[ክቡር ሚኒስትሩ ከሚስታቸው ጋር እያወሩ ነው]
- አንተ ምን ዓይነት ሰው ነህ?
- ምን እያልሽ ነው?
- በሕይወቴ እንደ አንተ ዓይነት ፈዛዛ ዓይቼ አላውቅም፡፡
- ምንድነው የምትቀባጥሪው?
- ለምንድነው ያልነገርከኝ?
- ስብሰባ እንደምገባ ነው?
- ስማ የአንተ ስብሰባ ምንም ሲፈይድ አላየንም፡፡
- ስለምንድነው የምታወሪው?
- መፈቀዱን ለምን አልነገርከኝም?
- ሰላማዊ ሠልፍ መቼ ተፈቀደ?
- እሱንማ ባትፈቅዱም ሕዝቡ እየተሠለፈላችሁ ነው፡፡
- ስለምን ፈቃድ ነው የምታወሪው?
- ከቀረጥ ነፃ ዕቃ ማስገባት እንደሚቻል ነዋ፡፡
- አልሰማሁም እንዳትይኝ?
- አንተ ካልነገርከኝ ማን ይነግረኛል?
- ሚዲያ አትከታተይም እንዴ?
- እንዲህ ዓይነት ነገር በሚዲያ እንደማታወጡማ አውቃለሁ፡፡
- ለምን አይወጣም?
- የሚወጣው እኮ የተፈቀደው ሲከለከል ነው፡፡
- አሁን ማን ይሙት ጓደኞችሽ አልነገሩሽም?
- እነሱማ ነገሩኝ፡፡
- ታዲያ ከሰማሽ ለምን እንዲህ ትጨቀጭቂኛለሽ?
- የከነከነኝ እሱ አይደለም፡፡
- ምኑ ነው የከነከነሽ?
- እስካሁን በዕድሉ አለመጠቀሜ ነዋ፡፡
- ምን እያልሽ ነው?
- ጓደኞቼ ለሱቃቸው እኮ ዕቃ እያስመጡ ነው፡፡
- የምን ዕቃ?
- ይኸው ይህን የቀረጥ ዕድል በመጠቀም አንዴ ከዱባይ አንዴ ከቻይና ዕቃ እያስገቡ አይደል እንዴ?
- እየቀለድሽ ነው?
- ምን እቀልዳለሁ፣ ይኸው ጓደኞቼ ከበሩ አይደል እንዴ?
- ይኼማ ሊሆን አይችልም፡፡
- ለማንኛውም እኔ ወስኛለሁ፡፡
- ምንድነው የወሰንሽው?
- የቀረጥ ነፃ ዕድሉን ተጠቅሜ ላስጭን ነው፡፡
- ምንድነው የምታስጭኝው?
- አንድ አርባ ፊት ኮንቴይነር፡፡
- ምን?
- እነሱ እንዲያውም የማይረባ ሻንጣ እያስጫኑ ስለተሸወዱ እኔ በአንዴ ኮንቴይነሩን አስጭኜ ብገላገል ይሻለኛል፡፡
- ሴትዮ ጤነኛ ነሽ?
- ምን ሆንክ?
- አንድ ሙሉ ኮንቴይነር ዕቃ አስመጥተሽ አልቀረጥም ልትይ ነው?
- በመመርያ እኮ ነው የተፈቀደው፡፡
- ሴትዮ ምንም ሳይገባሽ እኔን ችግር ውስጥ እንዳትከቺኝ?
- ምን ሆነህ ነው ችግር ውስጥ የምትገባው?
- ያልሆነ ነገር ለማድረግ ስትሞክሪ መጥፎ ነገር ውስጥ እንዳትገቢ፡፡
- የተፈቀደ ነገር ነው እኮ ነው የምልህ?
- ሴትዮ መመርያው በደንብ የገባሽ አልመሰለኝም፡፡
- በሚገባ ነው የገባኝ፡፡
- ከገባሽ ከቀረጥ ነፃ እንዲያስገቡ የተፈቀደው ለመንገደኞች ብቻ ነው፡፡
- እኔም ዕቃውን ከዚህ ሆኜ ሳይሆን የማዘው ሄጄ ነው የምገዛው፡፡
- ከዚያ ኮንቴይነሩን በአውሮፕላን አንጠልጥለሽ ልታመጪው?
- እሱንማ ካርጎ ነው የማደርገው፡፡
- ስለዚህ አንቺ መንገደኛ ሳትሆኚ ነጋዴ ነሽ፡፡
- አይ መመርያው በደንብ የገባህ አልመሰለኝም፡፡
- በዚህ የቀረጥ ነፃ መመርያ አንቺም ነፃ መሆንሽን አውቂያለሁ፡፡
- ከምን?
- ከዕውቀት!
[ክቡር ሚኒስትሩ መኪናቸው ውስጥ ገብተው ከሾፌራቸው ጋር እያወሩ ነው]
- ምንድነው አንተ ይኼ?
- ምኑ ክቡር ሚኒስትር?
- መኪናውን ዓይተኸዋል?
- ምን ሆነ ክቡር ሚኒስትር?
- ቅድም ምን ብዬህ ነበር?
- ምን አሉኝ?
- ቀጠሮ አለኝ ብዬህ አልነበር?
- ለዚያ እኮ ነው ባሉኝ ሰዓት የመጣሁት፡፡
- ትልቅ እንግዳ ነው የማገኘው አላልኩህም?
- ታዲያ ምን አጠፋሁ ክቡር ሚኒስትር?
- መኪናው ምን እንደሚመስል ዓይተኸዋል?
- ልጆቹ ኳስ ሲጫወቱ አበላሽተውት ነው፡፡
- ታዲያ ይኼን እያየህ መኪናውን ይዘህ ትወጣለህ?
- የቀጠሮው ሰዓት እንዳይረፍድብዎት ብዬ ነው፡፡
- ከትናንት ጀምሮ ነበር የነገርኩህ፡፡
- ምኑን ክቡር ሚኒስትር?
- እንዲታጠብ በተደጋጋሚ ነበር የነገርኩህ፡፡
- እሱማ ታጥቦ መኪና ውስጥ ይዤዋለሁ፡፡
- ምንድነው የምታወራው?
- ይኸው ላውንደሪው በአስቸኳይ እንዲያጥበው አድርጌ ይዤዋለሁ እኮ ልብስዎን፡፡
- ልብሴን መቼ አሳጥብ አልኩህ?
- ታዲያ ምንድነው ያሉኝ?
- መኪናዬን አሳጥብ ነው ያልኩህ፡፡
- ኧረ ልብሴን አሳጥብ ነው ያሉኝ፡፡
- ከመቼ ጀምሮ ነው አንተ ልብሴን የምታሳጥብልኝ ደግሞ?
- እኔም ገርሞኝ ነበር፡፡
- የሚነገርህን ስለማትሰማ እኮ ነው፡፡
- መስሎኝ ነው ክቡር ሚኒስትር፡፡
- ለመሆኑ አደረስክልኝ?
- የሚፈልጉት ቦታ አድርሼያቸዋለሁ፡፡
- ማንን ነው ያደረስከው?
- ሚስትዎን ነዋ፡፡
- እኔ የጠየቅኩህ አድርስ ያልኩህን ዶክመንት አደረስክ ወይ?
- የምን ዶክመንት?
- ዶክመንት አድርስልኝ አላልኩህም ነበር?
- አድርስልኝ ሲሉኝ ያው እሳቸውን የሚፈልጉበት ቦታ አድርሻቸዋለሁ፡፡
- ሰውዬው ማገናዘብ ተስኖሃል እንዴ?
- ምን እያሉ ነው ክቡር ሚኒስትር?
- የምትታዘዘውን ነገር አትሰማም ማለት ነው?
- ኧረ እሰማለሁ፡፡
- ታዲያ ይኸው ሁለቱንም ያዘዝኩህን አላደረግከውም እኮ?
- እኔማ የታዘዝኩትን ፈጽሜያለሁ፡፡
- ያልታዘዝከውን ነው እንጂ የፈጸምከው፡፡
- ከዚህ በላይ ምን ላድርግ?
- ትልቅ የኮሙዩኒኬሽን ችግር እንዳለብህ ነው የተረዳሁት፡፡
- ማን እኔ?
- እህሳ?
- የኮሙዩኒኬሽን ችግር ያለበት እኔ ሳልሆን ሌላ ነው፡፡
- ማን ነው?
- መንግሥት!
[ክቡር ሚኒስትሩ ከማዕከላዊ ኮሚቴ ስብሰባ ሲወጡ የቀድሞ ወዳጃቸውን አገኟቸው]
- እንዴት ነዎት ክቡር ሚኒስትር?
- እንዴት ነህ ወዳጄ?
- ጠፉ እኮ ክቡር ሚኒስትር?
- ምን ሥራ ወጥሮኝ ነው፡፡
- ነው የወጠረዎት?
- ያው የሕዝብ ጥያቄ እየጠጠረ ስለመጣ እኛም ጠጠር ያለ ስብሰባ እያደረግን ነው፡፡
- ታዲያ አሁን ከየት እየመጡ ነው?
- ከፓርቲያችን የማዕከላዊ ኮሚቴ ስብሰባ መውጣቴ ነው፡፡
- ክቡር ሚኒስትር እዚያ ስብሰባ ላይ ነው ስለአገር ጉዳይ ያወራችሁት?
- በሚገባ እንጂ፡፡
- እኔ ግን አንድ የማይገባኝ ነገር አለ፡፡
- ምን?
- የፓርቲ ስብሰባ ላይ ነው ስለአገር የምትወያዩት?
- አገሪቷ ምን ዓይነት ችግር ውስጥ እንዳለች ረሳኸው?
- እሱማ አውቃለሁ፡፡
- ታዲያ ይኼን ችግር እንኳን ፓርቲዬ ውስጥ ቤተሰቤ ውስጥ ማውራት ይጠበቅብኛል?
- ክቡር ሚኒስትር የእኔም ነጥብ እሱ ነው፡፡
- ምንድነው ነጥብህ?
- እንዴት ነው የፓርቲ ስብሰባ ላይ ስለአገር ጉዳይ የምታወሩት?
- ምን ችግር አለው?
- በፓርቲ ስብሰባ እኮ ስለፓርቲውና ስፓርቲው ፕሮግራም ነው መወራት ያለበት፡፡
- ነገሩ የገባህ አልመሰለኝም?
- ያልገባዎት እርስዎ ነዎት ክቡር ሚኒስትር፡፡
- ምን?
- ይኸው መቼ ዕለት የፓርቲዎቹ ሊቃነ መናብርት መንግሥት የሚወስነውን ውሳኔ ሲወስኑ ተመለከትን፡፡
- ሰውዬ ተምታቶብሃል ልበል?
- እናንተ ናችሁ እንጂ የተምታታባችሁ፡፡
- ምን?
- ወይ አንደኛችሁን እንደ CPC መሆን ይሻላችኋል?
- እንደ ምን?
- እንደ ኮሙዩኒስት ፓርቲ ኦፍ ቻይና፡፡
- እንዴት ማለት?
- ያው እነሱ ፓርቲም መንግሥትም አንድ ነው ብለው ነው የሚንቀሳቀሱት፡፡
- እ. . .
- አንዴ ዴሞክራሲ፣ ሌላ ጊዜ መድበለ ፓርቲ ምናምን እያላችሁ ሕዝቡን ታምታቱላችሁ፡፡
- አንተ አንድ ያልገባህ ነገር አለ፡፡
- ምንድነው እሱ?
- ፓርቲና መንግሥት የአንድ ሳንቲም ሁለት ገጽታ ናቸው፡፡
- ስለዚህ ለምን አትናገሩም?
- ምኑን?
- አንድ መሆናችሁን!
[ክቡር ሚኒስትሩ ተመልሰው የፓርቲ ስብሰባ ውስጥ ገቡ]
- ክቡር ሚኒስትር በእርስዎ ጉዳይ ተወያይተናል፡፡
- ምን ወሰናችሁ?
- እርስዎ መሰናበት አለብዎት፡፡
- ምን?
- በክብር መሸኘት አለብዎት፡፡
- አልገባኝም?
- ክቡር ሚኒስትር ከዕለት ወደ ዕለት የሚያጠፉት ጥፋት ዋጋ እያስከፈለን ነው፡፡
- አሁን ራሳችሁን ከችግር የፀዳ አድርጋችሁ ስታወሩ አታፍሩም?
- እኛ ንፁህ ነን እያልን ሳይሆን የእርስዎ የባሰ ነው፡፡
- አሁን እኔን ወህኒ ልታወርዱ?
- ኧረ በፍፁም፣ እሱማ መዘዝ አለው፡፡
- ሁላችሁንም ጠራርጎ እንደሚያስገባችሁ ማወቃችሁም ጥሩ ነው፡፡
- ስለዚህ አይታሰሩም፡፡
- ምን ልታደርጉ ነው ታዲያ?
- አገር ስላገለገሉ በክብር ይሸኛሉ፡፡
- ምን ማለት ነው?
- አገር ላገለገሉበት በደብል ቪ ነው የምንሸኝዎት፡፡
- ምንድነው ደብል ቪ?
- ቪ8 እና ቪላ ነዋ፡፡
- ይህቺን ይወዳል?
- ምነው ክቡር ሚኒስትር?
- እኔ ስንቱን ቪ8 ሳገላብጥ አልነበር እንዴ?
- እ. . .
- ቪላስ ቢሆን እኔ ጀማሪ ካድሬ አይደለሁ?
- ምን እያሉ ነው ክቡር ሚኒስትር?
- እኔ ሥልጣኔን መልቀቅ አልፈልግም፡፡
- እሱማ አይቀርም፡፡
- ከለቀቅኩ ደግሞ ባልረባ ነገር ስሜ እንዲነሳ አልፈልግም፡፡
- ምን ማለት ነው?
- አገራችን እኮ በደብል ዲጂት እያደገች ነው፡፡
- እናውቃለን ክቡር ሚኒስትር፡፡
- ወደፊትም ምናልባት የባህር በር ሊኖረን ይችላል፡፡
- ምንድነው የሚያወሩት ክቡር ሚኒስትር?
- እኔ የእናንተን ቪ8 እና ቪላ አልፈልግም፡፡
- ታዲያ ምንድነው የሚፈልጉት?
- መርከብ!
