Thursday, June 13, 2024
- Advertisement -
- Advertisement -

ልናገርበኢትዮጵያዊነታችን የጐደለን ነገር ምንድነው?

በኢትዮጵያዊነታችን የጐደለን ነገር ምንድነው?

ቀን:

በዋለልኝ እምሩ

ባሰብነው ቁጥር የህሊና ሕመም የፈጠረብንን በኢትዮጵያውያን ላይ የተፈጸመው ዘግናኝ የሆነው የጅምላ ግድያ፣ የአይኤስ አባል የሆኑ የተለያየ አገር ዜግነት ያላቸው ግፈኞች ተስማምተው የፈጸሙት እንደሆነ ይታመናል፡፡ ይባስ ብሎ ከመሀላቸው ኢትዮጵያውያን አሉ መባሉ ነገሩን እንቆቅልሽ ያደርገዋል፡፡ በዚህና በሌላም ጉዳይ ከአገራችን ጋር በተያያዘ እያየንና እየሰማን ያለነው ነገር ከጊዜ ወደ ጊዜ ግራ የሚያጋባ እየሆነ መጥቷል፡፡ ይኼን ጉዳይ አይቼም ሰምቼም ዝም ማለት አልችልም ብንልስ ምን ልናደርግ እንችላለን? ለጊዜውም ቢሆን እስኪ ይህን ጉዳይ እንተወውና ሌላ ተያያዥ ጉዳዮች እንመልከት፡፡ በአሸባሪው ድርጅት ውስጥ ሊቢያውያን መኖራቸውን ደግሞ እናስብ፡፡ ይኼም ሌላ የሚገርም ጉዳይ ሆኖ እናገኘዋለን፡፡ በሊቢያውያን ፊት፣ በሊቢያውያን ምድር ኢትዮጵያውያን መታረዳቸው የሚገርም ክስተት ነው፡፡

ከተገደሉ መገደላቸው ይግረምህ እንጂ ሊቢያ ውስጥ መገደላቸው ምን አስገረመህ? ልትሉኝ ትችላላችሁ፡፡ መልሴ አዎ … በጣም የሚገርም ነገር አለው እላችኋለሁ፡፡ ኧረ እባክህ ተው ድሮውንስ ቢሆን ሊቢያ ለእኛ መቼ ነው መልካም አስባልን የምታውቀው? በአምባገነን መሪዋ ጋዳፊ ውሳኔ የጦር መሣሪያ እየላከች እርስ በርሳችን እንድንጨራረስ አድርጋናለች፡፡ የአፍሪካ ኅብረት መቀመጫነትን ከመዳፋችን ፈልቅቃ ልትወስድ ያላደረገችው ነገር የለም፡፡ ስለዚህ ሊቢያ ውስጥ በግፍ ስንገደል ሊቢያውያን አብረው ገዳይ መሆናቸው ብዙም አያስገርምህ ልትሉኝ ትችላላችሁ፡፡ ሐሳባችሁን እጋራዋለሁ፡፡ ይሁን እንጂ ሊቢያውያን የታሪክ መዝገባቸውን ገልጠው ቢመለከቱ ኖሮ ኢትዮጵያውያን ስደተኞች እንኳን በግፍ ሊገድሉአቸው ይቅርና እግራቸው አፈር እንዳይነካ ቀይ ምንጣፍ ዘርግተው የክብር አቀባበል ባደረጉላቸው ነበር እላለሁ፡፡ ምንድነው የምታወራው? ይህ ሁሉ ቀርቶ ምነው በራሳችን ገንዘብ የምንፈልገው አገር እስክንደርስ በሰላም በሸኙን፣ ምነው ማሰሩና መግደሉን በተውን፡፡ ኧረ ይኼም ይቅር ይግደሉንም ምን አለበት ሰው መገደል እንዳለበት አድርገው ቢገድሉን እያልክ ብታስብ አይሻልም ልትሉኝ ትችላላችሁ፡፡ አዎ እኔም ይህ ዘግናኝ ድርጊት የሌሊት እንቅልፌን ነስቶኝ አይደል ዳግም ለመጻፍና በኢትዮጵያና በሊቢያ መካከል ያለ አንድ የሚያስደንቅ ታሪክ ለማስታወስና ከላይ የጠቀሱትን ሐሳብ ለመግለጽ ያስገደደኝ፡፡ ታሪኩን ትንሽ ቆየት ብዬ አካፍላችኋለሁ፡፡ ዋናውን የዚህን ጽሑፍ ጭብጥ ደግሞ መጨረሻ ላይ ትኩረት እሰጥበታለሁ፡፡ አሁን የዛሬ ሁለት ሳምንት ጽሑፌ ይዘት የሆነውን አንኳር ጉዳይ ላካፍላችሁ፡፡

- Advertisement -

በዚያ ጽሑፌ መንግሥት የኃይል ዕርምጃ እንዲወስድ የሚያሳስብ ጽሑፍ አቅርቤ ነበር፡፡ ከባድ ሁኔታዎች ቢኖሩም የኢትዮጵያ መንግሥት በዜጐቹ ላይ የደረሰውን ዕልቂት ተቃውሞ በማሰማት ብቻ ያልፈዋል የሚል እምነት የለኝም፡፡ አፄ ቴዎድሮስ እንኳ በባዶ እግራቸው እየተጓዙና በእጃቸው ጦርና ጋሻ ብቻ ይዘው ኢየሩሳሌምን ነፃ ማውጣት ያልሙ ነበር፡፡ መድፋቸውንም ሴባስቶፖል የሚል ስያሜ የሰጡት ከዚህ ዓላማቸው ጋር በማያያዝ ነበር፡፡ ሕዝቡም እኮ ይህን ዓላማቸውን ስለሚያውቅ ‹‹…ዓርብ…ዓርብ ይሸበራል ኢየሩሳሌም›› በማለት ሞራል ይሰጣቸው ነበር፡፡ መከላከያ ሠራዊታችንም የቴዎድሮስን ልብ እንደያዘ አምናለሁ፡፡ እናም አንድ ቀን መከላከያ ሠራዊታችን የምሥራች ሰበር ዜና ያሰማናል ብዬ በጉጉት እጠብቃለሁ፡፡ በእንደዚህ ዓይነት ስሜትና አስተሳሰብ የኢትዮጵያ መንግሥት እንዲገባ የሚያደርግ ጽሑፍ ሳወጣ የሞተብኝ ዘመድ፣ ጓደኛ ወይም የማውቀው ሰው ኖሮ አይደለም፡፡ ኢትዮጵያዊነት፣ ከዚያም አልፎ የፍትሕና የሰብዓዊነት ስሜት ሲቃ ይዞኝ እንጂ! ለነገሩ የእኔ ብቻ ስሜት እንዳልሆነ እርግጠኛ ነኝ፡፡ በሚሊዮን የሚቆጠር በሐዘን ልቡ የተወጋ ኢትዮጵያዊ ሁሉ እንደሆነ አምናለሁ፡፡

ዛሬ የዚህ ስሜት ሰለባ እንሁን እንጂ ከዘጠና ዓመታት በፊት ኢትዮጵያውያን በሊቢያ ውስጥ የነበረን ዝና፣ ክብርና ተደናቂነት ለሚያውቀው የሆነውን ሁሉ ማመን ይቸገራል፡፡ አቤት የትውልድ የአስተሳሰብና ፍላጐት መገለባበጥ የሚያመጣው ጣጣ! እኛ በኢኮኖሚያዊ፣ በማኅበራዊና በፖለቲካዊ ችግሮች ተተብትበን ስደት ለሚያመጣው ችግር ሰለባ ሆነናል፡፡ ከዘጠና ዓመታት በፊት (በ1920ዎቹ መጀመሪያ አካባቢ) ሊቢያውያን በጣሊያን ቅኝ ግዛት የሚማቅቁበት ጊዜ ነበር፡፡ ሊቢያውያን በዚያ ጨለማ ሰፍኖበት በነበረበት የጭንቀት ዘመናቸው የደረሱላቸው ኢትዮጵያውያን ብቻ ነበሩ፡፡ ለሊቢያ ነፃነት ከተዋደቁት ኢትዮጵያውያን ስመ ጥር ጀግና የነበሩት ከትግራይ አጋሜ አውራጃ ተወልደው ያደጉ ቀኝ አዝማች አሰፋ ባህታ ናቸው፡፡ ከታዋቂው የሊቢያ ብሔራዊ ጀግና ኡመር ሙክታር በላይ ጣሊያኖችን ያስጨንቁ የነበሩት አሰፋ ባህታ ነበሩ፡፡ የጣሊያን ወታደር ሆነው ወደ ሊቢያ የሄዱት አሰፋ ጣሊያኖች በሊቢያውያን ላይ ያደርሱት የነበረውን ግፍ ከተመለከቱ በኋላ፣ ያስታጠቃቸውን መሣሪያ በመጠቀም ጣሊያንን ለማጥቃት ወሰኑ፡፡ ሊቢያውያንን በማደራጀትና ከጣሊያን ጦር መጋዘኖች መሣሪያ በመዝረፍ ሊቢያውያንን እያስታጠቁ በትላልቅ ዓውደ ግንባሮች የጣሊያንን ኃይል ድል አደረጉት፡፡ ኡመር ሙክታር እንኳ ሲማረክ አሰፋ ጀብድ ሠርቶ ነበር ያመለጠው፡፡ በአሁኑ ዘመን የሙክታር ትውልድ ሊቢያ ውስጥ ቢኖር ኖሮ የአሰፋ ባህታ ዘሮች ኢትዮጵያውያን፣ ቸግሮአቸው የሊቢያን ምድር ሲረግጡ ውለታቸው እየተዘረዘረ ውዳሴና ምሥጋና በቀረበላቸው ነበር፡፡ የአሰፋ ባህታን ውለታ የሚያስብ ሊቢያዊ ቢኖር ኖሮ በሊቢያ ምድር ኢትዮጵያውያን ዘውድ ጭነው በነገሡ ነበር፡፡ ታሪክን የማያውቅ፣ ውለታን ማሰብ የማይችል ህሊና ቢስ ትውልድ ሊቢያ ውስጥ ተንሰራፍቷልና ሊቢያ ለኢትዮጵያውያን አኬልዳማ፣ የደም መሬት የግፍ ምድር ሆነች፡፡

አክራሪ ሙስሊም ቢሆን የነብዩ መሐመድን ትምህርት አክርሮ ቢከተለው፣ የመሐመድ የመጀመሪያዋ የሰላም ምድር ኢትዮጵያ ቅድስት ምድር ብለው ወደ ኢትዮጵያ ሒጅራ ባወጁ ነበር፡፡ ያከረሩት የእምነታቸውን መሠረት የጣለውን ቢላልንና የቢላልን ዘሮች ኢትዮጵያውያንን ለፈጣሪ ጸሎትና ምሥጋና የሚያቀርቡ ሰዎች በማለት የቅድስና ማዕረግ በሰጡአቸው ነበር፡፡ ያከረሩት እምነታቸው ግን ያለ ዕውቀት ነውና ሊያከብሩት የሚገባውን ሕዝብ እንደ እንስሳ አረዱት፡፡ የኢትዮጵያውያንን ደም በሊቢያ አሸዋ ላይ በግፍ ረጩት፡፡ በሊቢያ ምድር በኢትዮጵያውያን ላይ ሊሆን የማይገባው ሆነ፡፡

ኢትዮጵያ ለአፍሪካ ነፃነት ብዙ ብዙ መስዋዕትን ከፍላለች፡፡ የአፍሪካ የነፃነት አባቶችም ምሳሌያቸው ኢትዮጵያ ነበረች፡፡ ኬንያን ለነፃነት ያበቋት ጆሞ ኬንያታ በመጽሐፍ ገጾች ላይ በሚያገኙት የአፄ ምኒልክ ፎቶግራፍ ላይ ተደፍተው ያለቅሱ ነበር፡፡ ኔልሰን ማንዴላ በጽናት አፓርታይድን ለመቃወም የቻለበትን መንፈስ የተላበሰው የኢትዮጵያን ምድር ከረገጠ በኋላ ነበር፡፡ በእነዚህና በሌሎችም ሥራዎች ኢትዮጵያ ከብዙ የአፍሪካ መንግሥታትና ሕዝቦች ተደናቂነትንና ክብርን ብታገኝም፣ ከቅርብ ጊዜ ወዲህ እየከፋብን ከመጣው ችግር ለማምለጥ በተጠጋናቸው ቁጥር አፍሪካውያን እንደ እሳት የሚያንገበግበን በደል ይፈጽሙብን ጀመር፡፡ ምን ይሻላል? ኢትዮጵያውያን የጐደለን ነገር ምንድነው? መፍትሔው ይህ ነው፣ ያ ነው ብዬ በዚህ አጭር ጽሑፍ መግለጽ ባልችልም ለመፍትሔው የሚሆነውን ዋነኛ መንገድ ግን ማመልከት ይቻለኛል ብዬ አስባለሁና ይኼንኑ ለአንባቢያን ማካፈል እፈልጋለሁ፡፡ የመፍትሔው መንገድ ነው ብዬ የማቀርበውን ሐሳብ ያገኘሁት ከጥንት የግሪክ ፍልስፍና ነው፡፡

በአሁኑ ዘመን ግሪካውያን እጅግ ከተጐዱበት ሁኔታ ይልቅ በጥንቱ ዘመን በአምስተኛው ዓመተ ዓለም መጀመሪያ ላይ በተለይም የፔሎፓኔሲያን ጦርነት ሽንፈት ባደረሱባቸው ችግሮች፣ በተለይ አቴናውያን ከፍተኛ የሆነ ውድቀት ደርሶባቸው ነበር፡፡ አቴናውያን የሚኮሩባቸው የዴሞክራሲ ሥርዓታቸው፣ ለዜጐቻቸው ያጐናጸፉዋቸው መብቶችና ነፃነቶች፣ ለረጅም ዘመናት ያዳበሯቸው የሥነ ምግባር እሴቶቻቸው አንድ በአንድ መናድ ጀመሩ፡፡ ዴሞክራሲ ወደ አምባገነንነት ቀስ በቀስ ተቀየረ፡፡ የሥልጣኔያቸው ማሳያ የነበሩት የሕንፃ፣ የሐውልት፣ የግንብ ሥራዎች ወደ ፍርስራሽነት ተቀየሩ፡፡ በሕዝቡ መካከል ማኅበራዊ፣ ኢኮኖሚያዊና ሥነ ምግባራዊ ቀውስ ሰፈነ፡፡ የአገር ፍቅር ቀዘቀዘ፡፡ በዚህ ጊዜ ማንም ቢሆን እንዲህ እንዲያ መሆን አለብን የሚለውን ሳይከተል የተሰማውን ብቻ ማድረግ ጀመረ፡፡ በዚህ ምክንያት የራስን ጥቅም ማስቀደም የወቅቱ አስገዳጅ ሁኔታ ነበር፡፡

ሥልጡኗ፣ ውቧ፣ የጠበብትና የነፃነት ምድር የሆነችው ታላቋ አቴንስ እንዴት ለዚህ በቃች የሚለው ጉዳይ ለራሷ ለጠበብቶቿም ቢሆን እንቆቅልሽ የሆነ ጉዳይ ሆነ፡፡ መመራመር ባህላቸው ነውና እንዴት ለዚህ በቃን? አቴንስ ምን ቢጐድላት ነው ለዚህ የበቃችው? እያሉ የተለመደ ምርምራቸውን በውድቀታቸው ላይ አደረጉ፡፡ አኪላስና ሶፎኪለስ የአቴንስን ውድቀት የሚገልጽ በትራጄዲ ድራማዎቻቸው ማሳየት ጀመሩ፡፡ ሰበቡንም የአማልክት ቁጣ አደረጉት፡፡ ሦስተኛው ትሬጄዲያን የሆነው ዮሮፒደስ ግን ለአቴንስ መውደቅ ምክንያቱ አማልክት ሳይሆኑ የራሷ ዜጐች ጥፋት መሆኑን ድፍረት በተሞላበት ሁኔታ በሥራዎቹ ገለጸ፡፡ በዚህ አስተሳሰቡ በሰው ልጅ ላይ ለሚደርሱ ችግሮች ዋናው ተጠያቂው ራሱ ሰው መሆኑን አመለከተ፡፡ በሰው ልጅ ላይ የሚደርሱ ችግሮች መንስዔ በፍላጐቱና ባለው ነገር መካከል ያለው ልዩነት ነው ሲል አስገነዘበ፡፡

በድራማዊ ሥነ ጽሑፍ የተገለጸውን የዮሮፒደስ አስተሳሰብ ሶቅራጥስ በፍልስፍናው በአመክንዮአዊ አስተሳሰብ አጠናክሮ በይፋ ገለጸው፡፡ በአቴንስ ውድቀት ልቡ የተሰበረው ሶቅራጥስ ከውድቀታችን የሚያወጣን ራሳችንን ስንፈትሽና ለውድቀታችን መንስዔ የሆኑትን ችግሮች ለይተን መፍትሔ መስጠት ስንችል ነው በማለት አስረዳ፡፡ ይህ አስተሳሰቡንም ‹‹መርምረን የማንከተለው ሕይወት እርባና የለውም – “Unexamined life is not worth living” በማለት አጽንኦት በመስጠት ገለጸው፡፡ ፈትሾና መርምሮ እውነተኛውን ነገር ለመከተል ከዚህ በፊት ትክክል ናቸው ተብለው ይታመኑባቸው የነበሩ አስተሳሰቦችን፣ እምነቶችንና ተግባራትን እንደገና መፈተሽ ጀመረ፡፡ በሕዝብ የሚታመንባቸውን ነገሮች ሁሉ በጥያቄ ውስጥ አስገባቸውና ከሕዝቡ ጋር እየተወያየ ጥርት ያለ ግንዛቤ ላይ ለመድረስ ጥረት ማድረግ ጀመረ፡፡ እኛ አቴናውያን ስለፍትሕ እናወራለን፡፡ ፍትሕ ግን ምንድነው? ፍትሕ በምን ይመዘናል? እኛ አቴናውያን ነፃነት ያለንና በእኩልነት የምንኖር አድርገን እንቆጥራለን፡፡ ለመሆኑ እኩልነት ምንድነው? ነፃነታችንስ ምኑ ላይ ነው? በእርግጥ አቴናውያን ለእውነት እንኖራለን? እያለ መጠየቅ ጀመረ፡፡

በዚህም ምርምሩ ሕዝቡ ስለዴሞክራሲ ያወራል እንጂ ዴሞክራሲን እንደማያውቅ ተረዳ፡፡ ስለነፃነት፣ ስለእኩልነት፣ ስለፍትሕ ያወራል እንጂ ዕውቀቱም ተግባሩም በሕዝቡ ውስጥ እንደሌለ ተረዳ፡፡ በዚህም ግንዛቤው የታሪክ አባት ተብሎ የሚጠራው ሄረዲተስ አቴናውያንን በዓለም ሁሉ ካሉ ሕዝቦች በተለየ ሁኔታ የጥበብና የፈጠራ ክህሎት ያላቸው፣ አዳዲስ አስተሳሰብና ምርምር የሚወዱ፣ ነፃነትና ዴሞክራሲን ናፋቂዎች ናቸው ብሎ የገለጸው ነገር ህፀፅ ያለበት ግንዛቤ መሆኑን ተረዳ፡፡ ሶቅራጥስ አቴናውያን ራሳቸውን ከሌሎች አብልጠው የሚመለከቱበት መንገድ ስህተት ብቻ ሳይሆን፣ ድክመታቸውን እንዳያውቁ ያደረገና ለውድቀታቸው መንስዔ መሆኑን ተረዳ፡፡

እስኪ አሁን ደግሞ ወደ ራሳችን ወደ ኢትዮጵያዊነታችን እንመለስ፡፡ ከዩሮፒደስ በትራጀዲ ድራማው እንዲሁም ከሶቅራጥስ የፍልስፍና አስተሳሰቦች የምንማረው ነገር የለም ትላላችሁ? በበኩሌ ብዙ የምንማራቸው ነገሮች እንደሚኖሩ አምናለሁ፡፡ በተለይም ደግሞ ራሳችንን አጥርተን እንድንመለከት፣ ያሉብንን ደካማ ጎኖች እንድንለይና ለችግሮቻችን ትክክለኛውን መፍትሔ እንድናገኝ ያግዘናል ብዬ አምናለሁ፡፡ በዚህ መሠረት እንደ ሶቅራጥስ ሆነን ራሳችንን እንመርምር፡፡ ምክንያቱም ተፈትሾና ተመርምሮ ያልተኖረ ሕይወት እርባና የለውምና፡፡

ለኋላቀርነታችን፣ ለድህነታችን፣ ለስደታችን፣ ለፖለቲካ፣ ለማኅበራዊና ለሥነ ምግባራዊ ችግሮቻችን ምክንያት የሆኑትን  በአጠቃላይ በኢትዮጵያዊነታችን የጐደሉንን ነገሮች መረዳት የሚያስችሉንና ራሳችንን አጥርተን ለመርዳት የሚያግዙን ጥያቄዎች እናንሳ፡፡

እውነተኛው የአገር ፍቅር እንዳለን እናወራለን፣ እርስ በርሳችን እንደምንተሳሰብ፣ እንደምንከባበርና እንደምንቻቻል እናወራለን፡፡ እነዚህ ነገሮች እውነት ናቸውን? እውነተኛ ፍቅርና መተሳሰብ ካለ ብሔር ከብሔር፣ ሃይማኖት ከሃይማኖት ይቅርና ወላጅና ልጅ፣ ባልና ሚስት፣ እህትና ወንድም የማይገዳደሉበት ኅብረተሰብ አለን? በየጊዜው ብሔራዊ ድንጋጤ የሚፈጥሩ ወንጀሎችን መስማት ውሎ አዳራችን አልሆነም? የአገር ሀብት ለመዝረፍ እንዲመቸው ገዥው ፓርቲ ሥር መሸጐጥ ፋሽን ተደርጐ የተያዘበት ጊዜ ውስጥ አይደለም የምንኖረው? አንድም ብዙም የሆኑ የተቃዋሚ ፓርቲ ጋጋታ የሚያስጨንቀን ጊዜ ውስጥ እየኖርን አይደለምን? በአንድ በኩል መልካምነት ማን እንደ እኔ በሚል መልኩ ስለራሱ የሚናገር፣ በሌላ መልኩ በራሱ ውስጥ የተፈጠረው ኪራይ ሰብሳቢነት የሥርዓቱ አደጋ ነው ብሎ የሚያውጅ ጠርቶ የማይጠራ ማንነት አለኝ ብሎ በሚናገር ገዢ ፓርቲ መንግሥታችን ለአሥርት ዓመታት እየተመራን አይደለምን? በባህላችንና በብሔራዊ ሃይማኖታችን በዓላት ጊዜ ውጫዊ ማንነታችን አምሮብንና ደምቀን እንደምንታየው የውስጥ ውበት (ቅድስናው) አለን? ኢትዮጵያዊ ዜግነታችንን ቀይረን የሌላ አገር ዜግነት ለማግኘት ለምን ተራብን? ስደትን ስታስብ በመንገድህ ሁሉ ስቃይ፣ ውርደት፣ ዝርፊያና ሞት አለ ሲባል ‹‹ስደት ወይ ሞት›› እያለ ሀብታሙም ደሃውም፣ የተማረውም ያልተማረውም ስደትን ለምን ምርጫው አደረገ? ዓይናችን የሰው አገር ለማየት ለምን ይናፍቃል? ኢትዮጵያን ከኢትዮጵያውያን ልብ እንድትጠፋ ያደረጋት ነገር ምንድነው? አብዲሳ አጋ ዜግነቱን ቀይሮ እንግሊዛዊ ሆኖ በሀብትና በክብር ከመኖር ይልቅ ከብዙ መከራም ጋር ቢሆን ደሃዋ አገሬ ውስጥ ኢትዮጵያዊ ተብዬ ተጠርቼ መኖር ይሻለኛል ብሎ የኖረባትን አገር ዛሬ ጥሏት ለመሰደድ፣ በስሟም ላለመጠራት የሚፈልግ ትውልድ ለምን በዛ? የሚበሉት እያጡ፣ የከብት ቆዳ ቀቅለው ተመግበው፣ የጫካ አትክልት ሥር በልተው ለእግራቸው ጫማ፣ ለልብሳቸው መቀየሪያ ሳይኖራቸው ልጅ ልጆቻቸው በነፃነት እንዲኖሩባት ከቅኝ ገዢ ወራሪ ኃይል ጋር በከባድ መሣሪያና በመርዘኛ ጋዝ ሞተው ያኖሯትን የነፃነት ምድር ትተው፣ የእነሱ የልጅ ልጆች ነፃነት የማይገኝበትም ቢሆን ራሳቸውን እንደ ባሪያ አስገዝተውና ተሰደው ለመኖር ለምን ፈለጉ?

እንደዚህ እያልን ራሳችን መፈተሽ የሚያስችሉን በርካታ ጥያቄዎችን ማንሳት እንችላለን፡፡ እንደዚህ ዓይነት ጥያቄዎችን ማንሳት ተገቢ ነው፡፡ ሶቅራጥስ ጥያቄዎችን በማንሳት ብቻ አልተገደበም፡፡ የጋራ ግንዛቤ መፍጠር እስኪያስችለው ድረስ ከሕዝቡ ጋር ይወያይ ነበር፡፡ በተመሳሳይ እኛም እነዚህን መሰል ጥያቄዎች እያነሳን እንወያይ፡፡ ምሁራን ከምሁራን፣ ምሁራን ከመንግሥት፣ ሕዝብ ከሕዝብ፣ መንግሥትም ከሕዝብ ጋር ይወያይ፡፡ እውነት አንድ ወገን የሚያራምደው አስተሳሰብ ሳይሆን ሐሳብ ለሐሳብ ተፋጭቶ የጋራ መግባባት የሚፈጠርበትና በሁሉም ዘንድ ተግባራዊ የሚሆንበት እሳቤ ነው፡፡ ስለዚህ እንጠይቅ፡፡ በኢትዮጵያዊነታችን የጐደለንን ነገር ለማወቅ እንጠይቅ፡፡ሰ እንወያይ፡፡

መልካም ነው ብለን ስንከተለው የኖርነው ጉዳይ መልካም ሳይሆን ቀርቶ ለውድቀታችን መንስዔ ሊሆን ይችላልና፡፡ መጥፎ ነው ብለን ስንኮንነው የኖርነው አመለካከትና እምነት መልካም ሆኖ ልናገኘው እንችላለንና ራሳችንን መፈተሽ አናቋርጥ፡፡ ከሁሉ በላይ ስለራሳችን ደግመን ደጋግመን የምናወራቸው መልካም ነገሮች የሸፈኗቸው እኩይ የሆኑ ነገሮች በመካከላችን ተንሰራፍተው መከራዎችን በላያችን ላይ እያዘነቡብን ሊሆን ይችላልና ደግመን ደጋግመን በባህላችን፣ በሃይማኖታችን፣ በፖለቲካችን፣ በትምህርት ሥርዓታችን፣ ወዘተ ያሉትን በመልካም ስም የተደበቁ እኩዮችን ደግመን ደጋግመን ፈትሸን እንድረስባቸው፡፡ በሊቢያ እንደ ደረሰብን ያለ መከራ እንዳያስከፍለን አገራዊ ማንነታችንን ወደነው፣ አድንቀነው፣ አክብረነውና ተንከባክበነው መኖር እንድንችል ኢትዮጵያዊነታችንን ፈትሸን፣ መርምረን፣ አጥንተንና አውቀነው እንኑር፡፡

ከአዘጋጁ፡- ጸሐፊው የኮተቤ ዩኒቨርሲቲ ኮሌጅ ባልደረባ ሲሆኑ፣ ጽሑፉ የእሳቸውን አመለካከት ብቻ የሚያንፀባርቅ መሆኑን እንገልጻለን፡፡  

     

  

               

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ በመንግሥት የሚታወጁ ንቅናቄዎችን በተመለከተ ባለቤታቸው ለሚያነሱት ጥያቄ ምላሽ ለመስጠት እየሞከሩ ነው]

እኔ ምልህ? እ... ዛሬ ደግሞ ምን ልትይ ነው? ንቅናቄዎችን አላበዙባችሁም? የምን ንቅናቄ? በመንግሥት...

የመንግሥት የ2017 ዓ.ም በጀትና የሚነሱ ጥያቄዎች

የ2017 ዓመት የመንግሥት ረቂቅ በጀት ባለፈው ሳምንት መገባደጃ ለሚኒስትሮች...

ከፖለቲካ አባልነትና ከባንክ ድርሻ ነፃ የሆኑ ቦርድ ዳይሬክተሮችን ያካተተው ብሔራዊ ባንክ ያዘጋጃቸው ረቂቅ አዋጅና መመርያዎች

የኢትዮጵያ የብሔራዊ ባንክ የፋይናንስ ተቋማትን የተመለከቱት ድንጋጌዎችንና የባንክ ማቋቋሚያ...

የልምድ ልውውጥ!

እነሆ መንገድ ከቦሌ ሜክሲኮ። አንዱ እኮ ነው፣ ‹‹እንደ ሰሞኑ...