Sunday, February 5, 2023
- Advertisement -
- Advertisement -
ማኅበራዊየስኳር ፕሮጀክቶች በመዘግየታቸው ችግሩን ለመቅረፍ ልዩ ትኩረት እንደሚደረግ ተገለጸ

የስኳር ፕሮጀክቶች በመዘግየታቸው ችግሩን ለመቅረፍ ልዩ ትኩረት እንደሚደረግ ተገለጸ

ቀን:

  • በዩሮ ቦንድ ከተገኘው ብድር 25 በመቶ ለስኳር ፕሮጀክቶች ተወስኗል

በአገሪቱ የተጀመሩ የስኳር ፕሮጀክቶች በመዘግየታቸው መንግሥት ችግሩን ለመቅረፍ ከፕሮጀክቶቹ ባለቤት ተቋማት ጋር እንደሚነጋገር፣ የገንዘብና ኢኮኖሚ ትብብር ሚኒስትሩ አቶ አብዱላዚዝ መሐመድ ለፓርላማው ገለጹ፡፡

ሚኒስትሩ የ2009 ዓ.ም. ረቂቅ በጀት ለማብራራት ሰኞ ሰኔ 27 ቀን 2008 ዓ.ም. በተገኙበት ወቅት፣ የተለያዩ የምክር ቤት አባላት መንግሥት ስለሚመድበው በጀትና በጀቱ በአግባቡ ሥራ ላይ ስለመዋሉ ቁጥጥር ያደርጋል ወይ የሚሉ ጥያቄዎችን አቅርበውላቸዋል፡፡

በተለይ ከስኳር ፕሮጀክቶች ጋር በተያያዘ ፕሮጀክቶቹ በተያዘላቸው የጊዜ ገደብ ውስጥ ካለመጠናቀቃቸውም በላይ፣ ፕሮጀክቶቹ ያሉበት ደረጃ በእጅጉ ዝቅተኛ ሆኖ የፋይናንስ አፈጻጸማቸው ግን በአሳሳቢ ደረጃ ከፍተኛ መሆኑን በመግለጽ፣ ሚኒስቴር መሥሪያ ቤቱ በዚህ ላይ ለምን ቁጥጥር እንደማያደርግ ተጠይቀዋል፡፡

ሚኒስትሩ በሰጡት ምላሽ የስኳር ፕሮጀክቶቹ በከፍተኛ ደረጃ የዘገዩ መሆናቸውንና የፋይናንስ አፈጻጸማቸውም ከፍተኛ መሆኑን አምነዋል፡፡ መንግሥት የችግሩን መንስዔና መፍትሔውን ለማፈላለግ ከፕሮጀክቶቹ ባለቤቶችና ተዋናዮች ጋር እንደሚሠራም ጠቁመዋል፡፡

ከስኳር ፕሮጀክቶችም በተጨማሪ አገሪቱ ትልቅ ትኩረት የምትሰጠውና ከፍተኛ መዋዕለ ንዋይ የሚፈስባቸው የመንገድ ፕሮጀክቶች በተገቢው ጊዜ ካለመጠናቀቃቸውም በላይ፣ በጥራት ረገድ ችግር እንዳለባቸው ጠቁመዋል፡፡ ይህንን ችግር ለመቅረፍ የገንዘብና ኢኮኖሚ ልማት ትብብር ሚኒስቴር ከሚመለከተው የፕሮጀክቶቹ ባለቤት ጋር እንደሚወያይ ገልጸዋል፡፡

የኢትዮጵያ ስኳር ኮርፖሬሽን አመራሮች በ77 ቢሊዮን ብር እያስገነቧቸው የሚገኙ ሰባት ግዙፍ የስኳር ፋብሪካዎች በሚፈለገው የጊዜ ገደብ ውስጥ አለመጠናቀቃቸውን፣ ለዚህም ፋብሪካዎቹን እንዲገነባ የተፈቀደለት የኢትዮጵያ ብረታ ብረትና ኢንጂነሪንግ ኮርፖሬሽን (ሜቴክ) ትልቁን ችግር እንደሚፈጠር መግለጻቸውን መዘገባችን ይታወሳል፡፡

መንግሥት ለእነዚህ ፕሮጀክቶች ከቻይና መንግሥት ሁለት ቢሊዮን ዶላር፣ እንዲሁም ከኢትዮጵያ ንግድ ባንክ በተመሳሳይ ከፍተኛ ብድር በማግኘት ፕሮጀክቶቹን ቢያስጀምርም፣ ኮርፖሬሽኑ በፋይናንስ ችግር ውስጥ መውደቁን አመራሮቹ በወቅቱ ለፓርላማው የመንግሥት ልማት ድርጅቶች ጉዳዮች ቋሚ ኮሚቴ ገልጸው ነበር፡፡

መንግሥት ከዓመት በፊት በአውሮፓ የቦንድ ገበያ ውስጥ በመግባት ከተበደረው አንድ ቢሊዮን ዶላር ውስጥ 25 በመቶው ለስኳር ፕሮጀክቶች እንዲውል መፍቀዱንም አቶ አብዱላዚዝ ለፓርላማው አባላት ግልጽ አድርገዋል፡፡

መንግሥት በዩሮ ቦንድ ያገኘው ብድር ለኢንዱስትሪ ፓርኮች ግንባታና ለኤሌክትሪክ ኃይል ማስተላለፊያ መስመሮች ግንባታ እንደሚያውለው፣ የቀድሞው የገንዘብና ኢኮኖሚ ልማት ሚኒስትር አቶ ሱፊያን አህመድ ገልጸው ነበር፡፡

አቶ አብዱላዚዝ እንደሚሉት ግን ከዩሮ ቦንድ ገበያ ከተገኘው አንድ ቢሊዮን ዶላር ውስጥ 75 በመቶው ለኢንዱስትሪ ፓርኮች፣ ቀሪው 25 በመቶ ደግሞ ለስኳር ፕሮጀክቶቹ እንዲውል መወሰኑን ገልጸዋል፡፡

አቶ አብዱላዚዝ ያቀረቡት ረቂቅ በጀት 274 ቢሊዮን ብር ሲሆን፣ ከዚህ ውስጥ 35.5 ቢሊዮን ብር ገና ያልተገኘ በመሆኑ በበጀት ጉድለትነት ተይዞ ከአገር ውስጥ ባንኮችና ከውጭ ብድር ለመሙላት ዕቅድ ተይዟል፡፡   

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

የኢትዮጵያ ካፒታል ገበያ ምሥረታ ዝግጅቶችና ከገበያው የሚጠበቁ ዕድሎች

ኢትዮጵያ ከ50 ዓመት በኋላ ዳግም የምታስጀምረውን የካፒታል ገበያ ዘመኑን...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...

መንግሥት የደቡብ ሱዳን ታጣቂዎች ድንበር ጥሰው የሚያደርሱትን ጥቃት እንዲያስቆም ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዮች ቋሚ...