Saturday, December 3, 2022
ሌሎች ዓምዶች
    - Advertisment -
    - Advertisment -

    የፖለቲካ ፓርቲዎች ምርጫን የሁልጊዜ ሥራ ያድርጉ!

    ምርጫ በየአምስት ዓመት የሚከናወን ተግባር ቢሆንም፣ በምርጫ ውስጥ ተሳታፊ የሆኑ የፖለቲካ ፓርቲዎች በሙሉ አምስት ዓመት ሙሉ ያለማሳለስ የሚዘጋጁበት መሆን ይኖርበታል፡፡ በአገራችን በየአምስት ዓመቱ ጠቅላላ ምርጫ የሚካሄድ ቢሆንም፣ እየታየ ባለው ተጨባጭ ሁኔታ የፖለቲካ ሥራንና ምርጫን የሁልጊዜ የቤት ሥራ የሚያደርጉ የፖለቲካ ፓርቲዎች በጣም ትንሽ ናቸው፡፡ በዘንድሮ ምርጫ 58 የፖለቲካ ፓርቲዎች ተወዳዳሪ መሆናቸው በተደጋጋሚ ቢገለጽም፣ ስንቶቹ የፖለቲካ ሥራቸውን በመደበኛነት ሲያካሂዱ ነበር ተብሎ ቢጠየቅ ምላሹ በጣም በትንሹ ይሆናል፡፡ ምርጫ ሲደርስ ድንገት ከእንቅልፋቸው ባነው የሚነሱ በርካቶች ያሉትን ያህል፣ ሕዝቡ ስማቸውን እንኳ በትክክል መጥራት የማይችላቸው የፖለቲካ ፓርቲዎችም አሉ፡፡

    የምርጫ 2007 ድምፅ መስጠት ሒደት ተጠናቆ ውጤቱ በብሔራዊ ምርጫ ቦርድ ብቻ ነው የሚገለጸው ተብሎ እየተጠበቀ ባለበት በዚህ ወቅት፣ የምርጫውን አጠቃላይ ሒደት ለመገምገም ሲሞከር ‹‹ሠርገኛ መጣ በርበሬ ቀንጥሱ›› ዓይነት ተወዳዳሪ ፓርቲዎች በብዛት ታይተዋል፡፡ ለምርጫው በበቂ ሁኔታ ዝግጅት አድርገው ራሳቸውን ለውድድር አቅርበዋል የሚባሉት ፓርቲዎች የተለያዩ ችግሮች እንዳሉ ሆነው እንኳ፣ ምርጫውንም ሆነ መደበኛ የፖለቲካ ሥራውን የሁልጊዜ የቤት ሥራ አድርገዋል ለማለት አይቻልም፡፡ የአሁኑ ምርጫ በአብዛኛው ያሳየውም ይህንን ነው፡፡

    ዓለም የተስማማበት የምርጫ ዝግጅት ጉዳይ ብዙ የሚባልበት ቢሆንም አንዳንዶችን መጠቃቀስ ይገባል፡፡ ለምርጫ ከሚያስፈልጉ መሥፈርቶች መካከል የመጀመሪያው ምርጫ ዴሞክራሲያዊ መሆን አለበት የሚለው ነው፡፡ ዴሞክራሲያዊ ምርጫ ደግሞ ሁሉም ፓርቲዎች እኩል የሚወዳደሩበት ሜዳው የተመቻቸ መሆን ይኖርበታል፡፡ በዚህ ዓይነቱ ምርጫ ውስጥ የሚወዳደሩ ሁሉም የፖለቲካ ፓርቲዎች ሐሳባቸውን በነፃነት የሚገልጹ፣ ከመራጮቻው ጋር በነፃነት የሚወያዩ፣ በመንግሥት አሠራሮችና ፖሊሲዎች ላይ የሰላ ትችት የሚያቀርቡ፣ አማራጮቻቸውን በግልጽ የሚያቀርቡና ብቁና ንቁ ተወዳዳሪዎችን የሚያፎካክሩ መሆን አለባቸው፡፡ በሥልጣን ላይ ያለው መንግሥት በበኩሉ ሁሉም የፖለቲካ ፓርቲዎች በመገናኛ ብዙኃን፣ ለምርጫ የሚያገለግሉ የመንግሥት ቁሳቁሶችንና ሀብቶችን ተጠቃሚ በማድረግና ለደኅንነታቸው ዋስትና በመስጠት ኃላፊነቱን ይወጣል፡፡ የምርጫ ሕጐችም ለሁሉም የፖለቲካ ፓርቲዎች በእኩልነት ማገልገል ይኖርባቸዋል፡፡ ለእነዚህም የሙሉ ጊዜ ሥራ ያስፈልጋል፡፡

    በምርጫ ተሳትፎ ከሚያደርጉ የፖለቲካ ፓርቲዎች በተጨማሪ የሲቪክ ማኅበራት፣ የምርጫ ቦርድ፣ የምርጫ ታዛቢዎች፣ የመገናኛ ብዙኃንና የተለያዩ ባለድርሻ አካላት ዴሞክራሲያዊ ምርጫ እንዲኖር ጠቃሚ ናቸው፡፡ የእነዚህ አካላት በነፃነትና በገለልተኝነት መንቀሳቀስ በዓለም አቀፍ ደረጃ ተቀባይነት ያለው ምርጫ ለማከናወን ይጠቅማል፡፡ በአገራችን እንደሚታየው ግን በሁሉም መስክ በርካታ ችግሮች አሉ፡፡ ችግሮቹም ምርጫ በመጣና በሄደ ወቅት ሁሉ አፍጥጠው ይታያሉ፡፡ ምርጫ የሁልጊዜ የቤት ሥራ መሆን አለበት ሲባል፣ ሁሉም ተዋናይ ወገኖች የምር ማድረግ አለባቸው ማለት ነው፡፡ አሁን እንደምናየው ምርጫውን የሽርሽር ያህል የሚጠቀሙበትና በትክክል ዓላማቸው የማይታወቅ ፓርቲዎች አያስፈልጉም፡፡

    በአሁኑ ጊዜ በአገራችን በከፍተኛ ደረጃ የሚታየው ችግር በፖለቲካ ፓርቲዎች መካከል ያለው ጤናማ ያልሆነ ግነኙነት ነው፡፡ በገዥው ፓርቲና በተቃዋሚ ፓርቲዎች መካከል ለዓመታት የዘለቀው ልዩነትን አቻችሎ ለመደራደርም ሆነ ለመነጋገር አለመፈለግ፣ በአምስት ዓመት በሚካሄድ ቅድመ ምርጫ ወቅት በሚካሄዱ ክርክሮች የሚንፀባረቀው ጥላቻና መናናቅ፣ በብሔራዊ ዋነኛ ጉዳዮች የሚታየው የተለጠጠ ልዩነት፣ ግማሽ መንገድ እንኳ ተጉዞ ለመነጋገር ከመሞከር ይልቅ በባዕዳን አማካይነት መገናኘት፣ ወዘተ የመሳሰሉት ችግሮች በምርጫ ወቅት የሚፈጥሩት ተስፋ መቁረጥን ነው፡፡ የፖለቲካ ምኅዳሩም የተሻለ ከመሆን ይልቅ እያደር እየባሰበት ነው፡፡ በዚህም ምክንያት ዘወትር የሚደመጠው የፖለቲካ ፓርቲዎች ጩኸትና የገዥው ፓርቲ ማስተባበያ ነው፡፡ ከዚያም አልፎ ተርፎ መፈራረጅና መወነጃጀል ነው፡፡

    በተቃዋሚ የፖለቲካ ፓርቲዎች ጎራ ውስጥም የሚታየው አሳዛኝ ገጽታ ነው፡፡ ከምርጫ በፊት የተለያዩ ርዕዮተ ዓለሞችን እንደሚከተለው የሚናገሩ የፖለቲካ ፓርቲዎች፣ በምርጫ ወቅት በሚደረጉ ክርክሮች ተመሳሳይ አቋም ሲያንፀባርቁ ይታያሉ፡፡ የምርጫ ማኒፌስቶአቸውም ሲታይ በአብዛኛው ተመሳሳይ ነው፡፡ በፖሊሲ ጉዳዮች ላይ ገዥውን ፓርቲ ሲሞግቱት በአንድ አንደበት የሚናገሩ እስከሚመስሉ ድረስ ልዩነታቸው አይታይም፡፡ ሕዝብ ድምፅ ለመስጠት ሲወጣ ግን ተበታትነው ስለሚያገኛቸው፣ በውጤታቸው ላይ ከሚደርሱ ተፅዕኖዎች መካከል አንዱ ወይም ዋነኛው ተጠቃሽ ይሆናል፡፡

    ሰሞኑን እንኳ በርካታ ዓለም አቀፍ ሚዲያዎች ባቀረቧቸው ዘገባዎች ተቃዋሚ የፖለቲካ ፓርቲዎችን ‹‹የተበታተኑና ደካማ›› እያሉ ነበር የሚገልጿቸው፡፡ ፓርቲዎቹ በውስጣቸው ያለውን ልዩነት አቻችለው፣ ተቀራራቢና አስማሚ የሆነ የጋራ ፕሮግራም ይዘው ቢቀርቡ፣ የሰው ኃይላቸውንና ያላቸውን ሀብት ቢያስተባብሩና ጠንከር ብለው ቢገኙ የድክመታቸው ወይም የመበታተናቸው ጉዳይ ጐልቶ አይወጣም ነበር፡፡ ከምርጫ እስከ ምርጫ ያሉት አምስት ዓመታት ስለማይታሰብባቸው ግን ሁሉም ነገር በነበረው እንደቀጠለ ነው፡፡ ጊዜያዊ ትብብሮችና ኅብረቶች ሳይሆኑ አንድ ጠንካራ ፓርቲ ፈጥሮ በደረጀ መንገድ መንቀሳቀስ ለሚናፈቀው ዴሞክራሲም ጠቃሚ ይሆን ነበር፡፡ ምርጫ የሁልጊዜ የቤት ሥራ ነውና፡፡

    አሁን ላይ ተሁኖ ‹‹በፊት ነበር እንጂ መጥኖ መደቆስ፣ አሁን ምን ያደርጋል ድስት ጥሎ ማልቀስ›› የሚል ሙሾ ለመደርደር ሳይሆን፣ ሁልጊዜም ምርጫንና ሌሎች የፓርቲ የፖለቲካ ሥራዎችን በትጋት መሥራት ምን ያህል ጠቃሚ እንደሆነ ለማሳሰብ ነው፡፡ ተቃዋሚ የፖለቲካ ፓርቲዎች እጅግ በጣም በተጣበበ ምኅዳር ውስጥ ሆነው ወደ ምርጫ እንደሚገቡ በተለያዩ ጊዜያት ተናግረዋል፡፡ የሰላማዊ ሠልፍና የስብሰባ ክልከላና እስከ ተለያዩ እንቅስቃሴዎቻቸው ድረስ ያሉትን በርካታ ችግሮች ሲያስታውቁም ነበር፡፡ በዚህ ሁሉ ወጀብ ውስጥ ለሰላማዊ የፖለቲካ ትግሉ ያደረጉት መስዋዕትነት ይከበራል፡፡ ይሞገሳል፡፡ በዚያው ልክም የትናንት ስህተቶችን እያረሙ፣ በተሻለ ብቃትና አመራር ሠርተዋል ወይ? የሚለውን ራሳቸው የሚመልሱት ጥያቄ ነው፡፡

    ገዥው ፓርቲ ከስድስት ሚሊዮን በላይ አባላት፣ የተጠናከረ አደረጃጀትና መንግሥትን በመምራቱ የሚኖረውን ተጠቃሚነት ከግምት ውስጥ በማስገባት ያደረጉት ዝግጅት ውጤታማ ነበር? ገዥውን ፓርቲ የሚቃወሙ ወገኖችን ድጋፍ ለማግኘት ተብሎ ምርጫ ውስጥ ሲገባ በተቃራኒው ወገን ያለው ዝግጅትስ ተጢኗል? ሊታረቁ የሚችሉ መለስተኛ ልዩነቶችን በማጥበብ አንድ ሆነው ለመቅረብ ታስቦ ነበር? ሌላው ቀርቶ ሌሎች ጫናዎችን በመቋቋም በበቂ ሁኔታ ይኼንን የተበታተነ ድምፅ ለማግኘት፣ የምርጫውን ሒደት የሚታዘቡ ወኪሎችን ለማሰማራት የተደረገው እንቅስቃሴ በቂ ነበር? በአዲስ አበባና በክልል ዋና ከተሞች ጭምር መራጮቻቸው የታዛቢ ያለህ ሲሉ አልተሰማም? ምርጫው ውስጥ የተገባው እነዚህና ሌሎች ጥያቄዎች ተመልሰው ነበር?

    ቀደም ሲል ለመጠቀም እንደተሞከረው 58 የፖለቲካ ፓርቲዎች በምርጫ ሰሞን እንደ ግሪሳ ወፍ ከያሉበት ሲወጡ፣ ለምርጫው ዴሞክራሲያዊነት እንደ ማሳያ መጠቀም ትርጉም አይሰጥም፡፡ ይልቁንም የአሁኗን የኢትዮጵያ ተጨባጭ ሁኔታ ያገናዘበ የፖለቲካ ፓርቲዎች የአደረጃጀት ማዕቀፍ መፈጠር ይኖርበታል፡፡ እዚህ ላይ የመደራጀት መብትን ለመጋፋት ሳይሆን፣ በኢትዮጵያ የፖለቲካ ምኅዳር ውስጥ ጠንካራና ብቁ የሆኑ ፓርቲዎች ነጥረው እንዲወጡ አማራጭ አስፈላጊ በመሆኑ ነው፡፡ ገዥው ፓርቲና አጋሮቹ የሚወክሉዋቸውን ክልሎችና የከተማ አስተዳደሮች ታሳቢ በማድረግ በጥንካሬ ይንቀሳቀሳሉ፡፡ ሌሎቹ የፖለቲካ ፓርቲዎች በምርጫ ወቅት እየባነኑ ተነስተው መወዳደሪያውን ከሚያጨናንቁ፣ ፈርጠም ብለው ሊቀርቡ የግድ ይላል፡፡ የፖለቲካ ፓርቲ ሥራውም ሆነ ምርጫው የሁልጊዜ የቤት ሥራ መሆን የሚችለው፣ ለሰላማዊ የፖለቲካ ትግሉ ሙሉ ጊዜን መስዋዕት ማድረግ ሲቻል ብቻ ነው፡፡

    ሰላማዊ የፖለቲካ ትግሉ በእኩል ደረጃ የተሠለፉ የፖለቲካ ተወዳዳሪዎችን እያሳየን አይደለም፡፡ ገዥው ፓርቲ በኢኮኖሚ የፈረጠመ፣ በሚዲያ የበላይነት ያለው፣ በሚሊዮን የሚቆጠሩ አባላትና ደጋፊዎችን ያሰባሰበ፣ ሥልጣን ላይ በመሆኑ ምክንያት የመንግሥትን መዋቅሮች የሚጠቀም፣ አንድ የፖለቲካና የኢኮኖሚ ማኅበረሰብ መፍጠር በሚለው ስትራቴጂው በየደረጃው ባሉ መዋቅሮች ርዕዮተ ዓለሙን የሚያሰርፅ ግዙፍ ኃይል ነው፡፡ በአንፃሩ በተለይ በፖለቲካው ዓውድ ውስጥ ጐላ ጐላ ብለው የሚታዩት ተቃዋሚ ፓርቲዎች ደግሞ በበርካታ ጉዳዮች ብዙ ይቀራቸዋል፡፡ ለየት ያሉ ድምፆች እንዲሰሙ አማራጮች መሆን ቢችሉም፣ እንደፈለጉ ተንቀሳቅሰው የሚፈልጉትን ዓላማ ለማሳካት ችግር ውስጥ ናቸው፡፡ በበቂ መጠን አባላትና ደጋፊዎችን ማፍራት አልቻሉም፡፡ በቂ ገንዘብ የላቸውም፡፡ የሙሉ ጊዜ የፖለቲካ ሥራ ለመሥራት አልታደሉም፡፡ በዚህ ላይ ደግሞ ጫናዎችን መቋቋም የሚያስችል አቅም የላቸውም፡፡ በአጠቃላይ ህልውናቸው ሳይቀር በኪነ ጥበቡ ያለ ይመስላል፡፡ ይኼ ዓይነቱ ገጽታ ነው ከዛሬ ይልቅ የነገን የሚያሳስበው፡፡

    አሁን ወቅቱ አሸናፊ የሚባለው በድሉ የሚኩራራበት፣ ተሸናፊ የሚባለው ደግሞ ተስፋ ቆርጦ የሚቆዝምበት ሊሆን አይገባም፡፡ ለዴሞክራሲያዊ ሥርዓት ግንባታ የሚደረገው ትግል ሁልጊዜም በሒደት ላይ ነው፡፡ ይህንን ሒደት ማስቀጠል የሚቻለው በተስፋ ቆራጭነት ወይም በመቆዘም ሳይሆን፣ የትናንቱን ለትናንት ትቶ ዛሬን ለነገ ማዘጋጃ ማድረግ ሲቻል ብቻ ነው፡፡ ሰላማዊ የፖለቲካ ትግሉ እልህ አስጨራሽ ትግል ነው ሲባል፣ የፖለቲካ ፓርቲዎች ኪሳራ ውስጥ የሚያስገባቸውን ሳይሆን አትራፊ የሚያደርጋቸውን መንገድ መምረጥ አለባቸው፡፡ እስካሁን የተመጣበት የተበታተነና የተመሰቃቀለ አደረጃጀት አላዋጣ ካለ የተሻለውን መፈለግ ቅድሚያ ይሰጠዋል፡፡ በተለይ ተቃዋሚ የፖለቲካ ፓርቲዎች ምርጫን ወቅትን ጠብቆ የሚመጣ ክስተት አድርገው ከሚያዩ ይልቅ፣ ምርጫ የሁልጊዜ የቤት ሥራ መሆኑን ደግመው ደጋግመው ያጢኑ!          

    በብዛት የተነበቡ ፅሁፎች

    ባንኮች በትልልቅ ባለሀብቶችና በከተሞች ላይ ያተኮረ የብድር አቅርቦታቸውን እንዲያርሙ ብሔራዊ ባንክ አሳሰበ

    የአገሪቱ ባንኮች ዋነኛ ተግባራቸው የሆነው ብድር የማቅረብ አገልግሎት እንከን...

    አሜሪካ ሕወሓትን በማሳመንና በመጫን በሰላም ሒደቱ ትልቅ ሚና መጫወቷን የኢትዮጵያ ዋና ተደራዳሪ አስታወቁ

    የተመድና የአውሮፓ ኅብረት አበርክቶ አሉታዊ እንደነበር ጠቁመዋል በመንግሥትና በሕወሓት መካከል...

    አዲስ አበባና ኦሮሚያ ወሰን ለማካለል ተስማሙ

    ኮዬ ፈጬ፣ ቱሉዲምቱ፣ ጀሞ ቁጥር 2 ወደ ኦሮሚያ ለቡ፣ ፉሪና...

    የኢትዮጵያ መንግሥት ባለሥልጣናት ዩክሬንን እንዲጎበኙ ጥያቄ ቀረበ

    በመካከለኛው ምሥራቅና አፍሪካ የዩክሬን ልዩ መልዕክተኛ ከአቶ ደመቀ መኮንን...
    - Advertisment -

    ትኩስ ፅሁፎች

    [በተቋሙ ሠራተኞች የተወከሉ አንድ ባልደረባ ሚኒስትሩን ለማነጋገር ቀጠሮ ይዘው ወደ ቢሯቸው ገቡ]

    ጤና ይስጥልኝ ክቡር ሚኒስትር? ሰላም ሰላም ... ተቀመጥ! አመሠግናለሁ ክቡር ሚኒስትር!...

    የጉራጌ ዞን ጥያቄና የክላስተር አደረጃጀት የገጠመው ተቃውሞ

    መንግሥት የደቡብ ብሔር ብሔረሰቦችና ሕዝቦች ክልል አካል የነበሩ ዞኖችንና...

    አዋሽ ባንክ ካፒታሉን ወደ 55 ቢሊዮን ብር ለማሳደግ ያስገደደው ምክንያት ምንድን ነው?

    ባለፈው ቅዳሜ ጠቅላላ ጉባዔውን ያካሄደው አዋሽ ባንክ የ43 ቢሊዮን...

    አቢሲኒያ ባንክ ካለፈው ዓመት የ127 በመቶ ብልጫ ያለው ትርፍ በማግኘት አዲስ ታሪክ አስመዘገበ

    አቢሲኒያ ባንክ ከቀደሚ የሒሳብ ዓመት የ127 በመቶ ብልጫ ያለው...

    የጉድለታችን ብዛቱ!

    ከፒያሳ ወደ ሜክሲኮ ልንጓዝ ነው። ጎዳናውን ትውስታ እየናጠው ሁለትና...
    spot_img

    ተዛማጅ ፅሁፎች

    ለዘመኑ የማይመጥን አስተሳሰብ ዋጋ ያስከፍላል!

    በኳታር እየተከናወነ ያለው የዓለም ዋንጫ በእግር ኳስ ጨዋታ ውስጥ ያልተጠበቁ ማራኪ ቴክኒኮችንና ታክቲኮችን ከአስገራሚ ውጤቶች ጋር እያስኮመኮመ፣ ከዚህ ቀደም በነበረ ችሎታና ዝና ላይ ተመሥርቶ...

    መንግሥት ለአገር የሚጠቅሙ ምክረ ሐሳቦችን ያዳምጥ!

    በሕዝብ ድምፅ የተመረጠ መንግሥት ለሕዝብ የሚጠቅሙ ሐሳቦችን የማዳመጥ ኃላፊነት አለበት፡፡ ሥራውን ሲያከናውንም በግልጽነት፣ በተጠያቂነትና በኃላፊነት መርህ መመራት ይኖርበታል፡፡ እያንዳንዱ ዕርምጃው በሕግ ከተሰጠው ኃላፊነት አኳያ...

    የሰላም ስምምነቱ ተግባራዊ ይደረግ!

    የሰላም ስምምነቱ ‹‹ታጥቦ ጭቃ›› ሊሆን የሚችልባቸው ምልክቶች እየተስተዋሉ ነው፡፡ ሚሊዮኖችን ለዕልቂት፣ ለመፈናቀል፣ ለከፍተኛ ሰብዓዊ መብት ጥሰትና መሰል ሰቆቃዎች የዳረገው አውዳሚ ጦርነት በፕሪቶሪያው ስምምነት መሠረት...