Friday, October 7, 2022
ሌሎች ዓምዶች
    - Advertisement -
    - Advertisement -

    ያልተገለጠው ሀብት

    ኢትዮጵያ በእብነበረድ የበለጸገች አገር ናት፡፡ ይህ ሀብት ከሚገኝባቸው አካባቢዎች መካከል ሐረር፣ ትግራይ፣ ወለጋና ቤንሻንጉልን መጥቀስ ይቻላል፡፡ ምንም እንኳን በአገሪቱ የተትረፈረፈ እብነበረድ ሀብት ቢኖርም፣ በአግባቡ በሥራ ላይ እየዋለ አይደለም፡፡ ከፍተኛ ጥራት ያለው እብነበረድ በአገሪቱ እያለ በከፍተኛ የውጪ ምንዛሪ ምርቱ ከውጪ ይገባል፡፡ አሊሻ ማይኒንግ በእብነበረድ ምርት ላይ የተሰማራ የህንድና ኢትዮጵያ የጥምረት ድርጅት ሲሆን፣ በማደግ ላይ ያለውን የኢትዮጵያ እብነበረድ ኢንዱስትሪ የተቀላቀለው በቅርቡ ነው፡፡ ስለ ድርጅቱ እንቅስቃሴ ቃለየሱስ በቀለ የድርጅቱን ሥራ አስኪያጅ አሀን ሻይልሽ ሒንጋርን አነጋግሯቸዋል፡፡

    ሪፖርተር፡- አሊሻ እብነበረድ ካምፓኒ እንዴት ተመሠረተ?

    አሀን፡- ማዕድን ቁፋሮ የጀመርነው ቤንሻንጉል ጉሙዝ ውስጥ ነው፡፡ በኢትዮጵያ ያለውን እብነበረድ ጥሬ ሀብት ተመልክተን ነው የጀመርነው፡፡ ኢትዮጵያ ውስጥ ያለው እብነበረድ በብዛት ከውጪ የሚገባ ነው፡፡ ይህን ለመቀነስ እብነበረድ ማቀነባበሪያ ድርጅት በቡራዩ የኢንዱስትሪ ዞን ገነባን፡፡ ከጥቂት ዓመታት በፊት እብነበረድ የሚያቀነባብር ዘመናዊ መሣሪያ ኢትዮጵያ ውስጥ አልነበረም፡፡ አብዛኞቹ አንድ መቁረጫ ብቻ አላቸው፡፡ ይህ ገበያው የሚፈልገውን ዓይነት ጥራትና መጠን ያለው እንዲሁም በተፈለገው ጊዜ የሚደርስ ምርት አያስገኝም፡፡ እያደገች ያለችው ኢትዮጵያ ደግሞ ደረጃውን የጠበቀ እብነበረድ ትሻለች፡፡ አዲስ አበባ ውስጥና በሌሎችም የአገሪቱ ክፍሎች ግንባታ እየተስፋፋ ነው፡፡ እየተገነቡ ያሉት ውብ ሕንፃዎች ጥራት ያለው እብነበረድ ያስፈልጋቸዋል፡፡ ነገር ግን በማደግ ላይ ያለውን የግንባታ ዘርፍ የሚያግዝ ዘመናዊ እብነበረድ ማቀነባበሪያ አልነበረም፡፡ ስለዚህ ኢትዮጵያ ውስጥ ዘመናዊ እብነበረድ ማቀነባበሪያ ለማቋቋም ወሰንን፡፡ ከሁለት ዓመት ተኩል በፊት ኦሮሚያ ክልል፣ ቡራዩ ታጠቅ ኢንዱስትሪያል ዞን ውስጥ መሬት አገኘን፡፡ አገር ውስጥ በእብነበረድ ዘርፍ ይንቀሳቀስ ከነበረ ግለሰብ ጋር ጥምረት ፈጠርን፡፡ ማቀነባበሪያውን የገነባነው በ20,000 ካሬ ሜትር መሬት ላይ ነው፡፡

    ሪፖርተር፡- ቤንሻንጉል ውስጥ ስላለው እብነበረድ ካባ ይንገሩን?

    አሀን፡- ቦታውን ያገኘነው ከሦስት ዓመት በፊት ነበር፡፡ መንዲ ከተማ አቅራቢያ ሲሆን፣ እምነበረዱ ከፍተኛ ጥራት ያለው ነው፡፡ ቦታው ወደ 2.4 ካሬ ኪሎ ሜትር ሲሆን፣ ሁለት የእብነበረድ ማውጫ ጉድጓዶች ቆፍረናል፡፡ በወር ከ250 እስከ 300 ሜትር ኪዩቢክ እብነበረድ ማምረት እንችላለን፡፡ ኤክስካቬተርና ክሬንን የመሰሉ አስፈላጊ ቁሳቁሶችን ገዝተናል፡፡ ቀድሞ ሥራ ላይ የሚውለው ሀመር ብቻ ሲሆን፣ የሚፈለገውን የጠራ እብነበረድ አያስገኝም፡፡ እኛ ደረጃውን የጠበቀ እብነበረድ ለማግኘት የሚያስችለን ዋየርሳውን የመሰለ ዘመናዊ መሣሪያ እንጠቀማለን፡፡ ሠራተኞቻችንንም የዘመናዊ መሣሪያ አጠቃቀም አሠልጥነናል፡፡

    ሪፖርተር፡- ቡራዩ ስለገነባችሁት እብነበረድ ማቀነባበሪያ ይንገሩን?

    አሀን፡- ሥራውን የጀመርነው ከሁለት ዓመት በፊት ነው፡፡ አዳዲስ መሣሪያዎች ከውጪ ለማስመጣትና እብነበረድ ማቀነባበሪያውን ለመሥራት 45 ሚሊዮን ብር ኢንቨስት አድርገናል፡፡ በእብነበረድ ዘርፉ እጅግ ዘመናዊ የሆነውን መሣሪያ ነው የገዛነው፡፡ ዘመናዊ እብነበረድ መሞረጃና ማለስለሻ ማሽኖች አሉን፡፡ እነዚህ ዘመናዊ መሣሪያዎች በጥራት ለማምረት ያስችሉናል፡፡ የምናዘጋጀው በደንበኞቻችን ፍላጎት መሠረት ነው፡፡ ኢትዮጵያ ያለውን እብነበረድ ገፅታ የመለወጥ ፍላጎት አለን፡፡ አገር ውስጥ ያለውን ግዙፍ እብነበረድ ንጣፎችን እናቀርባለን፡፡ ቀደም ሲል እነዚህን ምርቶች በአገር ውስጥ  ለማግኘት አስቸጋሪ ከመሆኑም በላይ ከውጪ የገቡትም በውድ ዋጋ የመጡ ነበሩ፡፡ አሁን በአጭር ጊዜ ውስጥ 60 ሴንቲ ሜትር በ60 ሴንቲ ሜትር የሆነ ታይልና ከፍ ያሉ የደረጃ መወጣጫዎች እያመረትን እናከፋፍላለን፡፡ በአዲሱ ዘመን አመጣሽ መሣሪያችን 100 ሴንቲ ሜትር በ100 ሴንቲ ሜትር ማምረትም እንችላለን፡፡ ከዚህ በፊት ገበያ ላይ የማይገኝና መጠኑ ከጠቀስኩት የሚገዝፍ ማምረትም እንችላለን፡፡ ሁለት ሜትር በ32 ሴንቲ ሜትር የሆነ የደረጃ መወጣጫ እናቀርባለን፡፡ መጠኑ በደንበኞቻችን ፍላጎት መሠረት ይለዋወጣል፡፡

    ሪፖርተር፡- ቤንሻንጉል ጉሙዝ ባለው እብነበረድ ካባ ምን ያህል ኢንቨስት አደረጋችሁ?

    አሀን፡- እስካሁን 20 ሚሊዮን ብር አውጥተናል፡፡ ገንዘቡን መሣሪያዎች ከውጪ ለመግዛትና ለማስመጣት አውለነዋል፡፡ የእብነበረድ ቋጥኞች የሚወጡት በዘመናዊ መሣሪያዎች ሲሆን፣ ማቀነባበሪያውም ሙሉ በሙሉ አውቶማቲክ ነው፡፡

    ሪፖርተር፡- እብነበረድ ማቀነባበሪያውን ግንባታ መቼ አጠናቀቃችሁ?

    አሀን፡- ከሁለት ወር በፊት ነው የጨረስነው፡፡ የተለያየ ዓይነት እብነበረድ አገር ውስጥ ማምረትና ማከፋፈል ጀምረናል፡፡ አሁን በመጠን፣ በቀለምና በጥንካሬም የላቀ እብነበረድ እያመረትን እንደሆነ መናገር እችላለሁ፡፡

    ሪፖርተር፡- ምርታችሁን በአገር ውስጥ ገበያ ማሠራጨት ጀምራችኋል ማለት ነው?

    አሀን፡- አዎ፡፡ ገበያውን ለሁለት ከፍለነዋል፡፡ የመጀመሪያው በግንባታው ዘርፍ ላሉ ሲሆን፣ ሁለተኛው አነስተኛ እብነበረድ አምራቾች ናቸው፡፡ አነስተኛ የማዕድን አምራቾች በገበያው እንዲቆዩ እንፈልጋለን፡፡ የእምነበረዱን ክፋይ በቀጥታ እናቀርብላቸዋለን፡፡ እነሱ ያላቸው አነስተኛ የመቁረጫ መሣሪያዎች ነው፡፡ ነገር ግን ማተኮር የምንፈልገው ትልልቅ ትዕዛዝ በሚሰጡን ኮንስትራክሽን ኩባንያዎች ላይ ነው፡፡

    ሪፖርተር፡- ደንበኞቻችሁ እነማን ናቸው?

    አሀን፡- ኮንስትራክሽን ኩባንያዎች ዋነኛ ደንበኞቻችን ናቸው፡፡ የመንግሥት ድርጅቶች፣ አነስተኛ መሣሪያ ያላቸው ድርጅቶችም ደንበኞቻችን ናቸው፡፡ አትላስ ሆቴል ፊት ለፊት የመጀመሪያ ምርት ማሳያ ሱቃችንን ለመክፈት በእንቅስቃሴ ላይ ነን፡፡ ቤት መሥራት ለሚፈልጉ ደንበኞቻችን በቀጥታ ማድረስ እንፈልጋለን፡፡ የራሳቸውን ምርጫ መግዛት የሚፈልጉ ግለሰቦች አሉ፡፡ አንዳንዶች ገበያ ላይ ባለው መጠን ቢጠቀሙም፣ የተለየ ምርጫ ያላቸው አይጠፉም፡፡ እብነበረድ ታይልና የደረጃ መወጣጫ የምናዘጋጀው በደንበኞቻችን ትዕዛዝ መሠረት ነው፡፡ ዋነኛ ዓላማችን ለደንበኞቻችን ጥራት ያለው ምርት በተመጣጣኝ ዋጋና በአጭር ጊዜ ማቅረብ ነው፡፡ ይኼ በገበያው ውስጥ አልነበረም፡፡ ለምሳሌ ከውጪ የሚመጡ ኢትዮጵያውያን በአውሮፓ አኗኗር ስለቆዩ የተለየ ፍላጎት ሊኖራቸው ይችላል፡፡ ፍላጎታቸውን ለማሟላት ዝግጁ ነን፡፡ አሜሪካ ወይም እንግሊዝ የሚያገኙትን ምርት ልናቀርብላቸው እንችላለን፡፡

    ሪፖርተር፡- ኤክስፖርት በማድረግ በኩልስ?

    አሀን፡- ኢትዮጵያ ውስጥ የውጪ ገበያ ትርፋማ ነው፡፡ ብዙዎች ኢትዮጵያ ከፍተኛ ጥራት ያለው እብነበረድ እንዳላት አያውቁም፡፡ የኢትዮጵያን እብነበረድ በህንድ በማስተዋወቅ የእኛ ድርጅት የመጀመሪያው ነው፡፡ በርካታ ምርት ወደ ህንድ ልከን በጣም ጥሩ ምላሽ አግኝተናል፡፡ አሁን ወደ መካከለኛው ምሥራቅና የአውሮፓ ገበያ መግባት እንፈልጋለን፡፡ ከገበያው የተሻለ ተጠቃሚ መሆን እንችላለን፡፡ ከፍተኛ ጥራት ያለው እብነበረድ የምናመርትበት ጥሩ እብነበረድ ካባ አለን፡፡ ጥራት ያለው ምርት የሚያስገኝ መሣሪያዎች ባለቤትም ነን፡፡ ስለዚህ በጥራት፣ በዋጋና ምርቱን በምናስረክብበት ጊዜ ተወዳዳሪ መሆን እንችላለን፡፡ ከመጪው ወር ጀምሮ ምርታችንን ወደ ህንድና ሳዑዲ ዓረቢያ መላክ እንጀምራለን፡፡ ወደ አውሮፓ አገሮችም እንልካለን፡፡

    ሪፖርተር፡- ምን ያህል ገቢ የማግኘት ዕቅድ አላችሁ?

    አሀን፡- በመጪው ስድስት ወራት በአንድ ወር ውስጥ 150,000 ዶላር ገቢ የማግኘት ዕቅድ ያለን ሲሆን፣ በቀጣይ ዓመታት እየጨመረ ይሄዳል፡፡

    ሪፖርተር፡- ከአገር ውስጥ ገበያ ምን ያህል ለማግኘት አቅዳችኋል?

    አሀን፡- ከውጪ የሚመጣውን እብነበረድ ለመተካት ስለምንፈልግ በአገር ውስጥ ገበያ በሰፊው የመሸጥ ዕቅድ አለን፡፡ ወርሃዊ ምርታችን በአጠቃላይ 30,000 ካሬ ሜትር ነው፡፡ በመጀመሪያው ወቅት ከ10,000 እስከ 20,000 ካሬ ሜትር ማምረት እንችላለን፡፡ በአገር ውስጥ ገበያ በወር ከዘጠኝ እስከ 18 ሚሊዮን ብር ማግኘት እንችላለን፡፡ አሁን ለአገር ውስጥ ገበያ ከምናቀርበው ቢያንስ ግማሽ ያህሉ ከውጪ ይገባ ነበር፡፡ በወር ወደ 500,000 ዶላር የሚሆን የወጪ ምንዛሪ ማዳን ችለናል፡፡ አንዴ በሙሉ አቅማችን ኤክስፖርት ማድረግ ከጀመርን ለአገሪቱ ከፍተኛ የውጪ ምንዛሬ እናስገኛለን፡፡

    ሪፖርተር፡- እስካሁን ምን ዓይነት ፈተናዎች ገጥመዋችኋል?

    አሀን፡- ቦታ ማግኘት ለእኛ አስቸጋሪ አልነበረም፡፡ በቡራዩ ታጠቅ የኢንዱስትሪ ዞን ቦታ ተሰጥቶናል፡፡ በዚያ ኢንዱስትሪ ለማቋቋም የመጀመሪያዎቹ ነን፡፡ የንግድ ፈቃድ ያወጣነው በሳምንት ውስጥ ነው፡፡ ብዙም ፈተናዎች አልገጠሙንም፡፡ የመንግሥት ቢሮዎች ድጋፍ ሰጥተውናል፡፡ አገር ውስጥ የተዘጋጁ መለዋወጫዎች ስለሌሉ ከውጪ ማስመጣት ግድ ይለናል፡፡ ከጊዜ በኋላ እብነበረድ ፋብሪካዎች ሲስፋፉ ችግሩ ይቀረፋል ብዬ አምናለሁ፡፡ የኃይል መቆራረጥ ትልቁ ችግር ነው፡፡ በአንድ ሳምንት ውስጥ ከሁለት ቀን በላይ መብራት ይጠፋብናል፡፡ ያለ ምንም ቅድመ ማስጠንቀቂያ መብራት ስለሚሄድ ቀኑን ለማወቅ ያዳግታል፡፡ ችግሩ በተደጋጋሚ ስለሚገጥመን ምርታችን ላይ ትልቅ እንቅፋት ሆኗል፡፡ ከመንግሥት ባለሥልጣኖች ጋር ተነጋግረን ችግሩን ለመቅረፍ እንቅስቃሴ እያደረጉ መሆኑን ገልጸውልናል፡፡ የድሮዎቹን ትራንስፎርመሮችና ማስተላለፊያ መስመር እየቀየሩ ስለሆነ ችግሩ በአጭር ጊዜ መፍትሔ ይሰጠዋል ብለን ተስፋ እናደርጋለን፡፡ የማዕድን ቁፋሮ ቦታችን ገጠር ውስጥ ነው፡፡ በአካባቢው የኤሌክትሪክ ኃይል ስለሌለ ነዳጅ እየተጠቀምን እብነበረድ እናወጣለን፡፡ ከፍተኛ ገንዘብ ስለሚጠይቅ ሒሳቡን በወጪአችን ላይ ደምረነው የምንሸጥበትን ዋጋ ከፍ ለማድረግ እንገደዳለን፡፡ የኤሌክትሪክ ኃይል ማግኘት ብንችል የምናወጣውን ወጪ እንቀንሳለን፡፡ ይህ ማለት ደግሞ ለገበያ የምናቀርብበት ዋጋም ዝቅ ይላል ማለት ነው፡፡ የመንዲ መንገድ አስቸጋሪ ስለሆነ የትራንስፖርቱን ወጪ ከፍ አድርጎታል፡፡ በቅርብ ጊዜ የገጠመን ሌላው ችግር ከኢሚግሬሽን ጋር የተያያዘ ነው፡፡ ለሥራ የምንፈልጋቸውን ባለሙያዎች ማምጣት አልቻልንም፡፡ የዕውቀት ሽግግር ያስፈልጋል ብለን እናምናለን፡፡ የአገር ውስጥ ሠራተኞችን እያሠለጠንን ቢሆንም ጊዜ ይወስዳል፡፡ ለምሳሌ በእብነበረድ ቁፋሮና ማቀነባበሪያው 80 ሠራተኞች አሉን፡፡ ህንዳዊ ሠራተኞቻችን ግን ሰባት ብቻ ናቸው፡፡ የአገር ውሰጥ ሠራተኞቻችን ሥልጠና እየሰጠን ሲሆን፣ ብቁ ከሆኑ በኋላ የውጪ ዜጎቹን በኢትዮጵያውያን እንተካቸዋለን፡፡ አሁን የውጪ ባለሙያዎች ማስመጣት ያልቻልነው በቪዛና የሥራ ፈቃድ ምክንያት ነው፡፡ እብነበረድ ቁፋሮና ማቀነባበር ጥበብ ነው፤ የዕውቀት ሽግግር ጊዜ ስለሚወስድ ፕሮጀክቶትን ለተወሰነ ጊዜ በውጪ ባለሙያዎች መመራት ይኖርበታል፡፡

    ሪፖርተር፡- ኢትዮጵያ በእብነበረድ ምርት የበለጸገች ቢሆንም እብነበረድ ምርቶች ከውጪ ይመጣሉ፡፡ የአገሪቱን እብነበረድ ኢንዱስትሪ እንዴት ይገመግሙታል?

    አሀን፡- የኢትዮጵያ እብነበረድ ዘርፍ ማደግ የጀመረው ከአምስት ዓመት በፊት ነው፡፡ እኛ እንደምንገነዘበው፣ እብነበረድ ለማቀናበር የሚያስፈልጉ ዘመናዊ መሣሪያዎች ገና አልገቡም፡፡ እብነበረድ ግብዓቱ ቢኖርም ለማቀነባበርና ለመሸጥ ችሎታና መሣሪያው ያስፈልጋል፡፡ እብነበረድ ቁፋሮ በጣም ፈታኝ ስለሆነ ማንኛውም ሰው ሊቀላቀለው የሚችል ዘርፍ አይደለም፡፡ አንዳንዶች እብነበረድ ቁፋሮውን ሲሠሩ ሌሎች ማቀናበር ይችላሉ፡፡ ዘመናዊና ትልልቅ መሣሪያዎች ያሉን ድርጅቶች ለአነስተኛ አምራቾች ግብዓት ማቅረብ እንችላለን፡፡ አሁን ሰዎች በእብነበረድ ዘርፍ ኢንቨስት እያደረጉ ነው፡፡ እብነበረድን በጥሩ ሁኔታ ለማቅረብ ዘመናዊ መሣሪያ አስፈላጊ ነው፡፡ ጥሩ እብነበረድ ምርቶች ለማግኘት ዘመናዊ ማቀነባበሪያ መሣሪያ የግድ ነው፡፡ እምነበረዱን ቆራርጦ ቅርጽ ለማስያዝ ችሎታ ይጠይቃል፡፡ እብነበረድ ቁፋሮና ማቀነባበር ራሱን የቻለ ጥበብ ነው፡፡ ባነሰ የጥራት ደረጃ የሚያመርቱ አሮጌ ማሽኖች ነበሩ፡፡ የማዕድን ቁፋሮም በሰው ይሠራ ነበር፡፡ ኢንቨስት ማረደግ የሚያስፈልገው ታዲያ በማሽንና ችሎታ ማዳበር ነው፡፡ ምርት ማቅረቢያ ጊዜ ሌላው ችግር ነው፡፡ ምርት ለማድረስ ከአራት እስከ ስድስት ወራት ይወስዳል፡፡ ኮንስትራክሽን ዘርፉ እያደገ ስለመጣ እብነበረድ ፍላጎት በፍጥነት እያደገ ነው፡፡ ማንም እንደዚህ ይሆናል ብሎ አልጠበቀም፡፡ የአገር ውስጥ አምራቾች ፍላጎቱን ለማሟላት ያልቻሉት ለዚህ ነው፡፡ የታዘዘ ምርት ለማቅረብ ረዥም ጊዜ የሚጠይቀውም ለዚህ ነው፡፡ በዚህ ምክንያት ሰዎች እብነበረድ ከውጪ ማስመጣት ይመርጣሉ፡፡ ይኼ መቀየር አለበት፡፡ ምርቱ ደንበኛው እጅ ለመግባት የሚወስድበት ጊዜ ማጠር አለበት፡፡ የእኛ ድርጅት ከፍተኛ ወጪ ያላቸው ምርቶችን ለማድረስ ከሰባት እስከ ሃያ ቀን ይወስዳል፡፡ ይኼ ቀድሞ ከአራት እስከ ስድስት ወር የሚወስድ ነበር፡፡ በእብነበረድ ኢንዱስትሪ ዋናዎቹ ጉዳዮች ምርቱ የሚቀርብበት ጊዜ፣ የምርት ጥራትና መጠኑ ናቸው፡፡ ኢትዮጵያ በእብነበረድ ሀብት የበለጸገች ቢሆንም ዘርፉ ወደኋላ የቀረ ነበር፡፡

    ሪፖርተር፡- የኢትዮጵያ እብነበረድ ዘርፍ የወደፊት ተስፋው ምንድን ነው?

    አሀን፡- ኢትዮጵያ ባላት ጥራት ያለው እብነበረድ ከአፍሪካ ኤክስፖርት በማድረግ ቀዳሚ መሆን ትችላለች፡፡ በዘመናዊ መሣሪያና ችሎታ ማዳበር ላይ ኢንቨስት ቢደረግ እብነበረድ ዘርፉ ማደግ ይችላል፡፡ እብነበረድ ለአገር ውስጥ ለውጪ ገበያም መቅረብ ይችላል፡፡ እብነበረድ ኤክስፖርት በማድረግ ከፍተኛ የውጪ ምንዛሪ ማግኘት ይቻላል፡፡ በዓለም አቀፍ ገበያ የኢትዮጵያ እብነበረድ ከቬትናም፣ ከህንዱ ማክራናና እብነበረድ ጋር እያወዳደሩ ነው፡፡ የማክራና እብነበረድ የታጅመሀል ቤተ መንግሥት የተሠራበት ነው፡፡ የማክራና እብነበረድ ስለተሟጠጠ የኢትዮጵያ እብነበረድ የማክራናን መተካት ይችላል፡፡ ስለዚህ የኢትዮጵያ እብነበረድ ኢንዱስትሪ ከማዕድን ዘርፍ ቀዳሚ መሆን ይችላል፡፡ ከወርቅና ማዕድን ምርት ጎን ለጎንም መሄድ ይችላል፡፡ ብዙ የሥራ ዕድል፣ የውጪ ምንዛሬና ግብር ሊፈጥር ይችላል፡፡

    ሪፖርተር፡- ይህን ለማሳካት ምን መደረግ አለበት? መንግሥትስ እያደገ የመጣውን እብነበረድ ዘርፍ እንዴት ማገዝ ይቻላል? የማዕድን ሚኒስቴር ዘርፉን ለማሳደግ ምን ማድረግ ይጠበቅበታል?

    አሀን፡- የማዕድን ሚኒስቴር ተባባሪ ነው፡፡ ነገር ግን እብነበረድ ዘርፍ ከፍተኛ ጠቀሜታ እንዳለው ታውቆ ትኩረት ሊሰጠው ይገባል፡፡ ምናልባት ከወርቅ ኢንዱስትሪ እኩል ላይሆን ይችላል፡፡ ቢሆንም ለግንባታው ዘርፍ እንዲሁም ለአገሪቱ ፈጣን ኢኮኖሚያዊ ዕድገት ከፍተኛ እገዛ ሊያደርግ ይችላል፡፡ እብነበረድ ኢንዱስትሪ ስላለው ጥቅም ያለው ግንዛቤ ውስን ነው፡፡ ስለዚህ ሚኒስቴሩ አገር ውስጥና በውጪ አገርም የግንዛቤ ማስጨበጥ ሥራ በስፋት ሊሠራ ይገባል፡፡ ጥራት ያለው የኢትዮጵያ እብነበረድ በዓለም አቀፍ ገበያ መተዋወቅ አለበት፡፡ የአገር ውስጥ እብነበረድ አምራቾች ከሚኒስቴሩ ጋር በመተባበር በዓለም አቀፍ የንግድ ኤክዚቢሽኖች ላይ መሳተፍ አለባቸው፡፡ ኤክስፖርትን ለማስፋፋት የኢትዮጵያ መንግሥት ከሌሎች መንግሥታት ጋር የንግድ ስምምነት እንዲያደርግም እንፈልጋለን፡፡ የንግድ ስምምነቱ ኤክስፖርት ለማድረግ ዕገዳ ወዳለባቸው አገሮች ኤክስፖርት እንድናደርግ ያስችለናል፡፡ ስምምነቱ ከፍተኛ ታሪፍ ወደተጣለባቸው አገሮች ኤክስፖርት እንድናደርግ ያስችለናል፡፡ መንግሥት እብነበረድ ኢንዱስትሪ ኤክስፖርቱን ለማሳደግ የሚያደርጋቸው ተነሳሽነቶች ይኖራሉ፡፡ ይህ በዓለም ገበያ ተወዳዳሪ የምንሆንበትና ኤክስፖርቱን የምናሳድግበት እንደሚሆን ተስፋ እናደርጋለን፡፡

    ሪፖርተር፡- ድርጅታችሁ ኢትዮጵያ ውስጥ በሌላ ዘርፍ ኢንቨስት የማድረግ ዕቅድ አለው?

    አሀን፡- በብረት ማዕድንና የድንጋይ ከሰል ፍለጋና ምርት ላይ ኢንቨስት የማድረግ ዕቅድ አለን፡፡ ወደ ሪልስቴት ኢንቨስትመንት ለመግባትም በእንቅስቃሴ ላይ እንገኛለን፡፡

    ተዛማጅ ፅሁፎች

    - Advertisment -

    ትኩስ ፅሁፎች ለማግኘት

    በብዛት የተነበቡ ፅሁፎች