Thursday, October 6, 2022
ሌሎች ዓምዶች
    - Advertisement -
    - Advertisement -
    ዝንቅበቆሻሻና በተለያዩ መንገዶች እየተበከለና ከጊዜ ወደ ጊዜ እየሸሸ ያለው የሐዋሳ ሐይቅ

    በቆሻሻና በተለያዩ መንገዶች እየተበከለና ከጊዜ ወደ ጊዜ እየሸሸ ያለው የሐዋሳ ሐይቅ

    ቀን:

    የዓመት በዓል ጓደኞች

    ጓደኛሞች አለን፡-

    ዱሮ ለቅርጫና ለበግ ግዥ

    እንቃጠር ነበር – እየጠጣን፡፡

    ቀጥሎ ቅርጫው ቀረና፣

    ለበግ ግዥ ብቻ እንገናኝ ጀመር፤

                እየጠጣን፡፡

    ቀጥሎ ቀጥሎ፣ በግ ግዥው ቀረና፤

                ዶሮ ግዥ ገባን

                መጠጣትን እያሰብን፡፡

    በሦስተኛው ቀጠሮ . . . ስለኑሮ ውድነት ልናወራ

                      በባዶ ሆድ ተገናኘን፡፡

    ‹‹ያገር ኢኮኖሚ አሪፍ ሆነልን!››

    ብለን በምጸት ደመደምን፡፡

    ከዚያ ወዲያ፣ ጓደኛ መሆን  አቆምን፡፡

    • (ነቢይ መኮንን ስውር ስፌት 2003 ዓ.ም.)!

    ********

    በሠርጓ ዕለት የታሰረችው ሙሽራ

    ሲስሊያ ሲያው ከእጮኛዋ ጋር በጋብቻ አንድ የምትሆንበት ቀን ደርሶ በደስታ ተሞልታለች፡፡ ሠርጉ ሊካሄድ ደቂቃዎች ሲቀሩት ግን ፖሊሶች በቁጥጥር ሥር ያውሏታል፡፡ የተከሰሰችውም እንግሊዝ አገር ውስጥ ለመቆየት ከተፈቀደላት ጊዜ በላይ በሕገወጥ መንገድ ኖራለች ተብላ ነው፡፡ የ45 ዓመቷ ሲስሊያ በትውልዷ ጋናዊ ስትሆን ከጀርመናዊ እጮኛዋ ጋር ለመጋባት የገዛችውን ቬሎ እንኳን ሳትቀይር ታስራለች፡፡ ፖሊሶች እንደታሰረች ፎቶ (ማግሾት) ያነሷትም ቬሎዋን ለብሳና ተጋጊጣ ነበር፡፡ ከባለቤቷ ጋር የሠርግ ፎቶዎች ለመነሳት አኮብኩባ የነበረችው ሲስሊያ ህልሟ በእንግሊዝ ፖሊሶች ጨልሞ የስድስት ወር እስር ተፈርዶባታል፡፡ ሚረር እንደዘገበው፣ ሲስሊያ እ.ኤ.አ. በ2009 ዓ.ም. ወደ እንግሊዝ በመምህርነት ስትሄድ እንድትቆይ የተፈቀደላት ለአምስት ዓመት ብቻ ነበር፡፡ የሲስሊያ ጠበቃ በበኩሉ መምህርቷ ለደካሞች ሕክምና በመስጠት ተሰማርታ ለእንግሊዝ ከፍተኛ አስተዋጽኦ አበርክታ ሳለ በሠርጓ ዕለት መታሰሯ ተገቢ አለመሆኑን ተናግሯል፡፡ ሲስሊያ ስለጉዳዩ ስትጠየቅ በአገሪቱ ለመኖር ፍቃድ የመስጠት ሥራ እንደሚሠራ ከነገራት ሰው ፍቃድ በ5,000 ዩሮ መግዛቷን ለፍርድ ቤቱ ብታሳውቅም፣ የያዘችው ዶክመንት ሐሰተኛ ነው ተብሏል፡፡

    *****

    ከ850 በላይ ሴቶችን ካላቻ ጋብቻ ያላቀቁት መሪ

    ተሬሳ ካቺንዳሞቶ ማላዊ ውስጥ የሚገኝ ደድዛ የተባለ ቀጣና መሪ ሲሆኑ፣ ባለፉት ሦስት ዓመታት ከ850 በላይ ሴቶችን ካላቻ ጋብቻ አላቀው ትምህርታቸውን እንዲቀጥሉ ማድረጋቸው የበርካታ መገናኛ ብዙኃንን ትኩረት ስቧል፡፡ መሪዋ ሕፃናት ሴቶች ያለ ዕድሜያቸው እየተዳሩ ከትምህርታቸው የሚስተጓጎሉበት ልማድ እንዲወገድም ያላሰለስ ጥረት እያደረጉ ነው፡፡ ለእናቶችና ሕፃናት መብት ሽንጣቸውን ገትረው የሚከራከሩት ኃላፊዋ፣ ሥልጣን እንደያዙ በትውልድ ቀያቸው ውስጥ 12 ዓመት ያልሞላቸው ሕፃናት ልጅ ታቅፈው ከተመለከቱበት ጊዜ ጀምሮ ብዙ ለውጥ አምጥተዋል፡፡ በተጨማሪም በአካባቢያቸው ያሉ ወደ 50 የሚጠጉ ኃላፊዎች ያላቻ ጋብቻን የሚቃወም ሰነድ እንዲፈርሙ አድርገዋል፡፡ ማላዊ ከአምና ጀምሮ ከ18 ዓመት በታች ጋብቻን ብትከለክልም የአገሪቱ ነዋሪዎች በልጆቻቸው ላይ የሚያሳድሩት ጫና አልቀነሰም፡፡ ኃላፊዋ በበኩላቸው የጋብቻ ዕድሜ ገደቡ ወደ 21 ከፍ እንዲል የአገሪቱን ፓርላማ እየጠየቁ ሲሆን፣ ካላቻ ጋብቻ ካላቀቋቸው ሴቶች የብዙዎቹን የትምህርት ወጪ የሚሸፍኑት ራሳቸው ናቸው፡፡ መሪዋ ይህን ቢያደርጉም እንቅስቃሴያቸውን የሚቃወሙና የግድያ ዛቻ እስከመላክ የደረሱም አልታጡም፡፡

    *****

    ፍልስጤም እንግሊዝን ልትከስ ነው

    በፍልስጤም ምድር የእስራኤል መንግሥት እንዲቋቋም እንግሊዝ ድጋፍ ያሳየችበትን እ.ኤ.አ. የ1917ቱን የባልፎር ዴክላሬሽን ዋቢ በማድረግ ፍልስጤም እንግሊዝን ልትከስ መሆኑን የዘኢንዲፔንደት ዘገባ ያመለክታል፡፡ የፍልስጤም ፕሬዚዳንት ማሐሙድ አባስ ለእስራኤል መፈጠር መንገድ በማውጣት እንግሊዝን ለመክሰስ ፍላጎት እንዳላቸው የተገለጸው ባለፈው ሳምንት የዓረብ ሊግ ስብሰባ መክፈቻ ላይ ነበር፡፡ ይህ የፕሬዚዳንቱ ሐሳብ በስብሰባው ላይ የተገለጸው በውጭ ጉዳይ ሚኒስትሩ ሪያድ አልማሊኪ ነው፡፡ ፍልስጤም እንግሊዝን በመክሰስ ዕርምጃዋ ሌሎች አገሮችም እንዲደግፏት ጥሪ አድርጋለች፡፡ መሐሙድ አባስ ‹‹እስራኤል በፈጸመችው ወንጀል›› ድጋፍ በማድረግ፣ ከመጀመርያውም እ.ኤ.አ. በ1948 የእስራኤል መንግሥት ፍልስጤም ምድር ላይ እንዲመሠረት በማድረግና ለብዙ ፍልስጤማውያን ከመሬታቸው መፈናቀል እንግሊዝን ወንጅለዋል፡፡

    - Advertisement -

    ይመዝገቡ

    spot_img
    spot_img