Sunday, February 5, 2023
- ማስታወቂያ -
- ማስታወቂያ -

ከአዲስ አበባ ካርቱም የየብስ ትራንስፖርት በነሐሴ ወር ሊጀመር ነው

- ማስታወቂያ -

ተዛማጅ ፅሁፎች

ከአዲስ አበባ የሱዳን ዋና ከተማ ካርቱም ድረስ የየብስ የሕዝብ ትራንስፖርት አገልገሎት በነሐሴ 2007 ዓ.ም. በይፋ እንደሚጀመር የኢትዮጵያ ትራንስፖርት ባለሥልጣን አስታወቀ፡፡ የባለሥልጣኑ ዋና ሥራ አስኪያጅ አቶ ካሳሁን ኃይለ ማርያም ለሪፖርተር እንደገለጹት፣ የትራንስፖርት አገልግሎቱን በይፋ ለማስጀመር የዝግጅት ሥራዎች ሙሉ ለሙሉ ተጠናቀዋል፡፡ የሁለቱ አገሮች ከፍተኛ የመንግሥት ባለሥልጣናት በሚገኙበት ሥነ ሥርዓት አገልግሎቱን በነሐሴ ወር ለማስጀመር መወሰኑን ተናግረዋል፡፡

የትራንስፖርት አገልገሎቱ ከሦስት ወራት ቀደም ብሎ ማስጀመር ይቻል እንደነበር ያስታወሱት አቶ ካሳሁን፣ በሚያዝያ ወር በሱዳን ፕሬዚዳንታዊ ምርጫ ይካሄድ የነበረ በመሆኑ ለመዘግየቱ ምክንያት መሆኑን ጠቁመዋል፡፡

በሱዳን መንግሥት በኩል የትራንስፖርት አገልገሎቱን ለማስጀመር ዝግጁ መሆናቸውን የሚገልጽ ደብዳቤ ለኢትዮጵያ የደረሰ ቢሆንም፣ በኢትዮጵያ በኩል የ2008 ዓ.ም. የበጀት ዝግጅትና ሁለተኛውን የዕድገትና ትራንስፎርሜሽን ዕቅድ ዝግጅት ላይ ኃላፊዎች ተጠምደው ስለነበር እንዲሸጋገር መደረጉን ገልጸዋል፡፡

የትራንስፖርት አገልግሎቱ ተግባራዊ መሆን ሲጀመር ከኢትዮጵያ በኩል አንድ፣ በሱዳን በኩል አንድ የሕዝብ ማመላለሻ አውቶብሶች በቀን እንደሚነሱ ጠቁመዋል፡፡

የገበያውን ሁኔታ በማየት የሕዝብ ማመላለሻ አውቶብሶች ቁጥር ሊጨምር እንደሚችልም ገልጸዋል፡፡

ሁለቱ አገሮች በተስማሙት መሠረት ከአዲስ አበባ ካርቱም ድረስ  የትራንስፖርት ዋጋ 90 ዶላር ሆኖ፣ የሁለቱም አገሮች መንገደኞች በአገራቸው የመገበያያ ገንዘብ እንደሚከፍሉ አስረድተዋል፡፡

አገልግሎቱ ሲጀምር ከአዲስ አበባ የሚነሳው ተሽከርካሪ ደብረ ማርቆስ ለተሳፋሪዎች የምሳ ዕረፍት እንደሚሰጥና አዳሩን ደግሞ ጐንደር እንደሚያደርግም ገልጸዋል፡፡ አጠቃላይ ጉዞውም አራት ቀናት እንደሚፈጅ ታውቋል፡፡

የሁለቱ አገሮች ድንበር በሆነው መተማ በሁለቱም በኩል ለሚጓዙ መንገደኞች የጉምሩክና የኢሚግሬሽን አገልግሎቶች እንደሚሰጡ የገለጹት አቶ ካሳሁን፣ ቅድሚያ ቪዛን በተመለከተ በኤምባሲዎቹ መጨረስ ይጠበቅባቸዋል ብለዋል፡፡

በሁለቱ አገሮች መካከል የተደረገው ስምምነት ኢትዮጵያን ለመጀመሪያ ጊዜ ከጐረቤት አገር ጋር በየብስ ትራንስፖርት የሚያገናኝ እንደሆነ ጠቁመዋል፡፡ ተመሳሳይ ስምምነት ከጂቡቲ ጋር መፈረሙን የገለጹት አቶ ካሳሁን፣ ከሱዳን ጋር እንደተደረገው ዝርዝር ሁኔታዎችን የያዘ ሰነድ ለጂቡቲ መንግሥት ተልኮ ምላሽ እየተጠበቀ መሆኑን አስረድተዋል፡፡    

  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች