Wednesday, May 22, 2024
- ማስታወቂያ -
- ማስታወቂያ -

ኢትዮ ቴሌኮም በግማሽ ዓመቱ ከ18 ቢሊዮን ብር በላይ ገቢ መሰብሰቡን አስታወቀ

spot_img

ተዛማጅ ፅሁፎች

ኢትዮ ቴሌኮም ባለፉት ስድስት ወራት ከጠቅላላ የአገልግሎት ሽያጭ 18.4 ቢሊዮን ብር ማስገባቱን አስታወቀ፡፡

ኩባንያው እንደገለጸው፣ ከጠቅላላ ገቢው 13.2 ቢሊዮን ብር ያልተጣራ ትርፍ ማግኘቱንም ገልጿል፡፡ የኩባንያው ኮርፖሬት ኮሙዩኒኬሽን ዳይሬክተር አቶ አብዱራሂም አህመድ እንደጠቀሱት፣ በግማሽ ዓመቱ ከ15 በላይ አዳዲስ ተጨማሪ አገልግሎቶችን በመጀመሩ ገቢው 18.4 ቢሊዮን ብር ቢደርስም ቀደም ብሎ ካደቀው የገቢ መጠን አኳያ ማሳካት የቻለው 94.5 በመቶውን ነው፡፡ እንደሚሰበሰበው ታቅዶ የነበረውም 19.5 ቢሊዮን ብር እንደነበር ጠቁመዋል፡፡

ይሁን እንጂ ከዓምናው ተመሳሳይ ወቅት አንፃር ሲታይ፣ የዘንድሮው ገቢ በ18 በመቶ ከፍ እንዳለ አቶ አብዱራሂም ገልጸዋል፡፡ በአንፃሩ በስድስት ወራት ውስጥ የተመዘገበው ያልተጣራ ትርፍ (13.2 ቢሊዮን ብር) ቀደም ብሎ ታቅዶ ከነበረው (12.5 ቢሊዮን ብር) ከፍ ያለ ሲሆን፣ አፈጻጸሙም 106 በመቶ እንደነበር ጠቅሰዋል፡፡

በአሁኑ ወቅት በሁሉም የቴሌኮም አገልግሎት ዓይነቶች የሚገለገሉ የኩባንያው ደንበኞች ቁጥር 64.4 ሚሊዮን የደረሰ ሲሆን፣ ከ2009 ዓ.ም. ጋር ሲነጻጸር፣ በ7.5 በመቶ ከፍ ማለቱንም አቶ አብዱራሂም ለሪፖርተር ገልጸዋል፡፡ ከደንበኞቹ አጠቃላይ ብዛት አኳይ ሲታይ ከፍተኛውን ቁጥር የያዘው የሞባይል አገልግሎት ተጠቃሚዎች ቁጥር ሲሆን፣ ብዛቱም  62.6 ሚሊዮን ነው፡፡ በአንፃሩ የኢንተርኔት ዳታ ተጠቃሚው ቁጥር 16.05 ሚሊዮን ሲደርስ፣ የመደበኛ ስልክ ደንበኞች ቁጥር 1.18 ሚሊዮን እንደሆነ አስታውቀዋል፡፡

የምርት አገልግሎት አማራጮችን ማሳደግን በተመለከተ 19 አዳዲስ ምርትና አገልግሎቶች ወደ ተጠቃሚዎች ለማድረስ ታቅዶ 15ቱን ለገበያ በማቅረብ አፈጻጸሙ 79 በመቶ እንደደረሰም ተጠቅሷል፡፡

ባለፉት ስድስት ወራት ያጋጠሙትን ችግሮች በተመለከተ አቶ አብዱራሂም እንደገለጹት፣ የቴሌኮም ማጭበርበር ድርጊት ዋነኛው ተግዳሮት ሆኖ መቀጠሉን አስታውቀዋል፡፡ ይህንን ችግር ለመቅረፍ ኢትዮ ቴሌኮም ከሚመለከታቸው አካላት ጋር  እየሠራ እንደሚገኝ ጠቅሰዋል፡፡

ባለፉት አሥር ዓመታት ውስጥ ከሦስት ቢሊዮን ዶላር በላይ ወጪ በማድረግ የቴሌኮም መሠረተ ልማት አውታሮችን እያስፋፋ የቆየው ኢትዮ ቴሌኮም፣ ተጨማሪ ማስፋፊያዎችን ለማከናወን እንቅስቃሴ ላይ እንደሚገኝና ለማስፋፋያ ሥራውም ዓለም አቀፍ ጨረታ በማውጣት ኩባንያዎችን ማሳተፉ ሲዘገብ ቆይቷል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች