Wednesday, July 24, 2024
- ማስታወቂያ -
- ማስታወቂያ -

ከ45 ዓመታት በላይ ተቋርጦ የቆየው የንግድ ጆርናል እንደገና መታተም ተጀመረ

ተዛማጅ ፅሁፎች

የአዲስ አበባ ንግድና ዘርፍ ማኅበራት ምክር ቤት ከ45 ዓመታት በላይ ተቋርጦ የቆየውን ‹‹የኢትዮጵያ ትሬድ ጆርናል›› የተባለውን የንግድ ኢንቨስትመንት ጆርናል እንደገና በማዘጋጀት ማሳተም ጀመረ፡፡

በንግድ፣ በኢንቨስትመንትና በአጠቃላይ ኢኮኖሚያዊ ጉዳዮች ላይ የተለያዩ ሙያዊ ትንታኔ የሚቀርቡበት ነው የተባለውን ጆርናል እንደገና በማስጀመር የመጀመርያን ዕትም ባለፈው ሳምንት ይፋ አድርጓል፡፡

ጆርናሉ የቀድሞ መጠሪያውን ‹‹አዲስ ቻምበር ቢዝነስ ጆርናል ኦፍ ትሬድ ኤንድ ቢዝነስ›› በሚል ስያሜ በመቀየር፣ የቀድሞውን ጆርናል የተጀመረበትን ዓላማ ይዞ ለኅትመት መብቃቱን የንግድ ምክር ቤቱ ዋና ጸሐፊ አቶ ጌታቸው ረጋሳ ገልጸዋል፡፡

የኅትመቱን እንደገና መመለስ አስመልክቶ በተሰጠው ተጨማሪ ማብራሪያ፣ በመጀመርያው ዕትም ላይ ሦስት የተመረጡ የንግድና የኢንቨስትመንት ዘርፎች ላይ የተደረጉ ጥናታዊ ጽሑፎች እንዲታተሙበት ተደርጓል፡፡ ለኅትመት የበቁት ጥናታዊ ጽሑፎችም የኢትዮጵያን ብረታ ብረት ኢንዱስትሪ፣ የአግሮ ፕሮሰሲንግ ኢንዱስትሪና የማዕድን ኢንዱስትሪ ዘርፎችን ጥቅል ይዘት የሚያሳዩ ናቸው፡፡

የንግድ ምክር ቤቱ ምክትል ጸሐፊና የጆርናሉ ኤዲቶሪያል ቦርድ አባል አቶ ያየህይራድ አባተ ለሪፖርተር እንደገለጹት ደግሞ፣ ጆርናሉ ንግድና ኢኮኖሚን የተመለከቱ ጉዳዮች ላይ ጥናትና ምርምር የሚደረግባቸው ዘርፎች ውስጥ ያለውን መልካም ዕድሎች ማሳየት አንዱ ዓላማው ይሆናል፡፡ ከዚህም ሌላ በተደረገው ጥናት መሠረት የንግድና የኢንቨስትመንት ማነቆዎች ካሉ እነሱን በማሳየት መፍትሔ እንዲፈለግላቸው መጠቆምም የጆርናሉ ሌላው ዓላማ እንደሆነ ተጠቅሷል፡፡ ጆርናሉ የተለያዩ ኢኮኖሚያዊ የሆኑ ጉዳዮች የመረጃ ምንጭ በመሆን እንዲያገለግል እንደታቀደ የአቶ ያየህይራድ ማብራርያ ያስረዳል፡፡

በመጀመሪያው ኅትመት ላይ የተካተቱት ጹሑፎች ንግድ ምክር ቤቱን ያስጠናቸውንና በተለያዩ ሲምፖዚየሞች ላይ የቀረቡ ቢሆኑም፣ ከዚህ በኋላ ግን ንግድ ምክር ቤቱ በሚያቋቋመው ‹‹ሴንተር ኦፍ ሪሰርች ፖሊሲ ኤንድ አድቮኬሲ›› ተቋም በኩል ተጠንተው የሚቀርቡ ይሆናል፡፡ ተቋሙ በጆርናሉ ሊካተቱ ይገባል የተባሉ ሌሎች ንግድና ኢንቨስትመንት ነክ መረጃዎችም በማዘጋጀት የሚታተምበት ይሆናል፡፡ የኢኮኖሚ ዕድሎችን የሚያሳዩ መግለጫዎችና በተለያዩ ኢንቨስትመንት ላይ ያሉ ዕድሎች የሚቀርቡት ይሆናል፡፡ የአገር ውስጥም ሆኑ የውጭ ባለሀብቶች ሊሳተፉባቸው የሚችሉባቸውን የኢንቨስትመንት አማራጮች ጭምር በጥናት አስደግፎ በመያዝ በዓመት ሁለት ጊዜ ይታተማል ተብሎም ይጠበቃል፡፡

ከዚህም ሌላ የአገሪቱ የተለያዩ ኢንቨስትመንት ዘርፎች በመጪው ጊዜ የት ሊደርሱ ይችላሉ የሚል ትንበያዎችን በመጽሔቱ ለማካተት እንደታቀደም ተገልጿል፡፡ እንደ አቶ ያየህይራድ ገለጻ፣ ለምሳሌ ለሚቀጥለው አሥር ወይም አምስት ዓመት የወተት፣ የሆቲካልቸር፣ የማዕድና ወዘተ. የኢንቨስትመንተ ዘርፎች የሚደርሱበትን ደረጃ በአኃዝ በመደገፍ እንዲቀርብ ይደረጋል፡፡ 

እንዲህ ያሉ መረጃዎች የኢንቨስትመንት ዘርፉን የቀደመና ወቅታዊ ሁኔታ በሚገባ መረጃ በመስጠት በየዘርፎቹ ለመሰማራት ለሚሹ ኢንቨስተሮች የመረጃ ምንጭ በመሆን ይረዳሉ፡፡ ለፖሊሲ አውጪዎችም ግባት ይሆናል ተብሎ ይታመናል፡፡

ጆርናሉ ለንግዱ ኅብረተሰብና መንግሥታዊ ላልሆኑ ተቋማትና እንዲሁም የኢትዮጵያ ኤምባሲዎች ባሉበት አገሮች ይሠራጫል፡፡ እንደ ንግድ ምክር ቤቱ መረጃ የመጀመርያው ጆርናል የዳንሽ ኢንተርናሽናል የልማት ኤጀንሲ (DANIDA) በተባለ ተቋም የገንዘብ ድጋፍ የታተመ ነው፡፡

በ1952 ዓ.ም. ተጀምሮ በ1959 ዓ.ም. የተቋረጠው ጆርናል፣ ኅትመቱን እስካቋረጠበት ጊዜ ድረስ 16 ዕትሞች አውጥቷል፡፡ ይህ ጆርናል በወቅቱ የአገሪቱን ዋና ዋና ኢኮኖሚ ጉዳዮች የሚዳሰሱ ጥናታዊ ጽሑፎች ይቀርቡበት ነበር ተብሏል፡፡ መንግሥት የዕርዳታ ወይም የትብብር ስምምነቶች ሲፈርም እነዚህ መረጃዎች በጆርናሉ ይታተሙበት እንደነበር ተገልጿል፡፡ የተለያዩ አገሮች የኢኮኖሚ እንቅስቃሴዎችና የዓለም የገበያ ዋጋዎችን የሚያሳዩ መረጃዎችን ያካትት ነበር ተብሏል፡፡

ቀድሞ ሲታተም የነበረው ጆርናል የተቋረጠበት ምክንያት አይታወቅም፡፡ አሁን በአዲስ መልክ የተጀመረው ጆርናል ለተቋማት በነፃ የሚሠራጭ ሲሆን፣ ለሌሎች ግን በክፍያ እንደሚያሠራጭ ታውቋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች