Saturday, October 1, 2022
ሌሎች ዓምዶች
    - Advertisement -
    - Advertisement -
    ማኅበራዊበዓመት ከ20,000 በላይ ችግረኛ ተማሪዎች በምግብ እጦት ሳቢያ ትምህርታቸውን ያቋርጣሉ

    በዓመት ከ20,000 በላይ ችግረኛ ተማሪዎች በምግብ እጦት ሳቢያ ትምህርታቸውን ያቋርጣሉ

    ቀን:

    – ለ10,000 ችግረኛ ተማሪዎች ምሣ በነፃ ለማቅረብ ታቅዷል

    በአዲስ አበባ ከተማ በሚገኙ የመንግሥት ትምህርት ቤቶች ብቻ ወደ ግማሽ ሚሊዮን የሚጠጉ ተማሪዎች ሲኖሩ ከእነዚህ መካከል በዓመት ከ20,000 በላይ የሚሆኑት  በምግብ እጦት ሳቢያ ትምህርታቸውን እንደሚያቋርጡ አቶ ዴላሞ ኦሬሮ የአዲስ አበባ ከተማ አስተዳደር ትምህርት ቢሮ ኃላፊ ገለጹ፡፡  

    ችግሩን ለመቅረፍ ኅብረተሰቡ፣ መንግሥታዊ ያልሆኑ ግብረ ሰናይ ድርጅቶችና ሲቪክ ማኅበራት እጆቻቸውን እየዘረጉ ሲሆን፣ ቀዳማዊት እመቤት ሮማን ተስፋዬና አንዳንድ ግብረሰናይ ድርጅቶችም ለችግሩ መፍትሔ ለመሻት እየተንቀሳቀሱ ይገኛሉ፡፡ ከአቶ ዴላሞ ማብራሪያ ለመረዳት እንደተቻለው፣ በቀዳማዊት እመቤት ሮማን ተነሳሽነት ወደ 5,000 ለሚጠጉ ችግረኛ ተማሪዎች በየዕለቱ ምሣ በነፃ ማቅረብ ተጀምሯል፡፡

    ምሣ በነፃ የሚቀርብላቸውም በኮልፌና በአዲስ ከተማ ክፍላተ ከተሞች በሚገኙ 28 የመጀመርያ ደረጃ ትምህርት ቤቶች ውስጥ ለሚማሩ ችግረኛ ተማሪዎች ነው፡፡  አቅርቦቱንም በሚቀጥለው ዓመት በሌሎች የመጀመርያ ደረጃ ትምህርት ቤቶች  ለማስቀጠል ሥራውን የሚያስፈጽሙ ባለሙያዎች ተመድበዋል፣ መዋቅርም ተዘርግቷል፡፡

    ቪዥን ፎር ጄኔሬሽን የተባለው አገር በቀል ግብረ ሰናይ ድርጅትም፣ በአዲስ አበባ የመጀመርያ ደረጃ ትምህርት ቤቶች ውስጥ ለሚገኙና በኢኮኖሚያዊ ችግር ምክንያት ትምህርታቸውን ለሚያቋርጡ 10,000 ተማሪዎች የምግብ፣ የትምህርት መርጃ መሣሪያና የሥነ ልቦና ድጋፍ ለማድረግ አቅዶ ለመተግበር እንቅስቃሴ ጀምሯል፡፡

    የድርጅቱ መሥራችና የቦርድ ሰብሳቢው አቶ ያሬድ ግርማ እንዳሉት፣ እስካሁን በተካሄደው እንቅስቃሴ፣ የኢትዮጵያ አየር መንገድና መከላከያ ሚኒስቴር በተለያዩ ክፍለ ከተሞች ባሉ 20 የመጀመርያ ደረጃ ትምህርት ቤቶች ለሚገኙ 465 ችግረኛ ተማሪዎች የመሰናዶ ትምህርታቸውን እስከሚያጠናቅቁ ድረስ የምግብ፣ የትምህርት መርጃ መሣሪያና ሌሎችንም ድጋፍ ለማድረግ ተስማምተዋል፡፡

    በስምምነቱም መሠረት የኢትዮጵያ አየር መንገድ በቦሌ ክፍለ ከተማ በስድስት የመጀመርያ ደረጃ ትምህርት ቤቶች ለሚገኙ 150 ችግረኛ ተማሪዎች፤ ሚኒስቴሩ ደግሞ በቂርቆስና በአራዳ ክፍላተ ከተሞች በሚገኙ 14 የመጀመርያ ደረጃ ትምህርት ቤቶች ላሉ ችግረኛ ተማሪዎች ድጋፍ ማድረግ ጀምረዋል፡፡

    የኢትዮጵያ አየር መንገድ ድጋፍ መጀመሩን ሰኔ 6 ቀን 2007 ዓ.ም. በክበቡ ባካሄደው ሥነ ሥርዓት ላይ ይፋ አድርጓል፡፡ ሚኒስቴሩ ደግሞ ድጋፉን የጀመረው ከሦስት ወራት በፊት ነው፡፡ እንደ አቶ ያሬድ፣ ደርባ ሜድሮክ፣ ቴሌኮሙዩኒኬሽን፣ በአዲስ አበባ የሚገኙ 200 ባለኮከብ ሆቴሎች፣ አቶ ሳሙኤል ታፈሰ  የሰንሻይን ኮንስትራክሽን መሥራችና ዋና ሥራ አስኪያጅ፣ ሻለቃ ኃይሌ ገብረ ሥላሴ የየበኩላቸውን ድጋፍ ለማድረግ ቃል ገብተዋል፡፡

    ወ/ሮ አዚዛ አህመድ የኢትዮጵያ አየር መንገድ የሰው ኃይል አስተዳደር ምክትል ፕሬዚዳንት፣ አየር መንገዱ ለችግረኛ ተማሪዎች የሚያበረክተውን ድጋፍ ለማጠናከርና በአጠቃላይ ማኅበራዊ ኃላፊነቱን ለመወጣት እንዲያስችለው፣ የኢትዮጵያ አየር መንገድ ፋውንዴሽን የተባለ ግብረ ሰናይ ድርጅት ለማቋቋም የሚያስችል የቅድመ ዝግጅት ሥራ ማከናወኑን፣ በዚህም ለድርጅቱ ምሥረታ መነሻ የሆነውን ፕሮጀክት ፕሮፖዛል አዘጋጅቶ ለበጎ አድራጎትና ማኅበራት ማደራጃ ኤጀንሲ ማቅረቡንና የዕውቅና ውጤቱን በመጠባበቅ ላይ መሆኑን ገልጸዋል፡፡

     ‹‹ዕድሜው ለትምህርት የደረሰ ማንኛውም ሕፃን ትምህርት ቤት መግባት አለበት›› ይላል የአዲስ አበባ ትምህርት ቢሮ መርሕ፡፡ በመርሑ መሠረት ወላጆችና አሳጊዎቹም ልጆቻቸውን ወደ ትምህርት ቤት መላክ፣ ትምህርታቸውን መከታተልና መንከባከብ ግዴታቸው ነው፡፡ ሆኖም ልጆቻቸውን መመገብ ባልቻሉ ወላጆች ምክንያትና መንግሥትም ችግረኛ ተማሪዎችን መቀለብ ባለመቻሉ በመማር ዕድሜ ያሉ ተማሪዎች ከትምህርት ገበታ ተፈናቅለው ይታያሉ፡፡

    - Advertisement -

    ይመዝገቡ

    spot_img
    spot_img