Tuesday, November 29, 2022
ሌሎች ዓምዶች
    - Advertisement -
    - Advertisement -
    ማኅበራዊያልተፈታው የንፅህና ችግር

    ያልተፈታው የንፅህና ችግር

    ቀን:

    በአገር ውስጥ የሚታየው የፅዳት ችግር ሁሌም አሳሳቢ ነው፡፡ በየአውራ ጐዳናውና በየመንደሩ እዚህም እዚያም ከሚጣሉ ቆሻሻዎች በተጨማሪ በየጐዳናው መፀዳዳትም የከተማዋ ራስ ምታት ነው፡፡ ‹‹ባለመሽናትዎ እናመሰግናለን›› ወይም ‹‹መሽናት ያስቀጣል›› የሚሉ ማስታወቂያዎችን በየቦታው መመልከትም የተለመደ ነው፡፡ ችግሩን ከመቅረፍ አኳያ መንግሥት በተለያዩ ሥፍራዎች የሕዝብ መፀዳጃ ቤቶችን ያስገነባና እየገነባ ቢሆንም ከችግሩ ስፋት አንፃር ይቀረዋል፡፡ የውኃ አገልግሎት ተደራሽ አለመሆንም አካባቢን ከመበከል ባለፈ ለሰዎች ጤና መቃወስ ምክንያት ሲሆን ይታያል፡፡

    ‹‹ይህ ችግር መንግሥትና ሌሎችም መንግሥታዊ ያልሆኑ ድርጅቶች ተናብበው መሥራት ባለመቻላቸው የተፈጠረ ቀውስ ነው፤›› የሚሉት አቶ መሳይ ብርሃኑ በዋሽ ኢትዮጵያ የሚዲያና የኮሙዩኒኬሽን ባለሙያ ናቸው፡፡ እንደ እሳቸው ገለጻ፣ ዋሽ ኢትዮጵያ ተናብበው ባለመሥራት እየደረሱ ያሉትን ችግሮች ለመቅረፍ ‹‹ዋን ዋሽ ናሽናል ፕሮግራም›› የተሰኘ ፕሮጀክት እ.ኤ.አ. በ2013 ቀርጾ እየተንቀሳቀሰ ይገኛል፡፡

    የፕሮጀክቱ ተልዕኮ በውኃ አቅርቦት፣ በአካባቢና የግል ንፅህና ጉዳዮች ላይ የሚሠሩ አካላትን እርስ በርስ ተናብበው እንዲሠሩ ማድረግ ነው፡፡ የናሽናል ዋሽ ቢሮ አስተባባሪ አቶ አብይ ግርማ እንዳሉት፣ ፕሮጀክቱ የተጀመረው በ2013 ቢሆንም መሟላት ያለባቸውን ቅድመ ሁኔታዎች ሲያከናውን በቶሎ ወደ ሥራው መግባት አልቻለም ነበር፡፡

    ዋሽ ኢትዮጵያ ሙቭመንትና ወተር ኤይድ ኢትዮጵያ ከናሽናል ኮኦርዲኔሽን ጋር በመተባበር ስለፕሮጀክቱ የሥራ አፈጻጸም በኢሊሊ ሆቴል ባለፈው ቅዳሜ ባዘጋጁት የፓናል ውይይት ላይ የቀረቡ ጥናታዊ ጽሑፎች እንደሚያመለክቱትም፣ እስካሁን በተሠሩ ሥራዎች ከፅዳትና ከውኃ አቅርቦት ጋር የተያያዙ ጉዳዮች መሻሻል ማሳየታቸውን፣ በቀጣይም የዕድገትና የትራንስፎርሜሽን ዕቅድ ሙሉ ለሙሉ ለማሳካት ጠንክሮ መሠራት እንዳለበት አመላክቷል፡፡ ጥናቱን ያቀረቡት አቶ አብይ እንዳሉት ለዕቅዱ ስኬታማነት የዋን ዋሽ ናሽናል ፕሮግራም ተሳትፎ ወሳኝነት አለው፡፡

    ፕሮጀክቱ በሁሉም ክልሎች በሚገኙ የተመረጡ ወረዳዎች የሚተገበር ሲሆን፣ ሥራውን በጀመረባቸው ክልሎች ያጋጠሙት ጉዳዮች በውይይቱ ላይ ቀርቧል፡፡ በአማራ ክልል ያለውን የግልና የአካባቢ ፅዳት እንዲሁም የውኃ አቅርቦት አስመልክቶ የፋይናንስ ችግር መኖሩን፣ የሰው ኃይል እጥረት መኖሩንና የተለያዩ ሴክተር ቢሮዎች ተባብሮ የመሥራት ችግር መኖሩን በሚዲያ በተደረገው ዳሰሳ እርስ በርስ ተናብቦ አለመሥራት የችግሩ አንዱ ምክንያት ነው፡፡

    ከዚህ ቀደም በርካታ ችግሮች ነበሩ የሚሉት አቶ መሳይ፣ በኢትዮጵያ 32 በመቶ የሚሆኑ ትምህርት ቤቶች የተሟላ የመፀዳጃና የውኃ አገልገሎት እንደሚያገኙ ይናገራሉ፡፡ ‹‹ትምህርት ሚኒስቴር የመማሪያ ክፍሎችን ይሠራል፡፡ የውኃ አገልግሎትና መፀዳጃ ቤቶችን አይመለከተኝም ይላል፡፡ የሚመለከታቸው አካላትም አይገነቡም፡፡ ይህ ተናብቦ ባለመሥራት የተፈጠረ ችግር ነው፡፡ ተማሪዎችም ለጤና ችግርና ሌሎች እንግልት ይዳረጋሉ፤›› በማለት ትምህርት ቤቶች መሠረታዊ ፍላጐቶችን ሳያሟሉ ሥራ እንደሚጀምሩ ይናገራሉ፡፡

    በመሆኑም ዋን ዋሽ ኢትዮጵያ ፕሮጀክት ማን ምን እየሠራ ነው? የሚለውን በማየትና ለወደፊት ምን መሥራት አለባቸው? የሚለውን በማመቻቸት ይህና መሰል ተግዳሮቶች እንዲሻሻሉ አስተዋጽኦ እንደሚያደርግ ይናገራሉ፡፡ ፕሮግራሙ በጣም ሰፊ ነው የሚሉት ባለሙያው በሚቀጥሉት አምስት ዓመታት ኢትዮጵያ በዕድገትና ትራንስፎርሜሽን ዕቅድ ያስቀመጠችውን የውኃ ሽፋን ለማድረስ ፕሮጀክቱ እንደሚተጋ ይገልጻሉ፡፡  

    spot_img
    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    በችግር የተተበተበው የሲሚንቶ አቅርቦት

    ሲሚንቶን እንደ ግብዓት ተጠቅሞ ቤት ማደስ፣ መገንባት፣ የመቃብር ሐውልት...

    ‹‹የናይል ዓባይ መንፈስ›› በሜልቦርን

    አውስትራሊያ ስሟ ሲነሳ ቀድሞ የሚመጣው በተለይ በቀደመው ዘመን የባህር...

    ‹‹ልብሴን ለእህቴ››

    ለሰው ልጅ መኖር መሠረታዊ ፍላጎት ተብለው ከተዘረዘሩት ውስጥ ልብስ...

    የአዲስ አበባ ትምህርት ቤቶች የምርመራ ውጤት እስከምን?

    በፍቅር አበበ የትምህርት ጥራትን፣ ውጤታማነትንና ሥነ ምግባርን ማረጋገጥ ዓላማ አድርጎ...