Tuesday, January 31, 2023
- ማስታወቂያ -
- ማስታወቂያ -

በኢትዮጵያ ምርት ገበያ አንድ የአባልነት መቀመጫ በ1.9 ሚሊዮን ብር ተሸጠ

- ማስታወቂያ -

ተዛማጅ ፅሁፎች

የኢትዮጵያ ምርት ገበያ ከቀናት በፊት ባወጣው አንድ የአባልነት ወንበር ጨረታ፣ ቀርጫንሺ ትሬዲንግ ኃላፊነቱ የተወሰነ የግል ኩባንያ 1.9 ሚሊዮን ብር በማቅረብ የግብይት ወንበሩን መረከቡ ተገለጸ፡፡

ምርት ገበያው ለ17ኛ ጊዜ የአባልነት መቀመጫን ያስተላላፈው ተጫራቾችና ሕጋዊ ወኪሎቻቸው በተገኙበት ግልጽ ጨረታ ሲሆን፣ ከቀረቡት ሁለት ዕጩ ተወዳዳሪዎች ውስጥ ቀርጫንሺ ያሸነፈበት የ1.9 ሚሊዮን ብር መቀመጫው በመጀመርያ ከተገዛበት ዋጋ በ38 እጥፍ ብልጫ እንዳለው ታውቋል፡፡

ምርት ገበያው ሥራውን በጀመረበት ወቅት አንድ የአባልነት መቀመጫን በ50,000 ብር ይሸጥ እንደነበርም መረጃዎች ያሳያሉ፡፡

ከዚህ ጨረታ ቀደም ብሎ የካቲት ወር ምርት ገበያው አቅርቦት በነበረው ጨረታ አርኪድ ቢዝነስ ኃላፊነቱ የተወሰነ የግል ኩባንያ ለአባልነት ወንበሩን በ1.6 ሚሊዮን ብር መግዛቱን መዘገባችን ይታወሳል፡፡

የምርት ገበያው ዋና ሥራ አስፈጻሚ አቶ ኤርምያስ እሸቱ እንዳሉት፣ “በቀጣዮቹ ዓመታት ተጨማሪ የግብርና ምርቶችን ወደ ግብይት መድረክ ስለምናስገባ፣ የኤሌክትሮኒክስ ግብይትና ሌሎች አዳዲስና ዘመናዊ አገልግሎቶችን በስፋት ስለምናከናውን የምርት ገበያው አባል መሆን ሰፊና ልዩ ጠቃሜታ ይኖረዋል፡፡”

የአባልነት መቀመጫ ማንኛውም ሕጋዊ ሰው ወይም ድርጅት በኢትዮጵያ ምርት ገበያ የመገበያየት መብት የሚሰጥ ሲሆን፣ ይህም የመገበያያ መቀመጫ ሁለት ዓይነት የአባልነት መደቦች አሉት፡፡ እነዚህም ተገበያይና አገናኝ አባል በመባል ይታወቃሉ፡፡ ተገበያይ አባል የሚገበያየው በራሱ ስም ብቻ ሲሆን አገናኝ አባል ደግሞ በራሱ ወይም በደንበኞች ስም መገበያየት የሚያስችል የአባልነት ዓይነት ነው፡፡ ደንበኛ ማለት ማንኛውም ሕጋዊ ሰው ወይም ድርጅት በአገናኝ አባላት በኩል በምርት ገበያው የሚነግድ ማለት ነው፡፡

የኢትዮጵያ ምርት ገበያ ከተመሠረተበት 2001 ዓ.ም. ጀምሮ ሻጮችንና ገዢዎችን በዘመናዊ የግብይት ዘዴ እንዲገበዩ ሲያደርግ ቆይቷል፡፡ ምርት ገበያው በ100 መሥራች አባላትና በ600 ደንበኞች ግብይት የጀመረ ሲሆን፣ በአሁኑ ወቅት 346 አባላትና ከ14,000 በላይ ደንበኞችን ማፍራት ችሏል፡፡ ከዚህም በተጨማሪ ሁለት ብቻ የነበሩትን መጋዘኖች ወደ 56 ሲያደርሳቸው የመቀበል አቅማቸውም ከ300,000 ቶን በላይ ይደርሳል፡፡ አንድ ብቻ የነበረው የምርት መቀበያ ማዕከል ወደ 19 ያደገ ሲሆን የሚያገበያያቸውም ምርቶች ብዛት ከአንድ ወደ ስድስት ደርሷል፡፡ ቡና፣ ሰሊጥ፣ ነጭ ቦለቄ፣ ማሾ፣ በቆሎና ስንዴ በአሁኑ ጊዜ በምርት ገበያው ግብይት የሚፈጸምባቸው ምርቶች ናቸው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች