Wednesday, June 12, 2024
- ማስታወቂያ -
- ማስታወቂያ -

በፖለቲካ ቀውሱ ምክንያት በአዲስ ቻምበር ዓውደ ርዕይ የውጭ ተሳታፊዎች ቁጥር ቀንሷል

spot_img

ተዛማጅ ፅሁፎች

ከ22 ዓመታት በላይ ሲካሄድ የቆየውና በየዓመቱ የሚሰናዳው አዲስ ቻምበር ዓለም አቀፍ የንግድ ትርዒት ላይ የተሳታፊ አገሮችና ኩባንያዎች ቁጥር ዘንድሮ መቀነሱ ታወቀ፡፡ የውጭ ተሳታፊዎች ቁጥር ከቀነሰባቸው ምክንያቶች ዋነኛው የፖለቲካው ቀውስ እንደሆነ ተጠቅሷል፡፡

በአዲስ አበባ ንግድና ዘርፍ ማኅበራት ምክር ቤት በኩል የተሰናዳው ዓለም አቀፍ የንግድ ትርዒት፣ ከረቡዕ የካቲት 14 ቀን 2010 ዓ.ም. ጀምሮ ለሰባት ቀናት ይካሄዳል፡፡ ዘንድሮ ለ22ኛ ጊዜ የሚካሄደው የንግድ ትርዒት ላይ 160 ኩባንያዎች እንደሚሳተፉም  ታውቋል፡፡ ዘንድሮው ከ11 አገሮች የተውጣጡ 70 ያህል ኩባንያዎች እንደሚሳተፉ ሲታወቅ፣ ከጠቅላላ ተሳታፊዎች ቁጥር አንፃር ከአምናው ይልቅ በዘንድሮው ከ20 ያላነሱ ኩባንያዎች እንደማይመጡ ተረጋግጧል፡፡  

ከንግድ ምክር ቤቱ የተገኘው መረጃ እንደሚያስረዳው፣ ከአሥራ አንዱ አገሮች መካከል በርካታ ተሳታፊዎችን ይዘው የሚቀርቡት ጣልያን፣ ኬንያ፣ ቻይና እንዲሁም የተባበሩት ዓረብ ኤምሬትስ ናቸው፡፡ ጣልያን በ50፣ ኬንያም በ20 ኩባንያዎቻቸው አማካይነት በንግድ ትርዒቱ ይወከላሉ፡፡

ሆኖም የዘንድሮው የተሳታፊ አገሮች ቁጥር ከሌላው ጊዜ አነስተኛ ተሳታፊ የታየበት ሆኗል፡፡ በዓምናው የንግድ ትርዒት የተሳተፉ አገሮች ቁጥር 18 እንደነበር ይታወሳል፡፡ እነዚህ አገሮች 100 ኩባንያዎችን ይዘው እንቀረቡና 80 የአገር ውስጥ ኩባንያዎችም በንግድ ትርዒቱ እንደተካፈሉ መዘገባችን አይዘነጋም፡፡

በ2008 ዓ.ም. በተካሄደው 20ኛው አዲስ ቻምበር የንግድ ትርዒት ላይ ተሳትፈው የነበሩት ከ130 በላይ የውጭ ኩባንያዎች ሲሆኑ፣ እነዚህም ከ18 አገሮች የተውጣጡ እንደነበሩ ይታወሳል፡፡ በተለይ ቱርክ በዚህ የንግድ ትርዒት ላይ በ73 ኩባንያዎች በመወከል ቀዳሚዋ አገር ነበረች፡፡ በ2007 ዓ.ም. በተካሄደው 19ኛው የንግድ ትርዒት ወቅትም በርካታ ተሳታፊዎች ታድመው እንደነበር የምክር ቤቱ መረጃ ይጠቁማል፡፡ ከ20 አገሮች የተውጣጡ 163 ኩባንያዎች የተሳተፉበት ነበር፡፡

 በዘንድሮው ዝግጅት ላይ 11 አገሮች ብቻ መሳተፋቸው የአገሮች ተዋጽኦ ዝቅተኛ የሆነበት ዓመት እንዲሆን አድርጎታል ተብሏል፡፡ የተሳታፊ ኩባንያዎች ቁጥር ለምን ቀነሰ? ለሚለው ጥያቄ ንግድ ምክር ቤቱ በሰጠው ማብራሪያ መሠረት፣ አንዳንድ አገሮችና ተሳታፊዎች ከኢትዮጵያ የወቅቱ ፖለቲካዊ ሁኔታ ጋር በተገናኘ ለተሳትፎ ያስያዙትን ቀጠሮ መሰረዛቸው አንዱ ምክንያት ሆኗል፡፡

አንድ የውጭ የመድን ኩባንያ 72 ካሬ ሜትር ቦታ እንዲያዝለት ጠይቆ ኋላ ላይ ግን ተሳትፎውን እንደሰረዘ አስታውቋል፡፡ ከግብፅና ከሌሎች አገሮችም በተመሳሳይ መንገድ በዘንድሮው የንግድ ትርዒት እንደማይሳተፉ ያስታወቁ ኩንያዎች ይህንኑ ለምክር ቤቱ ማስታወቃቸውን ለመረዳት ተችሏል፡፡ የተሳታፊዎችን ቁጥር እንዳይቀንስ፣ ከተቻለም ከዓምናውም የበለጠ እንዲሆን ሲጣጣር መቆየቱን የጠቀሰው ምክር ቤቱ፣ ይህም ሆኖ ለመሳተፍ በመጡት ተሳታፊዎች ሰፋፊ ቦታዎች በመያዛቸው ሦስቱም ዓውደ ርዕይ የሚካሄድባቸው አዳራሾች መሙላታቸውን ጠቅሷል፡፡ ከውጭ ለሚመጡና በንግድ ትርዒቱ የሚሳተፉ 300 የኩባንያ ተወካዮች እንደሚገኙም ይጠበቃል፡፡

የዘንድሮው የንግድ ትርዒት ‹‹ንግድ ለልማት›› በሚል መሪ ቃል የተሰናዳ ሲሆን፣ ለአንድ ሳምንት በሚቆየው ዝግጅትም በኩባንያዎች መካከል የእርስ በርስ ግንኙነትና ትስስር የሚፈጠርበት እንደሆነ ምክር ቤቱ አስታውቋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች