Monday, May 20, 2024
- Advertisement -
- Advertisement -

ማኅበራዊየማይንቀሳቀስ ንብረት ኤጀንሲ የይዞታ ሰርቲፊኬት መስጠት ጀመረ

የማይንቀሳቀስ ንብረት ኤጀንሲ የይዞታ ሰርቲፊኬት መስጠት ጀመረ

ቀን:

–  ለቀበሌ ቤቶች ካርታ ሊሰጥ ነው

የአዲስ አበባ ከተማ የማይንቀሳቀስ ንብረት ምዝገባንና መረጃ ኤጀንሲ የይዞታ ባለቤትነት ማረጋገጫ ዋስትና ሰርተፊኬት መስጠት ጀመረ፡፡

ኤጀንሲው በተያዘው በጀት ዓመት በአሥሩም ክፍላተ ከተሞች በመምረጥ፣ 60,773 ይዞታዎችን ማካለሉ ተገልጿል፡፡

- Advertisement -

የኤጀንሲው ዋና ዳይሬክተር አቶ ግፋወሰን ዲሲሳ ለሪፖርተር እንደገለጹት፣ በጉለሌና በንፋስ ስልክ ላፍቶ ክፍላተ ከተሞች የይዞታ ባለቤትነት ማረጋገጫ ሰርተፊኬት መስጠት ተጀምሯል፡፡

በምዝገባው የባለቤትነት ሰርቲፊኬት ያገኙ ነዋሪዎች በይዞታቸው ላይ ሙሉ መብት ኖሮዋቸው ሰርተፊኬቱን በማስያዝ ከባንኮች ብድር ማግኘት ከመቻላቸውም በተጨማሪ፣ በንብረቱ ላይ ማንም ሦስተኛ ወገን ጥያቄ ማንሳት እንደማይችል ተገልጿል፡፡

በአዲስ አበባ ከተማ አስተዳደር ሕግ ቁጥር 22/2002 ዓ.ም. የተቋቋመው የአዲስ አበባ ከተማ የማይንቀሳቀስ ንብረት ምዝገባና መረጃ ኤጀንሲ፣ ማረጋገጫ ሰርተፊኬት በሰጠው ማንኛውም አካል  ላይ ለሚደርስ ጉዳት ኃላፊነት ወይም ዋስትና እንደሚወስድ ታውቋል፡፡

አቶ ግፋወሰን በ80 ቀጣናዎች ለሚገኙ 60,773 ባለይዞታዎች የወሰን ማካለል ሥራ መሠራቱን አረጋግጠው የቀበሌ ቤቶች፣ የመንግሥት ቤቶች ኤጀንሲ፣ ሰነድ አልባ ይዞታዎችና በሥነ ምግባርና በፀረ ሙስና ኮሚሽን የታገዱ ይዞታዎች የባለቤትነት ማረጋገጫ ሰርተፊኬት እንዳልተሰጣቸው አስረድተዋል፡፡

የዚህ ምክንያቱ ደግሞ በከተማው ውስጥ የሚገኙ 174 ሺሕ የቀበሌ ቤቶች ካርታ የሌላቸው መሆኑ ነው፡፡ በጉለሌ ክፍለ ከተማ የሚገኙ 263 ቤቶች በፀረ ሙስና ኮሚሽን በመታገዳቸው ለማስተናገድ አለመቻሉን አቶ ግፋወሰን ገልጸው፣ አስተዳደሩ ለእነዚህ ችግሮች እልባት እንዲሰጥ ኤጀንሲው ማመልከቱን አክለዋል፡፡

ኤጀንሲው አጠቃላይ ቆጠራ ቢያካሂድም ካርታ የሌላቸው በመሆኑ የዋስትና ሰርተፊኬት ሊሰጣቸው እንዳልቻለ አቶ ግፋወሰን ተናግረዋል፡፡ የቀበሌ ቤቶችን የሚያስተዳድረው የአዲስ አበባ ቤቶች አስተዳደር ኤጀንሲ የሚያስተዳድራቸው የቀበሌ ቤቶችን ካርታ ከተረከበ የባለቤትነት ማረጋገጫ ሰርተፊኬት እንደሚሰጥም አስረድተዋል፡፡ የአዲስ አበባ ቤቶች አስተዳደር ኤጀንሲ ምንጮች እንደገለጹት፣ በመልሶ ማልማት ክልል ውጪ ለሆኑ የቀበሌ ቤቶች በ2008 ዓ.ም. የይዞታ ማረጋገጫ እንዲሰጥ ተወስኗል፡፡  

በሥነ ምግባርና ፀረ ሙስና ኮሚሽን እግድ ላይ የሚገኙት የማኅበራት ቤቶች፣ የመጨረሻ ውሳኔ ተሰጥቷቸው ካርታ እንዲያገኙ ባለመደረጉ ሊስተናገዱ አለመቻላቸው ተገልጿል፡፡ በከተማው የተገነቡ መንገዶች ባለቤትም በውል አለመመዝገቡ በሥራ ሒደት የታየ ችግር መሆኑን አቶ ግፋወሰን ተናግረዋል፡፡

የሕዝብ ተወካዮች ምክር ቤት ጥር 8 ቀን 2006 ዓ.ም. የማይንቀሳቀስ ንብረት ዳግም ለመመዝገብና መረጃ ለመያዝ የሚፈቅድ አዋጅ አፅድቋል፡፡ በፌዴራል ደረጃ ይህንን አዋጅ የማስፈጸም ኃላፊነት ለከተማ ልማት፣ ቤቶችና ኮንስትራክሽን ሚኒስቴር ተሰጥቷል፡፡ የአዲስ አበባ ከተማ አስተዳደር ከመሬት ጋር የተያያዙ ችግሮችን በዘላቂነት ለመፍታት በኤጀንሲው ላይ ተስፋ የጣለ ሲሆን፣ ከፍተኛ በጀት በመመደብ ኤጀንሲው በቴክኖሎጂ ውጤቶች እንዲደራጅ አድርጓል፡፡   

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

በሥጋ ላይ አላግባብ እየተጨመረ ያለውን ዋጋ መንግሥት ሊቆጣጠረው ይገባል

በአገራችን የግብይት ሥርዓት ውስጥ ኢኮኖሚያዊ ያልሆኑ ወይም ያልተገቡ የዋጋ...

ኢትዮጵያን የተባበረ ክንድ እንጂ የተናጠል ጥረት አይታደጋትም!

ኢትዮጵያ በአሁኑ ጊዜ ከምትገኝበት ውጥንቅጥ ውስጥ የምትወጣበት ዕድል ማግኘት...

የፖለቲካ ቅኝቱ የሕዝባችንን ታሪካዊ ትስስር ለምን አያከብርም?

በንጉሥ ወዳጅነው የዓብይ አህመድ (ዶ/ር) መራሹ የ2010 ዓ.ም. የለውጥ መንግሥት...

ዛሬም ኧረ በሕግ!

በገነት ዓለሙ በዚህ በያዝነው ሚያዝያ/ግንቦት ወይም ሜይ ወር ውስጥ የተከበረው፣...