Saturday, October 1, 2022
ሌሎች ዓምዶች
    - Advertisement -
    - Advertisement -
    ማኅበራዊአዲሱን የአዲስ አበባ ማስተር ፕላን የሚከታተል ተቋም ሊመሠረት ነው

    አዲሱን የአዲስ አበባ ማስተር ፕላን የሚከታተል ተቋም ሊመሠረት ነው

    ቀን:

    በውድነህ ዘነበ

    የመጠቀሚያ ጊዜው በተጠናቀቀው የአዲስ አበባ ከተማ አስተዳደር ማስተር ፕላን በመሬት አጠቃቀም ላይ የተፈጠሩ ስህተቶች በአዲሱ ማስተር ፕላን እንዳይደገሙ ለማድረግ የመቆጣጠርና የመከታተል ሥልጣን ያለው ተቋም ሊመሠረት ነው፡፡

    ከ1996 ዓ.ም. ጀምሮ ለአሥር ዓመታት የተተገበረው የአዲስ አበባ ማስተር ፕላን በ2005 ዓ.ም. የመጠቀሚያ ጊዜው ማብቃቱ ይታወቃል፡፡ በዚህ ማስተር ፕላን በመሬት አጠቃቀም በተለይም በአረንጓዴ ቦታዎች፣ በንግድ ማዕከላት፣ በሕንፃ ከፍታ፣ በኢንዱስትሪ ዞን በመሳሰሉ ጉዳዮች የተቀመጡ ድንጋጌዎች አለመተግበራቸው ታውቋል፡፡

    የቀድሞው ማስተር ፕላን በአዲስ አበባ 16 አዳዲስ የሕዝብ ፓርኮች እንዲቋቋሙ ቦታዎችን ለይቶ ቢያስቀምጥም ተግባራዊ ግን አልተደረገም፡፡ ፓርኮቹ ይተገበሩባቸዋል የተባሉ ቦታዎችም በተለያዩ አካላት የተያዙ ናቸው፡፡

    ከዚህ በተጨማሪ የከተማ ማዕከላት በደረጃ ተለይተው የንግድ ተቋማት እንዲቋቋሙ ቢደነገግም ተግባራዊ አልተደረገም፡፡

    ጀሞ አካባቢ ቀደም ብሎ ለኢንዱስትሪ ልማት የታሰበ ቢሆንም፣ ከሀንስም ግላስ ፋብሪካ ሌላ ኢንዱስትሪ ሳይቋቋም አካባቢው ለመኖሪያ ቤት ግንባታ ውሏል፡፡

    ከነዚህ የመሬት አጠቃቀም ችግሮች በተጨማሪ መካከለኛው የከተማው ክፍል እንዲሁም ከመካከለኛ ውጭ ያሉ የከተማው ክፍሎች የሚገነቡ ሕንፃዎች የከፍታ መጠን የተቀመጠ ቢሆንም ተግባራዊ ግን አለመሆኑ እንደ ችግር ተነስቷል፡፡

    የአዲስ አበባ ከተማ አስተዳደር እነዚህን ችግሮች በአዲሱ ማስተር ፕላን ላይ እንዳይደገም ራሱን የቻለ ተቋም ተቋቁሞ እንዲቆጣጠርና እንዲከታተል የቀረበ ሰነድ ላይ ውሳኔ ማሳለፉ ታውቋል፡፡

    በዚህ መሠረት የሚቋቋመው ተቋም ስያሜ እስካሁን ያልፀደቀ ቢሆንም፣ ተቋሙ በኮሚሽን ደረጃ ሊቋቋም እንደሚችል ለጉዳዩ ቅርበት ያላቸው ምንጮች ተናግረዋል፡፡

    የአዲስ አበባ ማስተር ፕላን ዝግጅት በአብዛኛው የተጠናቀቀ ሲሆን፣ ከሚቀጥለው ሳምንት ጀምሮ ለሕዝብ ውይይት እንደሚቀርብ ተገልጿል፡፡

    አዲስ አበባ በ129 ዓመት ዕድሜዋ ዘጠኝ ማስተር ፕላኖች አስተናግዳለች፡፡ የአዲስ አበባ ከተማ አስተዳደር ከንቲባ ሰሞኑን ለአስተዳደሩ ብዙኃን መገናኛ እንደገለጹት፣ በተለይ በስምንተኛውና በዘጠነኛው ማስተር ፕላኖች የታዩ ግድፈቶች በአሥረኛው ማስተር ፕላን እንዳይደገሙ ይደረጋል፡፡

    ‹‹በስምንተኛውና በዘጠነኛው ማስተር ፕላን እንደ ሕግ የተቀመጡ ጉዳዮች አልተተገበሩም፤›› ያሉት ከንቲባው፣ ‹‹በአሥረኛው ማስተር ፕላን ይህንን በማረም ማስተር ፕላኑን እንደ ቁልፍ ሕግ እንወስደዋለን፤›› ሲሉም አክለዋል፡፡

    አዲሱ ማስተር ፕላን የአገልግሎት መስጫ ተቋማት፣ ማኅበራዊ አገልግሎት መስጫ ተቋማትን ማስፋት ዓላማው አድርጓል፡፡ ከተማው ያለው የመሬት ሀብት ውስን በመሆኑ ለኢንዱስትሪ ዞኖች ልማት፣ በተወሰኑ ቦታዎች ላይ እንደሚያስፋፋና ለአረንጓዴ ቦታዎች ልማት፣ ለወንዞችና ለወንዞች ዳርቻ ልማት ልዩ ትኩረት እንደሚሰጥ ተገልጿል፡፡ በተለይ የወንዞች ልማትን የሚያካሂድ ፕሮጀክት ጽሕፈት ቤት እየተቋቋመ መሆኑን ከንቲባው ተናግረዋል፡፡

    በእስካሁኑ ሒደት አዲስ አበባ የከተማ ማዕከል የላትም፡፡ በአዲሱ ማስተር ፕላን በአምስት ደረጃ ማዕከላት ይዋቀራሉ፡፡ በዚህ መሠረት አንድ ዋና የከተማ ማዕከል፣ ሦስት የሚሆኑ ሁለተኛ ደረጃ ማዕከላት፣ 13 የሚሆኑ ሦስተኛ ደረጃ ማዕከላት፣ 120 የወረዳ ማዕከላትና የሰፈር ማዕከላት ይኖሯታል ተብሏል፡፡

    ከዚህ በተጨማሪም የባቡር መስመር ግንባታ፣ የመንገድ ግንባታን ጨምሮ በርካታ አዳዲስ ፕሮጀክቶች የሚገነቡ ሲሆን፣ ለዚህ ግንባታ የሚያስፈልገው በጀት ከአስተዳደሩ ገቢ፣ በፌዴራል መንግሥትና ከለጋሽ አገሮች በሚገኝ ብድርና ዕርዳታ እንደሚሸፈን ከንቲባው ተናግረዋል፡፡

    ከንቲባው በተያዘው ወር ከሕዝብ ጋር ውይይት እንደሚካሄድና ከሕዝብ የሚገኝ ግብዓት ታክሎበት ለከተማው ምክር ቤት ቀርቦ እንደሚፀድቅ ተናግረዋል፡፡  

    - Advertisement -

    ይመዝገቡ

    spot_img
    spot_img