Saturday, February 4, 2023
- ማስታወቂያ -
- ማስታወቂያ -

የሎስ አንጀለስ ንግድ ምክር ቤት ከአዲስ አበባ አቻው ጋር ስምምነት አደረገ

- ማስታወቂያ -

ተዛማጅ ፅሁፎች

የአዲስ አበባ ንግድና ማኅበራት ምክር ቤት ከአሜሪካ ሎስ አንጀለስ አቻው ጋር ሰኔ 6 ቀን 2007 ዓ.ም. በኢሊሌ ኢንተርናሽናል ሆቴል የመግባቢያ ሰነድ ተፈራረሙ፡፡ ሰነዱ የውጭ ቀጥታ ኢንቨስትመንት በመሳብ፣ ለአገር ውስጥ ምርቶች ገበያ በማፈላለግ የንግድ የኢንቨስትመንት ትብብር በመፍጠር ረገድ ከፍተኛ ሚና እንደሚጫወት ተገልጿል፡፡ በተጨማሪም ሁለቱ ምክር ቤቶች በንግድና በሌሎችም የንግድ ግንኙነቶች ላይ መረጃ እንዲለዋወጡ የሚያስችል የመግባቢያ ስምምነት ሲሆን፣ በሁለቱ አገሮች የሚገኙ የንግድ አባላትም እንደሚያስተዋውቅ ይጠበቃል፡፡

የመግባቢያ ሰነዱን ሲፈራረሙ በአፍሪካ የመጀመሪያቸው መሆኑን የሚናገሩት በሎስ አንጀለስ አካባቢ የንግድ ምክር ቤት ቻምበር ኦፍ ኮሜርስ ምክትል ፕሬዚዳንት ካርሎስ ቫልደርማ ናቸው፡፡ ምክትል ፕሬዚዳንቱ፣ ስምምነቱ በሚፈጥረው መልካም አጋጣሚ በሎስ አንጀለስ የሚገኙ ተቋማት ኢትዮጵያ ውስጥ በትምህርት፣ በቤቶች ልማት፣ በኃይልና በሌሎችም በአገሪቱ በተዘረጉ የኢንቨስትመንት መስኮች ተሳታፊ እንደሚሆኑ ጠቁመዋል፡፡

‹‹ሁሉም የንግድ ማኅበራት በመንግሥትና በግሉ ዘርፍ ለተሰማሩ ተቋማት እንደ አገናኝ ድልድይ ሆነው ያገለግላሉ፤›› ብለዋል፡፡ ያሉት የንግድ ማኅበራት  ምክር ቤቶች በአገር ውስጥ የሚገኙ የንግድ ተቋማት ብቻ ሳይሆን ዓለም አቀፍ ግብይቶችንም መወከል ይጠበቅባቸዋል በማለት የከተሞቹ የንገድ ትስስር ወሳኝ መሆኑን ገልጸዋል፡፡

‹‹በኢትዮጵያ ያለው የኢንቨስትመንት ዕድል አበረታች ነው፡፡ አገሪቱም በፈጣን ዕድገት ላይ ትገኛለች፡፡ ይህም በኢትዮጵያ ኢንቨስት ለሚያደርጉ የሎስ አንጀለስ የንግድ ተቋማት ምቹ አጋጣሚ ነው፤›› ብለዋል፡፡

ሁኔታዎች ሲመቻቹም ወደፊት የሁለቱን አገሮች የንግድ ማኅበረሰብ የሚረዳ ‹‹የቢዝነስ ካውንስል›› እንደሚቋቋም የተናገሩት አቶ ጌታቸው ረጋሳ፣ የአዲስ አበባ ንግድና የዘርፍ ማኅበራት ምክር ቤት ዋና ጸሐፊ ናቸው፡፡ እንደ እሳቸው ገለጻ የቢዝነስ ካውንስሉ የንግዱንና የኢንቨስትመንት ሥራውን ያሳልጣል፡፡ ወደፊትም በሁለቱ ከተሞች መካከል ያለውን የንግዱን ኅብረተሰብ ተጠቃሚነት የሚያረጋግጥ የአሠራር ሥርዓት ለመዘርጋት ያለመ ነው፡፡

አሜሪካኖች ስለ አፍሪካ የተዛባ አመለካከት አላቸው የሚሉት ወይዘሮ ንግሥት ለገሠ ከሎስ አንጀለስ ከተማ ከመጡ የንግድ ልዑኮች መካከል አንዱ ናቸው፡፡ እሳቸው እንደሚሉት፣ በአሜሪካኖች ዘንድ አፍሪካ በተለይም ኢትዮጵያ በረሃብ፣ በችግር፣ በበሽታ እንዲሁም በሌሎች አሉታዊ ጎኗ ትታወቃለች፡፡ ይህም አሜሪካውያን በአገር ውስጥ ከሌሎቹ አገሮች እኩል ኢንቨስት እንዳያደርጉ ማነቆ ሆኖ ይዟቸው ቆይቷል፡፡ ‹‹ኢንቨስት ለሚያደርጉት ሀብት ተመጣጣኝ ምላሽ ማግኘት እንደሚችሉ እርግጠኞች አይደሉም፡፡ የእኛ ዓላማ አገሪቱ ያለችበትን የኢኮኖሚ ግንባታና የንግድ አቅም ማሳየት ነው፤›› በማለት አጋጣሚው ስለ አገሪቱ ያላቸውን አሉታዊ ገጽታ የሚቀይሩበትና በንግድ የሚተሳሰሩበት እንደሚሆን ተናግረዋል፡፡

በአሜሪካና በኢትዮጵያ መካከል ያለው የንግደ ትስስር ለረዥም ዓመታት ቆይቷል፡፡ አሜሪካ ኢትዮጵያ ወደ ውጭ ከምትልካቸው ምርቶች አንዷ መዳረሻ ስትሆን፣ የውጭ ቀጥታ ኢንቨስትመንት ምንጭ መሆኗም ይነገራል፡፡ በሁለቱ አገሮች የተደረገው የመግባቢያ ሰነድ ፊርማም የቆየ ግንኙነታቸውን ይበልጥ እንደሚያጠናክረው ይጠበቃል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች