Monday, February 6, 2023
- Advertisement -
- Advertisement -
- Advertisement -

ፌርማታ ፅሁፎች

ጀግኖቻችንን ለማክበር ኮሪያውያን ውቅያኖስ አቋርጠው መምጣት አለባቸውን?

ትኩስ ፅሁፎች

‹‹ሀገሬ ኢትዮጵያ ሞኝ ነሽ ተላላ

የሞተልሽ ቀርቶ የገደለሽ በላ›› ያለው ሰው አንደበቱ ይባረክ። ይህቺ ሀገር የሞቱላትን ገድላ የገደሏትን አጠብድላ እዚህ ደርሳለች። ጀግኖቻችንን… ዛሬ አፋችንን ሞልተን ቅኝ አልተገዛንም ብለን በአደባባይ የምንፎክርበትን ታሪክ በደማቸው ያወረሱንን አጥር ጠባቂዎቻችንን እንደተነበበ መጽሐፍ ከድነን ረስተናቸዋል። ጀግና ማክበር አንችልበትም። ይህቺ ሀገር ዛሬ ለቆመችበት ክብር የበቃችው በእነዚህ አባቶቻችንና እናቶቻችን መሆኑን እያነበነብን የነርሱን ስም የምናነሳው በዓመት አንዴ ብቻ ነው። እነዚህ ጀግኖች ኢትዮጵያዊ ባይሆኑ ኖሮ ይቅር እነርሱ ዘር ማንዘራቸውም የሚከብርበት ሀገር ይኖራቸው ነበር።

በአንድ ወቅት የኮሪያ ጦርነት ላይ የተሳተፉ አርበኞችን ለማመስገን ከኮሪያ የመጡ የመንግሥት የሥራ ኃላፊዎች ለአባት አርበኞቹ ተንበርክከው ያቀረቡላቸውን ሰላምታና ምስጋና ስመለከት በራሳችን አፍሬ የምገባበት ነበር የጠፋኝ። እነዚህ ደሃ አርበኞች እንዴት እንደሚኖሩ፣ ሕይወት እንዴት እንደደቆሳቸው ፊታቸው ይናገራል። ለእነዚህ ለወሬ ነጋሪ ተርፈው የድል በዓል ሲመጣ ብቻ አደባባይ ለማድመቂያ ለሚወጡ ጀግና አባቶቻችን ነፃ ትራንስፖርት፣ ነፃ መኖሪያ ቤት፣ ነፃ ሕክምና ወዘተ ቢዘጋጅላቸው ያንሳቸዋል?……… ደም ለሰጠ ውሃ መጨለፍ እንደማለት ነው።

በእኚህ አርበኛ ትካዜ ውስጥ ምን ታያላችሁ? በእነዚህ የእርጅና መስመሮች መካከል ያለው ሕይወት የሚነግራችሁ ታሪክ የለም? በዚህ ጉስቁልና ውስጥ የምትታዘቡት ዕውነት ታጣላችሁ? እንደብርቅ ዕቃ በዓመት አንዴ አደባባይ ለማስጌጥ የሚወጡት ጀግኖቻችን ለዚህች ሀገር እንደዋሉት መጠን ብድራቸውን አግኝተዋል? …ጭራሽ!!!!

ብቻ ከጥቂት ዓመታት በኋላ ፎቶግራፋቸውን ሰቅለን ለምናያቸው ለነዚህ አርበኞች አንድ የምስጋና ቀን አዘጋጅተን እንደተከዙ እንዳያልፉ አለን ብንላቸው ኢትዮጵያ የገደላትን ቁንጣን የምታሲዝ ብቻ ሳትሆን የሞተላትንም የምታጎርስ ሀገር እንደሆነች አውቀው ፈገግ ይሉ ነበር። የኛን ጀግኖች ለማክበርና ለማመስገን ሁልጊዜ ኮሪያውያን ውቅያኖስ አቋርጠው መምጣት ያለባቸው አይመስለኝም።

  • መላኩ ብርሃኑ በገጹ እንደከተበው

**********

 አባ ይፍቱን!!

እንኳንስ ፅድቅና – ሀጢያት ወይ ኩነኔ
ለይቅል ነውና – በእርዎና ለኔ
አንደዜ ‹‹ሀገሩ›› – አባ አባ ካለዎ
እኔም እኖር ብዬ – ‹‹አባ›› ልበልዎ፤

አባ አባ እርስዎ…
በዚህ ጭጋግ ክረምት – ሰው በዝቶ ቤትዎ
ሳልፍ በጩልቅታ – ድንገት ባይልዎ
ምን ተዓምር ነው ብዬ – ሰው ጠየኩልዎ፤

‹‹አባ ለደመናው – ለጤዛው ለጎርፉ
ለአልፎ ሂያጁ ምቾት – ሰው እያጠመቁ – ሰው እያሳለፉ
መፍታት ጀምረዋል
ትናንት ጀምረው – ዛሬንም ደግመዋል››፤

አለኝና ተፈቺ – ‹‹በል አንተም ተፈታ››
ከአገር እኖር ብዬ – መጣሁ ወደርስዎ – በሉ ይፍቱኝ የኔታ፤

አወይ የኔ ነገር – ‹‹ይፍቱኝ›› ነው ያልኩዎ?
አፌን አምልጦኝ ነው
በሉ እንደጀመሩ – ‹‹ይፍቱን!›› እባክዎ!!!

  • በደመቀ ከበደ – (መሀል ሸገር)

****

ሞገደኛው ትርጉም

ማምሻውን ከአንዱ ወዳጄ እና ከሁለት ፈረንጅ የሥራ ባልደረቦቹ ጋር ነበርኩ፡፡ ፈረንጆቹ በኢትዮጵያ ውስጥ በሴቶችና ሕፃናት ላይ የሚደርሱ ጥቃቶችን በተመለከተ ጥናት ላይ ናቸው፡፡ የወዳጄ ዋነኛው ሥራ ‹‹ሴትና ሕፃናትን የሚያንቋሽሹ ምሳሌያዊ አነጋገሮችን እና አባባሎችን›› መዘርዘርና ወደ እንግሊዝኛ ተርጉሞ መስጠት ነው፡፡

‹‹እስካሁን ምን ምንን መዘገብክ?›› ብዬ ጠየቅኩት፡፡

ላፕቶፑን ከፈተና ከአርባ በላይ ምሳሌያዊ አነጋገሮችን ከነ ትርጉማቸው ያስቀመጠበትን ሰንጠረዥ አሳየኝ፡፡
‹‹ሴት በዛ ጎመን ጠነዛ››፣ ‹‹ሴት ወደ ማጀት ወንድ ወደ ችሎት››፣ ‹‹ልጅ ያቦካው ለእራት አይቀርብም››

ማንበቤን ስቀጥል፤ ‹‹ያሉት ከሚጠፋ የወለዱት ይጥፋ›› የሚል አገኘሁ፡፡ የእንግሊዝኛ ትርጉሙ ላይ እንዲህ ይላል፤ ‹‹Children Should be killed for keeping promise›› ክፉኛ ተደናግጬ ‹‹ይህ ምን ይሉት ትርጉም ነው?›› ብዬ ጠየቅኩት፡፡

‹‹ሐሳቡን ነው የተረጎምኩት- ቃል በቃል መተርጎም ይከብዳል ታውቂያለሽ›› አለኝ፡፡

‹‹ሐሳቡንስ መች ተረጎምከው!…ያሉት ከሚጠፋ የወለዱት ይጥፋ ልጆች ይገደሉ ማለት ነው እንዴ…?!››
ይሄን ጊዜ ሞቅ ያለ ውይይት በአማርኛ መጀመራችን ያሳሰባቸው የሚመስሉት ፈረንጆች ምን እንደምናወራ ጠየቁን፡፡

ነገርናቸው፡፡

‹‹ችግሩ ምንድነው?›› አለችኝ ሴቷ

‹‹ሲጀምር ትርጉሙ በአሰቃቂ ሁኔታ ተዛብቷል፡፡ ይሄ አባባል እንደ ጎጂ አባባል ታይቶ እዚህ መግባት የለበትም…ቃል በቃል…በትክክል ቢተረጎምም እንኳን መንፈሱ ጎጂ ስላልሆነ እዚህ መግባት የለበትም››

‹‹እንዴት?›› ሌላኛው ፈረንጅ ጠየቀኝ፤

‹‹‘ያሉት ከሚጠፋ የወለዱት ይጥፋ’› ማለት የኛ ሀገር ሰው ለቃሉ ያለውን ጥልቅ ታማኝነትና ክብር ሊገልፅበት የሚጠቀምበት አባባል እንጂ እዚህ እንደተፃፈው ልጆች ቃልኪዳን ለመጠበቅ ይገደላሉ ማለት አይደለም…በኔ አስተያየት እንደውም ለልጆቹ ያለውን ፍቅር ነው ሚያሳየው…እንደ መሐላ ነው…በምትወደው ነገር ካልማልክ ቃልህ ይታመናል አንተ?›› አልኩት::

‹‹የኔ አይታመንም›› አለች የመጀመሪያዋ
‹‹ሰው እንዲያምንሽ በምን ትምያለሸ?›› ጠየቅኩ፡፡
‹‹እኔ በውድ ጫማዎቼ ነው የምምለው ግን ነጥብሽን አግኝቼዋለሁ›› አለችኝ እየሳቀች፡፡

ነገሩ እጅግ ከንክኖኝ ፤ ይህችን አባባል ከዝርዝሩ ለማስወጣት ብዙ ተከራክሬ ከተለያየን በኋላ ከዓመታት በፊት በተደረገ ‹‹የድህነትና ደኅንነት ሁኔታ›› ጥናት ላይ በተመሳሳይ ሁኔታ ተፈጥሮ ስለነበር አስቂኝም አሳዛኝም ነገር አስቤ ሳቅኩ፡፡

በጥናቱ የተሳተፉ አንዲት የገጠር ሴት በአንድ ኢትዮጵያዊና ብዙ ፈረንጆች ታጅበው መልስ ይሰጣሉ፡፡

‹‹አግብተዋል?›› አለ ጠያቂው
‹‹ትዳር ነበረን አሁን ግን…ተፋተናል›› ሴቲቱ ስቅቅ ብለው መለሱ፡፡
‹‹ለምን ተፋታችሁ?››
ሴቲቱ ፈጠን ብለው ‹‹አሃ! እህል ውሃችን አለቃ!›› ብለው ሲመልሱ፣
ፈረንጆቹ ለምዝገባቸው የሴትየዋን የመጨረሻ መልስ ትርጉም ይጠይቃሉ፡፡ ኢትዮጵያዊው ጠያቂም ደቂቃ ሳይፈጅ፤ ”no food and water” ብሎ መለሰ አሉ፡፡

ይሄኔ ያኔ በተመዘገበች ይህች መልስ ‹‹በጥናት እንደተረጋገጠው አብዛኞቹ ኢትዮጵያውያን ባልና ሚስቶች የሚፋቱት በምግብና ውኃ እጥረት ምክንያት ነው›› ተብሎ ስንት ቦታ ተፅፎልናል!

ችግርና ችጋር ሳንሸጥ ዶላር መሰብሰብ የማንችል የሚመስለን ሞገደኛ ተርጓሚዎች ስንቱን የሚነካ ስንት መዘዝ አምጥተን ይሆን!?

  • ሕይወት እምሻው በፌስቡክ ገጽዋ እንደታዘበችው*********

 

የ‹‹ምፅዋት›› ሰለባዎች

 

ረጅም ርቀት የሚጓዙ የሕዝብ ማመላለሻ አውቶብሶች ደረጃ ወጥቶላቸው እንደየደረጃቸው አምባሻና ለስላሳ ለተሳፋሪ ማቅረብ ከጀመሩ ወዲህ ጉዳዩ ሳይበረታ እንዳልቀረ እገምታለሁ፡፡ ተራራማና በጫካ በተከበቡ ቦታዎችን ሲያቋርጡ ለዱር እንስሳት ዳቦና ጥራጥሬ ሌላም ታስቦም ለመዝናናት ‹‹ለምፅዋት›› አሊያም ቆሻሻ ለማስወገድ ሲባል በመጣሉ ምክንያት የዱር እንስሳቱ መመገብ በመልመዳቸው መንገድ ዳር ቁጭ ብለው መጠበቅ እና ተመፅዋች መሆን ለመዱ፡፡

እናም ይህ ሁኔታ ከቀደመው በላቀ ደረጃ ለእነዚህ እንስሳት በመኪና መገጨትና መሞት ምክንያት ሆኗል፡፡ አውቃችሁም ሳታውቁ ምግብ አሊያም ቆሻሻ በየመንገዱ የምታስወግዱ ተሳፋሪዎች ሌሎችም ተጓዦች ለእነዚህ እንስሳት ሞት ምክንያት መሆናችሁን እንደማታስቡት ቢታወቅም ሐቁ ግን መሆናችሁ ነው፡፡ ምግብና ምግብ ነክ ነገሮች ስንጥል የዱር እንስሳት በመኪና እንዲገጩና እንዲሞቱ አለያም ጉዳት እንዲደርስባቸውና ለተፈጥሯዊ አኗኗራቸው መዛባት ምክንያት እንሆናለን፡፡ ምፅዋቱንም እንተው!! ቆሻሻንም በከተሞች የቆሻሻ ማጠራቀሚያዎች እናስወግድ!!

- Advertisement -
- Advertisement -

ተጨማሪ ለማንበብ

በብዛት የተነበቡ ፅሁፎች