Tuesday, November 29, 2022
ሌሎች ዓምዶች
    - ማስታወቂያ -
    - ማስታወቂያ -

    በዳያስፖራ አባላት የተቋቋመው ቴራ ግሎባል የኤሌክትሪክ ኃይል ማመንጫ ፕሮጀክት ሊረከብ ነው

    - ማስታወቂያ -

    ተዛማጅ ፅሁፎች

    ነዋሪነታቸው በአሜሪካ ባደረጉ 15 ኢትዮጵያውያንና ትውልደ ኢትዮጵያውያን (ዳያስፖራዎች) ያቋቋሙት ቴራ ግሎባል ኢነርጂ ዴቨሎፕመት ኩባንያ፣ ከንፋስ የኤሌክትሪክ ኃይል ለማመንጨት ከኢትዮጵያ ኤሌክትሪክ ኃይል ጋር ሊፈራረም መሆኑ ተገለጸ፡፡

    ቴራ ግሎባል በአማራ ክልል ሰሜን ሸዋ ዞን፣ ደብረ ብርሃን አካባቢ ከንፋስ የኤሌክትሪክ ኃይል ለማመንጨት ከኢትዮጵያ ኤሌክትሪክ ኃይል ጋር ከሦስት ዓመት በፊት የመግባቢያ ሰነድ ተፈራርሞ ነበር፡፡ የመግባቢያ ሰነዱ ለቴራ ግሎባል ጥናትና ግንባታ የማካሄድ ሙሉ የባለቤትነት መብት ይሰጣል፡፡

    ቴራ ግሎባል ላለፉት 18 ወራት ዝርዝር ጥናት ሲያካሂድ መቆየቱን፣ ከቻይና ንግድ ባንኮች ብድር ማግኘቱንና ግንባታውንም በጋራ ለማካሄድ ኩባንያ መምረጡን አስታውቋል፡፡

    የቴራ ግሎባል ዋና ሥራ አስፈጻሚ አቶ ደረጃ አበበ ለሪፖርተር እንደገለጹት፣ ከኢትዮጵያ ኤሌክትሪክ ኃይል ጋር የሚያካሂዱት ድርድር በመገባደዱ በሚቀጥሉት ሦስት ወራት ግንባታ ማካሄድ የሚያስችል ስምምነት ይፈራረማሉ፡፡

    በደብረ ብርሃን የሚካሄደው የንፋስ ኃይል ማመንጫ ፕሮጀክት 100 ሜጋ ዋት የኤሌክትሪክ ኃይል ማመንጨት ያስችላል ተብሏል፡፡ ለፕሮጀክቱ 230 ሚሊዮን ዶላር የሚያስፈልግ ሲሆን፣ ይህንን ገንዘብ ሁለት የቻይና መንግሥት ንግድ ባንኮች ለማበደር ፈቃደኛ መሆናቸውን አቶ ደረጀ ተናግረዋል፡፡

    ከገንዘብና ኢኮኖሚ ልማት ሚኒስቴር ጋር በብድሩ ላይ ንግግር እየተካሄደ መሆኑን አቶ ደረጀ ገልጸው፣ የኃይል ማመንጫ ግንባታውን በሽርክና ለማካሄድ የቻይናው ግዙፍ ኩባንያ ጎልድ ዊንድን መምረጣቸውን አስታውቀዋል፡፡ አቶ ደረጀ እንደገለጹት፣ ቴራ ግሎባል ባወጣው ዓለም አቀፍ ጨረታ 13 ኩባንያዎች ተወዳድረዋል፡፡ ከእነዚህ ኩባንያዎች መካከል ጎልድ ዊንድ መመረጡንና ፕሮጀክቱን በጋራ ለማካሄድ ውል መገባቱን አቶ ደረጀ ጨምረው ተናግረዋል፡፡ ቴራ ግሎባል ባካሄደው ጥናት ደብረ ብርሃን አካባቢ 400 ሜጋ ዋት የኤሌክትሪክ ኃይል ከንፋስ ማመንጨት የሚያስችል አቅም አለ፡፡

    የኢትዮጵያ ኤሌክትሪክ ኃይል ባካሄደው ጥናት ኢትዮጵያ ከንፋስ ኃይል ብቻ 1.3 ሚሊዮን ሜጋ ዋት ኤሌክትሪክ የማመንጨት አቅም አላት፡፡ መንግሥት የኢነርጂ ምንጮችን በማብዛት ሊከሰት የሚችል ችግርን ከወዲሁ ለመቅረፍ፣ ለንፋስ ኃይል ትኩረት በማድረጉ በርካታ የንፋስ ማመንጫ ፕሮጀክቶች በመካሄድ ላይ ናቸው፡፡

    ቴራ ግሎባልን ያቋቋሙ 15 የዳያስፖራ አባላት በተለያዩ የኢነርጂ ቴክኖሎጂዎች የሠለጠኑ ባለሙያዎች መሆናቸውን አቶ ደረጀ ገልጸው፣ ዳያስፖራዎቹ ለዚህ ፕሮጀክት ከሙያ በተጨማሪም ገንዘባቸውንም ኢንቨስት በማድረግ አስተዋጽኦ እያበረከቱ ነው ብለዋል፡፡

    ይህ ፕሮጀክት የመጀመሪያ ክፍል ይሁን እንጂ በቀጣይነት ከደብረ ብርሃን አካባቢ ንፋስ ኃይል ክፍል ሁለትና ክፍል ሦስት ፕሮጀክቶችንም የማካሄድ ዕቅድ እንዳላቸው አቶ ደረጀ ተናግረዋል፡፡

    ከቴራ ግሎባል በተጨማሪም ከ100 በላይ የሚሆኑ የዳያስፖራ አባላት ኢትዮ አሜሪካ ዶክተርስ ግሩፕ የተሰኘ ኩባንያ በማቋቋም በኢትዮጵያ ግዙፍ ሆስፒታል ለመገንባት፣ እንዲሁም ጤና ላይ ያተኮረ ትምህርት የሚሰጥ ማዕከል ለማቋቋም እንቅስቃሴ መጀመራቸው ይታወቃል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች