Wednesday, October 5, 2022
ሌሎች ዓምዶች
    - Advertisment -
    - Advertisment -

    ክቡር ሚንስተር

    [ክቡር ሚኒስትሩ ቢሯቸው ከአማካሪያቸው ጋር እያወሩ ነው]

    • ዓየህ አይደል?
    • የአውሮፓ ዋንጫን ነው?
    • በዓለም ላይ ጐልተን ልንታይ ነው፡፡
    • ለዓለም ዋንጫ አለፍን እንዴ?
    • ምን ይላል ይኼ? 15ቱ ውስጥ ገባን ነው የምልህ፡፡
    • ለዓለም ዋንጫ ማጣሪያ ነው?
    • አንተ ያለኳስ አታውቅም እንዴ?
    • ተመስገን ነው ክቡር ሚኒስትር፡፡
    • ለምኑ ነው ተመስገን?
    • እርሶ እንዲህ ማለትዎ ነዋ፡፡
    • እንዴት ማለቴ?
    • አይ እርሶ ከኳስ ሌላ መቼ ያወራሉ ብዬ ነዋ?
    • እሱማ ኳስን ጠልቼ አይደለም እንደዚህ የምልህ?
    • ለማንኛውም ዓለም ላይ ጐልተን ልንታይ ነው ያሉኝ በምንድን ነው?
    • የፀጥታው ምክር ቤት አባል ሆንን አይደል እንዴ?
    • እ…እሱን ነው እንዴ የሚሉኝ?
    • በቃ ዓለምን ልናንቀጠቅጣት ነው፡፡
    • እንዴት ሆኖ?
    • የዓለም መሪ ሆንን እኮ፡፡
    • ብለው ነው?
    • አሁን ምን እንደምናደርግ ታውቃለህ?
    • ምን ልታደርጉ ነው?
    • የመጀመሪያ ጠላታችን ማን ነው?
    • ድህነት ነዋ፡፡
    • በቃ እሱን ማጥፋት የመጀመሪያ ሥራችን ነው፡፡
    • የተመድ ዋነኛ ጠላት ግን ድህነት ነው እንዴ?
    • ምን ነካህ? ከእኛ ሊጋባባቸው ስለሚችል በመጀመሪያ እሱን ማጥፋት አለብን፡፡
    • እሺ፡፡
    • ከዛ ደግሞ ሽብርተኝነትን ድራሹን ነው የምናጠፋው፡፡
    • ምን አሉኝ?
    • በቃ እያንዳንዱን ሽብርተኛ ሕግ ፊት ነው የምናቀርበው፡፡
    • ሌላስ?
    • ሌላማ ይኼ ጐረቤታችን ያለውን ኢሳያስ እንነቅለዋለን፡፡
    • ይቻላል ብለው ነው?
    • ስማ ነገርኩህ እኮ ዓለምን በእጃችን ይዘናታል፡፡
    • እንዴት ሆኖ?
    • እነአሜሪካ ሦስት መቶ ዓመት ቢፈጅባቸውም፣ እኛ ግን በ25 ዓመታት ውስጥ በአቋራጭ ዓለምን መግዛት ጀምረናል፡፡
    • ክቡር ሚኒስትር የፀጥታው ምክር ቤት አባል መሆን ማለት ምን ማለት እንደሆነ ግን ብዙ የገባዎት አልመሰለኝም?
    • ስማ ወደድክም ጠላህም ዓለም በእጃችን ላይ ናት፡፡
    • ይሁና፡፡
    • እኔ እኮ በፊትም እነግርህ ነበር፡፡
    • ምን ብለው?
    • ገና ይኼ ዕድገታችን ብዙ ቦታ ያደርሰናል ብዬ ነዋ፡፡
    • ክቡር ሚኒስትር ግን የፀጥታው ምክር ቤት አባል ስንሆን ይኼ ለመጀመሪያ ጊዜ አይደለም፡፡
    • እንዴት ሆኖ?
    • አሁን ለሦስተኛ ጊዜ ነው እኮ አባል ስንሆን፡፡
    • ይኼ የኪራይ ሰብሳቢዎች ወሬ ነው፡፡
    • እንዴት ማለት?
    • አውቀው የደረስንበትን ስኬት ለማፍረስ የሚሠሩት ሴራ ነው፡፡
    • ክቡር ሚኒስትር ብዙ አልገባዎትም ያልኩዎት ለዚህ ነበር፡፡
    • ስማ ዓለምን መግዛታችን ይቀጥላል፡፡
    • እንዴት ነው የምንገዛው?
    • የምንፈልገውን እንወስናለን፣ የማንፈልገውን እንጥለዋለን፡፡
    • እኮ እንዴት ሆኖ?
    • ድምፅን በድምፅ የመሻር መብት አለና፡፡
    • ኪኪኪ…
    • ምን ያስቅሃል?
    • ኧረ እንደዛ ማድረግ አንችልም፡፡
    • ለምን ሲባል?
    • ተራ አባል ስለሆንን፡፡

     

    [ለክቡር ሚኒስትሩ ሌላ አፍሪካዊ ሚኒስትር ደወለላቸው]

    • እንዴት ነዎት ክቡር ሚኒስትር?
    • እንዴት ነህ ወዳጄ?
    • እንኳን ደስ አልዎት፡፡
    • ለምኑ ነው?
    • የፀጥታው ምክር ቤት አባል ሆናችሁ አይደል?
    • በአምላክህ፣ በአምላክህ፡፡
    • በጣም ነው ደስ ያለኝ፡፡
    • ስማ ገና በጣም ትልቅ ቦታ እንደርሳለን፡፡
    • የማይደረስበትማ ቦታ የለም፡፡
    • ዋናው ዓላማችን ለአፍሪካ ጠንክሮ መሥራት ነው፡፡
    • እንዴት ማለት?
    • እንዴ እኛ አገር የተመዘገበው የ11 በመቶ ዕድገት 54 አገሮች ላይ እንዲደገም ጠንክረን እንሠራለን፡፡
    • እ…
    • ከዛማ የአኅጉሪቱ ዕድገት 11×54 በመቶ ይሆናል ማለት ነው፡፡
    • ክቡር ሚኒስትር ቁጥር ላይ እምብዛም አይደሉም መሰለኝ?
    • እንዴ እንደ ቁጥርማ የሚቀናኝ ነገር የለም፡፡
    • አልመሰለኝም ክቡር ሚኒስትር?
    • ገንዘብ ስቆጥር አይደል እንዴ የምውለው?
    • እንግዲያው የምክር ቤት አባልነቱ ለዚህ በጣም ይጠቅማል፡፡
    • ስነግርህ አኅጉሪቷንም አገራችንንም የሚጠቅም ነገር እንሠራለን ስልህ?
    • ኧረ ራስዎትንም መጥቀም ይችላሉ፡፡
    • በምንድን ነው የምጠቅመው?
    • የእኛ አገር እኮ ከጥቂት ዓመታት በፊት የምክር ቤቱ አባል ነበረች፡፡
    • በአፍሪካ የመጀመሪያዎቹ አባል ስንሆን እኛ አይደለንም እንዴ?
    • ምን ነካዎት ክቡር ሚኒስትር?
    • አሁን ስንመረጥ ለመጀመሪያ ጊዜ አይደለም እንዴ?
    • አይደለም ክቡር ሚኒስትር፣ እኛም ከዓመታት በፊት የምክር ቤቱ አባል ነበርን፡፡
    • ምን እያልክ ነው?
    • በነገራችን ላይ ኢትዮጵያም ስትመረጥ እኮ ይኼ ለሦስተኛ ጊዜ ነው፡፡
    • ይኼ የኪራይ ሰብሳቢዎች ወሬ ነው፡፡
    • ኪራይ ሰብሳቢ ማለት ምን ማለት ነው?
    • እሷን ትንሽ አንብቤ ሌላ ጊዜ እነግርሃለሁ፡፡
    • ለማንኛውም ራስዎትን በደንብ መጥቀም ይችላሉ፡፡
    • እኮ እንዴት አድርጌ?
    • እኔ አሜሪካ ውስጥ ሦስት ቤት አለኝ፡፡
    • የት የት ስቴት?
    • ኒውዮርክ፣ አትላንታና ላስቬጋስ ውስጥ፡፡
    • እሺ፡፡
    • ፈረንሳይ ውስጥ ፓሪስና ማርሴይ ቤቶች አሉኝ፡፡
    • ወይ ግሩም፡፡
    • ሚላን ውስጥ ደግሞ እየተገነባ ያለ ቤት አለኝ፡፡
    • ትቀልዳለህ?
    • ዱባይም ሌላ ቤት አለኝ፡፡
    • እሺ ቀጥል፡፡
    • በዓለማችን ባሉ ትላልቅ ባንኮች ደግሞ ከፍተኛ ሼሮች አሉኝ፡፡
    • እኮ እንዴት ሆኖ?
    • በቃ እነዚህ ምዕራባውያንም ሆኑ በነዳጅ ገንዘብ ያበጡ የዓረብ አገሮች የእነሱ አጀንዳ እንዲፈጸምላቸው ስለሚፈልጉ ለእኛ የማያደርጉት ነገር የለም፡፡
    • እ…
    • በቃ አጀንዳቸውን እንዲልፍ ከላይ ያልኩዎትን ነገር ለሚኒስትሮቹ ያደርጋሉ፡፡
    • ከእኛ ታዲያ ምንድን ነው የሚጠበቀው?
    • በቃ እጅ እያወጡ ከእነሱ ጋር መስማማት፡፡
    • እጅ ማውጣቱንማ እዚህም ፓርላማ ለምደነው የለ?
    • በቃ እሱ ብቻ ነው የሚጠበቀው፡፡
    • የነዳጅ ቁፋሮ ውስጥ ነዋ የገባሁበት፡፡
    • ስነግርዎት ክቡር ሚኒስትር፡፡
    • አገራችን ነዳጅ ሳታወጣ እኔ ላወጣ ነው ማለት ነው?
    • ከእርሶ የሚያስፈልገው አንድ ነገር ብቻ ነው፡፡
    • ምንድን ነው የሚያስፈልገው?
    • ቅልጥፍና!

    [ክቡር ሚኒስትሩ ከሚኒስትር ጓደኛቸው ጋር ምሳ እየበሉ ነው] 

    • ዛሬ ለምን እንደፈለኩህ ታውቃለህ?
    • ለምንድን ነው የፈለጉኝ ክቡር ሚኒስትር?
    • ነዳጅ እናውጣ ልልህ ነው፡፡
    • ለአገሪቷ የህልም እንጀራ የሆነን ነዳጅ እኛ ከየት ልናመጣው?
    • በቃ ነዳጅ ተገኝቷል፤ እናውጣው ነው የምልህ፡፡
    • ክቡር ሚኒስትር በቃ ብዙ ልብ ወለዶች እያነበቡ ተቸገሩ አይደል?
    • ይኼ ልብ ወለድ አይደለም፡፡
    • ልብ ወለድ ካልሆነ እንዴት ነው ነዳጅ ማውጣት የምንችለው?
    • እሱን ልነግርህ እኮ ነው፡፡
    • እሺ ይንገሩኝ፡፡
    • የፀጥታው ምክር ቤት አባል በመሆናችን ብዙ እንጠቀማለን፡፡
    • በእሱማ ዓለማችን ላይ ያሉ ችግሮችን ስለምንቀርፍ ብዙ እንጠቀማለን፡፡
    • መጀመሪያማ እኔም እንደዛ ብቻ መስሎኝ ነበር፡፡
    • እንዴት ማለት?
    • ድህነትን ምናምን እናጠፋለን ስል ነበር፡፡
    • እሱንማ ማጥፋት አለብን፡፡
    • ስማ መጀመሪያ የራሳችንን ድህነት ነው ማጥፋት ያለብን፡፡
    • እንዴት አድርገን?
    • በቃ እነዚህ ምዕራባውያንና በነዳጅ የጠገቡ ዓረቦች የእነሱን አጀንዳ ለማስፈጸም ገንዘብ ይረጫሉ አሉ፡፡
    • ይቀልዳሉ?
    • እንዴ ይኸው አንድ የአፍሪካ ሚኒስትር በየቦታው ነው ቤት ያለው፡፡
    • ቤት?
    • አሜሪካ ሦስት፣ ፈረንሳይ ሁለት፣ ጣሊያን፣ ዱባይ ብቻ ምኑ ቅጡ፡፡
    • ምንድን ነው ከእኛ የሚጠበቀው?
    • በቃ እነሱ ለሚፈልጉት አጀንዳ እጃችንን ማውጣት ብቻ፡፡
    • እሱንማ እዚህስ ፓርላማ ለምደነው አይደል እንዴ?
    • ምን ላድርግህ? እኔም ያልኩት እሱን ነበር፡፡
    • ግን እዛ የምናስቀምጠው ሰው ወሳኝ ነው፡፡
    • ዓየህ እሱ ላይ ነው በደንብ መሥራት ያለብን፡፡
    • እኮ እዛው ያሉት ሰዎች የእኛን ውሳኔ ዝም ብለው ላይቀበሉት ይችላሉ፡፡
    • ታዲያ ምን እናድርግ?
    • እርሶ እዛ ይቀመጣሉዋ፡፡
    • እንዴ? እንዴት?
    • በቃ የእኛን ሐሳብ እዛ ላሉ ሰዎች እያስረዱ ያፀድቃሉ፡፡
    • እኔ የት ልቀመጥ?
    • ቤት ይገዛልዎታላ፡፡
    • የት?
    • ኒውዮርክ!

    [ክቡር ሚኒስትሩ አንድ የአውሮፓ ዲፕሎማት ጋር ደወሉ] 

    • ሰላም ክቡር ሚኒስትር፡፡
    • እንዴት ነህ?
    • እግዚአብሔር ይመስገን፡፡
    • ሰማህ አይደል?
    • ምኑን ክቡር ሚኒስትር?
    • የፀጥታው ምክር ቤት አባል እንደሆንን፡፡
    • እኛም እኮ አባል ነን፡፡
    • በቃ ዓየህ ከምንጊዜውም በላይ ተቀራርበን መሥራት አለብን፡፡
    • ልክ ብለዋል፡፡
    • የዓለማችንን ችግር የምንቀርፍበት ጊዜ ነው፡፡
    • ትክክል ነው ክቡር ሚኒስትር፡፡
    • የእኛንም ችግር እንቀርፈዋለን አይደል?
    • የእኛ ሲሉ?
    • ማለቴ የግል ሕይወታችንንም ማሻሻል እንችልበታለን፡፡
    • ክቡር ሚኒስትር ይኼ እኮ ለአገር የሚሠሩበት ኃላፊነት ነው፡፡
    • እሱማ ነው፡፡
    • ታዲያ ምን እያሉ ነው?
    • ያው ተቀራርበን እንድንሠራ ለማለት ነው፡፡
    • እሱንማ ማድረግ አለብን፡፡
    • እንግዲህ በቀጣይ ብዙ አብረን የምንሠራቸው ነገሮች ይኖራሉ፡፡
    • ቦታው ትልቅ ኃላፊነት አለበት፡፡
    • እኔም የምልህ እሱን ነው፡፡
    • በሌላ በኩል ደግሞ ለሌላ ነገር ሊያጋልጥ ይችላል፡፡
    • ለምን?
    • ለኪራይ ሰብሳቢነት!

    [ክቡር ሚኒስትሩ ቤት ሲገቡ ሚስታቸውን አገኟቸው] 

    • ምነው የደካከመህ ትመስላለህ?
    • ዛሬ ሥራ በዝቶብኝ ነው የዋልኩት፡፡
    • ምን ተገኘ?
    • ምን ያልተገኘ ነገር አለ?
    • ምን አዲስ ነገር ተገኘ?
    • የፀጥታው ምክር ቤት አባል ሆንን አይደል?
    • እሱማ ሰነባበተ፡፡
    • እኮ ለእኛ ጥሩ አጋጣሚ ፈጥሮልናል፡፡
    • እንዴት ሆኖ?
    • በቃ ቦታው ለዘመናት ስንመኘው የነበረውን ነገር ሊሰጠን ይችላል፡፡
    • ማለት?
    • በአሜሪካና በአውሮፓ ቤት መሥራት ቀላል ሊሆን ነው፡፡
    • እየቀለድክ ነው?
    • በቃ እንደቀልድ ቤት ሊኖረን ነው ስልሽ?
    • እንዴት ሆኖ?
    • የምክር ቤቱ አባል መሆናችን ብዙ ዕድል ይከፍትልናል፡፡
    • በጣም ደስ ይላል፡፡
    • ትንሽ ሊያስቸግሩን የሚችሉት ምዕራባውያን ናቸው፡፡
    • ዓየሽ አንዳንዴ ብዙ መማር ጥሩ አይደለም፡፡
    • አልገባኝም፡፡
    • ብዙ መማር፣ ፈጽሞም አለመማር ጥሩ አይደለም፡፡ እንደ እኔ መካከል ላይ መሆን ነው የሚያዋጣው፡፡
    • አንተ ብዙ ማስተርስ አይደል እንዴ ያለህ?
    • ምን የእኔ ማስተርስ እኮ ቤት ድረስ ነው የሚመጣልኝ፡፡
    • እሱስ ልክ ነህ፡፡
    • ለአንቺስ ተርፌያለሁ አይደል እንዴ?
    • እግዚአብሔር ይስጥህ፣ በማስተርስ ከ12ኛ ክፍል ሰርተፍኬት ገላገልከኝ፡፡
    • እና እነዚህ ምዕራባውያን ትንሽ ሊያስቸግሩን ይችላሉ፡፡
    • አንተ ግን ከመቼ ጀምሮ ነው ከኒዮሊብራሎች ጋር መሥራት የጀመርከው?
    • ገንዘብ ካገኘሁበትማ አይደለም ከኒዮሊብራል ጋር ከሌላም ጋር እሠራለሁ፡፡
    • ከሌላ ከማን ጋር?
    • ከኒዮጋኔን!   

    በብዛት የተነበቡ ፅሁፎች

    አገር የሚገቡ የግል ዕቃዎችን በሚገድበው መመርያ ምክንያት በርካታ ንብረቶች በጉምሩክ መያዛቸው ተገለጸ

    በአየር መንገድ ተጓዦች ወደ አገር የሚገቡትን የግል መገልገያ ዕቃዎች...

    በዕድሳት ምክንያት የተዘጋው የአዲስ አበባ ስታዲየም በቅርቡ ለአገልግሎት ክፍት ይሆናል

    የአደይ አበባ ስታዲየም ግንባታ በሚፈለገው ልክ እየተከናወነ እንዳልሆነ ተገልጿል ከስፖርታዊ...

    የአፍሪካ ሕብረት የሰላም ንግግሩን ለማስጀመር ያቀረበውን ጥሪ መንግስት ተቀበለ

    የአፍሪካ ሕብረት በፌደራል መንግስትና በህወሃት መካከል የሰላም ንግግር እንዲጀመር...

    የንብረት ታክስ ጉዳይ በሁለቱ ምክር ቤቶች የጋራ ጉባዔ ቀዳሚ አጀንዳ ይሆናል ተባለ

    መስከረም 30 ቀን 2015 ዓ.ም. በሚጀምረው የሕዝብ ተወካዮችና የፌዴሬሽን...
    - Advertisment -

    ትኩስ ፅሁፎች

    የአፍሪካ ሕብረት የሰላም ንግግሩን ለማስጀመር ያቀረበውን ጥሪ መንግስት ተቀበለ

    የአፍሪካ ሕብረት በፌደራል መንግስትና በህወሃት መካከል የሰላም ንግግር እንዲጀመር...