Sunday, January 29, 2023
- Advertisement -
- Advertisement -
ዜናየፈረንሣይ ኩባንያ የታላቁ ህዳሴ ግድብ ዋና አጥኚ እንዲሆን ተወሰነ

የፈረንሣይ ኩባንያ የታላቁ ህዳሴ ግድብ ዋና አጥኚ እንዲሆን ተወሰነ

ቀን:

ኢትዮጵያ፣ ግብፅና ሱዳን በካርቱም ባደረጉት ጥልቅ ውይይት ቢአርኤል ኢንጂነርስ የተባለው የፈረንሣይ ኩባንያ በታላቁ የኢትዮጵያ ህዳሴ ግድብ ላይ የሚከናወኑትን ሁለት ጥናቶች በኃላፊነት እንዲያጠና ወሰኑ፡፡

በግብፅ በኩል የቀረበው የኔዘርላርንዱ ኩባንያ ዴልታ ሬዝ በቢአርኤል ኃላፊነት ሥር ሆኖ የጥናቱ ተባባሪ እንዲሆን፣ የሦስቱ አገሮች የውኃ ጉዳይ ሚኒስትሮች በመጨረሻ ሐምሌ 17 ቀን 2007 ዓ.ም. ተስማምተዋል፡፡

በታላቁ የኢትዮጵያ ህዳሴ ግድብ ላይ ቀደም ብለው ጥናት ያከናወኑ ገለልተኛ ዓለም አቀፍ ባለሙያዎች ፕሮጀክቱ በታችኛው ተፋሰስ አገሮች፣ ማለትም በግብፅና በሱዳን ላይ ጉልህ ጉዳት እንደማያደርስ በመግለጽ በሦስቱ አገሮች መተማመን ለመፍጠር፣ ሁለት ጥናቶች በጋራ እንዲከናወኑ ምክረ ሐሳብ መስጠታቸው ይታወሳል፡፡

እነዚህን ምክረ ሐሳቦች በጋራ ተግባራዊ ለማድረግ ሦስቱ አገሮች ተስማምተው ከመረጧቸው ሰባት ኩባንያዎች መካከል፣ የፈረንሣይ ቢአርኤልና የኔዘርላንዱ ዴልታ ሬዝ በሚያዝያ ወር 2007 ዓ.ም. አዲስ አበባ ላይ ተመርጠዋል፡፡

በዚህ የሚያዝያው ስምምነት ቢአርኤል ዋናው አጥኚ እንዲሆን ዴል ታሬዝ ደግሞ በተባባሪነት እንዲያጠና ቢወሰንም፣ የትኛው ኩባንያ የጥናቱን ምን ያህል ድርሻ ይወስዳልና ኃላፊነቱ እስከምን ድረስ ነው በሚሉት ነጥቦች ላይ መግባባት አልተቻለም ነበር፡፡

በኢትዮጵያና በሱዳን በኩል የፈረንሣዩ ኩባንያ የጥናቱን ኮንትራት በመውሰድ 70 በመቶ የሚሆነውን ሥራ ያከናውናል፣ ቀሪውን 30 በመቶ ከዴልታ ሬዝ ጋር በመተባበር ይሠራል የሚል ሐሳብ ቢያቀርቡም በግብፅ በኩል በቀረበ ተቃውሞ ስምምነት ላይ ሳይደረስ ቆይቷል፡፡

በግብፅ በኩል ይቀርብ ከነበረው ክርክር አንዱ የዴልታ ሬዝ ድርሻ ከፍ እንዲል የሚጠይቅ ነበር፡፡ ባለፈው ሳምንት ረቡዕ በሱዳን ዋና ከተማ ካርቱም የተገናኙት የሦስቱ አገሮች የቴክኒክ ኮሚቴና የውኃ ጉዳይ ሚኒስትሮች ሦስት ቀናት የፈጀ ውይይት ካደረጉ በኋላ መግባባት ላይ መደረሱን፣ የውኃ፣ መስኖና ኢነርጂ ሚኒስትሩ አቶ ዓለማየሁ ተገኑ ለሪፖርተር ገልጸዋል፡፡

ለሰባተኛ ጊዜ የተካሄደው የቴክኒክ ኮሚቴው ውይይት አለመግባባት የፈጠሩ ነጥቦችን በመፍታት በመግባባት መጠናቀቁን ሚኒስትሩ አስታውቀዋል፡፡

በስምምነቱ መሠረት የፈረንሣዩ ቢአርኤል ኩባንያ ሁለቱንም ጥናቶች ለማከናወን ኮንትራቱ እንዲሰጠው፣ ከኔዘርላንዱ ኩባንያ ዴልታ ሬዝ ጋር በመተባበር እንዲሠራና የዴልታ ሬዝ ተጠሪነት ለቢአርኤል እንዲሆን ተወስኗል፡፡

የፈረንሣዩ ኩባንያ ጥናቱን ለማካሄድ የሚያስችለውን የቴክኒክ ፕሮፖዛል እ.ኤ.አ. እስከ ኦገስት 12 ቀን 2015 ለሦስቱም አገሮች ብሔራዊ የቴክኒክ ቡድን እንዲያቀርብ ተስማምተዋል፡፡

ከነሐሴ 15 ቀን 2007 ዓ.ም. ጀምሮ ሦስቱ አገሮች በአዲስ አበባ በሚያደርጉት ውይይት ስምምነት ይፈረማል ተብሎ ይጠበቃል፡፡

የሚከናወኑት ሁለት ጥናቶች የህዳሴው ግድብ የውኃ አሞላል በተለያዩ የዝናብ ወቅቶች ምን መሆን እንዳለበት፣ እንዲሁም የግድቡ መገንባት በግብፅና በሱዳን ላይ የሚያደርሰው አካባቢያዊና ማኅበራዊ ተፅዕኖን መገምገም ናቸው፡፡   

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የገጠር መሬት ማሻሻያና የመሬት ባለቤትነት ጥያቄ በኢትዮጵያ

በኢትዮጵያ ከቅርብ ወራት ወዲህ መሬትን በተመለከተ ጠንከር ያሉ የለውጥ...

በፖለቲከኞች እጅ ያለው ቁልፍ

ኢትዮጵያ በተለይ ካለፉት አምስት ዓመታት ወዲህ ሰላሟ መረጋጋት አቅቶታል፡፡...

የኤክሳይስ ታክስ ረቂቅ አዋጅ ፓርላማው ያፀደቀውን አዋጅ የሚጥሱ ድንጋጌዎችን በማካተቱ እንዳይፀድቅ ተጠየቀ

ሰሞኑን ለሕዝብ ተወካዮች ምክር ቤት የቀረበው የኤክሳይስ ታክስ ማሻሻያ...

በፀጥታ ችግር ሳቢያ ከተለያዩ አካባቢዎች ተፈናቅለው አማራ ክልል የገቡ ዜጎች ቁጥር 800 ሺሕ መድረሱ ተነገረ

በቤኒሻንጉል ጉሙዝ ክልል 112 ሺሕ ተማሪዎች ከትምህርት ገበታ ውጪ...