Wednesday, February 28, 2024

ሁለቱን ዶክተሮች ያፋጠጠው የቦንጋ ምርጫ

- Advertisement -spot_img

በብዛት የተነበቡ

ሰኞ ሰኔ 8 ቀን 2007 ዓ.ም. ታሪካዊቷና በተፈጥሮ ቅርስ የታደለችው የካፋ ዞን ርዕሰ ከተማ በሆነችው የቦንጋ ከተማ፣ ምንም እንኳን ረፈድፈድ ብሎ ወደ ማለዳው ሦስት ሰዓት የተጠጋ ቢሆንም፣ ከተማዋን ከከበቧት በርካታ ጥቅጥቅ ደኖች የሚነሳው ጉም ገና ያልነጋ አስመስሎት ነበር፡፡

በዚህች ታሪካዊትና የቡና መገኛ እንደሆነች በሚታመንባት ከተማ የሚግተለተለውን ጉም ከቁብ ሳይቆጥሩ፣ በተለያዩ ተሽከርካሪዎች ላይ ተጭነውና የተለያዩ ዘፈኖችን እየዘፈኑ በርከት ያሉ የከተማዋ ነዋሪዎች ከአንድ ቀን በፊት በተካሄደው ምርጫ የሰሙትንና ያዩትን ውጤት ለማጣጣም ጎዳናዎችን ሞሏቸው፡፡

የቦንጋ ከተማ ነዋሪዎች ከምርጫ ቦርድ የተላለፈውን ‹‹የምርጫውን ውጤት እኔ ብቻ ነኝ ማሳወቅ ያለብኝ›› የሚለውን ትዕዛዝ የሚቀበሉ አይመስሉም፡፡ በየሠፈሩና በየመንደሩ የምርጫ ጣቢያዎች የተለጠፉ ውጤቶችን እየተመለከቱ፣ በተመለከቱት ውጤትም በደስታ እየቦረቁ ወደ አደባባይ ተመሙ፡፡ ምርጫ ቦርድ አጠቃላይ አገራዊ የምርጫ ውጤትን ይፋ የማደርገው ሰኔ 15 ቀን 2007 ዓ.ም. ነው ቢልም፣ የቦንጋና የአካባቢዋ ነዋሪዎች በየመንደሩ የተለጠፉ ውጤቶችን መሠረት አድርገው በፌሽታ ወደ አደባባይ ወጥተዋል፡፡ ሰኔ 15 ቀን በብሔራዊ ደረጃ ከሚነገረው ይልቅ በዓይናቸው ያዩትን አምነዋልና፡፡ የቦንጋ ከተማና በዙሪያዋ የሚገኙትን ነዋሪዎች በፌሽታ ወደ አደባባይ ያወጣቸው ደግሞ፣ ለሦስት ሳምንታት ያህል ተራዝሞ የነበረው የዘንድሮው አምስተኛው ዙር ጠቅላላ ምርጫ ያስገኘላቸው ውጤት ይመስላል፡፡

አምስተኛው ዙር ጠቅላላ ምርጫ በመላው አገሪቱ የተካሄደው ግንቦት 16 ቀን 2007 ዓ.ም. የነበረ ቢሆንም፣ በቦንጋ ግን ምርጫውን በሰከነ መንገድ ለማከናወን የሚያስችል ሁኔታ እስኪፈጠር ድረስ ምርጫ መራዘሙን የምርጫ ቦርድ አስታውቆ የነበረው፣ ጠቅላላ ምርጫው ሊካሄድ የቀናት ዕድሜ ሲቀሩት ነበር፡፡

በደቡብ ክልል ለካፋ ዞን በቦንጋ ጊምቦና ገዋታ ከተሞች ምርጫው ለሌላ ጊዜ እንዲተላለፍ በተወሰነው መሠረት፣ ምርጫው እሑድ ሰኔ 7 ቀን 2007 ዓ.ም. ተከናውኗል፡፡ ምርጫ ቦርድ ምርጫውን ለማካሄድ አመቺ ሁኔታ እስኪፈጠር ድረስ ምርጫውን በሌላ ጊዜ እንዲካሄድ ወስኛለሁ የሚል መግለጫ ከመስጠት ውጪ፣ ምርጫው በአመቺ ሁኔታ እንዳይካሄድ ያደረጉትን ምክንያቶች ከመጥቀስ ተቆጥቦ ነበር፡፡

ነገር ግን በወቅቱ ከሥፍራው ይወጡ በነበሩ መረጃዎች መሠረት በገዋታ ከተማ የሁለቱ ዕጩዎች ደጋፊዎች የምረጡኝ ቅስቀሳ ወደ ግጭት በማምራቱ የተነሳ፣ ምርጫው መራዘሙን በወቅቱ መዘገባችን የሚታወስ ነው፡፡

በእዚህ የምርጫ ክልል የሚወዳደሩት ሁለቱ ዕጩዎች ደግሞ ደኢሕዴን/ኢሕአዴግን የወከሉት ዶ/ር መብራቱ ገብረ ማርያምና በግል የሚወዳደሩት ዶ/ር አሸብር ወልደ ጊዮርጊስ ናቸው፡፡

ከምርጫው ዕለት አንድ ቀን ቀደም ብሎ በዋዜማው በከተማዋ የተለመደው የዕለት ተዕለት እንቅስቃሴ እየተከናወነ ነበር፡፡ የከተማዋ ነዋሪዎች ከሥፍራ ሥፍራ እየተንቀሳቀሱ ሥራቸውን እያከናወኑ ነበር፡፡ በዋዜማው ይህን ያህል የተለየ እንቅስቃሴ በሕዝቡ ውስጥ አልታየም፡፡ የየሥፍራው የምርጫ አስፈጻሚዎችም በማግሥቱ ለሚካሄደው ምርጫ የሚያስፈልጉ ተግባራትን ሲያከናውኑ ነበር፡፡ ከቀኑ አሥር ሰዓት ጀምሮ በሁሉም የምርጫ ጣቢያዎች ማለት በሚያስደፍር ሁኔታ ሥራዎች ተጠናቀው ነበር፡፡

አብዛኛዎቹ የምርጫ ጣቢያዎች ድንኳን የተጣለባቸው ሲሆን፣ ድንኳኖቹም ለሚስጥር ድምፅ መስጫ እንዲሁም አጠቃላይ ሒደትን ለማከናወን ጥቅም ላይ የዋሉ ናቸው፡፡ በምርጫ ዕለት ጠዋት ላይ ይዘንብ ለነበረው ዝናብ ለመጠለያነትም ሲያገለግሉ ነበር፡፡

ድንኳኖቹ መግቢያቸው ላይ የሰላም ምልክት የሆነው የዘንባባ ዝንጣፊ የተለጠፈባቸው ሲሆን፣ ዘንባባው ከበር ጌጥነት አልፎም በዝናብ ውኃ የጨቀየውን መሬት በመረብረብ ለመራጮች ምቹ እንዲሆን አድርጎ ነበር፡፡

በብሔራዊ ምርጫ ቦርድ በምርጫ አስተባባሪነት እንዲሠሩ የተመደቡት አቶ ደስታ ኃይለ ሚካኤል፣ ‹‹የምርጫው ጊዜ ከተላለፈ በኋላ ምርጫውን ተዓማኒ ለማድረግ እየሠራን ነው፤›› ብለዋል፡፡ ‹‹በአንዳንድ ወገኖች በኩል ይቀርቡ የነበሩ ቅሬታዎችን በአግባቡ ዴሞክራሲያዊ በሆነ መንገድ ለመፍታት ይቻል ዘንድ ምርጫው ተራዝሟል፤›› በማለትም የተራዘመበትን ምክንያት አስረድተዋል፡፡

ምርጫው በተሳካ ሁኔታ ለማስኬድ ይቻል ዘንድ ቦርዱ በአስተባባሪነት የሚሠሩ 98 የምርጫ አስተባባሪዎችን ከአዲስ አበባና ከኦሮሚያ ክልል የምርጫ አስፈጻሚዎች በማምጣት፣ በአካባቢው ካሉት የምርጫ አስፈጻሚዎች ጋር እየተባበሩና እያስተባበሩ በበላይነት እንዲሠሩ ማድረጉንም ጠቁመዋል፡፡ ምንም እንኳን በዕለቱ በሥፍራው በሚካሄደው ምርጫ ተሳታፊ የሆኑት ስድስት የፖለቲካ ፓርቲዎችና በግል የቀረቡት ዶ/ር አሸብር ወልደ ጊዮርጊስ የነበሩ ቢሆንም፣ የአብዛኛውን ቀልብ የሳበውና አትኩሮት የተቸረው ግን የሁለቱ ዶክተሮች ፍጥጫ ነበር፡፡

ሁለቱ ዶክተሮች ደግሞ በንብ የተመሰሉት ዶ/ር መብራቱ ገብረ ማርያምና በላም የተመሰሉት ዶ/ር አሸብር ወልደ ጊዮርጊስ ናቸው፡፡

ከሁለቱ ከፍተኛ ግምት ከተሰጣቸው ዕጩ ተወዳዳሪዎች በተጨማሪ ቅንጅትን የወከሉት አቶ ዓለሙ አድነው፣ መድረክን የወከሉት አቶ አባቢ ዘርጋ፣ መኢአድን የወከሉት አቶ አክሊሉ ዓለማየሁ፣ ኢራፓን የወከሉት አቶ ፍሬው አደቶና እንዲሁም ኢዴፓን የወከሉት መቶ አለቃ አድማሱ ገብረ ሥላሴ በምርጫው ለመፎካከር የተሠለፉ ተወዳዳሪዎች ነበሩ፡፡ ከእነዚህ ዕጩዎች በተጨማሪም የሰማያዊ ፓርቲን የወከሉት አቶ ክንፈ አባተ ራሳቸውን ከምርጫው ማግለላቸውን በማስታወቃቸው በምርጫው አልተሳተፉም፡፡

 በዚሁ ጉዳይ ላይ አስተያየታቸውን የሰጡት የሰማያዊ ፓርቲ ሕዝብ ግንኙነት ኃላፊ አቶ ዮናታን ተስፋዬ፣ ‹‹ዕጩ አባላችን በደረሰባቸው ከፍተኛ ወከባና ማስፈራሪያ የተነሳ ከምርጫው ራሳቸውን አግልለዋል፤›› በማለት ለሪፖርተር አስረድተዋል፡፡ ‹‹አባላችን በሕይወታቸው፣ በሥራቸውና በቤተሰባቸው ላይ ስለመጡባቸውና በደረሰባቸው ከፍተኛ ጫና ምክንያት ከምርጫው ራሳቸውን አግልለዋል፤›› በማለት አክለዋል፡፡

የምርጫው ዕለት

እሑድ ሰኔ 7 ቀን 2007 ሌሊት የምርጫ አስፈጻሚዎች በምርጫ ጣቢያዎች ተገኝተው፣ ምርጫውን ለማከናወን የሚያስችሉ ኮሮጆዎች ባዶ መሆናቸውን ማረጋገጥና ሌሎች ተያያዥ ሥራዎችን እያጠናቀቁ ነበር፡፡

ከንጋቱ 12፡10 ሰዓት አካባቢ የነበረውን ቀዝቃዛና ካፊያ የተቀላቀለበት አየር ተቋቁመው የሚጠባበቁ መራጮች በምርጫ ጣቢያ 02/ለ ሠልፋቸውን ይዘው ለመምረጥ ይጠባበቃሉ፡፡ በሰዓቱ 68 ወንዶችና 35 ሴት መራጮች ተሠልፈው ለመምረጥ እየተጠባበቁ ነበር፡፡

በደቡብ ክልል በካፋ ዞን ምርጫ ባልተካሄደባቸው ቦንጋ፣ ጊምቦ፣ ገዋታና ዴቻ ወረዳዎች 98 የምርጫ ጣቢያዎች የሚገኙ ሲሆን በቦንጋ ከተማ 12፣ በገዋታ ከተማ 44፣ በጊምቦ ከተማ ደግሞ 38፣ እንዲሁም በዴቻ ወረዳ አራት የምርጫ ጣቢያዎች ነበሩ፡፡

በዕለቱ ቦንጋ ከተማ የምርጫ ጣቢያ 02/ለ ድምፃቸውን የሰጡት የግል ዕጩ ተወዳዳሪው ዶ/ር አሸብር ወልደ ጊዮርጊስ፣ ‹‹የምርጫ ቅስቀሳው ጊዜ አጠር ያለ ነው፤›› በማለት በቅስቀሳው ወቅት ጊዜ ማጠሩን እንደ አንድ ችግር በመጥቀስ ለሪፖርተር አስተያየታቸውን ሰጥተዋል፡፡

‹‹በተለያዩ ችግሮች ምክንያት ያልተሟሉ ነገሮች በመኖራቸው ምርጫው ተራዝሟል፤›› በማለት ገልጸው፣ ‹‹አሁን ደግሞ በአንድ ሳምንት ጊዜ ውስጥ ሁሉንም ሥፍራዎች ለመሸፈን ተቸግረናል፡፡ በእርግጥ በመኪና ለማዳረስ ሞክረናል፡፡ ነገር ግን መንገዱ ዳር ያሉ ሥፍራዎችን ብቻ ነው መሸፈን የቻልነው፡፡ ውስጥ ድረስ ለመግባት ጊዜው አጠረን፤›› በማለት አጋጠሙ ያሉዋቸውን ችግሮች አስረድተዋል፡፡

‹‹የቻልነውን ያህል ለማዳረስ ሞክረናል፡፡ ነገር ግን የአቅም ውስንነት አለ፤›› በማለትም አክለዋል፡፡ በምርጫው ዕለት የገጠማቸው ችግር እንዳለ የተጠየቁት ዶ/ር አሸብር፣ ‹‹የሚደርሱ መረጃዎች አሉ፡፡ ነገር ግን አላጣራሁም፤›› በማለት ምላሽ ሰጥተዋል፡፡

በተመሳሳይ በምርጫው ደኢሕዴን/ኢሕአዴግን የወከሉት ዶ/ር መብራቱ ገብረ ማርያም ደግሞ፣ በጊምቦ ወረዳ ኡፋ አዶ ቀበሌ ዓለም ጎኖ የምርጫ ጣቢያ ድምፃቸውን ሰጥተዋል፡፡

ዶ/ር መብራቱ በበኩላቸው፣ ‹‹በአገሪቱ ከዚህ ቀደም በነበሩት ሥርዓቶች የነበረው የሥልጣን ሽግግርና የሥርዓት መቀያየር በሰው ደም ነበር፡፡ አሁን ግን በሕዝብ ምርጫ ሰላማዊ፣ ዴሞክራሲያዊ፣ ፍትሐዊና ነፃ በሆነ ሁኔታ እየተካሄደ ነው፡፡ ይህ ደግሞ አዲስ ታሪክ ነው፡፡ እስካሁን አራት ምርጫዎችን አካሂደናል፡፡ ይህ አምስተኛው ዙር ምርጫም የኢትዮጵያ ሕዝብ ያደገና የሠለጠነ መሆኑን ያሳየበት ነው፤›› በማለት ለሪፖርተር ገልጸዋል፡፡

ከዚህ በተጨማሪም በተለያዩ የምርጫ ጣቢያዎች ሪፖርተር ያገኛቸው የፖለቲካ ፓርቲ ተወካዮች የምርጫውን ሒደት እየታዘቡ ነበር፡፡ ሪፖርተር ተዘዋውሮ በተመለከታቸው የምርጫ ጣቢያዎች መመልከት እንደተቻለው ለውድድር ከቀረቡት ፓርቲዎች መካከል ታዛቢ ማቅረብ የቻሉት ግን ደኢሕዴን/ኢሕአዴግና መኢአድ ብቻ ነበሩ፡፡ በተጨማሪም በእነዚህ የምርጫ ጣቢያዎች የግል ዕጩ ተወዳዳሪው የዶ/ር አሸብር ወልደ ጊዮርጊስ ተወካዮች ሲታዘቡ ተስተውሏል፡፡

በምርጫው ማግሥት

ምርጫው ተጠናቆ ቆጠራ ከተካሄደ በኋላ ዘግይቶ እገሌ አሸነፈ የሚሉ ወሬዎች በቦንጋ ከተማ መናፈስ ጀምረው ነበር፡፡ በነገታው ረፋድ ላይ ግን በየቦታው የተለጠፈውን ውጤት ከመንደሩና ከየሠፈሩ የተመለከቱ መራጮች ባዩት ውጤት ምክንያት ለጭፈራ አደባባይ ወጥተው፣ የተለያዩ ዘፈኖችን በማዜም ፌሽታቸውን ሲገልጹ ታይተዋል፡፡

በዚህ የተነሳም ለደቂቃዎች በከተማዋ የነበሩ የተለመዱ እንቅስቃሴዎች ወደ ደስታና ጭፈራ ተቀይረው ነበር፡፡ ባጃጆች፣ አይሱዙዎችና የተለያዩ ተሽከርካሪዎች የክልሉንና የኢትዮጵያን ባንዲራ እያውለበለቡ ደስታቸውን ሲገልጹ ታይተዋል፡፡

ደኢሕዴን/ኢሕአዴግን ወክለው በሕዝቡ የአሸናፊነት ዜማ የተዜመላቸው ዶ/ር መብራቱ የፊዚክስ ምሩቅ ሲሆኑ፣ የመጀመርያና ሁለተኛ ዲግሪያቸውን ከአዲስ አበባ ዩኒቨርሲቲ አግኝተዋል፡፡ የሦስተኛ ወይም የዶክትሬት ዲግሪያቸውን ደግሞ ከኮሪያ የሳይንስና ቴክኖሎጂ አድቫንስድ ኢንስቲትዩት (KAIST) ወስደዋል፡፡

ዶ/ር መብራቱ ላለፉት አሥር ዓመታት ደግሞ ከምሥረታው ጀምሮ የሚዛን ቴፒ ዩኒቨርሲቲ ፕሬዚዳንት ሆነው በማገልገል ይገኛሉ፡፡ ባለፈው ምርጫ 2002 ለክልል ምክር ቤት ተወዳድረው ያሸነፉት ዶ/ር መብራቱ፣ ለሕዝብ ተወካዮች ምክር ቤት ሲወዳደሩ የመጀመሪያቸው ነው፡፡

ዶ/ር አሸብር ወልደ ጊዮርጊስ ደግሞ በ2002 ዓ.ም. ምርጫ ከቦንጋ አሸንፈው ብቸኛው የግል ተወዳዳሪ የፓርላማ አባል ነበሩ፡፡ በወቅቱ ቦንጋ ላይ ያሸነፉት በጠቅላይ ሚኒስትር ጽሕፈት ቤት የካቢኔ ጉዳዮች ሚኒስትር የነበሩትን አቶ ብርሃኑ አዴሎ ነው፡፡ በቅርቡ ኢትዮጵያን በመወከል የፓን አፍሪካ ፓርላማ ሁለተኛ ምክትል ፕሬዚዳንት በመሆን በድጋሚ መመረጣቸው ይታወሳል፡፡ ዶ/ር አሸብር እስከ ቅርብ ጊዜ ድረስ የፓን አፍሪካ ፓርላማ አራተኛ ምክትል ፕሬዚዳንት በመሆን ሲያለግሉ ነበር፡፡ የዘንድሮ ጠቅላላ ምርጫ ግን አልቀናቸውም፡፡

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -