመታት በኋላ ግን ህልማቸው እውን ሆነ፡፡ በአካባቢው የሚገኙ በጎ ፈቃደኛ ነዋሪዎች አስፈላጊውን ወጪ ሸፍነው ሊንግሊና ሊሺ እንደ አዲስ ተሞሽረው ባለፈው ሳምንት ፎቶ ግራፍ ለመነሳት ችለዋል፡፡   

    * * *

    በኢትዮጵያዊው ላይ እጁን የሰነዘረው ኬንያዊ አትሌት

    በየዓመቱ በአሜሪካ ዴቨንፖርት ውስጥ በሚካሄደው የሰባት ማይልስ የሩጫ ውድድር ላይ ተሳታፊ የነበረውን አትሌት ተሾመ መኰንንን ኬንያዊው አትሌት ሲላስ ኪሩፕቶ በጥፊ ለመምታት እጁን መሰንዘሩ መነጋገሪያ ሆኗል፡፡ ፍሎትራክ እንደዘገበው፣ ኪሩፕቶ ድርጊቱን የፈጸመው፣ በቅርብ ርቀት ይከተለው የነበረው ተሾመ ምቾት ስለነሳው ነው፡፡ ኪሩፕቶ ሩጫውን በ33 ደቂቃ 03 ሰከንድ በአንደኛነት ሲያጠናቅቅ፣ ተሾመ ደግሞ ስምንተኛ ደረጃ ይዞ ውድድሩን ጨርሷል፡፡ የተቃጣበትን ድርጊት የተቃወመው ተሾመ ለሚመለከታቸው አካላት አቤቱታ አቅርቦ ነበር፡፡ ይሁንና ኪሩፕቶ ሙከራ አደረገ እንጂ ድርጊቱን አልፈጸመም በሚል አቤቱታውን ውድቅ አድርገውታል፡፡ ከ23 ዓመታት በፊት በደቡብ ኮሪያ ሴኦል በተካሄደ የወጣቶች ሻምፒዮና ላይ ማቹካ የተባለው የኬንያ አትሌት አትሌት ኃይሌ ገብረሥላሴን መምታቱ ይታወሳል፡፡    

    - Advertisement -
    - Advertisement -

    ተጨማሪ ለማንበብ

    በብዛት የተነበቡ ፅሁፎች