Tuesday, October 4, 2022
ሌሎች ዓምዶች
    - Advertisement -
    - Advertisement -

    ‹‹አሜሪካ ያለንን ኃይልና ጉልበት በአገራችን ብናስቀምጠው ብዙ ለውጥ ማምጣት እንችላለን››

    ወ/ሮ ቅድስት አሰፋ፣ የፒፕል ቱ ፒፕል ቦርድ አባል

    በናዝሬት ስኩል ተማሪ እያሉ ትምህርት በማይኖርበት ጊዜ የበጐ ፈቃድ ሥራን ይሠሩ ነበር፡፡ በበጐ ሥራው ለመሳተፍ በውጭ ድርጅት ይሠሩ የነበሩት አባታቸው አግዘዋቸዋል፡፡ በኢትዮጵያ በእናቶች ጤና ዘርፍ እገዛ ለማድረግ ወደ ኢትዮጵያ ለሚመጡ አሜሪካውያን በማስተርጐምና በማገዝ መሥራታቸውን ይናገራሉ፡፡ አሜሪካ ሄደው ለመማር የቻሉትም በበጐ ፈቃድ አገልግሎት ሲሰጧቸው የነበሩት አሜሪካውያን፣ አሜሪካ ሄደው እንዲማሩ ዕድሉን በማመቻቸታቸው ነው፡፡ ከናዝሬት ስኩል የሁለተኛ ደረጃ ትምህርታቸውን ጨርሰው ኮሜርስ በመማር ላይ እያሉ በአሜሪካ ለመማር ባገኙት ዕድል ምክንያት የኮሜርሱን ትምህርት አቋርጠው ወደ አሜሪካ አቀኑ፡፡ ወ/ሮ ቅድስት አሰፋ በአሁኑ ሰዓት በአሜሪካ ፔይስትሪ (ኬክ ቤት) ከፍተው በመሥራት ላይ የሚገኙ ሲሆን፣ በኢትዮጵያ በሕክምና፣ በሕክምና ትምህርት፣ በአቅም ግንባታና በልምድ ልውውጥ ዙሪያ እየሠራ የሚገኘውና በአሜሪካ ዋና መቀመጫውን ባደረገው ፒፕል ቱ ፒፕል ድርጅት የቦርድ አባል ናቸው፡፡ ወ/ሮ ቅድስት ድርጅቱ ከአጋሮቹ ጋር በመሆን ሐምሌ 10 እና 11 ቀን 2007 ዓ.ም. በአፍሪካ ኅብረት ባዘጋጀው የፓን አፍሪካ የከፍተኛ ትምህርት ተቋማት ጉባኤ ላይ ተሳትፈዋል፡፡ ምሕረት ሞገስ አነጋግራቸዋለች፡፡

    ሪፖርተር፡‑ አሜሪካ ሲሄዱ የነበረውን ሁኔታ እንዴት ያስታውሱታል?

    ወ/ሮ ቅድስት፡‑ ከቤተሰብ ሥር ወጥቶ አሜሪካ መሄድ ከባድ ነበር፡፡ መጀመሪያ ያቀናሁት በረዶ የሚበዛበትና ካናዳ ጠረፍ ወደምትገኘው ሞንታና ነበር፡፡ በወቅቱ በከተማዋ የሚኖረው ሰው ከ300 አይበልጥም፡፡ ሰው ለሰመር [በጋ] ብቻ ነበር ወደዛ የሚመጣው፡፡ በዊንተር [ክረምት] አካባቢው ላይ የሚኖረው ሰው ጥቂት ነበር፡፡ ቋንቋውን እንደነሱ አለመናገር፣ መኪና መንዳት አለመቻል፣ ቦታ አለማወቅ ከባድ ነበር፡፡ ለስድስት ወር ያህል ተፈትኛለሁ፣ ተቸግሬ ነበር፡፡

    ሪፖርተር፡‑ በምን ትምህርት ነው የሠለጠኑት?

    ወ/ሮ ቅድስት፡‑ በራድዮሎጂ ሳይንስ ወይም በጨረር ሕክምና ትምህርት ነበር የጀመርኩት፡፡ ትምህርቱን ሳልጨርሰው ወደ ዋሽንግተን ሄድኩ፡፡ ዋሽንግተን ስገባ የሐሳብ ለውጥ አድርጌ ‹‹ኩልነሪ ሳይንስ›› ማለትም የምግብ ዝግጅት ትምህርት ገባሁ፡፡ በአብዛኛው ወደ ጣፋጭ ምግቦች ዝግጅት ትምህርት እንዳዘነብል ያደረገኝ በወቅቱ የአሜሪካ ፕሬዚዳንት የነበሩት ጆርጅ ቡሽ ሼፍ የነበረ ፈረንሣያዊ ጋር በትርፍ ሰዓት ስሠራ ያደረብኝ ፍላጐት ነው፡፡ በፔይስትሪ ደረጃ ኮሌጅና ዩኒቨርሲቲ መግባት ስለሚቻል ትምህርቴን በኩልነሪ ሳይንስ ለመማር ቦልቲሞር ኢንተርናሽናል ኮሌጅ ገባሁ፡፡ ሁለት ዓመት በኮሌጁ ከተማርኩና በዲግሪ ከተመረቅኩ በኋላ አየርላንድ ሄጄ ለስድስት ወር ሠራሁ፡፡ አሜሪካ ተመልሼ በሪትዝ ካርቶልን ሆቴል ለአራት ዓመት ከሠራሁ በኋላ እ.ኤ.አ. በ2006 የራሴን ሥራ ጀመርኩ፡፡

    ሪፖርተር፡‑ በአሜሪካ የራስን ኢንቨስትመንት መጀመር እንዴት ነበር?

    ወ/ሮ ቅድስት፡‑ ብዙ ሰው የራሱን ሥራ ለመሥራት ይመኛል፡፡ ቀላልም ይመስላል፡፡ ሆኖም ብዙ ፈተናዎች አሉ፡፡ በተለይም ቤተሰብና ልጅ ላለው ይከብዳል፡፡ በአሜሪካ ሥራ ለመሥራት ብዙውን ሰዓት በሥራ ላይ ማሳለፍን ይጠይቃል፡፡ የሥራው ውጣ ውረድ ከውጭ ሆኖ እንደሚያዩት አይደለም፡፡ ኃላፊነት ይጠይቃል፡፡ መጀመሪያ ላይ ያለውን ፈተና ማሳለፍ ከተቻለና ፕሮግራም ከተደረገ መሥራት ይቻላል፡፡ ፈተናዎቹን አልፌ ውጤታማ መሆን ችያለሁ፡፡ ባለቤቴም ካጠገቤ ስላለ ፈተናዎቹን አልፈን ውጤታማ ሆነናል፡፡ ፍሌቨር ኬክ ኤንድ ፔስትሪ የተባለውን ድርጅት በአሌክሳንደሪያ ፎልስ ቸርች ቨርጂኒያ ውስጥ ከፍተን እየሠራን ነው፡፡ አካባቢው ብዙ ሐበሾች፣ የሐበሻ ሬስቶራንቶችና ሱቆች ያሉበት ነው፡፡ ከአዲስ አበባ ለዕረፍት የሚመጡ ሰዎችም በብዛት የሚገናኙበት ቦታ ነው፡፡ እኛም ከአሜሪካ ባህል ለየት ባለና ኢትዮጵያዊ በሚፈልገው መጠን (በአሜሪካ ምግቡም፣ ዕቃውም ሁሉም ነገር በጣም ትላልቅ ነው) ኬኩንም ቡናውንም አዘጋጅተን ስለምናቀርብ ተመራጭ ሆነናል፡፡ ቁጥር ሁለት ለመክፈትም አቅደናል፡፡ አንድ ኢትዮጵያዊና ዘጠኝ የውጭ ዜጐችም ተቀጥረው ይሠራሉ፡፡

    ሪፖርተር፡‑ በአሜሪካ ካልዎት ንግድ ባለፈ በኢትዮጵያ በጤናውና በጤናው ትምህርት ዘርፍ በሚሠራው ፒፕል ቱ ፒፕል ድርጅት ውስጥ የቦርድ አባል ነዎት፡፡ በዚህም በኢትዮጵያ በአፍሪካ ኅብረት በተካሄደው የፓን አፍሪካ የከፍተኛ ትምህርት ተቋማት የ2015 ጉባኤ ላይ ተሳታፊ ሆነዋል፡‑

    ወ/ሮ ቅድስት፡‑ አዎ፡፡ የመጣሁት እንደ ቦርድ አባልነቴ ፒፕል ቱ ፒፕልን ወክዬ ነው፡፡ የድርጅቱን ፕሮግራሞችም እደግፋለሁ፡፡ የአማኑኤል የአዳሪ ትምህርት ቤት (ጐጃም) ወላጅ ለሞቱባቸው ተማሪዎች ድርጅቱ የሚያደርገውን ድጋፍ አግዛለሁ፡፡ በዩኒቨርሲቲዎች ውስጥ ስፖንሰር ያደረግኋቸው ተማሪዎችም አሉ፡፡ የፓን አፍሪካ የከፍተኛ ትምህርት ተቋማት ጉባኤ በከፍተኛ ትምህርት ጥራት ላይ ትኩረት ሰጥቶ ነበር የመከረው፡፡ የትምህርት ጥራት ለአገር ዕድገት መሠረቱ ነው፡፡ ፒፕል ቱ ፒፕልም በዘርፉ በተለይ በሕክምና ትምህርት ዙሪያ የሚሠራው ጥራት ለአገሪቱ ዕድገትና ለሚሰጡ አገልግሎቶች መሠረት ስለሆነ ነው፡፡

    ሪፖርተር፡‑ በጉባኤው በከፍተኛ ትምህርት ተቋማት ትምህርት ጥራት ላይ ከመምህራን፣ ከመሠረተ ልማት፣ ከትምህርት ግብዓቶች ጋር ተያይዞ የተነሱ ችግሮች ነበሩ፡፡ ፒፕል ቱ ፒፕል ምን ሊረዳ ይችላል?

    ወ/ሮ ቅድስት፡‑ አንድ ሰው በጥራትና ዓለም በሚፈልገው ደረጃ ከተማረ ነው ጥሩ ቦታ ሊደርስና አገሩን ሊጠቅም የሚችለው፡፡ ከአገሬ ከወጣሁ በኋላ በኢትዮጵያ ብዙ አዳዲስ ዩኒቨርሲቲዎች ተከፍተዋል፡፡ ይህ ጥሩ ነው፡፡ ዩኒቨርሲቲዎች በቁጥር ሲበዙ ጥራቱን የጠበቀ ትምህርት መስጠትም ወሳኝ ነው፡፡ ለትምህርቱ ጥራት አስተማሪዎች ወሳኝ ናቸው፡፡ እነሱን የተለያየ ሥልጠናና ትምህርት መስጠት እንዲሁም ከጊዜው ጋር እንዲሄዱ ማድረግ ወሳኝ ነው፡፡ ለትምህርቱ ጥራት አስተማሪዎች ወሳኝ ናቸው፡፡ መምህራን በተለያየ ሥልጠናና ትምህርት ዕውቀታቸውን እንዲያዳብሩ ማድረግ ያስፈልጋል፡፡ የትምህርት ጥራት ዩኒቨርሲቲ ላይ ብቻ ተሠርቶ ማምጣትም አይቻልም፡፡ ከታች ጀምሮ መሠራት አለበት፡፡ ለመምህራን የደመወዝ ማሻሻያና ሥልጠና ወሳኞች ናቸው፡፡ የትምህርት ጥራት ለማምጣትና ጥራት ያለው ተማሪ ለማፍራት መምህራንን ማገዝ ያስፈልጋል፡፡ የትምህርት ዋና አንቀሳቃሽ የሆኑትን መምህራን መደገፍ አለብን፡፡

    ሪፖርተር፡­‑ ከኢንቨስትመንት አንፃር በኢትዮጵያ ያሰብሽው አለ?

    ወ/ሮ ቅድስት፡‑ እንደ ዳያስፖራ ለአገሬ መሥራት ስላለብኝ እያሰብኩ ነው፡፡ አሜሪካ ያለንን ኃይልና ጉልበት በአገራችን ብናስቀምጠው ብዙ ለውጥ ማምጣት እንችላለን፡፡ የውጪውን ዕውቀት ጨምሮ ወደ ኢትዮጵያ ልናመጣውና ከሕዝባችን ጋር አብረን ልንሠራ የምንችላቸው የምንሠራቸው ብዙ ሥራዎች አሉ፡፡ እኔም በተማርኩበት ትምህርት አገሬ ያሉትን መርዳት እፈልጋለሁ፡፡ ከሠራን ማደግና መለወጥ እንችላለን፡፡ አንድ ሥራ እንዳይሳካ የሚያደርገው ካልተሞከረ ብቻ ነው፡፡ ሴቶች እህቶቼ የሚያቅዱት ነገር ካለ ተስፋ ሳይቆርጡ መሥራት እንዳለባቸው መግለጽ እፈልጋለሁ፡፡ ከጣርን የፈለግንበት ደረጃ መድረስ እንችላለን፡፡ አሜሪካ ሆነንም ትልቅ ቦታ የምንደርሰው ለረጅም ሰዓት ሠርተን ያለንን አቅምና ጉልበት አሟጠን ነው፡፡ በአገር ውስጥ እዛ እንደምንሠራው ብንሠራ አገራችንንም ራሳችንንም እንጠቅማለን፡፡       

      

    ተዛማጅ ፅሁፎች

    - Advertisment -

    ትኩስ ፅሁፎች ለማግኘት

    በብዛት የተነበቡ ፅሁፎች