Sunday, February 5, 2023
- ማስታወቂያ -
- ማስታወቂያ -

የአዲስ አበባ ቀላል ባቡር በመስከረም ወር ሥራ ሊጀምር ነው

- ማስታወቂያ -

ተዛማጅ ፅሁፎች

የአዲስ አበባ ቀላል ባቡር ፕሮጀክት ከረዥም ወራት መጓተት በኋላ የትራንስፖርት አገልግሎት በመስከረም ወር 2008 ዓ.ም. አገልግሎት መስጠት ሊጀምር ነው፡፡

የኢትዮጵያ ምድር ባቡር ኮርፖሬሽን ምንጮች ለሪፖርተር እንደገለጹት፣ የትራንስፖርት አገልግሎቱ ከመጀመሩ በፊት የኮርፖሬሽኑ የሥራ ኃላፊዎችና ሌሎች ከፍተኛ የመንግሥት ባለሥልጣኖች ከአዲስ አበባ ነዋሪዎች ጋር ይወያያሉ፡፡

ውይይቱ በመጀመርያ ይካሄዳል ተብሎ ፕርግራም የተያዘው ነሐሴ 25 ቀን 2007 ዓ.ም. ቢሆንም ከኢሕአዴግ ጠቅላላ ጉባዔ ጋር በመገጣጠሙ ላልተወሰነ ጊዜ እንዲራዘም መደረጉን ለማወቅ ተችሏል፡፡

ኃላፊዎቹ የአዲስ አበባ ነዋሪዎችን የሚያወያዩት የባቡር ፕሮጀክቱ ተጀምሮ እስኪጠናቀቅ ድረስ ያለፈበትን ችግርና የደረሰበትን ውጤት ለኅብረተሰቡ በማስረዳት የትራንስፖርት አገልግሎቱ በሚጀመርበት ወቅት ደግሞ ከኅብረተሰቡ ስለሚጠበቅ ትብብር ግንዛቤ ለመፍጠር እንደሆነም ምንጮቹ ገልጸዋል፡፡

የባቡር ፕሮጀክቱ ዋነኛ መሠረተ ልማቶች ተገንብተው የተጠናቀቁት በጥር ወር 2007 ዓ.ም. መሆኑ ይታወሳል፡፡ በወቅቱ የባቡሩን የሙከራ እንቅስቃሴ ያስጀመሩት ጠቅላይ ሚኒስትር ኃይለ ማርያም ደሣለኝ የሙከራ ጊዜው ሦስት ወር እንደሚፈጅ ቢገልጹም ትራንስፖርቱ ግን እስካሁን አልተጀመረም፡፡

ትራንስፖርቱ ከዘገየባቸው ምክንያቶች አንዱ ለባቡሩ የኤሌክትራክ ኃይል የሚያቀርቡ ኬብሎችን ለማቅረብ ኮንትራት የተሰጠው አካል በፍጥነት አለማቅረቡ ነው፡፡ ሌላኛው ደግሞ የኢትዮጵያ ኤሌክትሪክ ኃይል ከብሔራዊ የኃይል መስመር ውጪ የሆነ የኤሌክትሪክ ኃይል ለባቡር ፕሮጀክቱ ባለማቅረቡ መሆኑን ምንጮቹ ይገልጻሉ፡፡

ይህ የኤሌክትሪክ ኃይል አቅርቦት ችግር አሁንም ሙሉ በሙሉ አለመፈታቱን የተናገሩት ምንጮቻችን ባቡሩ በመስከረም ወር ውስጥ ሥራ የሚጀምረውም የኃይል አቅርቦቱ በደረሰባቸው አካባቢዎች ብቻ መሆኑን አስረድተዋል፡፡

በአሁኑ ወቅት የትራንስፖርት አገልግሎቱን ለማስጀመር ትኬት መታተሙንም ጨምረው ገልጸዋል፡፡ የባቡር ትራንስፖርት አገልግሎቱ ሥራ ሲጀምር የክፍያ ሥርዓቱ ኤሌክትሮኒክ የማድረግ ኃላፊነት የኦፕሬሽን ኃላፊነቱን በወሰደው ሸንዞን ሜትሮ ግሩፕ ላይ  ተጥሏል፡፡

የትራንስፖርት አገልግሎቱ ለኅብረተሰቡ የሚቀርበው እጅግ ተመጣጣኝ በሆነ ዋጋ መሆኑን የተናገሩት ምንጮቻችን ከአዲስ አበባ አውቶብስ የትራንስፖርት ታሪፍ ትንሽ ከፍ እንደሚል ከታክሲ የትራንስፖርት ታሪፍ ደግሞ ዝቅ እንደሚል ገልጸዋል፡፡ በመሆኑም የትራንስፖርት ዋጋው ከሁለት ብር እስከ አሥር ብር ብቻ ይሆናል ተብሎ እንደሚጠበቅ ለዚሁም መንግሥት ከፍተኛ ድጎማ የሚያደርግ መሆኑን ጠቁመዋል፡፡

አጠቃላይ የባቡር ፕሮጀክቱ 34 ኪሎ ሜትር የሚሸፍን ሲሆን፣ 474 ሚሊዮን ዶላር ለአጠቃላይ የመሠረተ ልማት ዝርጋታውና ለባቡሮቹ ግዥ መውጣቱን፣ ለአምስት ዓመት የኦፕሬሽንና የጥገና አገልግሎት ደግሞ 118 ሚሊዮን ዶላር ወጪ ለማድረግ ስምምነት መፈረሙን መዘገባችን ይታወሳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች