Sunday, December 4, 2022
ሌሎች ዓምዶች
    - Advertisement -
    - Advertisement -
    ማኅበራዊ‹‹የሃያኛው ክፍለ ዘመን የኢትዮጵያ ታሪክ ከቀዳማዊ ኃይለ ሥላሴ ለይቶ መተረክ አይቻልም›› ...

    ‹‹የሃያኛው ክፍለ ዘመን የኢትዮጵያ ታሪክ ከቀዳማዊ ኃይለ ሥላሴ ለይቶ መተረክ አይቻልም›› አምባሳደር ዘውዴ ረታ

    ቀን:

    የዋቢ ሸበሌ ሆቴል የስብሰባ አዳራሽ ባለፈው ሰንበት (ሐምሌ 26 ቀን 2007 ዓ.ም.) ከቀትር በኋላ ለየት ያለ ዝግጅት አስተናግዷል፡፡ ዝግጅቱንም ለየት የሚያደርገው የመጨረሻውን የኢትዮጵያ ንጉሠ ነገሥት (1923-1967) ግርማዊ ቀዳማዊ አፄ ኃይለ ሥላሴን 123ኛ ዓመት የልደት በዓልን በድምቀት ማክበሩ ነበር፡፡ ሐምሌ 16 ቀን 1884 ዓ.ም. የተወለዱትን የንጉሠ ነገሥቱን ልዩ ልዩ እንቅስቃሴዎች የሚያሳዩና በመድረኩ ፊት ለፊት የተሰቀሉት ፎቶግራፎችም ለዝግጅቱ ድባብ ተጨማሪ ውበትን አትርፈዋል፡፡ በዚህ መልክ ከታዩት ፎቶግራፎች መካከል ንጉሠ ነገሥቱ ከጆን ኤፍ ኬኒዲና ባለቤታቸው፣ በሊግ ኦፍ ኔሽን ንግግር ሲያደርጉ፣ ከቤተሰቦቻቸው ጋር በነጭ የአገር ባህል ልብስ አሸብርቀውና በማይጨው ጦርነት የፀረ አውሮፕላን የቁም መትረየስ ሲተኩሱ የሚያሳዩት ፎቶግራፎችና ሌሎችም ተጠቃሾች ናቸው፡፡

    ከቤተሰቦቻቸው ጋር በተነሱት ፎቶግራፍ ሥር ‹‹አገርና ታሪክ አይሞትም፤ የታሪክንም ክብር የሚጠብቀው ትውልድ ነው››፣ እንዲሁም በሊግ ኦፍ ኔሽንስ ፎቶግራፍ ሥር ‹‹ለሕዝቡ ምን ምላሽ ልውሰድለት?›› የሚሉት ጥቅሶች ሰፍረዋል፡፡ በዚህ መልኩ በተዘጋጀው አዳራሽ ንጉሣውያን ቤተሰቦች፣ በሥርዓቱ ለአገራቸው በልዩ ልዩ መስኮች አገልግሎት ያበረከቱ አረጋውያን፣ የቀድሞው ፕሬዚዳንት ግርማ ወልደ ጊዮርጊስና ጥሪ የተደረገላቸው እንግዶች ታድመዋል፡፡

    ታዋቂው ድምፃዊ አቶ ዓለማየሁ ፈንታ በመሰንቆ መዲናና ዘለሰኛ በማሰማት የታዳሚውን ስሜትና ትዝታ ቀስቅሰዋል፡፡ ግርማዊ ቀዳማዊ አፄ ኃይለ ሥላሴ ከአልጋ ወራሽነታቸው ዘመን አንስቶ እስከ ነሐሴ 1967 ዓ.ም. ድረስ ለአገሪቱ ዕድገትና ለሕዝቡ ብልፅግና ያከናወኗቸው ተግባራት በድራማ፣ በዜማ፣ በግጥምና በመነባነብ ቀርቦ የታዳሚውን ቀልብ ስቧል፡፡ ከዚህም ሌላ የንጉሠ ነገሥቱን ሰብዕና በዓለምና በአገር አቀፍ ደረጃ የሚያንፀባርቁ ንግግሮችና ጥናታዊ ጽሑፎች ቀርበዋል፡፡

    ንግግር ካደረጉትም መካከል ታዋቂው ጋዜጠኛና የታሪክ ጸሐፊ አምባሳደር ዘውዴ ረታ ይገኙበታል፡፡ እንደ አምባሳደር ዘውዴ አነጋገር ከሆነ ከሩብ ምእት ዓመት በፊት በኢትዮጵያ ላይ የደረሰው እጅግ አስከፊ የሆነው የግፍ አስተዳደር ንጉሠ ነገሥቱንና ታሪካቸውን ከአገሪቱ ገጽ ላይ ለማጥፋት በከፈተው ዘመቻ የታሪክ ሰነዶች ተቃጥለዋል፤ መረጃዎችም ጠፍተዋል፡፡ ነገር ግን የግርማዊ ቀዳማዊ አፄ ኃይለ ሥላሴ ታሪክ እናወድማለን ብለው የተነሱት ክፉዎች ያቃጠሉትና ያጠፉት የኢትዮጵያን ታሪክ መሆኑን ሊታያቸው አልቻለም፡፡

    የደርግ ባለሥልጣኖች ማናቸውንም ጉዳይ ከማጥፋታቸው በፊት ጥቅምና ጉዳቱን ለይቶ ለመረዳት ጥቂት በጎ ፈቃድ ቢኖራቸው ኖሮ የአገሪቱ ታሪክ ከንጉሠ ነገሥቱ ታሪክ ለይቶ መተረክ እንደማይቻል ለመገንዘብ ይችሉ ነበር፡፡ ደግነቱ በግርማዊ ቀዳማዊ አፄ ኃይለ ሥላሴ የተገነባው የ20ኛው ክፍለ ዘመን የአገሪቱ የታሪክ ሰነዶች የሚገኙት በኢትዮጵያ ብቻ ሳይሆን በጥንታውያኖቹ አውሮፓ አገሮችና በአሜሪካ ከተሞች ነው፡፡ በእነዚህም ከተሞች እየተዘዋወሩ የታሪክ ሰነዶችን ለመጠቀም የሚያስችል ዕድል እንዳገኙ የተናገሩት አምባሳደር ዘውዴ፣ ‹‹የሃያኛው ክፍለ ዘመን የኢትዮጵያ ታሪክ ከቀዳማዊ ኃይለ ሥላሴ ለይቶ መተረክ አይቻልም፤›› በማለት አስረግጠው ተናግረዋል፡፡

    እንደ ደርግ ባለሥልጣኖች ምኞትና ፍላጎት ቢሆን ኖሮ የአፄ ኃይለ ሥላሴ ታሪክና ዝና ከኢትዮጵያ ብቻ ሳይሆን ከመላው ዓለም ገጽ በቀላሉ ለመፋቅ የሚቻል መስሏቸው ነበር፡፡ ለምሳሌ ያህል የዛሬ 52 ዓመት አዲስ አበባ ላይ የተመሠረተው የአፍሪካ አንድነት ድርጅት ታሪክ በሚጠቀስበት ጊዜ የንጉሠ ነገሥቱን ስም ለመሰረዝ ጥረትና ተንኮል ተደርጎ እንደነበር አይዘነጋም፡፡

    32 ነፃ የአፍሪካ መንግሥታት መሪዎች ሳይከፋፈሉ ለመጀመሪያ ጊዜ በአንድነት ለመሰብሰብ የቻሉት፣ ለመላው የአፍሪካ  ሕዝብ አንድ ቋሚ የሆነ ተስፋ መሠረት ሳይጥሉ መለያየት እንደሌለባቸው የተገነዘቡት፣ በመጨረሻም ሁሉም ተስማምተው የአንድነታቸውን ቻርተር ተፈራርመው ለመለያየት የበቁት በግርማዊ ቀዳማዊ አፄ ኃይለ ሥላሴ ጥረት፣ ምክርና ሐሳብ ነው፡፡

    በዚህ ዘመን ብዙውን ጊዜ እውነተኞች ታሪኮች በሰነድ እየተደገፉ በመቅረብ ፈንታ በአፍ ታሪክ ላይ እየተመሠረቱ የሚነዙት ጽሑፎች እየተስፋፉ በመሄድ ላይ ናቸው፡፡ የዚህ ዓይነቱ አዝማሚያ ተከታዩ ትውልድ እንዳይዛመት መፍትሔ ሊበጅለት እንደሚገባ እንዳመለከቱት አምባሳደር ዘውዴ አገላለጽ፣ በፈጠራ ታሪክ ላይ ተመሥርቶ የሚጽፍ ደራሲ አንድ ቀን እውነቱ ሲገለጽ ማፈሩና መዋረዱ ባይቀርም፣ እስከዛው ድረስ ግን ልጆቻችንን የሚያሳስትና የሚያወናብድ መሆኑን መዘንጋት የለብንም፡፡ አለመጠን የገሰገሰው የፕሮፓጋንዳ ጥበብ ከሁሉ ይበልጥ እጅግ አስቸጋሪ የሆነበት በሐሰት የተነዛውን ታሪክ ወደ እውነት ለመቀልበስ የሚያጋጥመው እንቅፋት ነው፡፡

    የአንድ አገር መሪ በዘመኑ ለአገሩ የፈጸማቸው በጎ ሥራዎች ሁሉ በአግባቡ ቢታወቁና ቢተገበሩ እንኳን የተፈጸሙት ስህተቶች ግን ሊደበቁ እንደማይገባ እምነታቸው መሆኑን የገለጹት፣ የቀዳማዊ ኃይለ ሥላሴን ታሪክ ከአልጋ ወራሽነታቸው እስከ ንጉሠ ነገሥትነታቸው የሚያወሱ ሁለት መጻሕፍት ያዘጋጁት አምባሳደር ዘውዴ፣ በስማቸው የሚጠራው መታሰቢያ ድርጅት ሊያሠራ ያቀደው ቤተ መጻሕፍት ለመላው የአፍሪካ ሕዝቦች የመጻሕፍትና የልዩ ልዩ የታሪክ ሰነዶች መመራመሪያ እንዲሆን ጠቁመዋል፡፡ ይህ ቤተ መጻሕፍት ለዚህ ግብ የሚውል ከሆነ ከብዙ አገሮች በርካታ ዕርዳታዎችን ማግኘት እንደሚችል ነው አምባሳደር ዘውዴ የተናገሩት፡፡

    ሚስተር አምቡሮስ ኪንግ የኢትዮጵያ ወርልድ ፌዴሬሽን ተጠሪ ‹‹ግርማዊ ቀዳማዊ አፄ ኃይለ ሥላሴ የጥቁር ሕዝቦች ስጦታ›› በሚል ርእስ ባቀረቡት ጽሑፍ የኢትዮጵያ ወርልድ ፌዴሬሽን በዶክተር መላኩ በያን ኒው ዮርክ ውስጥ በ1929 ዓ.ም. እንደተመሠረተ ገልጸዋል፡፡ የድርጅቱ ልሳን የሆነውም የኢትዮጵያ ድምፅ ጋዜጣ ተቋቁሞ የፋሺስት ኢጣሊያን የግፍ ወረራ በማውገዝ የኢትዮጵያ ሕዝብ ለነጻነቱ የሚያደርገውን ትግልና በአጠቃላይ የጥቁር ሕዝቦች እንቅስቃሴን የሚያወሱ መረጃዎችን በማቅረብ ረገድ ከፍተኛ አስተዋጽኦ ማበርከቱን በንግግራቸው ላይ አመልክተዋል፡፡

    የቀድሞው ፕሬዚዳንት ግርማ ወልደ ጊዮርጊስ በአፍሪካ አዳራሽ ቅጥር ግቢ ለግርማዊ ቀዳማዊ አፄ ኃይለ ሥላሴ በስማቸው የመታሰቢያ ሐውልት ለማቆም የተቻላቸውን ጥረት እንደሚያደርጉም ቃል ገብተዋል፡፡   

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    ዳግም ነፍስ የዘራው የተማሪዎች ማርች ባንድ

    የሙያው ፍቅር ያደረባቸው ገና በልጅነታቸው ነው፡፡ በ1970ዎቹ መጀመርያ፣ ለቀለም...

    በስንደዶና ሰበዝ የተቃኘው ጥበብ

    በአንዋር አባቢ ተወልዳ ያደገችው መሀል አዲስ አበባ አራት ኪሎ ነው፡፡...

    አዲስ ጥረት የሚጠይቀው  ኤችአይቪ  ኤድስን  የመግታት  ንቅናቄ

    ‹‹ኤችአይቪ በመላው ዓለም  በሚሊዮን የሚቆጠሩ ሰዎችን የሚያጠቃ ዋነኛ የሕዝብ...

    የኅትመት ብርሃን ያየው ‹‹የቃቄ ወርድዎት›› ቴአትር

    ከአራት ዓመታት በፊት በኢትዮጵያ ብሔራዊ ቴአትር መድረክ ላይ ይታይ...