Sunday, January 29, 2023
- ማስታወቂያ -
- ማስታወቂያ -

ባለሀብቶች በጂኦተርማል ኃይል ማመንጨት እንዲሰማሩ የሚፈቅድ አዋጅ ቀረበ

- ማስታወቂያ -

ተዛማጅ ፅሁፎች

ባለሀብቶች በጂኦተርማል የኃይል ማመንጨት ሥራ ተሰማርተው የሚያመነጩትን የኤሌክትሪክ ኃይል ለመንግሥት የሚሸጡበትን አሠራር የሚፈቅድ አዋጅ ለፓርላማ ቀረበ፡፡

የጂኦተርማል ሀብት ልማት አዋጅ የሚል መጠሪያ የተሰጠው ረቂቅ አዋጅ፣ በመንግሥትና በግሉ ዘርፍ የሚካሄዱ የጂኦተርማል ኃይል ማመንጨት ተግባራትን የሚደግፍ የሕግና የቁጥጥር ማዕቀፍ መፍጠር እንዲሁም የጂኦተርማል ሀብት ተጠብቆና ለምቶ ለአገሪቱ ኢኮኖሚያዊና ማኅበራዊ ጥቅም እንዲሁም ዕድገት መዋሉን ማረጋገጥ ዓላማው አድርጓል፡፡

በረቂቅ አዋጁ መሠረት የጂኦተርሚናል ሀብት ማለት የማዕድንም ሆነ የውኃ ሀብት ወይም ቁሳዊ ንብረት ያልሆነ ነገር ግን ለአዋጁ አፈጻጸም የጂኦተርማል ኢነርጂ፣ የጂኦተርማል ተረፈ ምርትና የጂኦተርማል ፈሳሽን የሚያካትት ተፈጥሯዊ የመሬት ሙቀት መሆኑን ይገልጻል፡፡

በረቂቅ አዋጁ መሠረት በጂኦተርማል ሀብት ሥራ ላይ ለመሰማራት ለሚፈልጉ ፈቃድ የሚሰጠው የኢትዮጵያ ኢነርጂ ባለሥልጣን ሲሆን፣ በደረጃ አንድ የጂኦተርማል ሀብት ላይ የቅኝት፣ የምርመራና የጂኦተርማል ጉድጓድ መሰል የማልማትና የመጠቀም ፈቃዶችን መስጠት እንደሚችል ተገልጿል፡፡

ደረጃ አንድ የጂኦተርማል ሀብት ማለት የኤሌክትሪክ ኃይል ለማመንጨት ብቃት ያለውና በዚሁ አካባቢ እንደማሞቂያና የተቀናጀ ሙቀትና ኃይል ለመሳሰሉ ለሌሎች ተጨማሪ አገልግሎቶች መስጠት የሚችል የጂኦተርማል ሀብት መሆኑን ረቂቁ ትርጓሜ ይሰጠዋል፡፡

የጂኦተርማል ጉድጓድ መስክ የማልማትና የመጠቀም ፈቃድ ማለት ‹‹የጂኦተርማል ሀብት መጠንና የአዋጭነት ጥናቶችን ለማጥናት ከፍተኛ ደረጃ የጂኦሎጂ፣ የጂኦኬሚስትሪና የጂኦፊዚክስ ጥናቶችን ለማካሄድ፣ የምርት፣ የሪኢንጂክሽንና የክትትል ጉድጓዶችን ለመቆፈር የእንፋሎት መስክን ለማልማት የጂኦተርማል ሀብትን ከመሬት ሥር ለማውጣትና ለመጠቀም መብት የሚሰጡ ነው፡፡››

ይህንን ፈቃድ ለማግኘት አመልካቾች ከሚጠበቅባቸው መካከል በፈቃድ ሰጪው ተቀባይነት ያገኘ የሥራ ዕቅድ የአዋጭነት ጥናት፣ ሕጋዊ የግዥ ስምምነት የመሳሰሉት ይገኙበታል፡፡

የዚህ የፈቃድ ዓይነት ፀንቶ የሚቆይበት ጊዜ ከ25 ዓመታት እንደማይበልጥና ይህ ፈቃድ ጊዜው ሲያበቃ መንግሥት በሚመቸው መንገድ የሀብት ልማቱን ሊቀጥል እንደሚችል ይገልጻል፡፡

ኢትዮጵያ 10 ሺሕ ሜጋ ዋት የማመንጨት አቅም ያለው ዕምቅ የጂኦተርማል ኃይል ቢኖራትም፣ እስካሁን የመነጨው ግን ሰባት ሺሕ ሜጋ ዋት ብቻ ነው፡፡ ይሁን እንጂ በሁለተኛው ዕድገትና ትራንስፎርሜሽን ዕቅድ ትልቅ ትኩረት ከመሰጠቱ ባለፈም በርካታ ዓለም አቀፍ ኩባንያዎች ፍላጐታቸውን እያሳዩ ነው፡፡

ከእነዚህም መካከል መቀመጫውን አይስላንድ ያደረገው ሪክያቪክ ጂኦተርማል ይገኝበታል፡፡

ይህ ኩባንያ በደቡብ ክልል ከርቤቴ አካባቢ አራት ቢሊዮን ዶላር በማውጣት አንድ ሺሕ ሜጋ ዋጋ የጂኦተርማል ኃይል ለማመንጨት ከኢትዮጵያ መንግሥት ጋር ተፈራርሟል፡፡

የፕሬዚዳንት ባራክ ኦባማ ‹‹ፓወር አፍሪካ›› ኢንሼቲቭ በዚህ ለአካባቢ ተስማሚ በሆነ ታዳሽ ኃይል ማመንጨት ተግባር ሰባት ቢሊዮን ዶላር ብድር ለማቅረብ ፍላጐታቸውን ይፋ ማድረጋቸው ይታወሳል፡፡ ኢትዮጵያ ከዚህ ኢኒሼቲቭ ከሚጠቀሙ አገሮች ቀዳሚዋ እንደምትሆን ተገልጿል፡፡

 

 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች