Wednesday, December 7, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    የአገር ፍቅር ስሜት ለኢኮኖሚያዊ ዕድገትም ይዋል

    ከሁለት ሳምንት በፊት ድፍን ኢትዮጵያ በሐዘንና በቁጭት ላይ ነበረች፡፡ የሁላችንንም ስሜት የነካውን ተግባር ለመቃወም ያሳየነው ተነሳሽነት አስገራሚ የሚባል ነው፡፡ እርግጥ ነው ወገኑ ሲነካ አገሩ ሲደፈር ‹‹እንዴት ተደርጎ›› የማይል ኢትዮጵያዊ ይኖራል ተብሎ አይታሰብም፡፡ ይህ ኢትዮጵያዊነት ነው፡፡ በሊቢያና በደቡብ አፍሪካ በወገኖቹ ላይ የደረሰውን ዘግናኝ ተግባር ለመቃወም አደባባይ የወጣበት ቅጽበትና ያሳየው የአገር ፍቅር ስሜት፣ በሌሎች አገራዊ ተግባራትም ቢደገም የት በደረስን እንድል አድርጎኛል፡፡

    ኢትዮጵያዊ ስሜታችን፣ ወኔያችንና ቁጭታችን አገራችን በኢኮኖሚያዊ ዕድገቷም እንድትመነጠቅ በሚያስችሉ ትብብሮች ጭምር ቢደገፍ፣ በርካታ ለውጦች ይኖሩ እንደነበር ያመላክታል፡፡ ሌሎችን ለማገልገል ልባችን ባህር ባልተሻገረም ነበር፡፡ አትንኩኝ ባይነታችን ኢኮኖሚያዊ ዕድገትን ሊያመጡ በሚችሉ ተግባራት ላይም ይዋል ሲባል፣ በርካታ ክንዋኔዎችን መግለጽ ቢቻልም ለአሁኑ ግን አንዱን ብቻ መርጫለሁ፡፡ የአገር ምርቶችን የመጠቀም ባህልን ማሳደግ፡፡

    እዚሁ በቀላሉ የምናገኛቸውን የአገር ውስጥ ምርቶች ትተን ለባህር ማዶ ምርቶች ቦርሳችንን በፍጥነት መዥረጥ የማድረጉ ልምድ በእጅጉ የተጠናወተን በመሆኑ፣ ጉዳዩን ብንነጋገርበት አይከፋም ከሚል ጭምር ነው የመረጥኩት፡፡ በእርግጥ አብዛኛዎቹን ለዕለት ኑሮ ወይም መሠረታዊ የሚባሉ ምርቶችን በአገር ውስጥ ስለማናመርት የግድ የውጭ ምርቶች ለመግዛት እየተገደድን ነው፡፡

    ከዚህ እውነት ባሻገር ግን በበቂ የጥራት ደረጃ የሚመረቱ የአገር ውስጥ ምርቶችን እንኳ ለመግዛት ወኔያችን የሚፈስ ብዙዎች ነን፡፡ ቅድሚያ ለአገር ምርት ብሎ መግዛት እንደ አለመዘመን፤ የውጭ ምርት መግዛት ደግሞ እንደ ዘመናዊነት የሚቆጠርባቸውን አጋጣሚዎች እናያለን፡፡ ለምሳሌ በአሁኑ ጊዜ ጥቂት የማይባሉ ጫማ አምራች አገር በቀል ፋብሪካዎች ሸጋ ጫማዎችን እያመረቱ ነው፡፡ እንደውም አንዳንዶቹ የጫማ ፋብሪካዎች የሚያመርቷቸው ጫማዎች በውጭ ገበያ ውስጥ ተፈልገው የሚሸመቱ ሆነው ሳለ፣ ብዙዎችን እነዚህን ምርቶች ከመግዛት ‹‹የውጭ ጫማ›› ፍለጋ ስንባዝን መመልከቱ ‹‹ኧረ ጎበዝ ወደ ራሳችንም እንመልከት›› ያስብላል፡፡   

    ከምግብ ሸቀጦች እንደፓስታ፣ ማካሮኒ፣ የቲማቲም ድልህና የመሳሰሉት የአገር ውስጥ ምርቶች ከውጭ ከገባው ያላነሰ ጥራት ኖሯቸው እንኳ፣ የአገር ውስጡን ለመግዛት የቀዘቀዘ ስሜት የውጭ ምርት አምላኪነታችንን አጉልቶ እያሳየ ነው፡፡ በዋጋ ደረጃም ቢሆን እነዚህ ምርቶች የተሻለ ሆነው እንኳን፣ በውስጣችን የተደበቀው የውጭ ምርት አምላኪነት እየተናነቀን የውጭውን ምርት እንሸምታለን፡፡ አጉል ባህል!!

    በእርግጥ ሸማቹ የውጭ ምርቶችን ሊመርጥ የሚችልባቸው ምክንያቶች ይኖራሉ፡፡ ከውጭ የሚገባው ምርት አገር ውስጥ ከሚመረተው ተመሳሳይ ምርት የተሻለ ሆኖ ሊሆን ይችላል፡፡ ይህ ከሆነ ሸማቹ ፈጽሞ የውጭ ይሻለኛል ቢል ለምን የአገር ውስጥ ምርቱን አልገዛህም ሊባል አይችልም፡፡  ጥራት የሌለውን ምርት እንዲገዛ አይገደድም፡፡ የአገር ውስጥ ኩባንያ ስለሆነ ብቻ የግድ መግዛት አለብህ ተብሎ መጫንም ትርጉም የለውም፡፡ ግን ከውጭ የሚመጣውና በአገር ውስጥ የሚመረተው ምርት ልዩነት የሌለው ከሆነ ወይም መጠነኛ ልዩነት እንኳን ቢኖረው፣ ለአገር ውስጥ ምርት ቅድሚያ መስጠቱ ግን እንደ ዜጋ ትክክለኛ ውሳኔ ሆኖ ሊወሰድ ይገባል፡፡ ይህ ሊለመድ የሚገባው ተግባር አያሌ ጥቅሞች ይኖሩታል፡፡ ዛሬ በኢኮኖሚያዊ ዕድገታቸው አፋችንን ከፍተን የምናደንቃቸው፣ በሚሠሩት ሥራ አጀብ ብለን ምራቅ የምንውጥላቸው አገሮች፤ እንደ ብርቅ የምናይላቸውን ዕድገት በደማቅ ቀለም መጻፍ ከቻሉባቸው በርካታ ምክንያቶች አንዱ ለአገራዊ ምርቶቻቸው ዘብ ስለቆሙ ጭምር ነው፡፡ ዜጎቻቸው ለአገራቸው ምርት ቅድሚያ ሰጥተው አምራቾቻቸው እንዲጎለብቱ ማድረጋቸውም ለተሻለ ሕይወት አብቅቷቸዋል፡፡ አደጉ የምንላቸው አገሮች የአገራቸውን ምርት የመግዛት ባህላቸውን ከአገራቸው ውጭም በመተግበር የማስተዋወቅ ሥራ ሲሠሩ ይታያሉ፡፡

    በዚህ ረገድ ምን እንደሚያስቡ ወይም ምን እንደሚያደርጉ አንድ ወዳጄ የነገረኝን ገጠመኙን ማስታወስ እፈልጋለሁ፡፡ በኢኮኖሚያዊ ዕድገታቸው ከሚጠቀሱ የሩቅ ምሥራቅ አገሮች መካከል አንዷ የሆነችው የደቡብ ኮሪያ ዜጎች ፈጸሙት የተባለ ነው፡፡

    ከጥቂት ወራት በፊት አንድ የልዑካን ቡድን ወደ ኢትዮጵያ ይመጣል፡፡ የልዑካን ቡድኑ በቦሌ አውሮፕላን ማረፊያ ይደርሳል፡፡ የልዑካን ቡድን ለመቀበል ቦሌ የደረሱት ተሽከርካሪዎች በዓለም አቀፍ ደረጃ ስመጥር በሚባሉ ኩባንያዎች የተመረቱ ናቸው፡፡ ዘናጭ የሚባሉ ተሽከርካሪዎች የተዘጋጀላቸው የልዑካን ቡድኑ አባላት ግን ለአቀባበል በተመረጠላቸው ተሽከርካሪዎች አልተደሰቱም፡፡ አፍ አውጥተም አንድ የአገራቸው ምርት የሆነ ተሽከርካሪ ስም ጠርተው ለምን እርሱ አልቀረበልንም ብለው ጠየቁ፡፡ ነገሩ ግራ የሚያጋባና ጥያቄያቸው የምር ሆኖ በመገኘቱ አወንታዊ መልስ ለመስጠት ግድ ብሏል፡፡ የልዑካን ቡድኑን አባላት እዛው ቆይተው የጠየቁትን የአገራቸው ምርት የሆነ ተሽከርካሪ መጥቶ ወሰዳቸው፡፡

     ይህ ምሳሌ የሚያሳየው ያደጉ የምንላቸው አገሮች የራሳቸውን አገር ምርት እንዴት እንደሚጠቀሙ ብቻ ሳይሆን፣ በተዘዋዋሪም የአገራቸውን ምርት ለማስተዋወቅ ምን ድረስ እንደሚጓዙ ነው፡፡ ሌሎችንም ኢትዮጵያ ውስጥ የሚንቀሳቀሱ የተለያዩ የውጭ ኩባንያዎች ስንመለከት ለእያንዳንዱ ሥራቸው የሚያስፈልጋቸውን ዕቃ ሲገዙ ቅድሚያ ለአገራቸው ምርት የሚሰጡ መሆናቸውን ነው፡፡ በአገራቸው የተመረተ ምርት ሊያገኙ ያለመቻላቸውን ካላረጋገጡ በስተቀር የአገራቸውን ምርት አሳደው ይገዛሉ፡፡  ነገሩን በምሳሌ ለመግለጽ የቻይና ኮንስትራክሽን ኩባንያዎችን መመልከት እንችላለን፡፡ ከትንሿ የሲሚንቶ መለስተኛ ማንኪያ ጀምሮ እስከ ትልቁ ማሽነሪ ድረስ ያለው መሣሪያ ሥሪቱ ቻይና ነው፡፡ (Made in China) ከሌለበት ንክች አያደርጉም፡፡ የተሻለ ጥራት ያለው ምርት በአገር ውስጥ ገበያ ቢያገኙ እንኳን፣ የእነሱን ከርካሳ ምርት ይመርጣሉ፡፡ ታዲያ እንዲህ እያደረጉ ቢያድጉ ምን ያስገርማል አያስብልም?

    እኛስ ጥቂትም ቢሆኑ ባሉን ምርቶች ይህንን ለማድረግ ያለመበርታታችን ለምን? ለአገር ያለን ፍቅር መገለጫዎች መካከል አንዱ እንዲህ ማድረግ ነው፡፡ የአገራቸውን ምርት የትም ቦታ መጠቀማቸው ለአገራቸው ዕድገት ጠቃሚ መሆኑን ስለሚያምኑ ነው፡፡ ለአገራቸው ዕድገት ምን ያህል ጠቀሜታ እንዳለው ስለሚያውቁ ነው፡፡ በአገር ምርት መጠቀም ኩራት ጭምር መሆኑን ስለሚረዱ፣ በአገራቸው ውስጥ ብቻ ሳይሆን ከአገራቸው ውጭ በሆነውም የራሳቸውን ምርት ሲሹ ይታያል፡፡ ይህንን የሚያደርጉት ያለ ምክንያት አይደለም፡፡ የአገር ፍቅር የሚገለጸው እንዲህ ባለው ተግባር ጭምር እየሆነ በመምጣቱ ነው፡፡

     ኢትዮጵያውያን ለአገር ፍቅር ያለን ስሜት ጥብቅ ስለመሆኑ የቀደሙ ታሪካችንም ሆኑ የእስካሁኑም ክንዋኔዎቻችን ያሳዩናል፡፡ የአገር ፍቅራችን በአትንኩኝ ባይነት ላይ ብቻ የታጠረ መሆን የለበትም ልል የወደድኩት ለዚህ ነው፡፡ የጊዜው ፍልሚያ ኢኮኖሚያዊ ነው፡፡ ይህንን ፍልሚያ አሸንፎ  መውጣት ካለብን ጅማሪያችን እንዲህ ካሉ ተግባራት መሆን ይገባዋል፡፡ እጅግ ብዙ ሥራዎች የሚጠብቁን ቢሆንም፣ አንዱ ተግባራችንና አገር ወዳድነታችን ከሚገለጽባቸው በርካታ ክንውኖች አንዱ፣ አገራዊ ምርቶችን ማብዛትና ሸማቹም አገራዊ ምርቶችን መሸመቱ ነው፡፡

    ሸማቹ የአገሩን ምርት በመጠቀም አገራዊ ፍቅሩን ይግለጽ ሲባል የሆነውንም ያልሆነውም ይግዛ ማለት አይደለም፡፡ አምራቹ ጥራት ያለው ምርት የማምረት ግዴታ አለበት፡፡ ያንን ካደረገም ነው አገሬው የአገሩን ምርት ለመግዛት የሚተጋው፡፡ ለአገራዊ ምርቶች ዕድገትና የአገር ምርትን የመግዛት ባህልን ለማዳበር፣ የአምራቾች የእጅ ጥራት ወሳኝ መሆኑን መዘንጋት የለበትም፡፡ ዛሬ እንደዋዛ እያየነው ያለነውን በአገር ምርት የመጠቀም ልምድ ለማስረጽ ግን የቀናጀ ሥራ ሊሠራ ይገባል፡፡ የማስታወቂያ ሥልቱን ማዘመንም ያሻል፡፡

    ዜጎች የአገራቸውን ምርት በመጠቀም ልምድ ለማዳበር ደግሞ ራሱን የቻለ ቋሚ ፕሮግራም ያሻል፡፡ በተለይ የንግድ ኅብረተሰቡን የሚወክሉ ተቋማት ቢያንስ ዜጎች በአገራቸው ምርት እንዲጠቀሙና እንዲገበዩ የሚያስችሉ የንግድ ትርዒቶችን ማሰናዳት አንዱ ሊሆን ይችላል፡፡ ‹‹በአገራችን ምርት እንኩራ›› የሚል ስያሜ ያላቸው የንግድ ትርዒቶች ያሉ ቢሆንም፣ አዘገጃጀቱ ግን የልብ የሚያደርስ ባለመሆኑ የሚፈለገውን ግብ እየመታ አይደለም፡፡ ስለዚህ እነዚሁ ተቋማት ቢያንስ የአገር ምርት የምንጠቀምበት ሳምንት በሚል ራሱን የቻለ ዝግጅት በማሰናዳት መንቀሳቀሱም አንድ አማራጭ ይሆናል፡፡

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት