Friday, December 2, 2022
ሌሎች ዓምዶች
    - Advertisement -
    - Advertisement -
    የሳምንቱ ገጠመኝየሳምንቱ ገጠመኝ

    የሳምንቱ ገጠመኝ

    ቀን:

    ከዚህ ቀደም ዝርፊያና ዘራፊዎችን በተመለከተ ብዙ ተብሏል፡፡ በድሮ ጊዜ ‘ቁጭ በሉ’ ከሚባሉት አጭበርባሪዎች ጀምሮ እስከ ኪስ አውላቂዎች በርካታ ገጠመኞችን ሰምተናል፡፡ በበኩሌ ከሁሉም የማይረሳኝ ፒያሳ ውስጥ የዛሬ 15 ዓመት የተፈጸመ ድርጊት ነው፡፡ ሰውየው በሙሉ ልብስ ከከረባት ጋር ተውቦ ዘ ኬቭ የሚባለው ካፌ ግድግዳ ተደግፎ ያለቅሳል፡፡ ይኼን የመሰለ ዘንካታ ሰው ምን ሆኖ ነው እየተንሰቀሰቀ የሚያለቅሰው በማለት ጠጋ አልኩት፡፡ እንደ ሕፃን ልጅ ፊቱ በእንባ ታጥቦ ዓይኖቹ ድልህ ይመስላሉ፡፡ ለማንኛውም አረጋግቼ ለማነጋገር ስጠጋው ሰዎች ከበብ ማድረግ ጀመሩ፡፡

    “ወንድሜ ምን ገጠመህ?” በማለት የመጀመሪያውን ጥያቄ ስወረውርለት፣ “ወገኖቼ ተዘረፍኩ፣ በቁሜ ተዘረፍኩ…” እያለ እዬዬ አለ፡፡ እኔና ሌሎች ሁለት ግለሰቦች ሰውዬውን ከከበባው ውስጥ አውጥተን ትሪያኖ ካፌ ወስደን አረጋግተን ማነጋገር ጀመርን፡፡ ሰውዬው እንደሚለው በእጅ በሚያዝ አነስተኛ ቦርሳ 40 ሺሕ ብር ይዞ ባንክ ለማስገባት ደጎል አደባባይ ከታክሲ ሲወርድ፣ ሁለት የገጠር ሰዎች ሰላምታ ያቀርቡለታል፡፡ እሱ እንደሚለው እነዚህ የገጠር ሰዎች የተባሉት ወንድና ሴት ናቸው፡፡ ወንድየው በሃምሳ፣ ሴትየዋ ደግሞ በ40 ዓመት ዕድሜ ክልል ይገመታሉ፡፡

    ሁለቱ ገጠር ተብዬዎች በገጠር የአነጋገር ዘዬ ሎተሪ ደርሷቸው ከገጠር እንደመጡ፣ ነገር ግን እንዴት ገንዘባቸውን እንደሚቀበሉ ስለማያውቁ እሱ እንዲያወጣላቸው እየተለማመጡ እየጠየቁት ሳለ ሁለት ሎተሪ አዟሪዎች ይመጣሉ፡፡ ሰዎቹም ይኼው የደረሰንን ዕጣ እይ ብለው የሎተሪ ቲኬታቸውን አውጥተው ያሳዩታል፡፡ በእርግጥም የአንደኛ ዕጣ አሸናፊ ቁጥርና የሎተሪው ቁጥር ተመሳሳይ ነው፡፡ ሰውየው በሐሳባቸው ተስማምቶ ብሔራዊ ሎተሪ አስተዳደር በር ድረስ አብሯቸው ይሄዳል፡፡ እነሱም መታወቂያ ስለሌላቸው ገብቶ እንዲያወጣላቸው በገጠር አነጋገር ያባብሉታል፡፡ እሱም ተስማምቶ ሊያወጣላቸው ሲገባ ሴትየዋ ቦርሳውን ትቀበለዋለች፡፡ “ምን እንደነካኝ አላወቅኩም፣ 40 ሺሕ ብር የያዘውን ቦርሳዬን ሳልጠራጠር ሰጥቻት ገባሁ፡፡ የሚመለከተው ኃላፊ ዘንድ ደርሼ ሎተሪውን ሰጠሁት፡፡ ገልበጥ ገልበጥ አድርጎ ካየው በኋላ አንገቱን እየነቀነቀ ‘ሎተሪው ያንተ ነው?’ ሲለኝ አይደለም አልኩት፡፡ ‘በል ወዳጄ ንብረት ወይም ገንዘብ ሰጥተህ ከሆነ ፍጠን’ ሲለኝ በቁሜ ደረቅኩ፡፡ ከሎተሪ አስተዳደር ግቢ ወጥቼ ወዲያ ወዲህ ብል ማንም የለም፡፡ በቃ ለዓመታት የለፋሁበትን ጥሪቴን በደቂቃዎች ውስጥ አዘረፍኩ፡፡ እኔማ መሞት ነው ያለብኝ…” ብሎ እዬዬውን አቀለጠው፡፡

    ሰውየውን ሁለተኛ ፖሊስ ጣቢያ ወስደን ቃሉን እንዲሰጥ አደረግን፡፡ አንድ በጣም ታዋቂ ልምድ ያለው መርማሪ ፖሊስ በዓይን እንተዋወቅ ስለነበር በጣም አዝኖ፣ “ሕዝቡ በተደጋጋሚ ሲነገረው አይሰማም፡፡ በሎተሪ የተነሳ በፖሊስ ሬዲዮና ጋዜጣ ብዙ ማሳሰቢያ ተሰጠ፡፡ ነገር ግን በየቀኑ የሚዘረፈው ሰው ብዙ ነው፡፡ ትንሽ ጥቅም ለማግኘት ወይም በአጉል አዛኝነት ሕዝቡ እየተዘረፈ ነው፡፡ ይኼንን መጥፎ ድርጊት ለማስቆም አንድ አገር አቀፍ ዘመቻ ያስፈልገናል፤” ብሎኝ ተለያየን፡፡ የዚያ ቅስሙ የተሰበረ ሰው ሁኔታ ግን ፈጽሞ አይረሳኝም፡፡ ለዓመታት ያለ ዕረፍት እየሠራ በዕቁብ ያገኘውን ገንዘብ ነበር በገጠር መሳይ ወንበዴዎች የተዘረፈው፡፡ አሁንም የረቀቁ በርካታ ዝርፊያዎች በዙሪያችን አሉ፡፡ የሰሞኑ ገጠመኜ ደግሞ ይህንን ይመስላል፡፡

    ባለፈው ሳምንት ከፒያሳ ይዞኝ የመጣው ታክሲ ሚሊኒየም አዳራሽ ፊት ለፊት ቦሌ ሚኒ ካፌ አጠገብ ያወርደኛል፡፡ መንገዱን ተሻግሬ እንደጨረስኩ ሚሊኒየም አዳራሽ በራፍ አጠገብ አንዲት በወጣትነት ዕድሜ ውስጥ የምትገኝ ሴት እሪ ትላለች፡፡ ጠጋ ብዬ ምን እንዳጋጠማት አንዱን ስጠይቅ ከዓረብ አገር እንደገባች መዘረፏን ይነግረኛል፡፡ ሚሊኒየም አዳራሽ ጥበቃ ላይ ያሉት የፖሊስ ባልደረቦች እያፅናኑዋት ድርጊቱ እንዴት እንደተፈጸመ ይጠይቋታል፡፡ ልጅቷ ቦሌ አውሮፕላን ማረፊያ ስትደርስ ሻንጣዎቿንና የእጅ ቦርሳዋን ይዛ ታክሲ ታፈላልጋለች፡፡ በዚህ መሀል ሁለት ሰዎች እንደሚረዷት ይነግሯትና በመኪና ይዘዋት ይወጣሉ፡፡ ሚሊኒየም አዳራሽ ጋ ሲደርሱ እሷ ለዘመዶቿ ስልክ እንድትደውልና የሚሞላ ፎርም እንድትሞላ በማለት ከመኪና እንድትወርድ አድርገው፣ ሳታስበው በፍጥነት ተፈትልከው ይጠፋሉ፡፡

    ለዓመታት ዓረብ አገር ለፍታ ያገኘችው ገንዘብ፣ የወርቅ ጌጣጌጦች፣ የሞባይል ስልኮች፣ አልባሳት፣ መጫሚያዎችና የመሳሰሉትን ንብረቶች ሰዎቹ ዘርፈዋት በመሄዳቸው ባዶ እጇን ቀርታለች፡፡ በእውነቱ እጅግ በጣም የሚያሳዝን ግፍ ነው የተፈጸመባት፡፡ ይህች ከገጠሪቱ ኢትዮጵያ ተሰዳ በዓረብ አገር በሥቃይ ያሳለፈች ሴት አገሯ ስትገባ የወንበዴዎች ሰለባ መሆኗ ቅዠት ሆኖባታል፡፡ የገጠማትን እየተናገረች በመሀል እሪሪ ስትል አዕምሮዋን የሳተች ትመስላለች፡፡ በእርግጥም አዕምሮዋን ብትስት አይገርምም፡፡ የለፋችበትን ገንዘብና ንብረት በደቂቃዎች ውስጥ ተዘርፋ ባዶዋን ቀርታለች፡፡ መሄጃ የላትም፡፡ በአንድ ጊዜ የቀኑ ብርሃን ጨለማ ሆኖባታል፡፡ በበኩሌ እንባዬን መቆጣጠር ነበር ያቃተኝ፡፡ ሰው በወገኑ ላይ ይኼን ያህል እንዴት ይጨክናል? በሊቢያ በረሃ ያ ሁሉ አረመኔያዊ ግፍ ተፈጽሞባቸው የተጨፈጨፉት ወገኖቻችንን ለሚያስብ ማንም ዜጋ፣ ይኼ በአገራችን ወንበዴዎች የተፈጸመ የዝርፊያ ተግባር ከዚያ አይተናነስም፡፡

    የዚህ ዓይነት ድርጊት ከዚህ በፊት ተፈጽሞ እንደሆነ ለማጣራት አንድ የማውቀው ሰው ዘንድ ወደ ቦሌ ድልድይ አካባቢ አመራሁ፡፡ እሱ እንደነገረኝ ከዓረብ የሚመጡ በርካታ ሴቶች በተለያዩ ጊዜያት ተዘርፈዋል፡፡ አንዳንዶቹ በታክሲ እየታፈኑ ተወስደውም ይደፈራሉ፡፡ ገንዘባቸው፣ ጌጣ ጌጦቻቸውና አልባሳቶቻቸው ተዘርፈው በቦሌ መንገድ ላይ እንደ ዕብድ የሚሮጡ ብዙ ጊዜ ታይተዋል አለኝ፡፡ ሕግ ባለበት አገር እንዴት እንዲህ ዓይነት ተግባር በአደባባይ ይፈጸማል? እንዲህ ዓይነቶቹ ሰብዓዊነት የሚጎድላቸው ዘራፊዎች ከኤርፖርት እስከ ውጪ ድረስ ያላቸው የግንኙነት ሰንሰለት እንዴት አይታወቅም? እነሱስ ማን ናቸው? ፖሊስ ይህንን ጉዳይ በጥብቅ ተከታትሎ መፍትሔ መፈለግ አለበት፡፡ በዚህ ደግሞ የኅብረተሰቡ ተሳትፎ ከበቂ በላይ ነው፡፡

    በተለይ የኤርፖርቶች ድርጀት የፀጥታ ክፍልና የሚመለከታቸው አካላት ከዓረብ አገር የሚመጡ ዜጎችን ጉዳይ በልዩ ሁኔታ መከታተል ይኖርባቸዋል፡፡ እነዚህ ወገኖች ከኤርፖርት ወጥተው የሚቀበላቸው ዘመድ ወዳጅ እስኪያገኙ መቆጣጠር፣ ከአውሮፕላን ወርደው ሲመጡ ጥንቃቄ እንዲያደርጉ መምከርና ማስጠንቀቅ ይገባል፡፡ ወገኖቻችንን በበረሃ ተቃጥለው ያፈሩትን ንብረት አረመኔዎች ሲዘርፉ ዝም ብሎ መመልከት ተገቢ አይደለም፡፡ በቀደም ዕለት የዚያችን ወገናችንን ሰቆቃ የተመለከቱ ሁሉ ያሉት “ኧረ በሕግ አምላክ” ነው፡፡ ሕግ ካልተከበረ፣ ሕገወጦች ተገቢውን ቅጣት ካላገኙና ዜጎች በሕግ ተማምነው ካልኖሩ አደጋ ነው፡፡ ልብ ያለው ልብ ይበል፡፡

    (መሳፍንት አለማየሁ፣ ከስድስት ኪሎ)

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    [በተቋሙ ሠራተኞች የተወከሉ አንድ ባልደረባ ሚኒስትሩን ለማነጋገር ቀጠሮ ይዘው ወደ ቢሯቸው ገቡ]

    ጤና ይስጥልኝ ክቡር ሚኒስትር? ሰላም ሰላም ... ተቀመጥ! አመሠግናለሁ ክቡር ሚኒስትር!...

    የጉራጌ ዞን ጥያቄና የክላስተር አደረጃጀት የገጠመው ተቃውሞ

    መንግሥት የደቡብ ብሔር ብሔረሰቦችና ሕዝቦች ክልል አካል የነበሩ ዞኖችንና...

    አዋሽ ባንክ ካፒታሉን ወደ 55 ቢሊዮን ብር ለማሳደግ ያስገደደው ምክንያት ምንድን ነው?

    ባለፈው ቅዳሜ ጠቅላላ ጉባዔውን ያካሄደው አዋሽ ባንክ የ43 ቢሊዮን...

    አቢሲኒያ ባንክ ካለፈው ዓመት የ127 በመቶ ብልጫ ያለው ትርፍ በማግኘት አዲስ ታሪክ አስመዘገበ

    አቢሲኒያ ባንክ ከቀደሚ የሒሳብ ዓመት የ127 በመቶ ብልጫ ያለው...