Sunday, January 29, 2023
- Advertisement -
- Advertisement -
ዜናብአዴን የጀመራቸው ንቅናቄዎች መሠረታዊ ለውጥ አለማምጣታቸውን መገምገሙን አስታወቀ

ብአዴን የጀመራቸው ንቅናቄዎች መሠረታዊ ለውጥ አለማምጣታቸውን መገምገሙን አስታወቀ

ቀን:

የብሔረ አማራ ዴሞክራሲያዊ ንቅናቄ (ብአዴን) የክልሉን ሁለንተናዊ ችግሮች ለመፍታት የጀመራቸው ንቅናቄዎች መሠረታዊ ለውጥ እንዳላመጡ መገምገሙን አስታወቀ፡፡

የብአዴን ጽሕፈት ቤት ኃላፊ አቶ ዓለምነው መኰንን ዓርብ ጥር 18 ቀን 2010 ዓ.ም. ለሪፖርተር እንደተናገሩት፣ በአማራ ክልል አንዳንድ አካባቢዎች እየተፈጠሩ ያሉ ችግሮች የሚያመላክቱት ገና የተጀመሩ ንቅናቄዎች መሠረታዊ ለውጥ አለማምጣታቸው መሆኑን በማዕከላዊ ኮሚቴው ተገምግሟል፡፡

ከጥር 12 ቀን 2010 ዓ.ም. ጀምሮ የብአዴን ማዕከላዊ ኮሚቴ በሁለት ዋና ዋና አጀንዳዎች ላይ ውይይት እያደረገ መሆኑን አቶ ዓለምነው ገልጸዋል፡፡ የመጀመርያው አጀንዳ የኢሕአዴግ ሥራ አስፈጻሚ ኮሚቴ ለአሥራ ሰባት ቀናት አካሂዶት በነበረው ዝግ ስብሰባ ላይ የመከረባቸው ጉዳዮች ከብሔራዊ ድርጅቶች ጋር እንዲጣጣም የሚል አቅጣጫ ተላልፎ እንደነበርና ብአዴንም፣ በጉዳዩ ላይ እየመከረ መሆኑን ጠቁመዋል፡፡

ሁለተኛው አጀንዳ የአምስት ዓመቱን የአካባቢ፣ የቀበሌና የወረዳ ምክር ቤት ምርጫ የተመለከተ እንደሆነ ጠቁመው፣ ‹‹ብአዴን እንደ አንድ ተወዳዳሪ ድርጅት ዝግጅቶች አሉት፡፡ እነዚያ ዝግጅቶች ላይ መነሻ ዕቅድ ቀርቦ ውይይት እየተደረገ ነው፤›› ብለዋል፡፡

በክልሉ ውስን አካባቢዎች እየተከሰቱ ያሉ የመልካም አስተዳደር ጥያቄዎችን ለመፍታት ሌት ከቀን እየሠራ መሆኑን የተናገሩት አቶ ዓለምነው፣ በወልዲያና በቆቦ አካባቢዎች ተከስቶ የነበረው ግጭት እየተረጋጋ መሆኑን አስረድተዋል፡፡

የብአዴን ማዕከላዊ ስብሰባ መደበኛ እንደሆነ ጠቁመው፣ ስብሰባው እየተካሄደ ያለው ሥራን ሳይጎዳ እንደሆነ ገልጸዋል፡፡ ሥራ በበዛበት ወቅት ስብሰባው እንደሚቋረጥና ሥራ በማይበዛበት ወቅት ደግሞ እንደሚቀጥል ተናግረዋል፡፡

ብአዴን የክልሉ መሪ ፓርቲ እንደመሆኑ መጠን፣ በክልሉ ያሉትን ችግሮች ለመፍታት አቅጣጫ ነድፎ እየተንቀሳቀስ መሆኑንም የጽሕፈት ቤቱ ኃላፊ አክለው ገልጸዋል፡፡

የማዕከላዊ ኮሚቴ ስብሰባ ባለመጠናቀቁ ሳቢያ የተላለፉ ውሳኔዎች ምን እንደሆኑ ማወቅ አልተቻለም፡፡

‹‹በአገሪቱ ያለው ችግር ግለሰቦችን ከሥልጣን በማንሳት ይፈታል ማለት ያለቦታው የማከክ ያህል ነው፤›› ያሉት አቶ ዓለምነው፣ ችግሮች ሊወገዱ የሚችሉት ችግሮችን ፈልፍሎ በማውጣትና ኃይልን በማስተባበር እንደሆነ ገልጸዋል፡፡ ራሱን የከፋ ችግር ውስጥ የከተተ አመራር ካለ ደግሞ ግምገማው ራሱ እያጣራው እንደሚሄድ አክለዋል፡፡

የማዕከላዊ ኮሚቴው ስብሰባ ጥር 12 ቀን እንደተጀመረ የተናገሩት አቶ ዓለምነው፣ ስብሰባው የሚጠናቀቅበት ቀን አለመቆረጡን ጠቁመዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የገጠር መሬት ማሻሻያና የመሬት ባለቤትነት ጥያቄ በኢትዮጵያ

በኢትዮጵያ ከቅርብ ወራት ወዲህ መሬትን በተመለከተ ጠንከር ያሉ የለውጥ...

በፖለቲከኞች እጅ ያለው ቁልፍ

ኢትዮጵያ በተለይ ካለፉት አምስት ዓመታት ወዲህ ሰላሟ መረጋጋት አቅቶታል፡፡...

የኤክሳይስ ታክስ ረቂቅ አዋጅ ፓርላማው ያፀደቀውን አዋጅ የሚጥሱ ድንጋጌዎችን በማካተቱ እንዳይፀድቅ ተጠየቀ

ሰሞኑን ለሕዝብ ተወካዮች ምክር ቤት የቀረበው የኤክሳይስ ታክስ ማሻሻያ...

በፀጥታ ችግር ሳቢያ ከተለያዩ አካባቢዎች ተፈናቅለው አማራ ክልል የገቡ ዜጎች ቁጥር 800 ሺሕ መድረሱ ተነገረ

በቤኒሻንጉል ጉሙዝ ክልል 112 ሺሕ ተማሪዎች ከትምህርት ገበታ ውጪ...